Kreston Georgia აგრძელებს საგადასახადო კანონმდებლობაში შესული ცვლილებებისა და სიახლეების მიმოხილვას. ამჯერად გთავაზობთ 2025 წლის დეკემბრის თვეში შესული საკანონმდებლო სიახლეების მიმოხილვას.

სარჩევი

1. ცვლილებები საქართველოს საგადასახადო კოდექსში

1.1. საგადასახადო საიდუმლოებასთან დაკავშირებული ცვლილებები

2. ცვლილებები საქართველოს ფინანსთა მინისტრის ბრძანებებში

2.1. ცვლილება აქციზის თანხის გაანგარიშებაში

2.2. ცვლილება არააქციზური საქონლის სავალდებულო მარკირებასთან და აქციზური მარკის ნომინალურ ღირებულებასთან დაკავშირებით

2.3. ცვლილება პიროტექნიკურ ნაწარმზე სასაქონლო ზედნადების გამოწერის წესში

2.4. ცვლილებები ინოვაციური საქმიანობის განმახორციელებელი სუბიექტების დეკლარაციებთან დაკავშირებით

3. ცვლილება მთავრობის დადგენილებებში

3.1.  „მაღალმთიან დასახლებაში მუდმივად მცხოვრები პირის სტატუსის მინიჭების, შეწყვეტის, შეჩერებისა და აღდგენის წესის დამტკიცების შესახებ“ ახალი დადგენილება.

1. ცვლილებები საქართველოს საგადასახადო კოდექსში

1.1. საგადასახადო საიდუმლოებასთან დაკავშირებული ცვლილებები

2025 წლის 18 დეკემბერს გამოქვეყნდა საქართველოს კანონი 1282-IVმს-XIმპ, ხოლო 2025 წლის 23 დეკემბერს გამოქვეყნდა საქართველოს კანონი 1296-IVმს-XIმპ. ორივე კანონის საფუძველზე ცვლილება შევიდა საქართველოს საგადასახადო კოდექსის (შემდგომში – სსკ) 39-ე მუხლის – „საგადასახადო საიდუმლოება“ მე-2 ნაწილში.

როგორც მოგეხსენებათ, სსკ-ის 39-ე მუხლის მე-2 ნაწილის მიხედვით, საგადასახადო ორგანო, მისი თანამშრომელი, მოწვეული სპეციალისტი ან/და ექსპერტი ვალდებულია დაიცვას გადასახადის გადამხდელის შესახებ ინფორმაციის საიდუმლოება, რომელიც მისთვის ცნობილი გახდა სამსახურებრივი მოვალეობის შესრულებისას. ამასთან, მას უფლება აქვს, ცალკეული გადასახადის გადამხდელის შესახებ იდენტიფიცირებული ინფორმაცია გადასცეს მხოლოდ ამავე მუხლით მკაცრად განსაზღვრულ პირებს. 

• პირველი ცვლილების მიხედვით, 39-ე მუხლის მე-2 ნაწილიდან ამოღებულ იქნა შემდეგი შინაარსის „რ“ ქვეპუნქტი: „საქართველოს ბიზნეს ომბუდსმენს/საქართველოს ბიზნეს ომბუდსმენის მოადგილეს საქართველოს კანონმდებლობით გათვალისწინებული უფლებამოსილების განხორციელებისას.“

მაშასადამე, ცვლილების საფუძველზე, სსკ-ის 39-ე მუხლის მე-2 ნაწილის მიხედვით განსაზღვრული პირების ჩამონათვალს გამოაკლდა ბიზნეს ომბუდსმენი და მისი მოადგილე, რაც იმას ნიშნავს, რომ საგადასახადო ორგანოს აღარ ექნება უფლება  საგადასახადო საიდუმლოების შემცველი ინფორმაცია გადასცეს აღნიშნულ პირებს. 

ცვლილება  ამოქმედდება 2026 წლის 1 იანვრიდან.

• მეორე ცვლილება კი გამომდინარეობს საკანონმდებლო ცვლილებების პაკეტით გათვალისწინებული, საჯარო სამართლის იურიდიული პირის − ანტიკორუფციული ბიუროს და პერსონალურ მონაცემთა დაცვის სამსახურის ლიკვიდაციისა და მათი ფუნქციებისა და უფლებამოსილებების სახელმწიფო აუდიტის სამსახურისთვის გადაცემის საკითხიდან.

აქედან გამომდინარე, 39-ე მუხლის მე-2 ნაწილიდან ამოღებულ იქნა შემდეგი შინაარსის „ბ1“ ქვეპუნქტი: „პერსონალურ მონაცემთა დაცვის სამსახურს − „პერსონალურ მონაცემთა დაცვის შესახებ“ საქართველოს კანონით გათვალისწინებული შემოწმების განხორციელებისას.“

ხოლო, „ზ“ და „ს“ ქვეპუნქტები ჩამოყალიბდა ახალი რედაქციით:

„ზ) სახელმწიფო აუდიტის სამსახურს – „პერსონალურ მონაცემთა დაცვის შესახებ“ საქართველოს კანონით გათვალისწინებული შემოწმების განხორციელებისას, აგრეთვე მოსამართლის ბრძანების საფუძველზე, „სახელმწიფო აუდიტის სამსახურის შესახებ“ საქართველოს ორგანული კანონით დადგენილი უფლებამოსილების განხორციელების მიზნით;“

„ს) საქართველოს იუსტიციის სამინისტროს მმართველობის სფეროში მოქმედ საჯარო სამართლის იურიდიულ პირს − ციფრული მმართველობის სააგენტოს − ამ სააგენტოს მიერ აღნიშნული ინფორმაციის სახელმწიფო აუდიტის სამსახურისთვის გადასაცემად, „კორუფციის წინააღმდეგ ბრძოლის შესახებ“ საქართველოს კანონითა და მის საფუძველზე გამოცემული კანონქვემდებარე ნორმატიული აქტებით გათვალისწინებული უფლებამოსილებების განხორციელების მიზნით, მონაცემების ელექტრონული მიმოცვლის სისტემის ფუნქციონირებისთვის.“

ცვლილება  ამოქმედდება 2026 წლის 2 მარტიდან.

ცვლილების შესახებ დეტალური ინფორმაცია იხილეთ ბმულზე:

https://matsne.gov.ge/ka/document/view/6699254?publication=0

https://matsne.gov.ge/ka/document/view/6698071?publication=0

2. ცვლილებები საქართველოს ფინანსთა მინისტრის ბრძანებებში

2.1. ცვლილება აქციზის თანხის გაანგარიშებაში

2025 წლის 12 და 29 დეკემბერს გამოქვეყნდა საქართველოს ფინანსთა მინისტრის ბრძანება N322 და N341, რის საფუძველზეც ცვლილება შევიდა „გადასახადების ადმინისტრირების შესახებ“ ფინანსთა მინისტრის N996 ბრძანებით დამტკიცებულ ინსტრუქციაში. ცვლილების შედეგად, ახალი რედაქციით ჩამოყალიბდა ინსტრუქციის 771-ე მუხლი, დანართი №IV-01-ის „განაყოფი III. აქციზის საერთო თანხის გაანგარიშება“, ხოლო 112-ე მუხლს დაემატა ახალი 78, 79 და 80 პუნქტები. აღსანიშნავია, რომ ცვლილება გამოწვეულია საგადასახადო კოდექსში 2025 წლის ნოემბრის (დეტალური ინფორმაციისთვის იხილეთ 2025 წლის ნოემბრის თვის სიახლეების მიმოხილვა https://kreston.ge/finansuri-media-blogi/) თვეში შესული ცვლილებით, რომელიც ეხება აქციზით დასაბეგრი განაკვეთების ცვლილებას.

ცვლილების მიხედვით, ინსტრუქციის 771-ე მუხლს „ა“ და „ბ“ ქვეპუნქტები ჩამოყალიბდა ახალი რედაქციით და ასევე დაემატა „ა1“ ქვეპუნქტი:

„ა) საგარეო-ეკონომიკური საქმიანობის ეროვნული სასაქონლო ნომენკლატურის 2402 20 კოდში მითითებული სიგარეტებისათვის, თამბაქოს შემცველობით, 20 ღერზე აქციზის განაკვეთი შეადგენს საქართველოს საგადასახადო კოდექსის 188-ე მუხლის პირველი ნაწილით განსაზღვრული აქციზის განაკვეთისა და ამ საქონლის საცალო სარეალიზაციო ფასის 20 პროცენტის ჯამს;

ბ) საგარეო-ეკონომიკური საქმიანობის ეროვნული სასაქონლო ნომენკლატურის 2404 11 000 00 კოდში მითითებული კაფსულებისა და მსგავსი სახის პროდუქტებისთვის (თამბაქოს შემცველობით) 20 ცალზე და წვის პროცესის გარეშე აეროზოლის მისაღებად გამოსაყენებელი ღერებისთვის 20 ღერზე აქციზის განაკვეთი შეადგენს საქართველოს საგადასახადო კოდექსის 188-ე მუხლის პირველი ნაწილით განსაზღვრული აქციზის განაკვეთისა და ამ საქონლის საცალო სარეალიზაციო ფასის 20 პროცენტის ჯამს.“

„ა​1) საგარეო-ეკონომიკური საქმიანობის ეროვნული სასაქონლო ნომენკლატურის 2402 20 კოდში მითითებული ყოველწლიურად 35 მილიონ კოლოფამდე/შეფუთვამდე ადგილობრივი წარმოების სიგარეტებისათვის, თამბაქოს შემცველობით, 20 ღერზე აქციზის განაკვეთი შეადგენს საქართველოს საგადასახადო კოდექსის 188-ე მუხლის პირველი ნაწილით განსაზღვრული აქციზის განაკვეთისა და ამ საქონლის საცალო სარეალიზაციო ფასის 15 პროცენტის ჯამს.“

ცვლილება  ამოქმედდება 2026 წლის 1 იანვრიდან.

რაც შეეხება 112 მუხლს, მოხდა შემდეგი შინაარსის ახალი პუნქტების დამატება:

„78. საგარეო-ეკონომიკური საქმიანობის ეროვნული სასაქონლო ნომენკლატურის 2402 20 კოდში მითითებული სიგარეტების მწარმოებელი/იმპორტიორი, მიუხედავად 2025 წლის 1 ოქტომბრამდე წარმოდგენილი სარეკომენდაციო საცალო სარეალიზაციო ფასისა, ვალდებულია, 2026 წლისათვის აქციზის თანხის გამოანგარიშების მიზნებისათვის, არაუგვიანეს 2025 წლის 29 დეკემბრისა შემოსავლების სამსახურს წარუდგინოს ინფორმაცია მის მიერ წარმოებული/იმპორტირებული საქონლის დასახელების/ქვედასახელების და თითოეული მათგანის სარეკომენდაციო საცალო სარეალიზაციო ფასის შესახებ.

79. შემოსავლების სამსახური ვალდებულია, 2026 წლის აქციზის თანხის გამოანგარიშების მიზნებისათვის, საქართველოს ფინანსთა მინისტრს არაუგვიანეს 2025 წლის 30 დეკემბრისა წარუდგინოს ინფორმაცია საგარეო-ეკონომიკური საქმიანობის ეროვნული სასაქონლო ნომენკლატურის 2402 20 კოდში მითითებული სიგარეტების, აგრეთვე  საგარეო-ეკონომიკური საქმიანობის ეროვნული სასაქონლო ნომენკლატურის 2404 11 000 00 და  2402 10 000 02 კოდებში მითითებული საქონლის დასახელებისა და მათი საცალო სარეალიზაციო ფასის შესახებ.

80. 2026 წლის აქციზის თანხის გამოანგარიშების მიზნისათვის საქონლის საცალო სარეალიზაციო ფასი საქართველოს ფინანსთა მინისტრის ბრძანებით დგინდება არაუგვიანეს 2025 წლის 31 დეკემბრისა და გამოიყენება ერთი წლის განმავლობაში.“

ცვლილება ამოქმედდა გამოქვეყნებისთანავე, ანუ 2025 წლის 12 დეკემბრიდან.

ცვლილების შესახებ დეტალური ინფორმაცია იხილეთ ბმულზე:

https://matsne.gov.ge/ka/document/view/6693750?publication=0

https://matsne.gov.ge/ka/document/view/6730740?publication=0

2.2. ცვლილება არააქციზური საქონლის სავალდებულო მარკირებასთან და აქციზური მარკის ნომინალურ ღირებულებასთან დაკავშირებით

2025 წლის 11 და 30 დეკემბერს გამოქვეყნდა საქართველოს ფინანსთა მინისტრის ბრძანება N320 და N345, რის საფუძველზეც ცვლილება შევიდა „გადასახადების ადმინისტრირების შესახებ“ ფინანსთა მინისტრის N996 ბრძანებით დამტკიცებულ ინსტრუქციაში. 

ცვლილების შედეგად, ახალი რედაქციით ჩამოყალიბდა ინსტრუქციის 112-ე მუხლის მე-13 პუნქტი და 2027 წლის 31 დეკემბრის ჩათვლით გაგრძელდა შემდეგი რეგულაცია, რომელიც ცვლილებამდე არსებული რედაქციით მოქმედებდა მხოლოდ 2025 წლის 31 დეკემბრის ჩათვლით:

„2027 წლის 31 დეკემბრის ჩათვლით შერჩეულ პირს არააქციზური საქონლის სავალდებულო მარკირების ნომინალური ღირებულება აუნაზღაურდება შემოსავლების სამსახურის მიერ, შერჩეულ პირთან გაფორმებული ხელშეკრულების საფუძველზე.“

ცვლილება ასევე შევიდა ინსტრუქციის 79-ე მუხლის მე-4 პუნქტში, რომელიც ადგენს თუ როგორ განისაზღვრება შერჩეული პირის მიერ მიწოდებული აქციზური მარკის ნომინალური ღირებულება. ცვლილების შედეგად იმპორტირებულ თამბაქოს ნაწარმზე და ადგილობრივი და იმპორტული ალკოჰოლიანი სასმელისთვის განკუთვნილ აქციზურ მარკაზე შემცირდა ნომინალური ღირებულება, კერძოდ:

• იმპორტული ფილტრიანი და უფილტრო (მათ შორის: სიგარა, სიგარილა) თამბაქოს ნაწარმისთვის განკუთვნილ 1 000 ცალ აქციზურ მარკაზე განისაზღვრა 18 დოლარის ეკვივალენტი ლარებში, ნაცვლად 19.5 დოლარის ეკვივალენტი ლარებისა, როგორც ეს ცვლილებამდე მოქმედი რედაქციით იყო განსაზღვრული;
• გ) ადგილობრივი და იმპორტული ალკოჰოლიანი სასმელისთვის განკუთვნილ 1 000 ცალ აქციზურ მარკაზე – 10 დოლარის ეკვივალენტი ლარებში, ნაცვლად 12 დოლარის ეკვივალენტი ლარებისა, როგორც ეს ცვლილებამდე მოქმედი რედაქციით იყო განსაზღვრული;
• ზ) იმპორტირებული საგარეო-ეკონომიკური საქმიანობის ეროვნული სასაქონლო ნომენკლატურის 2404 12 000 00 და 2404 19 900 00 კოდებში მითითებული საქონლისთვის განკუთვნილ 1 000 ცალ აქციზურ მარკაზე – 19.5 დოლარის ეკვივალენტი ლარებში, ნაცვლად 12 დოლარის ეკვივალენტი ლარებისა, როგორც ეს ცვლილებამდე მოქმედი რედაქციით იყო განსაზღვრული.

ცვლილება  ამოქმედდება 2026 წლის 1 იანვრიდან.

ცვლილების შესახებ დეტალური ინფორმაცია იხილეთ ბმულზე:

https://matsne.gov.ge/ka/document/view/6740426?publication=0

https://matsne.gov.ge/ka/document/view/6740426?publication=0

2.3. ცვლილება პიროტექნიკურ ნაწარმზე სასაქონლო ზედნადების გამოწერის წესში

2025 წლის 22 დეკემბერს გამოქვეყნდა საქართველოს ფინანსთა მინისტრის ბრძანება N328, რის საფუძველზეც ცვლილება შევიდა „გადასახადების ადმინისტრირების შესახებ“ ფინანსთა მინისტრის N996 ბრძანებით დამტკიცებულ ინსტრუქციაში. 

ცვლილება შეეხო ინსტრუქციის 251-ე მუხლს, რომელიც განსაზღვრავს სასაქონლო ზედნადების გამოწერის წესს. კერძოდ:

• სასაქონლო ზედნადების მე-4 და მე-5 სტრიქონებში, როგორც წესი, იწერება გამყიდველის/გამგზავნის და მყიდველის/მიმღების დასახელება ან სახელი და გვარი, საიდენტიფიკაციო/პირადი ნომერი. ცვლილების შედეგად კი დაზუსტდა, რომ პიროტექნიკური ნაწარმის შემთხვევაში (გარდა F1 ქვეკატეგორიის ზოგიერთი პიროტექნიკური ნაწარმისა, რომელიც არ არის ასაფეთქებელი სახის (მათ შორის, ბენგალური სანთელი, შუშხუნა და სხვა), ასევე,  P1 ქვეკატეგორიის ზოგიერთი პიროტექნიკური ნაწარმისა, რომელთა რეალიზაციაც დასაშვებია ლიცენზიის გარეშე), ამავე სტრიქონებში იწერება მხოლოდ შესაბამისი სერტიფიკატის ან/და რეალიზაციის ლიცენზიის მქონე პირის დასახელება და საიდენტიფიკაციო ნომერი;
• როგორც ვიცით, თუ საქართველოს ფინანსთა სამინისტროს ელექტრონული სერვისების ტექნიკური გაუმართაობის გამო ვერ ხერხდება სისტემასთან დაკავშირება და შეუძლებელია ზედნადების ელექტრონულად შევსება, პირს უფლება აქვს ისარგებლოს ზედნადების ქაღალდური ვერსიით გამოწერის შესაძლებლობით. ცვლილების შედეგად განისაზღვრა, რომ ამ პუნქტის მოქმედება არ ვრცელდება პიროტექნიკურ ნაწარმზე (გარდა F1 ქვეკატეგორიის ზოგიერთი პიროტექნიკური ნაწარმისა, რომელიც არ არის ასაფეთქებელი სახის (მათ შორის, ბენგალური სანთელი, შუშხუნა და სხვა), ასევე, P1 ქვეკატეგორიის ზოგიერთი პიროტექნიკური ნაწარმისა, რომელთა რეალიზაციაც დასაშვებია ლიცენზიის გარეშე) ზედნადების შევსების შემთხვევაზე. შესაბამისად, ზემოაღნიშნულ პიროტექნიკურ ნაწარმზე ქაღალდური ზედნადები არ გამოიწერება და ზედნადები ივსება მხოლოდ ელექტრონული ფორმით. ამასთან, სავალდებულოა ზედნადებში პროგრამულად მოინიშნოს ველი – „პიროტექნიკური ნაწარმი“.

ცვლილება  ამოქმედდება გამოქვეყნებიდან 30-ე დღეს, ანუ 2026 წლის 21 იანვრიდან.

ცვლილების შესახებ დეტალური ინფორმაცია იხილეთ ბმულზე:

https://matsne.gov.ge/ka/document/view/6703574?publication=0

2.4. ცვლილებები ინოვაციური საქმიანობის განმახორციელებელი სუბიექტების დეკლარაციებთან დაკავშირებით

2025 წლის 10 დეკემბერს გამოქვეყნდა საქართველოს ფინანსთა მინისტრის ბრძანება N317, რის საფუძველზეც ცვლილება შევიდა „გადასახადების ადმინისტრირების შესახებ“ ფინანსთა მინისტრის N996 ბრძანებით დამტკიცებულ ინსტრუქციაში. 

ცვლილება ითვალისწინებს „ინოვაციების შესახებ“ საქართველოს კანონით განსაზღვრული ინოვაციური საქმიანობის განმახორციელებელი სუბიექტების საქმიანობასთან დაკავშირებული ხელშემწყობი მექანიზმების ასახვას გადახდის წყაროსთან დაკავებული გადასახადისა და მოგების გადასახადის დეკლარაციებში. კერძოდ:

• ცვლილების შედეგად, ახალი რედაქციით ჩამოყალიბდა ინსტრუქციის 38-ე მუხლის მე-7 პუნქტის „ბ“ ქვეპუნქტი, რის საფუძველზეც გადახდის წყაროსთან დაკავებული გადასახადის დეკლარაციის მე-5 სვეტში, სადაც გადამხდელის მიერ მიეთითება შემოსავლების მიმღებ პირთა კატეგორია, არსებულ ჩამონათვალს დაემატა „ინოვაციების შესახებ“ საქართველოს კანონით გათვალისწინებულ ინოვაციური სტარტაპის სტატუსის მქონე სუბიექტში და კვლევისა და განვითარების მომსახურების გამწევი კომპანიის სტატუსის მქონე სუბიექტში დასაქმებული ფიზიკური პირები.
• ახალი რედაქციით ჩამოყალიბდა ინსტრუქციის მე-401 მუხლის მე-5 პუნქტის პრეამბულა, რის საფუძველზეც გარკვეული ცვლილებები შევიდა მოგების გადასახადის ყოველთვიური დეკლარაციის შევსების წესში. კერძოდ კი, ცვლილების შედეგად,  დეკლარაციის III ნაწილის მეორე სვეტში აისახება მოგების გადასახადით დაბეგვრის ობიექტი, რომელიც იბეგრება მოგების გადასახადის 15%-იანი განაკვეთით (მათ შორის, საერთაშორისო კომპანიის სტატუსის მქონე საწარმოს მიერ შესაბამისი სტატუსის მინიჭებამდე საანგარიშო პერიოდებში მიღებული წმინდა მოგებიდან დივიდენდის განაწილება), გარდა „ინოვაციების შესახებ“ საქართველოს კანონით გათვალისწინებული ინოვაციური სტარტაპის სტატუსის მქონე სუბიექტისა, შესაბამისი მოგების გადასახადით დასაბეგრი თანხა და მოგების გადასახადი, ხოლო მესამე სვეტში – მოგების გადასახადით დაბეგვრის ობიექტი, რომელიც იბეგრება მოგების გადასახადის 5%-იანი ან 10%-იანი განაკვეთით (მიუხედავად მოგების ფორმირების საანგარიშო პერიოდისა), შესაბამისი მოგების გადასახადით დასაბეგრი თანხა და მოგების გადასახადი. დეკლარაციის III ნაწილის მესამე სვეტში აისახება აგრეთვე „ინოვაციების შესახებ“ საქართველოს კანონით გათვალისწინებული ინოვაციური სტარტაპის და ინოვაციური მცირე და საშუალო კომპანიის სტატუსის მქონე სუბიექტის მოგების გადასახადით დაბეგვრის ობიექტი, რომელიც იბეგრება მოგების გადასახადის 15%-იანი განაკვეთით.

ასევე, ინსტრუქციის მე-401 მუხლს დაემატა ახალი 6​​9 პუნქტი, რის საფუძველზეც დეკლარაციის III ნაწილს დაემატა ახალი 1​7 დანართი, რომელიც წარმოადგენს ინოვაციური მცირე და საშუალო კომპანიის სტატუსის მქონე სუბიექტის მიერ წმინდა მოგებიდან დივიდენდის განაწილების შემთხვევაში მოგების გადასახადით დასაბეგრი თანხის კვლევისა და განვითარებისთვის გაწეული ხარჯების სამმაგი ოდენობით შესამცირებელი თანხის გათვალისწინებით, მოგების გადასახადით დასაბეგრი განაწილებული მოგების თანხის გაანგარიშების ფორმას და ივსება სვეტების დასახელების შესაბამისად. კერძოდ:

ა) პირველ სვეტში მიეთითება მიმდინარე საანგარიშო პერიოდში (თვეში) განაწილებული დივიდენდის ოდენობა, რომელიც ექვემდებარება მოგების გადასახადით დაბეგვრას;

ბ) მე-2 სვეტში მიეთითება მათ შორის, წინა ფინანსური წლის განმავლობაში მიღებული წმინდა მოგებიდან მიმდინარე საანგარიშო პერიოდში (თვეში) განაწილებული დივიდენდის ოდენობა, რომელიც ექვემდებარება მოგების გადასახადით დაბეგვრას;

გ) მე-3 სვეტში მიეთითება ინოვაციური მცირე და საშუალო კომპანიის სტატუსის მქონე სუბიექტის მიერ წინა ფინანსური წლის განმავლობაში კვლევისა და განვითარებისთვის გაწეული ხარჯების სამმაგი ოდენობა, რომლის გაწევის შემთხვევაშიც პირს უფლება აქვს შეამციროს მოგების გადასახადით დასაბეგრი განაწილებული მოგების თანხა;

დ) მე-4 სვეტში მიეთითება ინოვაციური მცირე და საშუალო კომპანიის სტატუსის მქონე სუბიექტის მიერ წინა ფინანსური წლის განმავლობაში კვლევისა და განვითარებისთვის გაწეული ხარჯების სამმაგი ოდენობიდან ხარჯების ის ოდენობა, რომლითაც  წინა საანგარიშო პერიოდებში შემცირდა მოგების გადასახადით დასაბეგრი განაწილებული მოგების თანხა;

ე) მე-5 სვეტში მიეთითება  ინოვაციური მცირე და საშუალო კომპანიის სტატუსის მქონე სუბიექტის მიერ წინა ფინანსური წლის განმავლობაში კვლევისა და განვითარებისთვის გაწეული ხარჯების სამმაგი ოდენობიდან ხარჯების ის ოდენობა, რომლითაც  მიმდინარე საანგარიშო პერიოდში მცირდება  მოგების გადასახადით დასაბეგრი განაწილებული მოგების თანხა (სვ.3-სვ.4);

ვ) მე-6 სვეტში მიეთითება მიმდინარე საანგარიშო პერიოდში მოგების გადასახადით დასაბეგრი განაწილებული მოგების თანხა  კვლევისა და განვითარებისთვის გაწეული ხარჯების თანხის შემცირების შემდგომ, რომელიც წარმოადგენს პირველ და მე-2 სვეტებს შორის სხვაობას, თუ მე-5 სვეტში ასახული თანხის ოდენობა მეტია ან ტოლია მე-2 სვეტში ასახულ თანხის ოდენობაზე, ან პირველ და მე-5 სვეტებს შორის სხვაობას, თუ მე-5 სვეტში ასახული თანხის ოდენობა ნაკლებია მე-2 სვეტში ასახულ თანხის ოდენობაზე. აღნიშნული თანხა აისახება დეკლარაციის III ნაწილის 16.1 სტრიქონის მესამე სვეტში.“.

ცვლილება  ამოქმედდა გამოქვეყნებისთანავე, ანუ 2025 წლის 10 დეკემბრიდან.

ცვლილების შესახებ დეტალური ინფორმაცია იხილეთ ბმულზე:

https://matsne.gov.ge/ka/document/view/6692355?publication=0

3. ცვლილება მთავრობის დადგენილებებში

3.1. მაღალმთიან დასახლებაში მუდმივად მცხოვრები პირის სტატუსის მინიჭების, შეწყვეტის, შეჩერებისა და აღდგენის დადგენილების დამტკიცების შესახებ

ძალაში შევიდა ახალი მთავრობის დადგენილება „მაღალმთიან დასახლებაში მუდმივად მცხოვრები პირის სტატუსის მინიჭების, შეწყვეტის, შეჩერებისა და აღდგენის წესის დამტკიცების შესახებ“, რომელიც ეხება პირების მიერ მაღალმთიანი დასახლების სუბიექტის სტატუსის მინიჭებას და ასეთი პირებისთვის განსაზღვრული საგადასახადო შეღავათებით სარგებლობას. 

დადგენილების ახალი რედაქციის  მიხედვით იცვლება მაღალმთიანი დასახლებაში მუდმივად მცხოვრები პირის სტატუსის მინიჭების წესი, კერძოდ ზუსტდება რომ სტატუსის მინიჭება ზოგიერთ შემთხვევაში მოხდება ცალკეულ დასახლებებში 6 თვეზე მეტი ხნით ცხოვრების შემთხვევაშიც, კერძოდ:

საქართველოს მოქალაქე მაღალმთიან დასახლებაში მცხოვრები პირებისთვის სტატუსის მინიჭება ხდება იმ შემთხვევაში თუ  იგი კალენდარული წლის განმავლობაში, ჯამში 9 თვის ან 9 თვეზე მეტი ვადით, ფაქტობრივად ცხოვრობს მაღალმთიან დასახლებაში, თუ მაღალმთიანი დასახლება ზღვის დონიდან 2000 მეტრის სიმაღლეზე ან მის ზევით მდებარეობს, ამ ქვეპუნქტით განსაზღვრული მაღალმთიან დასახლებაში ფაქტობრივად ცხოვრების ვადაა კალენდარული წლის განმავლობაში ჯამში 6 თვე ან 6 თვეზე მეტი.

ძველი რედაქციის მიხედვით ასეთი სტატუსის მისაღებად აუცილებელი იყო მაღალთიან დასახლებაში მინიმუმ 9 თვიანი პერიოდის გატარება, რაც ასეთ დასახლებებში 6 თვიანი პერიოდის გატარების შემთხვევაში აღნიშნული შეღავათით სარგებლობის შესაძლებლობას არ იძლეოდა.

გარდა ამისა ზუსტდება რომ მაღალმთიან დასახლებაში ცხოვრების დამადასტურებელი დოკუმენტის სახით წარსადგენია იმავე მაღალმთიან დასახლებაში რეგისტრირებული არანაკლებ ორი მოწმის, ნოტარიულად დამოწმებული განცხადება (ნოტარიულად დამოწმების შესახებ ჩანაწერი მანამდე არ არსებობდა).

ცვლილება  ამოქმედდა გამოქვეყნებისთანავე, ანუ 2025 წლის 26 დეკემბრიდან.

ცვლილების შესახებ დეტალური ინფორმაცია იხილეთ ბმულზე:

https://infohub.rs.ge/ka/workspace/document/13e90e44-ad56-477d-b940-5a6fc937a7e5

შპს კრესტონ ჯორჯია

მმართველი პარტნიორი                                                             დავით პაპიაშვილი

საგადასახადო აუდიტის დეპარტამენტის ხელმძღვანელი                     რუსუდან ჭაბუკიანი

The post 2025 წლის დეკემბრის თვის განმავლობაში საქართველოს საგადასახადო კანონმდებლობაში შესული ცვლილებები appeared first on ფინანსური აუდიტი და საგადასახადო მომსახურება.

Kreston Georgia აგრძელებს საგადასახადო კანონმდებლობაში შესული ცვლილებებისა და სიახლეების მიმოხილვას. ამჯერად გთავაზობთ 2025 წლის აპრილისა და მაისის თვეებში შესული საკანონმდებლო სიახლეების მიმოხილვას.

სარჩევი

1. ცვლილებები საქართველოს საგადასახადო კოდექსში 

1.1. ტექნიკური ხასიათის ცვლილება 

2. ცვლილებები საქართველოს ფინანსთა მინისტრის ბრძანებებში 

2.1. საჯარო გადაწყვეტილება საგანმანათლებლო დაწესებულებებისთვის 

2.2. საჯარო გადაწყვეტილება მგვ-ის ორგანიზაციისთვის 

2.3. ცვლილება საგადასახადო სამართალდარღვევის აღსრულების ნაწილში 

1.ცვლილებები საქართველოს საგადასახადო კოდექსში

1.1. ტექნიკური ხასიათის ცვლილება

2025 წლის 16 მაისს გამოქვეყნდა საქართველოს კანონი N561-IIმს-XIმპ, რის საფუძველზეც ცვლილება შევიდა საქართველოს საგადასახადო კოდექსში (შემდგომში – სსკ). ცვლილების შედეგად ახალი რედაქციით ჩამოყალიბდა სსკ-ის  39-ე მუხლის მე-2 ნაწილის „ქ“ ქვეპუნქტი.

ცვლილება არის დამაზუსტებელი ხასიათის და მიზნად ისახავს საგადასახდო კოდექსის იმ ცვლილებებთან შესაბამისობაში მოყვანას, რომელიც  განხორციელდა „წიაღის შესახებ“ საქართველოს კანონში.

კერძოდ კი, ცვლილებამდე არსებული სსკ-ის რედაქციით განსაზღვრული იყო, რომ სსიპ მინერალური რესურსების ეროვნული სააგენტო წარმოადგენს საქართველოს ეკონომიკისა და მდგრადი განვითარების სამინისტროს სისტემაში შემავალ საჯარო სამართლის იურიდიულ პირს. ცვლილების შედეგად კი დაზუსტდა, რომ სსიპ მინერალური რესურსების ეროვნული სააგენტო წარმოადგენს საქართველოს გარემოს დაცვისა და სოფლის მეურნეობის სამინისტროს სისტემაში შემავალ საჯარო სამართლის იურიდიულ პირს.

შესაბამისად, წარმოდგენილი ცვლილებით, საგადასახადო ორგანო, მისი თანამშრომელი, მოწვეული სპეციალისტი ან/და ექსპერტი ვალდებულია დაიცვას გადასახადის გადამხდელის შესახებ ინფორმაციის საიდუმლოება, რომელიც მისთვის ცნობილი გახდა სამსახურებრივი მოვალეობის შესრულებისას და მას უფლება აქვს, ცალკეული გადასახადის გადამხდელის შესახებ იდენტიფიცირებული ინფორმაცია გადასცეს მხოლოდ აღნიშნული 39-ე მუხლით განსაზღვრულ პირებს, მათ შორის კი არის საქართველოს გარემოს დაცვისა და სოფლის მეურნეობის სამინისტროს სისტემაში შემავალ საჯარო სამართლის იურიდიულ პირი – მინერალური რესურსების ეროვნულ სააგენტო.

ცვლილება ამოქმედდა გამოქვეყნებიდან 30-ე დღეს, ანუ 2025 წლის 15 ივნისიდან

ცვლილების შესახებ დეტალური ინფორმაცია იხილეთ ბმულზე:

https://matsne.gov.ge/ka/document/view/6495615?publication=0

2.ცვლილებები საქართველოს ფინანსთა მინისტრის ბრძანებებში

2.1.საჯარო გადაწყვეტილება საგანმანათლებლო დაწესებულებებისთვის

2025 წლის 30 მაისს გამოქვეყნდა საქართველოს ფინანსთა სამინისტროს №133 საჯარო გადაწყვეტილება, რომელიც განმარტავს სსკ-ის 170-ე მუხლის პირველი ნაწილის „ე“ ქვეპუნქტით გათვალისწინებული საგადასახადო შეღავათის გავრცელების საკითხს, საგანმანათლებლო დაწესებულების მიერ მოსწავლეთათვის კვების ან/და ტრანსპორტირების მომსახურების გაწევისას.

შეგახსენებთ, რომ სსკ-ის 170-ე მუხლით დადგენილია საგადასახადო შეღავათები სამედიცინო, განათლების, კულტურის, სპორტისა და სოციალურ სფეროებში, რომელთა მიზანია საზოგადოებრივი ინტერესებისთვის საქმიანობათა გარკვეული სახეების წახალისება.

კერძოდ კი, სსკ-ის 170-ე მუხლის პირველი ნაწილის „ე“ ქვეპუნქტის თანახმად, საგანმანათლებლო დაწესებულების მიერ განათლების მომსახურების გაწევა, აგრეთვე მასთან უშუალოდ დაკავშირებული ან/და დამხმარე მომსახურების გაწევა/საქონლის მიწოდება გათავისუფლებულია დღგ-სგან ჩათვლის უფლების გარეშე.

ხოლო, სსკ-ის 157-ე მუხლის „მ“ ქვეპუნქტის შესაბამისად, დამხმარე ხასიათის მომსახურება/საქონელი არის მომსახურება/საქონელი, რომლის შეძენა არ არის მისი მომხმარებლის ძირითადი მიზანი, მაგრამ გამიზნულია მისთვის ძირითადი მომსახურების გაწევის/საქონლის მიწოდების პირობების გაუმჯობესების ან/და უკეთ სარგებლობის უზრუნველსაყოფად. ამავე მუხლის „ნ“ ქვეპუნქტის თანახმად, უშუალოდ დაკავშირებული მომსახურება/საქონელი არის მომსახურება/საქონელი, რომლის მიწოდება ხორციელდება ძირითადი მომსახურების/საქონლის მიწოდების უზრუნველსაყოფად და რომლის განხორციელება აუცილებელია ამ ძირითადი ოპერაციის შესრულებისთვის.

შესაბამისად, სსკ-ის 170-ე მუხლის პირველი ნაწილის „ე“ ქვეპუნქტით დადგენილი საგადასახადო შეღავათით სარგებლობა დაიშვება, თუ ერთდროულად სახეზეა შემდეგი ორი პირობა:

a.მომსახურების გამწევი საგანმანათლებლო დაწესებულებაა _ ისევე როგორც განათლების მომსახურება, დამატებითი მომსახურებაც უნდა გაიწეოდეს საგანმანათლებლო დაწესებულების მიერ, რადგან განსახილველი შეღავათი ვრცელდება მხოლოდ შესაბამისი სტატუსის მქონე პირის ოპერაციებზე.

b.ხორციელდება მოსწავლეთათვის განათლების მომსახურების გაწევა ან განათლების მომსახურებასთან ერთად, მასთან უშუალოდ დაკავშირებული ან/და დამხმარე მომსახურების გაწევა/საქონლის მიწოდება _ განათლების მომსახურება უნდა წარმოადგენდეს ძირითად მომსახურებას. ხოლო, მასთან უშუალოდ დაკავშირებულ ან დამხმარე მომსახურებად განიხილება მომსახურება, რომელიც გაიწევა დამატებითი მომსახურების სახით, აქვს არსებითი მნიშვნელობა განათლების მომსახურების გაწევისთვის და მიზნად ისახავდეს განათლების მომსახურების პირობების გაუმჯობესებას.

ყოველივე ზემოაღნიშნულიდან გამომდინარე, საჯარო გადაწყვეტილების თანახმად, იმ შემთხვევაში, თუ მოსწავლეთა როგორც ტრანსპორტირების დროს, ასევე კვებით უზრუნველყოფისას, შესაბამისი ოპერაციის მხარეებს წარმოადგენდნენ საგანმანათლებლო დაწესებულება და მოსწავლე და ამავდროულად აღნიშნული დამატებითი მომსახურება მიზნად ისახავს განათლების მომსახურების პირობების გაუმჯობესებას და მნიშვნელოვანია განათლების მომსახურების გაწევისთვის, შედეგად აღნიშნული კვებისა და ტრანსპორტირების მომსახურებები განიხილება დამხმარე მომსახურებებად და გათავისუფლებულია დღგ-ისაგან ჩათვლის უფლების გარეშე, სსკ-ის 170-ე მუხლის პირველი ნაწილის „ე“ ქვეპუნქტის საფუძველზე.

ამასთან, თუ ადგილი აქვს საგანმანათლებლო დაწესებულების მიერ შესაბამისი მომსახურების შეძენას მესამე პირისგან, არსებითია, რომ მოსწავლეთა ტრანსპორტირება და კვება ხორციელდებოდეს საგანმანათლებლო დაწესებულების სახელით და შესაბამისი ანაზღაურების მოთხოვნის უფლება ჰქონდეს მხოლოდ საგანმანათლებლო დაწესებულებას.

ცვლილება ამოქმედდა გამოქვეყნებისთანავე, ანუ 2025 წლის 30 მაისიდან

ცვლილების შესახებ დეტალური ინფორმაცია იხილეთ ბმულზე:

https://infohub.rs.ge/ka/workspace/document/f8eb70f2-1fc3-42d2-a662-1c505b64b661

2.2. საჯარო გადაწყვეტილება მგვ-ის ორგანიზაციისთვის

2025 წლის 30 მაისს გამოქვეყნდა საქართველოს ფინანსთა სამინისტროს №132 საჯარო გადაწყვეტილება, რომელიც განმარტავს მწარმოებლის გაფართოებული ვალდებულების ორგანიზაციის (შემდგომ – მგვ-ის ორგანიზაცია) მიერ საკუთარი წევრებისთვის დადგენილი საწევროს სანაცვლოდ გაწეული მომსახურებისა და შეგროვებული ნარჩენების მიწოდების დღგ-ით დაბეგვრისა და ამ საქმიანობაზე სსკ-ის 170-ე მუხლის პირველი ნაწილის „კ“ და „ნ“ ქვეპუნქტებით გათვალისწინებული საგადასახადო შეღავათის გავრცელების საკითხს.

შეგახსენებთ, რომ ნარჩენების მართვის კოდექსის მე-9 მუხლის მე-3 ნაწილის მიხედვით, ისეთი პროდუქტის მწარმოებელი, რომელიც შემდგომ სპეციფიკური ნარჩენი ხდება და ასევე ამ პროდუქტის ბაზარზე განმათავსებელი, ვალდებულნი არიან, უზრუნველყონ პროდუქტისგან წარმოქმნილი ნარჩენების სეპარირებული შეგროვება, ტრანსპორტირება, აღდგენა (მათ შორის, რეციკლირება) და გარემოსთვის უსაფრთხო განთავსება. აღნიშნული ვალდებულება კი სრულდება ინდივიდუალურად ან კოლექტიურად – მგვ-ის ორგანიზაციის საშუალებით.

მწარმოებლის გაფართოებული ვალდებულების დანერგვის მიზნით, საქართველოს მთავრობის დადგენილებებით დამტკიცდა 4 ტექნიკური რეგლამენტი, ესენია:

a.„ნარჩენი ზეთების მართვის შესახებ;

b.„საბურავების ნარჩენების მართვის შესახებ“;

c.„ელექტრო და ელექტრონული მოწყობილობების ნარჩენების მართვის შესახებ“;

d.„ბატარეებისა და აკუმულატორების ნარჩენების მართვის შესახებ“.

აღნიშნული ნორმატიული აქტების შესაბამისად, მგვ-ის ორგანიზაცია არის მწარმოებლების მიერ ინდივიდუალურად ან კოლექტიურად შექმნილი ორგანიზაცია – ა(ა)იპ, რომელიც პასუხისმგებელია მწარმოებლების გაფართოებული ვალდებულებების შესრულებაზე. მწარმოებელი მგვ-ის ორგანიზაციაში წევრიანდება მასთან ხელშეკრულების დადებით. მგვ-ის ორგანიზაციის წევრი ვალდებულია, მგვ-ის ორგანიზაციაში გადაიხადოს რეციკლირების წინასწარი შენატანი, მის მიერ ბაზარზე განთავსებული პროდუქციის წილის შესაბამისად. თავის მხრივ, რეციკლირების წინასწარი შენატანი არის წილობრივი შენატანი, რომელსაც მგვ-ის ორგანიზაციის წევრი უხდის მგვ-ის ორგანიზაციას, მის მიერ ბაზარზე განთავსებული პროდუქტისგან წარმოქმნილი ნარჩენების კონკრეტული ტექნიკური რეგლამენტის მოთხოვნების შესაბამისად მართვისთვის.

საკუთარი წევრებისთვის დადგენილი საწევროს სანაცვლოდ მომსახურების გაწევა

სსკ-ის 170-ე მუხლის პირველი ნაწილის „კ“ ქვეპუნქტის თანახმად, დღგ-სგან ჩათვლის უფლების გარეშე გათავისუფლებულია ორგანიზაციის მიერ მისი საქმიანობის მიზნიდან გამომდინარე, საკუთარი წევრებისთვის დადგენილი საწევროების სანაცვლოდ მომსახურების გაწევა და მასთან უშუალოდ დაკავშირებული საქონლის მიწოდება.

აღნიშნულის გათვალისწინებით, სსკ-ის 170-ე მუხლის პირველი ნაწილის „კ“ ქვეპუნქტით გათვალისწინებული საგადასახადო შეღავათით სარგებლობისთვის განმსაზღვრელია, რომ მომსახურების გაწევა და, ასევე, მასთან უშუალოდ დაკავშირებული საქონლის მიწოდება ორგანიზაციის მიერ ხორციელდებოდეს საკუთარი წევრებისთვის დადგენილი საწევროების სანაცვლოდ. ამასთანავე, გაწეული მომსახურება და მასთან უშუალოდ დაკავშირებული საქონლის მიწოდება არ უნდა სცილდებოდეს ორგანიზაციის საქმიანობის მიზანს.

ვინაიდან, მგვ-ის ორგანიზაციისთვის მისი წევრის მიერ რეციკლირების წინასწარი შენატანის (საწევროს) გადახდის მიზანი არის ბაზარზე განთავსებული პროდუქტისგან წარმოქმნილი ნარჩენების კონკრეტული ტექნიკური რეგლამენტის მოთხოვნების შესაბამისად მგვ-ის ორგანიზაციის მიერ მართვის ანაზღაურება, სახეზეა მგვ-ის ორგანიზაციის მიერ, მისი საქმიანობის მიზნიდან გამომდინარე, საკუთარი წევრებისთვის ანაზღაურების (დადგენილი საწევროების) სანაცვლოდ მომსახურების გაწევა და შესაბამისად, მგვ-ის ორგანიზაციის მიერ წევრებისთვის ზემოხსენებული მომსახურების გაწევა და მასთან უშუალოდ დაკავშირებული საქონლის მიწოდება თავისუფლდება დღგ-სგან ჩათვლის უფლების გარეშე, სსკ-ის 170-ე მუხლის პირველი ნაწილის „კ“ ქვეპუნქტის საფუძველზე.

შეგროვებული ნარჩენების მიწოდება

სსკ-ის 170-ე მუხლის პირველი ნაწილის „ნ“ ქვეპუნქტის შესაბამისად, დღგ-სგან ჩათვლის უფლების გარეშე გათავისუფლებულია იმ ორგანიზაციის მიერ მომსახურების გაწევა/საქონლის მიწოდება, რომლის საქმიანობა გათავისუფლებულია ამ ნაწილის „ა“, „ე“ და „ზ“–„ლ“ ქვეპუნქტებიდან რომელიმე ქვეპუნქტის საფუძველზე, მხოლოდ საკუთარი საქმიანობის მიზნით სახსრების მოზიდვისთვის ორგანიზებული ღონისძიებების ფარგლებში.

ამდენად, პირის მიერ ღონისძიების ორგანიზების ფარგლებში მომსახურების გაწევა/საქონლის მიწოდება გათავისუფლებულია დღგ-ისგან ჩათვლის უფლების გარეშე, თუ არსებობს ყველა შემდეგი პირობა:

a.პირის საქმიანობა, რომელიც ახდენს ღონისძიების ორგანიზებას, გათავისუფლებულია დღგ-სგან ჩათვლის უფლების გარეშე სსკ-ის 170-ე მუხლის პირველი ნაწილის „ა“, „ე“ და „ზ“–„ლ“ ქვეპუნქტების თანახმად;

b.პირის მიერ მომსახურების გაწევა/საქონლის მიწოდება უნდა ხორციელდებოდეს ღონისძიების ორგანიზების ფარგლებში;

c.ღონისძიების ორგანიზების მიზანი უნდა იყოს მხოლოდ საკუთარი საქმიანობის მიზნით სახსრების მოზიდვა.

სსკ-ის 170-ე მუხლის პირველი ნაწილის „ნ“ ქვეპუნქტის მიზნისთვის, ღონისძიებად ჩაითვლება თავშეყრა, რომელიც ცალსახად ორგანიზებულია ორგანიზაციის საქმიანობის მიზნისთვის სახსრების მოსაზიდად, როგორიცაა გამოფენა, წარმოდგენა, ბაზარი, კონკურსი, ფილმის ჩვენება და სხვა, და მასში არ იგულისხმება შემოსავლის მომტანი შემთხვევითი ღონისძიებები და რეგულარულის ხასიათის ეკონომიკური საქმიანობა.

ყოველივე ზემოაღნიშნულის გათვალისწინებით, საჯარო გადაწყვეტილების მიხედვით, სსკ-ის 170-ე მუხლის პირველი ნაწილის „ნ“ ქვეპუნქტით დადგენილი საგადასახადო შეღავათის მიზნისთვის, მგვ-ის ორგანიზაციის მიერ დამატებითი შემოსავლის მიღების მიზნით შეგროვებული ნარჩენების რეალიზაცია არ წარმოადგენს აღნიშნული შეღავათით გათვალისწინებული ღონისძიების ფარგლებში საქონლის მიწოდებას, რამდენადაც აღნიშნული საქმიანობა, მისი შინაარსით ორგანიზაციისთვის რეგულარული ხასიათისაა. შესაბამისად, მგვ-ის ორგანიზაციის მიერ შეგროვებული ნარჩენების მიწოდებაზე არ ვრცელდება სსკ-ის 170-ე მუხლის პირველი ნაწილის „ნ“ ქვეპუნქტით დადგენილი საგადასახადო შეღავათი.

ცვლილება ამოქმედდა გამოქვეყნებისთანავე, ანუ 2025 წლის 30 მაისიდან

ცვლილების შესახებ დეტალური ინფორმაცია იხილეთ ბმულზე:

https://infohub.rs.ge/ka/workspace/document/af523ca1-6996-4669-a57c-9847a67f1df7

2.3.ცვლილება საგადასახადო სამართალდარღვევის აღსრულების ნაწილში

2025 წლის 17 აპრილს გამოქვეყნდა საქართველოს ფინანსთა მინისტრის N96 ბრძანება, რის საფუძველზეც ცვლილება შევიდა „მიმდინარე კონტროლის პროცედურების ჩატარების, სასაქონლო-მატერიალურ ფასეულობათა ჩამოწერის, აღიარებული საგადასახადო დავალიანების დაფარვის, საგადასახადო დავალიანების გადახდევინების უზრუნველყოფის ღონისძიებების განხორციელების, სამართალდარღვევათა საქმისწარმოების წესის დამტკიცების თაობაზე“ ფინანსთა მინისტრის N994 ბრძანებით დამტკიცებულ ინსტრუქციაში.

ცვლილების შედეგად, ახალი რედაქციით ჩამოყალიბდა ინსტრუქციის 69-ე მუხლის, რომელიც არეგულირებს საგადასახადო სამართალდარღვევის საქმის წარმოების წესს, მე-7 ნაწილის „ა“ ქვეპუნქტი. აღნიშნული მუხლის ახალი რედაქციის მიხედვით, ამ მუხლის მე-5 პუნქტში აღნიშნული განცხადების რეგისტრაციის შემთხვევაში, რეგისტრაციიდან არაუგვიანეს 10 სამუშაო დღისა, საგადასახადო ორგანო ადგენს საქონელზე ან/და სატრანსპორტო საშუალებაზე საჯარო სამართლის იურიდიული პირის – სახელმწიფო ქონების ეროვნული სააგენტოს მიერ დასრულებულია თუ არა განკარგვის პროცედურები  და იმ შემთხვევაში, თუ:

ა) საქონელზე ან/და სატრანსპორტო საშუალებაზე დასრულებულია განკარგვის პროცედურები „საჯარო სამართლის იურიდიული პირის – სახელმწიფო ქონების ეროვნული სააგენტოსათვის განსაკარგავად გადაცემული ქონებისა და სახელმწიფოს საკუთრებაში მიქცეული მოძრავი ქონების აღრიცხვის, შენახვის, შეფასებისა და განკარგვის წესის დამტკიცების თაობაზე“ საქართველოს ეკონომიკისა და მდგრადი განვითარების მინისტრის 2020 წლის 31 აგვისტოს №1-1/346 ბრძანების შესაბამისად, თუ არ არსებობს ამ პროცედურების შეჩერების ან შედეგების გაუქმების სამართლებრივი საფუძველი, საჯარო სამართლის იურიდიული პირის – სახელმწიფო ქონების ეროვნული სააგენტოსათვის საგადასახადო ორგანოს წერილობითი მიმართვით წარდგენილი საგადასახადო დავის განმხილველი ორგანოს ან სასამართლოს კანონიერ ძალაში შესული გადაწყვეტილების საფუძველზე:

ა.ა) პირს/გადასახადის გადამხდელს საჯარო სამართლის იურიდიული პირის – სახელმწიფო ქონების ეროვნული სააგენტოს მიერ უბრუნდება საქონლის ან/და სატრანსპორტო საშუალების რეალიზაციის შედეგად მიღებული თანხა;

ა.ბ) უსასყიდლოდ განკარგვის შემთხვევაში, პირს/გადასახადის გადამხდელს საქონლის ან/და სატრანსპორტო საშუალების ღირებულება უნაზღაურდება სახელმწიფო ხაზინის ერთიანი ანგარიშიდან, საჯარო სამართლის იურიდიული პირის – სახელმწიფო ქონების ეროვნული სააგენტოს მიმართვის საფუძველზე, საგადასახადო/საბაჟო ორგანოს მიერ ჩამორთმევის მომენტისთვის დადგენილი საბაზრო/საბაჟო, ხოლო ასეთის არარსებობის შემთხვევაში, საჯარო სამართლის იურიდიული პირის – სახელმწიფო ქონების ეროვნული სააგენტოს მიერ დადგენილი ღირებულების ოდენობით.

აქვე შეგახსენეთ, რომ ინსტრუქციის 69-ე მუხლის მე-5 ნაწილის მიხედვით, თუ საგადასახადო დავის განმხილველი ორგანოს ან სასამართლოს კანონიერ ძალაში შესული გადაწყვეტილებით ბათილად იქნა ცნობილი საგადასახადო ორგანოს გადაწყვეტილება, რომლითაც პირს საგადასახადო სანქციის სახით შეეფარდა სამართალდარღვევის საქონლის ან/და სატრანსპორტო საშუალების უსასყიდლოდ ჩამორთმევა, ან საგადასახადო დავის განმხილველი ორგანოს ან სასამართლოს კანონიერ ძალაში შესული გადაწყვეტილებით გადასახადის გადამხდელი საქართველოს საგადასახადო კოდექსის 269-ე მუხლის მე-7 ნაწილის საფუძველზე გათავისუფლდა შესაბამისი საგადასახადო სანქციისაგან, პირი უფლებამოსილია წერილობითი ან ელექტრონული ფორმით განცხადებით მიმართოს საგადასახადო ორგანოს საქონლის ან/და სატრანსპორტო საშუალების დაბრუნების თაობაზე, რომელსაც უნდა ერთოდეს დავის განმხილველი ორგანოს ან სასამართლოს კანონიერ ძალაში შესული გადაწყვეტილება.

ცვლილება ამოქმედდა გამოქვეყნებისთანავე, ანუ 2025 წლის 17 აპრილიდან

ცვლილების შესახებ დეტალური ინფორმაცია იხილეთ ბმულზე:

https://matsne.gov.ge/ka/document/view/6475825?publication=0

შპს კრესტონ ჯორჯია

მმართველი პარტნიორი                                                             დავით პაპიაშვილი

საგადასახადო აუდიტის დეპარტამენტის ხელმძღვანელი                     რუსუდან ჭაბუკიანი

The post 2025 წლის აპრილისა და მაისის თვის განმავლობაში საქართველოს საგადასახადო კანონმდებლობაში შესული ცვლილებები appeared first on ფინანსური აუდიტი და საგადასახადო მომსახურება.

2025 წლის 31 იანვარს გამოქვეყნდა და გამოქვეყნებისთანავე ამოქმედდა ცვლილება „გადასახადების ადმინისტრირების შესახებ“ ფინანსთა მინისტრის N996 ბრძანებაში. ცვლილება ეხება ნავთობპროდუქტების მიწოდების აღრიცხვის ჟურნალებს.

ცვლილების მიხედვით, ნავთობპროდუქტების საცალო მიწოდების შემთხვევაში, ერთ ობიექტზე ორი სარეალიზაციო ფასის არსებობისას, პირი ვალდებულია ნავთობპროდუქტების საცალო რეალიზაციის ყოველდღიური აღრიცხვის ჟურნალი აწარმოოს ახალი №III-17¹ დანართის შესაბამისად. აღსანიშნავია, რომ აღნიშნული ცვლილება არ ეხება საცალო მიწოდებისას ერთ ობიექტზე ერთი სარეალიზაციო ფასის არსებობის შემთხვევას და აღნიშნულ შემთხვევაში პირი აღრიცხვის ჟურნალს აწარმოებს კვლავ №III-17 დანართის შესაბამისად, როგორც ეს ცვლილებამდე იყო განსაზღვრული.

ჟურნალის ახალი ფორმა გადასახადის გადამხდელს აძლევს შესაძლებლობას, ერთსა და იმავე თარიღში გაატაროს ორი სხვადასხვა სარეალიზაციო ფასი და შესაბამისი ფასდათმობა (არსებობის შემთხვევაში). სწორედ ამ მიზნით დანართის 9;10;12;13;19 სვეტებს აქვს 2-2 სტრიქონი, რომლებშიც სვეტის – „ნავთობპროდუქტების გაცემისას მომსახურების სახე“ შესაბამისად (თვითმომსახურებით არის გაცემული ნავთობპროდუქტი თუ თვითმომსახურების გარეშე) მიეთითება არსებული მაჩვენებლები.

აღსანიშნავია, რომ  ახალი დანართის მიხედვით განსაზღვრული ჟურნალი შესაძლებელია იყოს მხოლოდ მატერიალური ფორმის.

დანართი №III-17¹: ნავთობპროდუქტების საცალო რეალიზაციის ყოველდღიური აღრიცხვის ჟურნალი ერთ ობიექტზე ორი სარეალიზაციო ფასის არსებობის შემთხვევაში.

ცვლილების შესახებ დეტალური ინფორმაცია იხილეთ ბმულზე:

https://matsne.gov.ge/ka/document/view/6396695?publication=0#DOCUMENT:1;

The post ნავთობპროდუქტების აღრიცხვის ჟურნალის ახალი ფორმა appeared first on ფინანსური აუდიტი და საგადასახადო მომსახურება.

Kreston Georgia აგრძელებს საგადასახადო კანონმდებლობაში შესული ცვლილებებისა და სიახლეების მიმოხილვას. ამჯერად გთავაზობთ 2024 წლის დეკემბრის თვეში შესული საკანონმდებლო სიახლეების მიმოხილვას.

სარჩევი

2. ცვლილებები საქართველოს საგადასახადო კოდექსში

1.1. ცვლილებები სათამაშო ბიზნესისა და თამბაქოს ინდუსტრიის სფეროში

2. ცვლილებები საქართველოს ფინანსთა მინისტრის ბრძანებებში

2.1. შეიცვალა ფორმა №3 _ „არარეზიდენტის მიერ საქართველოში გადახდილი/დაკავებული გადასახადების შესახებ ცნობის მოთხოვნა“

2.2. გაიზარდა აქციზური მარკის ნომინალური ღირებულება

2.3. განისაზღვრა ცალკეულ შემთხვევებში დღგ-ით დასაბეგრი ოპერაციის გაუქმებისას, დღგ-ის დაბრუნების წესი

2.4. მცირე ბიზნესის ყოველთვიური დეკლარაციის ფორმა მნიშვნელოვნად იცვლება

2.5. ყალბი დოკუმენტის საფუძველზე დღგ-ის ჩათვლის შეზღუდვა

2.6. შეიცვალა ორმაგი დაბეგვრის თავიდან აცილების შეთანხმების საფუძველზე განსაზღვრული შეღავათის (უცხოეთში გადახდილი გადასახადის ჩათვლის) გამოყენების წესი

2.7. სასაქონლო-მატერიალური ფასეულობების ინვენტარიზაცია

3. ცვლილებები საქართველოს მთავრობის დადგენილებებში

3.1. სამშენებლო მომსახურებიდან მიღებულ შემოსავალზე მცირე ბიზნესის 1%-იანი განაკვეთი აღარ გავრცელდება

3.2. დამტკიცდა აგრო ტურიზმითა და ღვინის ტურიზმით დაკავებული ფიზიკური პირებისთვის მცირე ბიზნესის სტატუსის სტატუსის მოპოვებისა და გაუქმების წესი

1.ცვლილებები საქართველოს საგადასახადო კოდექსში

1.1. ცვლილებები სათამაშო ბიზნესისა და თამბაქოს ინდუსტრიის სფეროში

2024 წლის 29 დეკემბერს გამოქვეყნდა ცვლილება საქართველოს საგადასახადო კოდექსში (შემდგომში, „სსკ“), რომელიც ძალაში შევიდა 2025 წლის 1 იანვრიდან. ცვლილების საფუძველზე, იცვლება სათამაშო აპარატების სალონის მომწყობის ან/და სისტემურ-ელექტრონული ფორმით აზარტული თამაშობების ორგანიზატორის მიერ მიღებული მოგების საშემოსავლო/მოგების გადასახადის და გაცემულ დივიდენდზე დადგენილი გადასახადის განაკვეთი. ცვლილების მიზანი არის, უთანასწორო პირობების აღმოფხვრა სათამაშო ბიზნესის დაბეგვრის სექტორში, რადგან აღნიშნული სფეროს მარეგულირებელი დაბეგვრის სისტემა ქმნიდა უთანასწორო პირობებს სათამაშო ბიზნესის ორგანიზატორ ფიზიკურ პირებსა და საწარმოებს შორის.

ცვლილებამდე მოქმედი სსკ-ის 81-ე, 98-ე და 130-ე მუხლების მიხედვით, სათამაშო აპარატების სალონის მომწყობის ან/და სისტემურ-ელექტრონული ფორმით აზარტული თამაშობების ორგანიზატორის მიერ მიღებული შემოსავალი/მოგება იბეგრება საშემოსავლო გადასახადის/მოგების გადასახადის 15%-იანი განაკვეთით (გარდა უცხო ქვეყნის მოქალაქეების სისტემურ-ელექტრონული ფორმით ორგანიზებულ აზარტულ თამაშობებში მონაწილეობის შედეგად, სისტემურ-ელექტრონული ფორმით აზარტული თამაშობების ორგანიზატორის დასაბეგრი შემოსავლისა), ხოლო რეზიდენტი საწარმოს მიერ ფიზიკური პირისთვის, არასამეწარმეო (არაკომერციული) იურიდიული პირისთვის ან არარეზიდენტი საწარმოსთვის გადახდილი დივიდენდები იბეგრება გადახდის წყაროსთან გადასახდელი თანხის 5%-იანი განაკვეთით.

ცვლილების შედეგად კი, სათამაშო აპარატების სალონის მომწყობის ან/და სისტემურ-ელექტრონული ფორმით აზარტული თამაშობების ორგანიზატორის მიერ მიღებული შემოსავლი/მოგება დაიბეგრება 20%-ით, ნაცვლად ცვლილებამდე მოქმედი 15%-სა, ხოლო აღნიშნული პირების მიერ, 2025 წლისა და შემდგომი პერიოდების კუთვნილი მოგებიდან, გაცემული დივიდენდი გადახდის წყაროსთან დაიბეგრება 0%-იანი განაკვეთით, ნაცვლად ცვლილებამდე მოქმედი კანონმდებლოობით გათვალისწინებული 5%-სა.

ამასთანავე, ცვლილება შეეხო თამბაქოს ნაწარმზე აქციზის განაკვეთებს. კერძოდ კი, ახალი რედაქციით ჩამოყალიბდა სსკ-ის 188-ე მუხლი და გაიზარდა სიგარის, სიგარილას, ფილტრიანი/უფილტრო სიგარეტის და წვის პროცესის გარეშე ინჰალაციისთვის განკუთვნილი პროდუქციის აქციზის განაკვეთი. ცვლილების მიზანი კი გახლდათ ის, რომ თამბაქოზე აქციზის მატებით მოსალოდნელია აღნიშნულ საქონელზე მოხმარების შემცირება და ამავდროულად, ბიუჯეტის შემოსავლების ზრდა. წარმოგიდგენთ ცხრილს, სადაც ასახულია ინფორმაცია აქციზის ძველი და ახალი განაკვეთების შედარების შესახებ:

ცვლილების შესახებ დეტალური ინფორმაცია იხილეთ ბმულზე:

https://matsne.gov.ge/ka/document/view/6328917?publication=0

2. ცვლილებები საქართველოს ფინანსთა მინისტრის ბრძანებებში

2.1. შეიცვალა ფორმა №3 „არარეზიდენტის მიერ საქართველოში გადახდილი/დაკავებული გადასახადების შესახებ ცნობის მოთხოვნა“

2024 წლის 6 დეკემბერს გამოქვეყნდა ცვლილება „ორმაგი დაბეგვრის თავიდან აცილების შესახებ საერთაშორისო შეთანხმებით განსაზღვრული საგადასახადო შეღავათით სარგებლობისა და არარეზიდენტისათვის საქართველოში გადახდილი გადასახადის დაბრუნების წესის დამტკიცების შესახებ“ ფინანსთა მინისტრის N633 ბრძანებაში, რომელიც ამოქმედდება გამოქვეყნებიდან მე-15 დღეს.

ცვლილების საფუძველზე, ახალი რედაქციით ჩამოყალიბდა ფორმა №3 _ „არარეზიდენტის მიერ საქართველოში გადახდილი/დაკავებული გადასახადების შესახებ ცნობის მოთხოვნა“, რომლის ახალი რედაქცია შეგიძლიათ იხილოთ თანდართულ ბმულზე. ასევე, ცვლილება მდგომარეობს იმაშიც, რომ ფორმა №3-ის შევსება შეუძლია არა მხოლოდ უშუალოდ საქართველოს არარეზიდენტ პირს, როგორც ეს ცვლილებამდე არსებული რედაქციით იყო განსაზღვრული, არამედ აღნიშნული ფორმის შევსება ასევე დასაშვებია საგადასახადო აგენტის მიერ, მის მიერ გაცემული ანაზღაურების ნაწილში.

ცვლილების შესახებ დეტალური ინფორმაცია იხილეთ ბმულზე:

https://matsne.gov.ge/ka/document/view/6324565?publication=0

2.3.გაიზარდა აქციზური მარკის ნომინალური ღირებულება

2024 წლის 25 დეკემბერს გამოქვეყნდა ცვლილება „გადასახადების ადმინისტრირების შესახებ“ ფინანსთა მინისტრის N996 ბრძანებაში, რომელიც ამოქმედდა 2025 წლის 1 იანვრიდან. ცვლილება ეხება აქციზური მარკის ნომინალური ღირებულებას.

ცვლილების მიხედვით, იმპორტული ფილტრიანი და უფილტრო (მათ შორის: სიგარა, სიგარილა) თამბაქოს ნაწარმისთვის განკუთვნილი 1’000 ცალი აქციზური მარკის ნომინალური ღირებულება განისაზღვრა 19.5 დოლარის ეკვივალენტ ლარად, ნაცვლად 18 დოლარის, როგორც ეს ცვლილებამდე არსებული რედაქციით იყო განსაზღვრული. ანალოგიურად, ცვლილების მიხედვით, იმპორტირებულ საგარეო-ეკონომიკური  საქმიანობის  ეროვნული  სასაქონლო  ნომენკლატურის 2404 12 000 00 და 2404 19 900 00 კოდებში (– – დანარჩენი, ნიკოტინის/თამბაქოს შემცველობით) მითითებული საქონლისთვის განკუთვნილ 1’000 ცალ აქციზურ მარკაზე დადგენილი ნომინალური ღირებულება გახდა 19.5 დოლარის ეკვივალენტი ლარებში, ნაცვლად 18 დოლარისა.

ცვლილების შესახებ დეტალური ინფორმაცია იხილეთ ბმულზე:

https://matsne.gov.ge/ka/document/view/6345072?publication=0

2.3.განისაზღვრა ცალკეულ შემთხვევებში დღგ-ით დასაბეგრი ოპერაციის გაუქმებისას, დღგ-ის დაბრუნების წესი

2024 წლის 26 დეკემბერს გამოქვეყნდა გამოქვეყნებისთანავე ძალაში შევიდა ცვლილება „გადასახადების ადმინისტრირების შესახებ“ ფინანსთა მინისტრის N996 ბრძანებაში. ცვლილების მიხედვით, ბრძანების 66​2-ე მუხლს დაემატა ახალი მე-9 პუნქტი, რომლის მიხედვითაც, სსკ-ის 1611-ე მუხლის პირველი ნაწილის შესაბამისად განხორციელებული ოპერაციის გაუქმებისას, საქონლის რეალიზაციის განმახორციელებელი უფლებამოსილი პირის მიერ აღნიშნული ოპერაციის გაუქმების შესახებ ინფორმაციის საგადასახადო ორგანოსთვის წარდგენა, საქონლის რეალიზაციის განმახორციელებელი უფლებამოსილი პირის პირადი აღრიცხვის ბარათზე თანხის შემცირების საფუძველი იქნება.

შეგახსენებთ, რომ სსკ-ის 1611-ე მუხლის პირველი ნაწილი ეხება საგადასახადო დავალიანების გადახდევინების უზრუნველყოფის ღონისძიების ფარგლებში ან სხვა ფულადი ვალდებულების (გარდა სისხლის სამართლის და ადმინისტრაციული წესით დაკისრებული სანქციებისა) გადახდევინების მიზნით საქონლის აუქციონის, პირდაპირი მიყიდვის ან სხვა წესით რეალიზაციის (მიწოდება) დღგ-ით დაბეგვრას.

ცვლილების შესახებ დეტალური ინფორმაცია იხილეთ ბმულზე:

https://matsne.gov.ge/ka/document/view/6354455?publication=0

2.4.მცირე ბიზნესის ყოველთვიური დეკლარაციის ფორმა მნიშვნელოვნად იცვლება

2024 წლის 4 დეკემბერს გამოქვეყნდა ცვლილება „სპეციალური დაბეგვრის რეჟიმების გამოყენების შესახებ“ ფინანსთა მინისტრის N999 ბრძანებით დამტკიცებულ ბრძანებაში, რომელიც ძირითადად მცირე ბიზნესის სტატუსის მქონე პირებსა და მათ მიერ წარსადგენი დეკლარაციის ფორმის ცვლილებას ეხება. ცვლილების მიხედვით მნიშვნელოვნად იცვლება მცირე ბიზნესის ყოველთვიური დეკლარაციის ფორმა, რაც ჩვენი აზრით ზოგიერთ შემთხვევაში უმნიშვნელოდ, ზოგ შემთხვევაში კი მნიშვნელოვნად გაზრდის დეკლარაციის შევსებისთვის საჭირო დროს. ცვლილება ეხება სხვა უამრავ საკითხსაც რითაც ზოგიერთ შემთხვევაში ზუსტდება კანონმდებლობაში მანამდე  არსებული ორაზროვნება.

1. დეკლარაციაში დეტალურად ჩაიშალა შემოსავლის სახეები

მცირე ბიზნესის სტატუსის მქონე პირების ყოველთვიური დეკლარაციის ცვლილებამდე მოქმედ ფორმაში თვის განმავლობაში მიღებული შემოსავლის მისათითებლად გამოყოფილი იყო მხოლოდ ერთი უჯრა და დეკლარაციის ფორმით არ იყო მოთხოვნილი მიღებული შემოსავლის ჩაშლა სხვადასხვა სახის შემოსავლების მიხედვით. ცვლილების შედეგად დამტკიცებული ფორმის მიხედვით კი უნდა მიეთითოს არა მხოლოდ თვის განმავლობაში მიღებული ჯამური შემოსავალი (დეკლარაციის 17-ე უჯრა), არამედ თვის შემოსავალი უნდა ჩაიშალოს ქვემოთ მითითებული შემოსავლის სახეობების მიხედვით. კერძოდ, დეკლარაციის ფორმას ემატება ნაღდი ფულით ანგარიშსწორებით მიღებული შემოსავლის, პოს-ტერმინალით მიღებული შემოსავლის, უნაღდო ანგარიშსწორებით მიღებული შემოსავლისა და სხვა ფორმით მიღებული შემოსავლის 18-21 სტრიქონებში მითითებული უჯრები (იხ. დანართი N1).

დეკლარაციის აღნიშნული უჯრების შევსების ვალდებულება უჩნდებათ იმ პირებს ვინც შემოსავლებს აღრიცხავს ე.წ. საკასო მეთოდით, შესაბამისად მათთვის სავალდებულო ხდება მიღებული ჯამური შემოსავლის სხვადასხვა შემოსავლების სახეობების მიხედვით გადანაწილება შესაბამის უჯრებში (18-21 უჯრები), ამასთან 22-24 უჯრების შევსება საკასო მეთოდის გამოყენების შემთხვევაში სავალდებულო არ არის.

გარდა ზემოთ აღნიშნულისა, მცირე ბიზნესის ყოველთვიურ დეკლარაციაში დაბეგვრისგან გათავისუფლებული შემოსავლის მითითებისას უნდა მიეთითოს შემოსავლის გათავისუფლების შესაბამისი კატეგორია (3000 ლარიანი, 6000 ლარიანი თუ სხვა). 

უცვლელად გთავაზობთ ფინანსთა მინისტრის N999 ბრძანებაში მოცემულ მაგალითს საკასო მეთოდით დაანგარიშებული შემოსავლის დეკლარირებასთან დაკავშირებით.

მაგალითი 1

პირობა:

გიორგის, რომელიც წარმოადგენს საქართველოს ტერიტორიული მთლიანობისათვის ბრძოლების მონაწილე საქართველოს მოქალაქეს, მინიჭებული აქვს მცირე ბიზნესის სტატუსი და ახორციელებს სურსათის საცალო ვაჭრობას. ამ საქმიანობის ნაწილში 2023 წლის 10 თვეში მიღებულმა დასაბეგრმა შემოსავალმა შეადგინა 300 000 ლარი, მათ შორის, ოქტომბრის თვეში – 30 000 ლარი.

გიორგი ასევე ეწევა სასოფლო-სამეურნეო საქმიანობას, საიდანაც სოფლის მეურნეობის პროდუქციის პირველადი მიწოდებით მიღებულმა ერთობლივმა შემოსავალმა 2023 წლის დასაწყისიდან ოქტომბრის თვის ჩათვლით შეადგინა 150 000 ლარი, მათ შორის, ოქტომბრის თვეში ჩაერიცხა 50 000 ლარი.

ამასთან, დამატებით, მან 2023 წლის განმავლობაში ნოემბრის თვემდე:

• საქართველოს კანონმდებლობის შესაბამისად ლიცენზირებული ფინანსური ინსტიტუტიდან მიიღო პროცენტები 3500 ლარის ოდენობით;
• ფართის იჯარით გაცემიდან საიჯარო ქირის სახით მიიღო შემოსავალი 80 000 ლარის ოდენობით;
• რეზიდენტი საწარმოსგან ხელფასის სახით მიიღო 15 000 ლარის შემოსავალი.

ანალიზი:

გიორგი, არაუგვიანეს 2023 წლის 15 ნოემბრისა, საგადასახადო ორგანოს წარუდგენს მცირე ბიზნესის სტატუსის მქონე პირის საშემოსავლო გადასახადის ყოველთვიურ დეკლარაციას. დეკლარაციის შესაბამის სტრიქონებში აისახება:

• მე-15 სტრიქონში აისახება 450 000 ლარი, რომელიც შედგება:

• ვაჭრობიდან მიღებული დასაბეგრი შემოსავლისაგან წლის დასაწყისიდან ნაზარდი ჯამით – 300 000 ლარი;
• სოფლის მეურნეობის პროდუქციის პირველადი მიწოდებით მიღებული ერთობლივი შემოსავლისაგან წლის დასაწყისიდან ნაზარდი ჯამით – 150 000 ლარი.

ამასთან, მცირე ბიზნესის მიერ მიღებულ ერთობლივ შემოსავალში არ აისახება და 500 000 ლარიანი ზღვრის განსაზღვრისას მხედველობაში არ მიიღება: ფართის იჯარით გაცემიდან მიღებული შემოსავალი, ხელფასის სახით მიღებული შემოსავალი, საქართველოს კანონმდებლობის შესაბამისად ლიცენზირებული ფინანსური ინსტიტუტიდან მიღებული პროცენტები.

• მე-16 სტრიქონში – განაკვეთი 1%, ვინაიდან ამ საქმიანობის ფარგლებში მიღებული ერთობლივი შემოსავალი არ აღემატება 500 000 ლარს;
• მე-17 სტრიქონში – 80 000 ლარი (30 000 + 50 000) – მცირე ბიზნესის სპეციალური რეჟიმით დაბეგვრას დაქვემდებარებული დასაბეგრი შემოსავალი ოქტომბრის თვის მიხედვით;
• მე-18 სტრიქონში − 30 000 ლარი, სურსათის საცალო ვაჭრობით მიღებული თანხა;
• მე-20 სტრიქონი − 50 000 ლარი, სოფლის მეურნეობის პროდუქციის პირველადი მიწოდებით მიღებული თანხა;
• 25-ე სტრიქონში − 53 000 ლარი (3000 + 50 000) (მ.შ 3000 ლარი − იმის გათვალისწინებით, რომ გიორგი წარმოადგენს საქართველოს ტერიტორიული მთლიანობისათვის ბრძოლების მონაწილე საქართველოს მოქალაქეს, მის მიერ კალენდარული წლის განმავლობაში 3000 ლარამდე მიღებული დასაბეგრი შემოსავალი საშემოსავლო გადასახადით არ იბეგრება. მოცემულ შემთხვევაში იგულისხმება, რომ გიორგის აღნიშნული შეღავათით წინა საანგარიშო პერიოდებში არ უსარგებლია. 50 000 ლარი − საშემოსავლო გადასახადისაგან გათავისუფლებულია სოფლის მეურნეობის პროდუქციის პირველადი მიწოდებით მიღებული დასაბეგრი შემოსავალი, ვინაიდან 2023 წელს ასეთი მიწოდებით მიღებული ერთობლივი შემოსავალი 200 000 ლარს არ აღემატება);
• 26-ე სტრიქონში − 270 ლარი ((80 000− 53 000)*1%).

2. დარიცხვის მეთოდით დასაბეგრი შემოსავლების დეკლარირება

საქმე გაცილებით რთულდება იმ მცირე ბიზნესის სტატუსის მქონე პირებისთვის ვინც შემოსავლებს ე.წ. დარიცხვის მეთოდით აღრიცხავს, ვინაიდან მათ მიერ მიღებული დასაბეგრი შემოსავლების დეკლარირება გაცილებით უფრო მეტი უჯრის შევსებას მოითხოვს.  იმ პირებმა ვინც შემოსავალს აღრიცხავენ  დარიცხვის მეთოდით თვის ჯამური შემოსავლის ამსახველ დეკლარაციის 17-ე უჯრაში  უნდა შეიტანონ დეკლარაციის 18 − 22 სტრიქონებში ასახული თანხების ჯამს გამოკლებული 23 – 24 სტრიქონებში ასახული თანხების ჯამი (იხ. დანართი N1).

შედეგად გამოდის, რომ დარიცხვის მეთოდით შემოსავლის დაანგარიშებისას, მცირე მეწარმეები თვის დასაბეგრი შემოსავლის გამოანგარიშებას ახდენენ შემდეგი პრინციპით (ფორმულით): 

თვის დასაბეგრი შემოსავალი დარიცხვის მეთოდით = (მიმდინარე პერიოდში მიღებული ფულადი ანაზღაურების თანხებს) + (საქონლის/მომსახურების მიწოდების თანხები რაც არ არის ანაზღაურებული მიმდინარე პერიოდში) – (შემოსავალი რომელიც წინა პერიოდებში იყო დაბეგრილი) – (მიმდინარე პერიოდში მიღებული ავანსები)

აღნიშნული მიანიშნებს იმაზე, რომ დარიცხვის მეთოდით შემოსავლების დეკლარირება მანამდე არსებული ერთი უჯრის შევსების  ნაცვლად,  გაცილებით უფრო მეტი უჯრის შევსებას გულისხმობს და მოითხოვს წინა პერიოდში დაბეგრილი თანხებისა და მიმდინარე პერიოდებში მიღებული ავანსების შესახებ ინფორმაციის წარდგენას. 

უცვლელად გთავაზობთ ფინანსთა მინისტრის N999 ბრძანებაში მოცემულ მაგალითს დარიცხვის მეთოდით დაანგარიშებული შემოსავლის დეკლარირებასთან დაკავშირებით.

მაგალითი 2

პირობა:

გიორგი, რომელიც წარმოადგენს დღგ-ის გადამხდელად რეგისტრირებულ მეწარმე ფიზიკურ პირს და მინიჭებული აქვს მცირე ბიზნესის სტატუსი, ახორციელებს სამშენებლო მასალებით ვაჭრობას. 2024 წლის მაისის თვეში მყიდველისაგან ავანსად ჩაერიცხა 10 000 ლარი. ივნისის თვეში მყიდველს მიაწოდა 15 000 ლარის საქონელი. დარჩენილი თანხიდან მყიდველმა 2000 ლარი ჩაურიცხა იმავე (ივნისის) თვეში, ხოლო 3000 ლარი − ივლისის თვეში. ანგარიშსწორება განხორციელდა უნაღდო ანგარიშსწორების წესით.

იმ დაშვებით, რომ გიორგის სხვა საქმიანობა არ განუხორციელებია და საქონლის ღირებულება მოცემულია დღგ-ის გარეშე, დეკლარაციაში მონაცემები აისახება შემდეგ სახით:

ანალიზი:

გიორგი საგადასახადო ორგანოს წარუდგენს 2024 წლის მაისის, ივნისის და ივლისის თვეების მცირე ბიზნესის სტატუსის მქონე პირის საშემოსავლო გადასახადის ყოველთვიურ დეკლარაციებს.

მაისის თვის დეკლარაციაში _ ავანსად ჩარიცხული თანხა 10 000 ლარი აისახება მე-20 სტრიქონში. იმის გათვალისწინებით, რომ ჩარიცხული ავანსის თანხა, შემოსავლების დარიცხვის მეთოდით აღრიცხვის შემთხვევაში, მცირე ბიზნესის სტატუსის მქონე პირისთვის საშემოსავლო გადასახადით არ იბეგრება, აღნიშნული თანხა იმავდროულად ექვემდებარება 24-ე სტრიქონში ასახვას. შესაბამისად, დასაბეგრი შემოსავლის (სტრ. 17), ერთობლივი შემოსავლის ნაზარდი ჯამის (სტრ.15) და საშემოსავლო გადასახადის თანხის (სტრ.26) გრაფებში აისახება 0 ლარი.

ივნისის თვის დეკლარაციაში _ მიწოდებული საქონლის ღირებულება სრულად ექვემდებარება საშემოსავლო გადასახადით დაბეგვრას, შესაბამისად ნაზარდი ჯამის მე-15 სტრიქონში და დასაბეგრი შემოსავლის მე-17 სტრიქონში აისახება 15 000 ლარი.

ამასთან, იმის გათვალისწინებით, რომ მიწოდებული საქონლის ღირებულებიდან, საანგარიშო თვეში ანაზღაურებულია 2 000 ლარი, აღნიშნული თანხა აისახება მე-20 სტრიქონში, ხოლო სხვაობა 13 000 ლარი ( 15 000 ლარი − 2 000 ლარი) აისახება 22-ე სტრიქონში. 

26-ე სტრიქონში აისახება 150 ლარი (15 000 *1%).

ივლისის თვის დეკლარაციაში _ იმის გათვალისწინებით, რომ 3 000 ლარი ანაზღაურებულია ივნისის თვეში მიწოდებული საქონლის ღირებულებიდან, აღნიშნული თანხა არ იღებს მონაწილეობას მე-15 სტრიქონის გაანგარიშებაში, შესაბამისად აღნიშნულ სტრიქონში გადმოიტანება წინა თვის მე-15 სტრიქონში ასახული ნაზარდი ჯამი 15 000 ლარი.

მე-20 და 23 სტრიქონებში აისახება 3 000 ლარი, შესაბამისად, საშემოსავლო გადასახადით დასაბეგრი თანხა 0-ის ტოლი იქნება და მე-17 და 26-ე სტრიქონებში აისახება 0 ლარი.

3. სხვა ცვლილებები და სიახლეები

გარდა ზემოთ აღნიშნულისა მცირე ბიზნესის დეკლარაციის ფორმაში და ასევე დაბეგვრის წესში განხორციელდა სხვა მნიშვნელოვანი დაზუსტებები: 

1. მე-15 უჯრაში, რომელშიც წლის დასაწყისიდან მიმდინარე პერიოდამდე ნაზარდი ჯამით მიღებული ჯამური შემოსავლის მითითება არის სავალდებულო, დაზუსტდა რომ აღნიშნულ უჯრაში შემოსავალი მიეთითება კალენდარული წლის დასაწყისიდან ნაზარდი ჯამით, საანგარიშო თვის ჩათვლით (მათ შორის საშემოსავლო გადასახადისაგან გათავისუფლებული შემოსავალიც). ამ სტრიქონში არ შეიტანება დაბეგვრის საერთო წესებით მიღებული შემოსავლები: დივიდენდი, პროცენტი, როიალტი, ვალის პატიება, უძრავი ქონების, ავტოსატრანსპორტო საშუალების, ფასიანი ქაღალდების, პარტნიორის წილის რეალიზაციით მიღებული ნამეტი, ქონების იჯარით/უძრავი ქონების ქირით გაცემა, სესხის გაცემიდან მიღებული შემოსავალი, სათამაშო ბიზნესიდან მიღებული მოგებები, ჩუქება, მემკვიდრეობით მიღებული ქონების სახით მიღებული შემოსავალი.
2. დაზუსტდა დეკლარაციის ველები, რომლებიც უკავშირდება აგრო და ღვინის ტურიზმით დაკავებული მცირე ბიზნესის სტატუსის მქონე პირების 1%-იან დაბეგვრას, 700 000 ლარამდე მიღებული წლიური შემოსავლის შემთხვევაში. 
3. და სხვა.

4. ჩვენი მოსაზრება

ჩვენი აზრით, მიუხედავად იმისა, რომ ზოგადად დეკლარირებასთან დაკავშირებული სიახლეები და მაგალითებში მოცემული მსჯელობა შეიძლება ითქვას, რომ გასაგებია, გაუგებარია ის თუ  რატომ არის  საუბარი მეორე მაგალითში დარიცხვის მეთოდით შემოსავლების დათვლის აუცილებლობაზე, მაშინ როდესაც დღგ-ს გადამხდელი პირისთვის დარიცხვის მეთოდის გამოყენებით შემოსავლების დათვლა აღარ არის სავალდებულო რამდენიმე წლის წინ განხორციელებული ცვლილების შემდგომ. აქედან გამომდინარე მიგვაჩნია, რომ მეორე მაგალითი საჭიროებს დაზუსტებას.

ასევე ვთვლით, რომ დასაზუსტებელია შემოსავლის აღრიცხვის დარიცხვის მეთოდიდან საკასო მეთოდზე გადასვლის მსურველ პირებთან დაკავშირებული დეკლარირების ტექნიკური დეტალები. გარდა აღნიშნულისა მიგვაჩნია რომ ახლებური ფორმით დეკლარირებისას შესაძლოა წარმოიშვას სხვა სირთულეები რაც ჩვენი აზრით წინასწარ უნდა იქნას იდენტიფიცირებული და აღმოფხვრილი ფინანსთა სამინისტროსა და შემოსავლების სამსახურის მხრიდან.

მცირე ბიზნესის დეკლარირებასთან დაკავშირებული ცვლილება 2024 წლის დეკემბრის და მის შემდგომ საანგარიშო პერიოდებზე წარსადგენ დეკლარაციებზე გავრცელდება.

 დანართი N1: დეკლარაციის ფორმა

ფინანსთა მინისტრის N999-ე ბრძანებაში განხორციელებულ ცვლილებასა და დეკლარაციის ახალ ფორმას (იხ. დანართები) დეტალურად შეგიძლიათ გაეცნოთ ქვემოთ მითითებულ ბმულზე.

ცვლილების შესახებ დეტალური ინფორმაცია იხილეთ ბმულზე:

https://matsne.gov.ge/ka/document/view/6321908?publication=0

2.5.ყალბი დოკუმენტის საფუძველზე დღგ-ის ჩათვლის შეზღუდვა

2024 წლის 19 და 24 დეკემბერს გამოქვეყნდა და გამოქვეყნებისთანავე ძალაში შევიდა ცვლილებები „გადასახადების ადმინისტრირების შესახებ“ ფინანსთა მინისტრის N996 ბრძანებაში. ცვლილება აზუსტებს სსკ-ის საფუძველზე განსაზღვრულ, დღგ-ის ჩათვლის შეზღუდვებს, ყალბი დოკუმენტის საფუძველზე.

შეგახსენებთ, რომ 2023 წლის დეკემბრის თვის ცვლილების საფუძველზე, სსკ-ის 178-ე მუხლს დაემატა, რომ დღგ-ის ჩათვლა იზღუდება ყალბი დოკუმენტის საფუძველზე. სწორედ ამ ცვლილებასთან მიმართებით მაკორექტირებელი ხასიათის ცვლილებები შევიდა ფინანსთა მინისტრის N996 ბრძანებაში.

კერძოდ კი, ახალი რედაქციით ჩამოყალიბდა ბრძანების 72-ე მუხლის მე-3 პუნქტის „ვ“ ქვეპუნქტი, რომლის მიხედვითაც, დასაბეგრ პირს უფლება არ აქვს ჩაითვალოს დღგ ყალბი დოკუმენტით, აგრეთვე იმ  საგადასახადო ანგარიშ-ფაქტურით, რომელიც ფიქტიურ გარიგებას ან უსაქონლო ოპერაციას ასახავს. ცვლილებამდე არსებულ რედაქციაში, „ყალბი დოკუმენტი“ ამ ჩამონათვალში აღნიშნული არ ყოფილა.

იგივე მიზნით, ახალი რედაქციით ჩამოყალიბდა ბრძანების 563-ე მუხლი, რომელიც განსაზღვრავს დღგ-სგან თავის არიდების წინააღმდეგ მიმართულ ადმინისტრირების ღონისძიებებს. ცვლილების შედეგად, ყველა იმ ჩანაწერს, სადაც საუბარი იყო უსაქონლო ოპერაციაზე ან ფიქტიური გარიგებაზე, დაემატა ყალბი დოკუმენტიც.

აქვე შეგახსენებთ, რომ პირის მიერ ფიქტიური გარიგების/უსაქონლო ოპერაციის ამსახველი ან ყალბი საგადასახადო ანგარიშ-ფაქტურის გამოწერა – იწვევს საგადასახადო ანგარიშ-ფაქტურის გამომწერი/გამცემი პირის დაჯარიმებას საგადასახადო ანგარიშ-ფაქტურაში მითითებული დღგ-ის თანხის 200 პროცენტის ოდენობით. ხოლო ასეთი დოკუმენტის საფუძველზე დღგ-ის ჩათვლის განხორციელება – იწვევს პირის დაჯარიმებას ჩათვლილი გადასახადის თანხის 200 პროცენტის ოდენობით.

ცვლილების შესახებ დეტალური ინფორმაცია იხილეთ ბმულზე:

https://matsne.gov.ge/ka/document/view/6339541?publication=0

2.6.შეიცვალა ორმაგი დაბეგვრის თავიდან აცილების შეთანხმების საფუძველზე განსაზღვრული შეღავათის გამოყენების (უცხოეთში გადახდილი გადასახადის ჩათვლის) წესი

2024 წლის 31 დეკემბერს გამოქვეყნდა და გამოქვეყნებისთანავე ძალაში შევიდა ცვლილებები „გადასახადების ადმინისტრირების შესახებ“ ფინანსთა მინისტრის N996 ბრძანებაში.

ბრძანების 38-ე მუხლს, რომელიც განსაზღვრავს გადახდის წყაროსთან დაკავებული გადასახადის დეკლარაციის შევსების წესს, დაემატა მაგალითი 1, რომელსაც წარმოგიდგენთ უცვლელი ფორმით:

მაგალითი 1.

ფაქტობრივი გარემოებები:

არარეზიდენტი საწარმოს (შვეიცარიული ავიაკომპანიის) საქართველოში არსებული მუდმივი დაწესებულება (შემდგომში – მუდმივი დაწესებულება) ახორციელებს საჰაერო ხომალდით მგზავრთა საერთაშორისო გადაყვანებს. აღნიშნულ მუდმივ დაწესებულებას დაქირავებული ჰყავს საქართველოს რეზიდენტი ფიზიკური პირი, რომელიც ფაქტობრივად საქმიანობას ახორციელებს საჰაერო ხომალდზე.

საქართველოს რეზიდენტი ფიზიკური პირის ხელფასის სახით მიღებული შემოსავალი 10 000 ლარი დაექვემდებარა დაბეგვრას, როგორც არარეზიდენტი საწარმოს (დამსაქმებლის) ფაქტობრივი მართვის ადგილის მიხედვით – შვეიცარიაში (15%), ასევე მუდმივი დაწესებულების ადგილსამყოფელის მიხედვით – საქართველოში (20%).

ანალიზი:

„შემოსავლებსა და კაპიტალზე ორმაგი დაბეგვრის თავიდან აცილების შესახებ“ საქართველოსა და შვეიცარიის კონფედერაციას შორის შეთანხმების (შემდგომში – შეთანხმება) 23-ე მუხლის პირველი პუნქტის შესაბამისად, როდესაც საქართველოს რეზიდენტი იღებს შემოსავალს, ან ფლობს კაპიტალს, რომელიც ამ შეთანხმების დებულებების თანახმად შეიძლება დაიბეგროს შვეიცარიაში, საქართველო დაუშვებს ამ რეზიდენტის შემოსავალზე გადასახადიდან იმ თანხის გამოქვითვას, რომელიც შვეიცარიაში შემოსავალზე გადახდილი გადასახადის ტოლია. ასეთი გამოქვითვა, არც ერთ შემთხვევაში, არ უნდა აღემატებოდეს შემოსავალზე გადასახადის ან კაპიტალზე გადასახადის იმ ნაწილს, რომელიც გამოქვითვამდე იყო დაანგარიშებული.

ვინაიდან, მოცემულ შემთხვევაში საქართველოს რეზიდენტი ფიზიკური პირისათვის გაცემული ხელფასი შესაძლებელია დაექვემდებაროს დაბეგვრას როგორც საქართველოში, ისე შვეიცარიის კონფედერაციაში, ამ უკანასკნელ სახელმწიფოში გადახდილი გადასახადის თანხა ექვემდებარება გამოქვითვას საქართველოში, შეთანხმების 23-ე მუხლის პირველი პუნქტის შესაბამისად. აღნიშნული გამოქვითვა უნდა განხორციელდეს საგადასახადო აგენტის მიერ.

შედეგი:

მოცემულ შემთხვევაში, საგადასახადო აგენტი ორმაგი დაბეგვრის თავიდან აცილების მიზნით, უფლებამოსილია, გადახდის წყაროსთან დაკავებული გადასახადის დეკლარაციის  დანართი „ა“-ს  მე-14 სვეტში მიუთითოს შვეიცარიაში დაკავებული და გადახდილი გადასახადის თანხა 1500 (10 000-ის 15%) ლარი, რომელიც დააკლდება ამავე დანართის მე-11 სვეტში, იგივე განაცემზე საქართველოში გადახდის წყაროსთან დაკავებული გადასახადის თანხას 2000 (10 000-ის 20%) ლარს. შესაბამისად, მოცემულ სახელფასო განაცემზე, საგადასახადო აგენტს მიმდინარე საანგარიშო თვეში საშემოსავლო გადასახადში დაერიცხება 500 (2000–1500) ლარი.

გარდა ამისა, ცვლილების შედეგად, ბრძანებას 38-ე მუხლის შემდეგ დაემატა ახალი 38​1 მუხლი, რომელიც განსაზღვრავს გადახდის წყაროსთან დაკავებული გადასახადის დეკლარაციის  დანართი „ა“-ს  მე-14 სვეტის (საერთაშორისო ხელშეკრულების საფუძველზე გათავისუფლებას ან შემცირებას დაქვემდებარებული გადასახადის თანხა) შევსებაზე  უფლების მინიჭების წესს.

ასევე, ცვლილების საფუძველზე, ბრძანებას დაემატა ორი ახალი დანართი:

• დანართი №II-061 – განცხადება, გადახდის წყაროსთან დაკავებული გადასახადის დეკლარაციის  დანართი „ა“-ს  მე-14 სვეტის შევსებაზე უფლების მინიჭების შესახებ;                                                                                                                                                                                                                              
• დანართი №II-06​2 – ინფორმაცია უცხო ქვეყანაში დაკავებული და გადახდილი გადასახადის შესახებ.

ზემოხსენებული 38​1-ე მუხლის მიხედვით, განისაზღვრა რიგი წესებისა, რომლის საფუძველზეც საგადასახადო აგენტს შეეძლება საერთაშორისო ხელშეკრულების საფუძველზე განსაზღვრული შეღავათის, კერძოდ კი უცხო ქვეყანაში დაბეგრილი გადასახადის ჩათვლის გამოყენება. აღნიშნული შეღავათის გამოყენების მიზნით:

• გადასახადის გადამხდელი, საგადასახადო ორგანოს მიმართავს №II-06​1 დანართით გათვალისწინებული ფორმის განცხადებით იმ შემთხვევაში, თუ „ორმაგი დაბეგვრის თავიდან აცილებისა და გადასახადების გადაუხდელობის  აღკვეთის  შესახებ“  შეთანხმების  საფუძველზე,  ერთსა და იმავე განაცემზე გადასახადის დაკავების უფლება წარმოექმნება როგორც ხელშემკვრელ სახელმწიფოს, ისე მეორე სახელმწიფოს (საქართველოს) და უცხო ქვეყანაში გადახდილი თანხა ექვემდებარება ჩათვლას.
• გადასახადის გადამხდელი ვალდებულია, საანგარიშო წლის მომდევნო წლის 1 აპრილამდე საგადასახადო ორგანოში წარადგინოს „ინფორმაცია უცხო ქვეყანაში დაკავებული და გადახდილი გადასახადის შესახებ“ დანართი №II-06​2 ფორმით, რომელსაც თან უნდა დაერთოს უცხო ქვეყნის კომპეტენტური ორგანოს მიერ გაცემული უცხო ქვეყანაში დაკავებული და გადახდილი გადასახადის შესახებ ცნობა, დაქირავებული ფიზიკური პირების მიხედვით და მისი ნოტარიულად დამოწმებული თარგმანი ქართულ ენაზე.
• იმ შემთხვევაში, თუ გადასახადის გადამხდელი დადგენილ ვადებში, საგადასახადო ორგანოში არ წარადგენს უცხო ქვეყანაში დაკავებული და გადახდილი გადასახადის შესახებ  ცნობას,  საგადასახადო ორგანოს უფლებამოსილი თანამშრომელი ვალდებულია, მოცემულ გადასახადის გადამხდელს შეუწყვიტოს გადახდის წყაროსთან დაკავებული გადასახადის დეკლარაციის  დანართი „ა“-ს  მე-14 სვეტის შევსების უფლება დადგენილი ვადის გასვლის მომდევნო სამუშაო დღიდან, ხოლო შემცირებული გადასახადის თანხა ექვემდებარება აღდგენას საგადასახადო კანონმდებლობით დადგენილი წესის შესაბამისად.

აღნიშნული მიანიშნებს იმაზე რომ თუ გადამხდელის მიერ დროულად არ იქნება მოთხოვნილი უცხოეთში გადახდილი გადასახადის საქართველოში ჩათვლა და  დროულად არ მოხდება უცხოეთში გადახდილი გადასახადის დამადასტურებელი ცნობის წარდგენა, გადასახადის გადამხდელი დაკარგავს უცხოეთში გადახდილი გადასახადის ჩათვლის უფლებას. 

ცვლილების შესახებ დეტალური ინფორმაცია იხილეთ ბმულზე:

https://matsne.gov.ge/document/view/6371911?publication=0

2.7. სასაქონლო-მატერიალური ფასეულობების ინვენტარიზაციისას დაზუსტებული დეკლარაციის მონაცემების გათვალისწინება აღარ მოხდება

2024 წლის 27 დეკემბერს გამოქვეყნდა და გამოქვეყნებისთანავე ძალაში შევიდა ცვლილება „მიმდინარე კონტროლის პროცედურების ჩატარების, სასაქონლო-მატერიალურ ფასეულობათა ჩამოწერის, აღიარებული საგადასახადო დავალიანების დაფარვის, საგადასახადო დავალიანების გადახდევინების უზრუნველყოფის ღონისძიებების განხორციელების, სამართალდარღვევათა საქმისწარმოების წესის დამტკიცების თაობაზე“ ფინანსთა მინისტრის N994 ბრძანებაში. ცვლილება ეხება მიმდინარე კონტროლის პროცედურას, კერძოდ სასაქონლო-მატერიალური ფასეულობების ინვენტარიზაციას. 

ცვლილების თანახმად, ბრძანების 30-ე მუხლს დაემატა ახალი მე-31 პუნქტი, რომლის მიხედვითაც, სმფ-ების ნაშთების სააღრიცხვო (საბუღალტრო) მონაცემების დადგენის მიზნებისათვის, საგადასახადო ორგანოს მიერ მხედველობაში არ მიიღება ინვენტარიზაციისა და სმფ-ების ნაშთის ფაქტობრივი მდგომარეობის აღრიცხვის დაწყებამდე საანგარიშო პერიოდებზე (გარდა ბოლო საანგარიშო პერიოდისა) წარდგენილი საგადასახადო დეკლარაციები/გაანგარიშებები (მათ შორის, შესწორებული საგადასახადო დეკლარაციები/ გაანგარიშებები), რომლებიც საგადასახადო ორგანოში წარდგენილ იქნა ინვენტარიზაციისა და სმფ-ების ნაშთის ფაქტობრივი მდგომარეობის აღრიცხვის დაწყების შემდეგ.

ცვლილების შესახებ დეტალური ინფორმაცია იხილეთ ბმულზე:

https://matsne.gov.ge/document/view/6355524?publication=0

3. ცვლილებები საქართველოს მთავრობის დადგენილებებში

3.1.სამშენებლო მომსახურებიდან მიღებულ შემოსავალზე მცირე ბიზნესის 1%-იანი განაკვეთი აღარ გავრცელდება

2024 წლის 23 დეკემბერს გამოქვეყნდა ცვლილება „სპეციალური დაბეგვრის რეჟიმების შესახებ“ საქართველოს მთავრობის №415-ე დადგენილებაში, რისი მიხედვითაც სამშენებლო მომსახურებიდან მიღებული შემოსავლები დაემატა იმ შემოსავლების ჩამონათვალს, რაზეც მცირე ბიზნესის სტატუსი და შესაბამისად შემოსავლების 1%-იანი განაკვეთით დაბეგვრა არ ვრცელდება. ცვლილება შევიდა ზემოთ ხსენებული დადგენილების დანართ №5-ში და აღნიშნულ დანართში ჩამოთვლილ შემოსავლებს დაემატა სამშენებლო მომსახურების გაწევიდან მიღებული შემოსავლების შემდეგი სახეობები: 

• საქართველოს ეროვნული კლასიფიკატორის სეკ 006-2016-ის“ 41.2 ჯგუფით გათვალისწინებული საცხოვრებელი და არასაცხოვრებელი შენობების მშენებლობის მომსახურების, 42-ე განყოფილებით გათვალისწინებული სამოქალაქო მშენებლობის მომსახურების ან/და 43-ე განყოფილებით გათვალისწინებული სპეციალიზებული სამშენებლო მომსახურების გაწევით მიღებული შემოსავალი, თუ აღნიშნული მომსახურების მიმღებს წარმოადგენს საქართველოს საგადასახადო კოდექსით გათვალისწინებული საწარმო, ორგანიზაცია ან მეწარმე ფიზიკური პირი.

აღნიშნული მიუთითებს იმაზე, რომ ფიზიკური პირების მიერ სამშენებლო მომსახურების გაწევიდან მიღებული შემოსავლების ზემოთ ხსენებულ სახეობებზე აღარ გავრცელდება მცირე ბიზნესის სტატუსი და აღნიშნული შემოსავლების დაბეგვრა ამ სტატუსისათვის დამახასიათებელი 1%-იანი განაკვეთით აღარ მოხდება. ამასთან, აღნიშნული სიახლე ვრცელდება იმ შემთხვევებზე, როდესაც  მომსახურების მიმღები არის  საწარმო, ორგანიზაცია ან მეწარმე ფიზიკური პირი.

1. როგორ მოხდება სამშენებლო მომსახურებიდან მიღებული შემოსავლების დაბეგვრა

გამომდინარე იქიდან, რომ სამშენებლო მომსახურებიდან მიღებული შემოსავლების ზემოთ ხსენებულ შემთხვევებში მცირე ბიზნესის სტატუსი აღარ გავრცელდება, დაბეგვრა მოხდება მეწარმე ფიზიკური პირებისთვის დამახასიათებელი საერთო წესის მიხედვით, კერძოდ წლიური დასაბეგრი შემოსავლის (მოგების) მიხედვით, რისი გაანგარიშებაც მოხდება შემდეგი წესით: 

წლიური დასაბეგრი შემოსავალი = წლიური ერთობლივ შემოსავალი – წლიური გამოქვითვები

ერთობლივი შემოსავლების გაანგარიშება მოხდება სსკ-ის XIV თავის მიხედვით, ხოლო გაწეული ხარჯების გამოქვითვებში აღიარება კი სსკ-ის XIV- თავის მიხედვით, მათ შორის სხვაობა კი (დადებით სხვაობის შემთხვევაში) დაექვემდებარება საშემოსავლო გადასახადის 20%-იანი განაკვეთით დაბეგვრას.

ყოველივე ზემოთ აღნიშნულიდან გამომდინარე, მცირე ბიზნესის სტატუსის მქონე ი/მ-ები ვალდებულნი იქნებიან სამშენებლო მომსახურებიდან მიღებულ შემოსავლებზე აღარ გაავრცელონ მცირე ბიზნესის სტატუსისთვის დამახასიათებელი 1%-იანი განაკვეთი და  მიღებული წლიურ დასაბეგრი შემოსავალის (მოგების) 20%-ის შესაბამისი თანხაზე ჩააბარონ წლიურის საშემოსავლო გადასახადის დეკლარაცია, საგადასახადო წლის მომდევნო წლის 1 აპრილამდე, ასევე ამავე ვადაში უნდა გადაიხადონ აღნიშნული გადასახადი, მეწარმე ფიზიკური პირის მიმდინარე გადასახდელების გათვალისწინებით (იხ. სსკ-ის 155-ე მუხლი).

ამასთან იმ შემთხვევაში თუ მცირე ბიზნესის სტატუსის მქონე ფიზიკური პირი არ იქნება დარეგისტრირებული ი/მ-ედ და იგი მომსახურებას გაუწევს მეწარმე სუბიექტს (მაგ. შპს-ს ან ი/მ-ს), მასზე გადახდილი თანხები შესაძლოა დაიბეგროს ზემოთ ხსენებულისგან განსხვავებული წესით, კერძოდ შემოსავლების დაბეგვრა მოხდეს გადახდის წყაროსთან საგადასხადო აგენტის მიერ (საშემოსავლო დააკავოს შპს-მ ან ი/მ-მ).

აღსანიშნავია, რომ სამშენებლო მომსახურების გამწევი ფიზიკური პირების დაბეგვრის წესი სხვა გადასახადების ნაწილში არ შეცვლილა, შესაბამისად აღნიშნული პირები შესაძლოა დაიბეგრონ სხვა გადასახადებითაც, რისი დეკლარირებისა და გადახდის ვალდებულება მანამდეც არსებობდა, კერძოდ საუბარია ისეთ გადასახადებზე როგორიცაა გადახდის წყაროსთან დასაკავებელი საშემოსავლო/მოგების გადასახადები, ქონების გადასახადი, დღგ (სავალდებულო ან ნებაყოფლობითი რეგისტრაციისას) და სხვა.

2. ვინ უნდა იყოს მომსახურების მიმღები?

ცვლილება ეხება ზემოთ ხსენებული სამშენებლო მომსახურების გამწევ პირებს თუ მათ მიერ გაწეული მომსახურების მიმღები არის საწარმო, ორგანიზაცია ან მეწარმე ფიზიკური პირი. შესაბამისად თუ გაიწევა ზემოთ ხსენებული სამშენებლო მომსახურება და მომსახურების მიმღები იქნება არამეწარმე ფიზიკური პირი, ასეთი შემოსავლების დაბეგვრაზე ზემოთ ხსენებული ცვლილება არ ვრცელდება. 

3. გამოიწვევს თუ არა სამშენებლო მომსახურების გაწევა მცირე ბიზნესის სტატუსის გაუქმებას სხვა საქმიანობაზე/შემოსავალზე?

აღსანიშნავია, რომ სამშენებლო მომსახურებიდან მიღებული შემოსავლების დამატება მოხდა საქართველოს მთავრობის №415-ე დადგენილების დანართ №5-ში (შემოსავლები რაზეც არ ვრცელდება სტატუსი, შემოსავალი არ შედის 500 000 ლარში) და არა დანართ №4-ში, სადაც ჩამოთვლილია ე.წ. აკრძალული საქმიანობები, რისი განხორციელებაც  უპირობოდ იწვევს მცირე ბიზნესის სტატუსის გაუქმებას სხვა საქმიანობაზე.

აქედან გამომდინარე, თუ ფიზიკურ პირს გააჩნია მცირე ბიზნესის სტატუსი სხვა ნებადართულ საქმიანობაზე (მაგ. მცირე საამქრო) და აღნიშნული პირი ასევე გასწევს სამშენებლო მომსახურებას, სამშენებლო მომსახურებაზე მცირე ბიზნესის სტატუსი არ გავრცელდება და ამ საქმიანობიდან მიღებული წლიური მოგება დაიბეგრება 20%-ით, თუმცა აღნიშნული არ გამოიწვევს სტატუსის გაუქმებას პირველ მომსახურებაზე (მცირე საამქრო) და ამ უკანასკნელი საქმიანობიდან მიღებული შემოსავლების დაბეგვრა კვლავინდებურად მოხდება ყოველთვიურად შემოსავლის 1%-იანი განაკვეთით, ამასთან სამშენებლო მომსახურებიდან მიღებული შემოსავლების ჩართვა არ მოხდება 500 000 ლარიანი ზღვარის გაანგარიშებაში.

აქედან გამომდინარე, თუ პირი ეწევა მცირე ბიზნესის სტატუსისთვის ნებადართულ საქმიანობას და ამის პარალელურად გასწევს სამშენებლო მომსახურებას, პირველ საქმიანობაზე მცირე ბიზნესის სტატუსი არ გაუქმდება, რისი გაუქმებაც მოხდებოდა დანართი 4-ით განსაზღვრული საქმიანობის განხორციელების შემთხვევაში (მაგ. სავალუტო ოპერაციები, კონსულტანტი, არქიტექტორი და ა.შ.). 

ზემოხსენებული ცვლილება 2025 წლის 1 თებერვლიდან ამოქმედდება.

საქართველოს მთავრობის N415-ე დადგენილებაში განხორციელებულ ცვლილებას დეტალურად შეგიძლიათ გაეცნოთ ქვემოთ მითითებულ ბმულზე.

ცვლილების შესახებ დეტალური ინფორმაცია იხილეთ ბმულზე:

https://matsne.gov.ge/ka/document/view/6344539?publication=0

3.2.აგრო ტურიზმითა და ღვინის ტურიზმით დაკავებული ფიზიკური პირებისთვის მცირე ბიზნესის სტატუსის სტატუსის მოპოვებისა და გაუქმების წესი დამტკიცდა

როგორც ცნობილია აგრო ტურიზმისა და ღვინის ტურიზმით დაკავებული ფიზიკური მიერ  მცირე ბიზნესის სტატუსის მოპოვების შემთხვევაში აღნიშნული სტატუსისთვის დამახასიათებელი წლიური 500 000 ლარიანი ზღვარის ნაცვლად მოქმედებს 700 000 ლარიანი ზღვარი. თუმცა აღნიშნული სტატუსების მიღებისთვის აუცილებელი კრიტერიუმები და სტატუსის მოპოებისა და გაუქმების წესი ამ დრომდე არ არსებობდა. 2024 წლის 30 დეკემბრის მთავრობის  №465 დადგენილებით სწორედ ეს წესი დამტკიცდა.

აღნიშნული წესის მიხედვით აგროტურისტული საქმიანობის სტატუსის მისაღებად, დაინტერესებული პირი უნდა აკმაყოფილებდეს შემდეგ მოთხოვნებს:

ა) საქართველოს საგადასახადო კოდექსის 88-ე-89-ე მუხლების შესაბამისად, მინიჭებული აქვს მცირე ბიზნესის სტატუსი;

ბ) საკუთრების ან სარგებლობის უფლებით ფლობს ფერმერულ მეურნეობას;

გ) რეგისტრირებულია ფერმერთა რეესტრში;

დ) შეესაბამება ამ დადგენილების და დადგენილების დანართ №1-ით განსაზღვრულ მოთხოვნებს.

ღვინის ტურიზმის საქმიანობის სტატუსის მისაღებად, დაინტერესებული პირი უნდა აკმაყოფილებდეს შემდეგ მოთხოვნებს:

ა) საქართველოს საგადასახადო კოდექსის 88-ე-89-ე მუხლების შესაბამისად, მინიჭებული აქვს მცირე ბიზნესის სტატუსი;

ბ) არის მესაკუთრე ან მოსარგებლე უძრავი ქონების (ვენახის), სადაც ის აწარმოებს (მათ შორის, წურავს) მომხმარებელთა მომსახურების ობიექტის მდებარეობიდან გამომდინარე ადგილწარმოშობის დასახელების ღვინოს;

გ) შეესაბამება ამ დადგენილების და დადგენილების დანართ №1-ით განსაზღვრულ მოთხოვნებს.

დანართი 1-ის სახით დადგენილია  დამატებით მოთხოვნები რასაც უნდა აკმაყოფილებდნენ აგრო და ღვინის ტურიზმით დაკავებული პირები:

დანართი N1

მუხლი 1. აგროტურისტული საქმიანობის სტატუსის მინიჭების სავალდებულო კრიტერიუმები:

ა) დაინტერესებული პირი ფერმერული მეურნეობის ტერიტორიაზე საკუთარი წარმოებული პროდუქტის გამოყენებით ახორციელებს ჩამოთვლილი ტურისტული მომსახურებიდან ერთ-ერთს მაინც: განთავსება, კვებით მომსახურება, საგანმანათლებლო, შემეცნებითი, გასართობი, რეკრეაციული და სხვა აქტივობა;

ბ) დაინტერესებულ პირს აქვს მოწესრიგებული და ესთეტიკურად გამართული ეზო/კარ-მიდამო;

გ) დაინტერესებულ პირს აქვს სტუმრებისთვის განკუთვნილი ცალკეული სანიტარიული კვანძი (გარდა საყოფაცხოვრებო სანიტარიული კვანძისა).

მუხლი 2. ღვინის ტურისტული საქმიანობის სტატუსის მინიჭების სავალდებულო კრიტერიუმები:

ა) დაინტერესებულ პირს აქვს მოწესრიგებული და ესთეტიკურად გამართული ეზო/კარ-მიდამო, მარანი, სადეგუსტაციო სივრცე, ჰიგიენური სანიტარიული კვანძები (სანიტარიული კვანძი არ უნდა იყოს განთავსებული მარნის სივრცეში ან მის სიახლოვეს და უნდა მდებარეობდეს მისგან მოშორებით. ასევე, მომხმარებელთა მომსახურების ობიექტს აქვს სტუმრებისთვის განკუთვნილი ცალკეული სანიტარიული კვანძი, გარდა საყოფაცხოვრებო სანიტარიული კვანძისა);

ბ) მომხმარებელთა მომსახურების ობიექტი აღჭურვილია შესაბამისი ღვინის საწარმოო ჭურჭლეულით (ღვინო არ ინახება იმგვარი პლასტმასის ბიდონებში, რომლებიც არ არის განკუთვნილი ღვინის შესანახად. ასევე, მარანში არ გამოიყენება პლასტმასის ჭურჭელი, მაგ., არ ხდება პლასტმასის დიდი ზომის ჭიქით ქვევრიდან ღვინის ამოღება და ა.შ.);

გ) მომხმარებელთა მომსახურების ობიექტზე, მომხმარებლების გამასპინძლებისთვის უნდა იყოს ღვინისთვის შესაბამისი ჭურჭლეული (მაგ.: მინის ან თიხის დოქი, დეკანტერი, თიხის ან მინის სასმისები, ქვევრის შემთხვევაში ღვინის ამოსაღები ორშიმო, ხაპი, ორხელი ან სხვა);

დ) მომხმარებელს სთავაზობს ღვინოსთან დაკავშირებულ ერთზე მეტ მომსახურებას, მათ შორის, სულ მცირე:

დ.ა) ღვინის დეგუსტაციის მომსახურებას;

დ.ბ) ღვინისა და კერძის შეხამების მომსახურებას;

დ.გ) ადგილისთვის დამახასიათებელი კერძების მასტერკლასს;

დ.დ) რთველში მონაწილეობის შესაძლებლობას;

ე) მომხმარებელთა მომსახურების ობიექტი სრული კალენდარული წლის განმავლობაში აწარმოებს დროის ერთ მონაკვეთში მისაღებ სრულწლოვან სტუმართა მაქსიმალური რაოდენობის გამასპინძლებისთვის საკმარის ღვინოს, რომელიც იანგარიშება შემდეგნაირად:

 A x B x C = D

სადაც, 

A = დეგუსტაციის ფარგლებში ერთი ადამიანის მიერ საშუალოდ მოხმარებული ღვინის რაოდენობა (ფორმულაში მუდმივად გამოიყენება 2.5 ლიტრი);

B = დროის ერთ მონაკვეთში მისაღებ ზრდასრულ სტუმართა მაქსიმალური რაოდენობა;

C = მასპინძლობის დღეების რაოდენობა;

D = დროის ერთ მონაკვეთში მისაღებ სტუმართა მაქსიმალური რაოდენობის გამასპინძლებისთვის საკმარისი ღვინის რაოდენობა.

მაგალითი:

მაგალითი მოცემულია შემდეგ დაშვებებზე დაყრდნობით: B = 10, ხოლო C = 182. 

2.5 ლ. x 10 x 182 = 4,550 ლ. 

ვ) მომხმარებელთა მომსახურების ობიექტი ფუნქციონირებს მთელი წლის განმავლობაში უწყვეტად, ყველა სეზონზე;

ზ) მომხმარებელთა მომსახურების ობიექტის ინფრასტრუქტურა სრულად დასრულებულია და უკვე დაწყებულია სტუმრების მიღება;

თ) კვებითი მომსახურების შეთავაზების შემთხვევაში, ობიექტს აქვს მენიუ.

აგრო და ღვინის ტურიზმით დაკავებული ფიზიკური პირების მიერ მიცრე ბიზნესის სტატუსის მოპოვებისთვის საჭირო დოკუმენტაციის, სტატუსის გაუქმების წინაპირობების და სხვა დეტალებისთვის  შეგიძლიათ გაეცნოთ დამტკიცებულ წესს ქვემოთ მითითებულ ბმულზე.

ცვლილების შესახებ დეტალური ინფორმაცია იხილეთ ბმულზე:

https://infohub.rs.ge/ka/workspace/document/cf2b48a4-51f6-4568-8672-cbcb9c5ff7fa

შპს კრესტონ ჯორჯია

მმართველი პარტნიორი                                                             დავით პაპიაშვილი

საგადასახადო აუდიტის დეპარტამენტის ხელმძღვანელი                     რუსუდან ჭაბუკიანი

The post 2024 წლის დეკემბრის თვის განმავლობაში საქართველოს საგადასახადო კანონმდებლობაში შესული ცვლილებები appeared first on ფინანსური აუდიტი და საგადასახადო მომსახურება.

2024 წლის 16 ოქტომბერს გამოქვეყნდა და გამოქვეყნებისთანავე ძალაში შევიდა ცვლილება „გადასახადების ადმინისტრირების შესახებ“ ფინანსთა მინისტრის N996 ბრძანებით დამტკიცებულ ინსტრუქციაში, რის შედეგადაც განიმარტა ის კრიტერიუმები რომელთა დაკმაყოფილების შემთხვევაშიც შემოსავლების სამსახურს შესაძლებლობა ეძლევა რამოდენიმე გადასახადის გადამხდელი განიხილოს ერთ გადამხდელად და დღგ-სგან თავის არიდების შემთხვევაში დაარიცხოს აღნიშნულ გადამხდელებს გადასახადისა და სანქციის თანხები.

რამოდენიმე გადასახადის გადამხდელის ერთ პირად (ერთ ბიზნესად) განხილვა მოხდება იმ შემთხვევაში თუ ბიზნესის რეალური მფლობელის  მიერ ბიზნესის რეგისტრაცია მოხდება ერთზე მეტ გადამხდელზე, დღგ-ს ბრუნვების 100 000 ლარზე არ გადაჭარბებისა და დღგ-ს გადახდის ვალდებულებისგან თავის არიდების მიზნით, თუ სრულდება ქვემოთ ჩამოთვლილი ორივე წინაპირობა:

1. აღნიშნულ ბიზნეს სუბიექტებს მართავს ერთი და იგივე პირი.
2. აღნიშნულ ბიზნეს სუბიექტების საქმიანობის ადგილი, სახე და შინაარსი იდენტურია.

მაგალითი 1: დავუშვეთ ი/მ და შპს რომლებიც საქმიანობენ როგორც დამოუკიდებელი ბიზნეს სუბიექტები და არ არიან დღგ-ს გადამხდელები.  დავუშვათ რომ ი/მ-ს დაგროვილი დღგ-ით დასაბეგრი ბრუნვა 12 უწყვეტი კალენდარული თვის განმავლობაში არის 95 000 ლარი, ხოლო შპს-ს ბრუნვა კი ამავე პერიოდში არის 90 000 ლარი. თუ შემოსავლების სამსახურის მხრიდან მიჩნეული იქნება რომ აღნიშნულ ორ ბიზნეს სუბიექტს ერთი და იგივე პირი მართავს  და თუ მიჩნეული იქნება რომ შპს-ს და ი/მ-ს საქმიანობის  საქმიანობის ადგილი, სახე და შინაარსი იდენტურია – შემოსავლების სამსახური ორივე გადასახადის გადამხდელს დააყენებს დღგ-ს გადამხდელად და დაარიცხავს დღგ-სა და შესაბამის სანქციის თანხებს, მიუხედავად იმისა რომ თითოეული მათგანის ბრუნვები ნაკლებია 100 000 ლარზე.

1. ცვლილებამდე არსებული მიდგომა

რამოდენიმე გადამხდელის  ერთ პირად განხილვის  რეგულაცია  2023 წლის აპრილის თვიდან ამოქმედდა, რომლის საფუძველზეც  ბიზნესის  რემოდენიმე გადამხდელზე  ხელოვნურად დანაწევრების შემთხვევაში შემოსავლების სამსახურს უფლება ეძლეოდა დაეჯამებინა აღნიშნული გადამხდელების ბრუნვები დღგ-ს 100 000 ლარიანი ზღვარის დათვლისას თუ შესრულდებოდა  ზემოთ ხსენებული 2 პირობა.

თუმცა აღნიშნულის მიუხედავად ხსენებული საკანონმდებლო ნორმა ამ დრომდე არ ამოქმედებულა გამომდინარე იქიდან რომ ფინანსთა მინისტრს უნდა განესაზღვრა ის კრიტერიუმები რა შემთხვევაშიც ექნებოდა შემოსავლების სამსახურს აღნიშნულის უფლება ანუ ის თუ რა შემთხვევები იქნებოდა  მიჩნეული ერთი და იგივე პირის მიერ რამოდენიმე ბიზნეს სუბიექტის მართვად, ასევე რა ჩაითვლებოდა ერთი და იგივე სახის საქმიანობად. სწორედ, ამ მიზნით რამოდენიმე დღის წინ, ფინანსთა მინისტრის N996 ბრძანებას დაემატა ახალი 46¹-ე მუხლი.

1. ცვლილების ამოქმედების შემდეგ გამოყენებული მიდგომა

ცვლილების შედეგად ფინანსთა სამინისტროს მიერ განსაზღვრული იქნა კონკრეტული შეფასების კრიტერიუმები რისი მიხედვითაც  ერთი და იგივე ბიზნესის რემოდენიმე პირზე გაფორმების შემთხვევაში,  თუ ხდება  ყველა ასეთი პირის ჯამური დღგ-ს ბრუნვების 100 000 ლარიან ზღვარზე გადამატება და დღგ-ს გადახდისგან თავის არიდება , შემოსავლების სამსახურის მიერ მოხდება აღნიშნული აღნიშნული რამოდენიმე გადამხდელის ერთ პირად განხილვა, რის შემდეგაც შემოსავლების სამსახური უფლებამოსილია ზემოთ ხსენებული წინაპირობების დაკმაყოფილების შემთხვევაში მოახდინოს დღგ-ს დასაბეგრი ბრუნვების დაჯამება და შესაბამისი გადასახადისა და სანქციის თანხების დარიცხვა ასეთი პირებისთვის.

ინსტრუქციით განსაზღვრული წესის მიხედვით, დღგ-ის გადახდისგან თავის არიდების აღკვეთის მიზნისთვის, საგადასახადო ორგანო მხოლოდ იმ შემთხვევაშია უფლებამოსილია, ერთ დასაბეგრ პირად განიხილოს საქართველოს ტერიტორიაზე დაფუძნებული ნებისმიერი რამოდენიმე პირი თუ სახეზეა ყველა შემდეგი პირობა:

ა) მათ საქმიანობასთან/მართვასთან დაკავშირებულ ძირითად გადაწყვეტილებებს იღებს ერთი და იგივე პირი;

ბ) მათი საქმიანობის ადგილი იდენტურია;

გ) მათი საქმიანობის სახე და შინაარსი იდენტურია;

დ) ჯგუფის მონაწილე რომელიმე წევრი არ არის რეგისტრირებული დღგ-ის გადამხდელად.

ბრძანებაში შეტანილი ცვლილების მიხედვით ითვლება, რომ პირთა საქმიანობასთან/მართვასთან დაკავშირებულ ძირითად გადაწყვეტილებებს იღებს ერთი და იგივე პირი, თუ ერთი და იმავე პირის მიერ მიიღება გადაწყვეტილება ჩამოთვლილთაგან, სულ მცირე, ორ საკითხთან დაკავშირებით:

• კონტრაქტორების შერჩევა და მათთან გარიგებების დადება;
• საქონლის/მომსახურების ფასის განსაზღვრა;
• დასაქმებულ პირთა შერჩევა და მათთან გასაფორმებელი შრომითი ხელშეკრულების პირობების განსაზღვრა;
• ხელმძღვანელი პირის თანამდებობაზე დანიშვნა და თანამდებობიდან გათავისუფლება;
• დივიდენდის განაწილება;
• საწარმოს რეორგანიზაცია;
• ინვესტიციების განხორციელება;
• ვალდებულებათა აღება;
• ვალდებულებათა უზრუნველყოფა;
• სხვა საკითხებთან დაკავშირებული გადაწყვეტილებები, რომლებიც არსებითად დაკავშირებულია პირის საქმიანობასთან ან/და მართვასთან;

ხოლო, საქმიანობის სახე და შინაარსი იდენტურია, თუ სახეზე არის ერთ-ერთი შემდეგი პირობა:

• პირები ახორციელებენ ერთსა და იმავე, ანალოგიური ან მსგავსი საქონლის ან/და მომსახურების მიწოდებას;
• პირები ახორციელებენ ერთსა და იმავე ეკონომიკურ სექტორთან დაკავშირებულ ანალოგიურ ან მსგავს ძირითად საქმიანობას;
• პირების საქმიანობა ორიენტირებულია ერთსა და იმავე სამიზნე მომხმარებელზე;
• პირები ფლობენ ან/და იყენებენ ერთსა და იმავე ძირითად საშუალებებს;
• სხვა გარემოება, რაც მიუთითებს საქმიანობის სახისა და შინაარსის იდენტურობაზე.

მაშასადამე, იმისათვის, რომ საგადასახადო ორგანომ ერთ დასაბეგრ პირად განიხილოს პირთა ჯგუფი (რამოდენიმე შპს ან ი/მ), უნდა სრულდებოდეს „ა“-„დ“ პუნქტებით განსაზღვრული ყველა პირობა. ამასთან, ჩაითვლება, რომ საქმიანობასთან/მართვასთან დაკავშირებულ ძირითად გადაწყვეტილებებს იღებს ერთი და იგივე პირი თუკი აღნიშნული პირი გადაწყვეტილებას იღებს ზემოაღნიშნული საკითხებიდან სულ მცირე ორი საკითხთან დაკავშირებით მაინც, ხოლო საქმიანობის სახე იდენტურად ჩაითვლება, თუკი ჩამოთვლილი პუნქტებიდან სრულდება ერთი პირობა მაინც. ზემოთ ხსენებულთან მიმართებაში მიგვაჩნია რომ ინსტრუქციით განსაზღვრული „იდენტური საქმიანობის“ და „ერთი პირის მიერ მართვის“ განმსაზღვრელი კრიტერიუმები, მაინც გარკვეულ ორაზროვნებას შეიცავს ვინაიდან, კითხვის ნიშნებს წარმოშობს ის საკითხი თუ რა შეიძლება ჩაითვალოს ანალოგიურ/მსგავს საქონლად/მომსახურებად და საქმიანობად, ასევე გაურკვეველია თუ რა იგულისხმება იმ სხვა გარემოებებში რაც მიუთითებს საქმიანობის იდენტურობაზე.

პირთა ჯგუფის ერთ დასაბეგრ პირად განხილვის შემთხვევაში, პირთა ჯგუფის თითოეული წევრის დღგ-ის გადამხდელად სავალდებულო რეგისტრაციის მიზნით, დასაბეგრი ოპერაციების საერთო თანხის განსაზღვრისას, მხედველობაში მიიღება ჯგუფის ყველა წევრის მიერ განხორციელებული საქონლის მიწოდების/ მომსახურების გაწევის ოპერაციების ჯამური თანხა, გარდა ამავე ჯგუფის წევრებს შორის განხორციელებული საქონლის მიწოდების/მომსახურების გაწევის ოპერაციების თანხებისა, შესაბამისად ხსენებული ყველა პირის ჯამური ბრუნვების 100 000 ლარზე გადამატების შემთხვევაში მოხდება ყველა პირის დღგ-ს გადამხდელად რეგისტრაცია ერთი და იგივე მომენტში კერძოდ ჯამური დღგ-ს ბრუნვების 100 000 ლარზე  გადამატების მომენტიდან.

თითოეული პირის დღგ-ს რეგისტრაციის მომენტის განსაზღვრის მიზნით ფინანსთა მინისტრის 996-ე ბრძანებაში მოყვენილია შემდეგი მაგალითი:

მაგალითი 2 – ი/მ-ედ რეგისტრირებულმა ფიზიკურმა პირმა გაგამ სამეწარმეო საქმიანობა დაიწყო 2024 წლის თებერვლიდან. იმავე წლის ივნისის თვეში დაარეგისტრირა  შპს „გაგა“, რომლის წილის 100%-ის მფლობელი თავადაა, ხოლო ივლისის თვეში 50/50-პროცენტიანი წილობრივი მონაწილეობით მეუღლესთან ერთად დაარეგისტრირა შპს „გუგა“. სამივე პირისათვის საქმიანობის სახე იდენტურია და არცერთი მათგანი არის რეგისტრირებული დღგ-ის გადამხდელად. ამასთან, დადგინდა, რომ გაგა იღებდა როგორც საკუთარ, ისე საწარმოების საქმიანობასთან დაკავშირებულ ძირითად გადაწყვეტილებებს. მათ მიერ განხორციელებული ბრუნვები შეადგენს:

შედეგად, საგადასახადო ორგანოს უფლება აქვს, ინდივიდუალური მეწარმე, შპს „გაგა“ და შპს „გუგა“ განიხილოს ერთ დასაბეგრ პირად, რადგან მოცემულ შემთხვევაში, სახეზეა ახალი 46^​1 მუხლის პირველი პუნქტით გათვალისწინებული ყველა პირობა. შესაბამისად, დღგ-ის გადამხდელად სავალდებულო რეგისტრაციის თარიღი და საგადასახადო ვალდებულებები ჯგუფის წევრი თითოეული პირისათვის განისაზღვრება სამივე პირის მიერ განხორციელებული დასაბეგრი ოპერაციების ჯამური თანხის გათვალისწინებით – აგვისტოს თვის იმ ოპერაციის განხორციელებიდან, რომლის მიხედვითაც, დასაბეგრი ოპერაციების ჯამურმა თანხამ გადააჭარბა 100 000 ლარს. აქედან გამომდინარე, ინდივიდუალურ მეწარმეს, შპს „გაგას“ და შპს „გუგას“ დღგ-ის სავალდებულო რეგისტრაციის ვალდებულება წარმოეშობათ 2024 წლის 20 აგვისტოს განხორციელებული  ოპერაციით. საგადასახადო ორგანო ვალდებულია ჯგუფის თითოეული წევრი დაარეგისტრიროს დღგ-ის გადამხდელად. აღნიშნულ შემთხვევაში, 2024 წლის 20 აგვისტოს განხორციელებულ ოპერაციაზე შპს „გაგა“, ხოლო ყოველ შემდეგ დასაბეგრ ოპერაციაზე ინდივიდუალური მეწარმე გაგა, შპს „გაგა“ და შპს „გუგა“, ჩაითვლებიან დღგ-ის გადამხდელებად.

ბრძანებაში შეტანილი ცვლილების მიხედვით ერთ დასაბეგრ პირად განხილულ პირთა ჯგუფის წევრები შეიძლება იყვნენ, როგორც ფიზიკური პირები, ისე საწარმოები და ორგანიზაციები, ასევე პირთა გაერთიანებები, რომელიც დამოუკიდებლად მონაწილეობენ სამართლებრივ ურთიერთობებში, მაგრამ არა აქვთ იურიდიული პირის სტატუსი. ამასთან, თითოეული მათგანის დაფუძნების ადგილი უნდა მდებარეობდეს საქართველოს ტერიტორიაზე, ან, ასეთის არარსებობის შემთხვევაში, მათი მუდმივი მისამართი ან საცხოვრებელი ადგილი უნდა იყოს საქართველოში.

ამასთან ბრძანებით განსაზღვრული პირობების არსებობის დადგენა და, შესაბამისად, პირთა ჯგუფის გამოვლენა უნდა განხორციელდეს მხოლოდ და მხოლოდ საგადასახადო შემოწმების ფარგლებში.

The post ფინანსთა სამინისტრომ დღგ-ს გადახდისგან თავის არიდებით დაკავებული რამოდენიმე პირის ერთ პირად განხილვის კრიტერიმები დაამტიცა appeared first on ფინანსური აუდიტი და საგადასახადო მომსახურება.

Kreston Georgia აგრძელებს საგადასახადო კანონმდებლობაში შესული ცვლილებებისა და სიახლეების მიმოხილვას. ამჯერად გთავაზობთ 2024 წლის ივლისის თვეში შესული საკანონმდებლო სიახლეების მიმოხილვას.

სარჩევი

1. ცვლილებები საქართველოს კანონში

1.1. ცვლილებები, რომლებიც განპირობებულია „დაგროვებითი პენსიის შესახებ“ საქართველოს კანონის ახალ რედაქციასთან შესაბამისობაში მოყვანით

1.2. უცხო ქვეყნის მოქალაქის სისტემურ-ელექტრონული ფორმით თამაშობებში მონაწილეობის დაბეგვრა

2. ცვლილებები საქართველოს ფინანსთა მინისტრის ბრძანებებში

2.1. ცვლილება აქციზის დეკლარაციაში

3. ცვლილებები შემოსავლების სამსახურის უფროსის ბრძანებებში

3.1. საგადასახადო დავალიანების ჩამოწერის წესის განსაზღვრა

1. ცვლილებები საქართველოს კანონში

1.1 ცვლილებები, რომლებიც განპირობებულია „დაგროვებითი პენსიის შესახებ“ საქართველოს კანონის ახალ რედაქციასთან შესაბამისობაში მოყვანით

2024 წლის 12 ივლისს გამოქვეყნდა ცვლილება საქართველოს საგადასახადო კოდექსში (შემდგომში, “სსკ“), რომელიც ამოქმედდება 2025 წლის 1 მაისიდან. ცვლილების განხორციელება განპირობებულია „დაგროვებითი პენსიის შესახებ“ საქართველოს კანონში განხორციელებული ცვლილებებით, რის შედეგადაც შეიცვალა სააგენტოს მმართველობითი სტრუქტურა და საპენსიო სააგენტოს დასახელება შეიცვალა სახელწოდებით „საპენსიო ფონდი“.

ცვლილების შედეგად, საქართველოს საგადასახადო კოდექსი შესაბამისობაში მოვიდა „დაგროვებითი პენსიის შესახებ“ საქართველოს კანონის ახალ რედაქციასთან, კერძოდ კი, სსკ-ში საპენსიო სააგენტოს სახელწოდება შეიცვალა საპენსიო ფონდის სახელით და ამასთან დაკავშირებით ახალი რედაქციით ჩამოყალიბდა სსკ-ის 39-ე, 154-ე და 238-ე მუხლები.

ანალოგიურად, „დაგროვებითი პენსიის შესახებ“ საქართველოს კანონის ახალ რედაქციასთან შესაბამისობაში მოყვანის მიზნით, 2024 წლის 12 ივლისს გამოქვეყნდა ცვლილება საქართველოს ადმინისტრაციულ სამართალდარღვევათა კოდექსში, რომელიც ამოქმედდება 2025 წლის 1 მაისიდან. ცვლილების შედეგად, ახალი რედაქციით ჩამოყალიბდა საქართველოს ადმინისტრაციულ სამართალდარღვევათა კოდექსის 2298-ე და 239-ე მუხლები და საპენსიო სააგენტოს სახელწოდება შეიცვალა სახელწოდებით „საპენსიო ფონდი“.

გარდა ამისა, ახალი რედაქციით ჩამოყალიბდა საქართველოს ადმინისტრაციულ სამართალდარღვევათა კოდექსის 16511-ე მუხლი, რომლითაც განისაზღვრება სანქციები დამსაქმებლის მიერ საპენსიო შენატანის განხორციელების ვალდებულების დარღვევის შემთხვევაში. კერძოდ კი, ცვლილებამდე არსებული რედაქციით, „დაგროვებითი პენსიის შესახებ“ საქართველოს კანონის მე-3 მუხლის მე-6 პუნქტის „დ“ ქვეპუნქტით გათვალისწინებული დასაქმებულის მიერ საპენსიო შენატანის განხორციელების ვალდებულების დარღვევის პირველ შემთხვევაზე გათვალისწინებული იყო გაფრთხილება, ხოლო იგივე ქმედებაზე, ჩადენილი განმეორებით _ 500 ლარით დაჯარიმება. ახალი რედაქციით კი აღნიშნული შემთხვევაც, ისევე როგორც სხვა ვალდებულებების დარღვევა, გამოიწვევს ზოგად წესით დაჯარიმებას, რაც გულისხმობს:

• დამსაქმებლის მიერ საკუთარი ან დასაქმებულის სახელით საპენსიო შენატანის განხორციელების ვალდებულების დარღვევა (მიუხედავად გამოვლენილი დარღვევის რაოდენობისა) – გამოიწვევს დაჯარიმებას 500 ლარის ოდენობით.
• იგივე ქმედება, ჩადენილი განმეორებით − გამოიწვევს დაჯარიმებას 1’000 ლარის ოდენობით.

შეგახსენებთ, რომ „დაგროვებითი პენსიის შესახებ“ საქართველოს კანონის მე-3 მუხლის მე-6 პუნქტის „დ“ ქვეპუნქტის მიხედვით, დასაქმებული, რომლის ხელფასიდან გადასახდელი საშემოსავლო გადასახადი არ ექვემდებარება გადახდის წყაროსთან დაკავებას, ხელფასის მიღებიდან არაუგვიანეს 5 სამუშაო დღისა, საპენსიო სააგენტოს მიერ განსაზღვრული წესით ახორციელებს საპენსიო შენატანს დასაბეგრი ხელფასის 4%-ის ოდენობით, ხოლო ამ დასაქმებულის დამსაქმებელი ვალდებულია ხელფასის გადახდისას მას აუნაზღაუროს საპენსიო შენატანი დასაბეგრი ხელფასის 2%-ის ოდენობით.

ცვლილების შესახებ დეტალური ინფორმაცია იხილეთ ბმულზე:

https://matsne.gov.ge/ka/document/view/6225535?publication=0

https://matsne.gov.ge/ka/document/view/6225890?publication=0

1.2. უცხო ქვეყნის მოქალაქის სისტემურ-ელექტრონული ფორმით თამაშობებში მონაწილეობის დაბეგვრა

2024 წლის 11 ივლისს გამოქვეყნდა ცვლილება საქართველოს საგადასახადო კოდექსში, რომელიც ამოქმედდება 2024 წლის 1 დეკემბრიდან. აღნიშნული ცვლილება, გამოწვეული იყო „ლატარიების, აზარტული და მომგებიანი თამაშობების მოწყობის შესახებ“ საქართველოს კანონში შესული ცვლილებით და ეხება უცხო ქვეყნის მოქალაქის სისტემურ-ელექტრონული ფორმით თამაშობებში მონაწილეობას. 

განისაზღვრა საშემოსავლო და მოგების გადასახადებით დაბეგვრის ობიექტი, კერძოდ:

• საგადასახადო კოდექსის მე-80 მუხლს დაემატა 71 ნაწილი, ხოლო 81-ე მუხლს 32 ნაწილი, რომელთა მიხედვითაც ფიზიკური პირის, რომელიც უცხო ქვეყნის მოქალაქეების სისტემურ-ელექტრონული ფორმით ორგანიზებულ ტოტალიზატორის თამაშობებში მონაწილეობის შედეგად, სისტემურ-ელექტრონული ფორმით ტოტალიზატორის თამაშობების ორგანიზებიდან იღებს შემოსავალს, აღნიშნული საქმიანობის ნაწილში საშემოსავლო გადასახადით დაბეგვრის ობიექტია უცხო ქვეყნის მოქალაქეობის მქონე მოთამაშეებისგან მიღებულ ფსონებსა და ამ მოთამაშეებზე გაცემულ მოგებას შორის სხვაობა.

ასეთი ფორმით მიღებული დასაბეგრი შემოსავალი იბეგრება 5%-ით.

ამასთან, საშემოსავლო გადასახადით დაბეგვრისგან თავისუფლდება უცხო ქვეყნის მოქალაქეების მიერ სისტემურ-ელექტრონული ფორმით ორგანიზებულ აზარტულ თამაშობებში ან/და სისტემურ-ელექტრონული ფორმით ორგანიზებულ ტოტალიზატორის თამაშობებში მონაწილეობის შედეგად მიღებული მოგება და სისტემურ-ელექტრონული სათამაშო ანგარიშიდან გატანილი თანხა.

• საგადასახადო კოდექსის 97-ე მუხლს დაემატა 93 ნაწილი, ხოლო 98-ე მუხლს დაემატა მე-5 ნაწილი, რომელთა მიხედვითაც პირის მოგების გადასახადით დაბეგვრის ობიექტია უცხო ქვეყნის მოქალაქეების სისტემურ-ელექტრონული ფორმით ორგანიზებულ ტოტალიზატორის თამაშობებში მონაწილეობის შემთხვევაში აღნიშნული საქმიანობის ნაწილში უცხო ქვეყნის მოქალაქეობის მქონე მოთამაშეებისგან მიღებულ ფსონებსა და ამ მოთამაშეებზე გაცემულ მოგებას შორის სხვაობა.

დასაბეგრი მოგება აღნიშნული საქმიანობის ნაწილში იბეგრება 5%-ით.

ზემოაღნიშნული დაბეგვრის ობიექტების მიხედვით, სისტემურ-ელექტრონული ფორმით ტოტალიზატორის თამაშობების ორგანიზების ნაწილში საანგარიშო პერიოდია კალენდარული თვე.

ცვლილების შესახებ დეტალური ინფორმაცია იხილეთ ბმულზე:

https://matsne.gov.ge/ka/document/view/6206774?publication=0

2. ცვლილებები საქართველოს ფინანსთა მინისტრის ბრძანებებში

2.1 ცვლილება აქციზის დეკლარაციაში

2024 წლის 4 ივლისს გამოქვეყნდა და გამოქვეყნებისთანავე ამოქმედდა ცვლილება ფინანსთა მინისტრის №996 ბრძანებით დამტკიცებულ „გადასახადების ადმინისტრირების შესახებ“ ინსტრუქციაში. კერძოდ კი, ინსტრუქციის დანართი №IV-01-ის, აქციზის დეკლარაციის,  განაყოფი V და განაყოფი VI  ჩამოყალიბდა ახალი რედაქციით.

ცვლილების შედეგად, მითითებულ განაყოფებში სეს ესნ-ის კოდი „3824 90 980 01“ შეიცვალა სეს ესნ-ის ახალი კოდებით „2404 12 000 00 და 2404 19 900 00“. ცვლილება გამოწვეულია, 2024 წელს დამტკიცებული საგარეო-ეკონომიკური საქმიანობის ეროვნული სასაქონლო ნომენკლატურის (სეს ესნ) ახალი რედაქციით, შინაარსობრივად კი დეკლარაციის აღნიშნულ განაყოფებში მითითებული ძველიც და ახალი კოდებიც ეხება ნიკოტინის და თამბაქოს შემცვლელების პროდუქტებს.

ცვლილების შესახებ დეტალური ინფორმაცია იხილეთ ბმულზე:

https://matsne.gov.ge/ka/document/view/6213596?publication=0

3. ცვლილებები შემოსავლების სამსახურის უფროსის ბრძანებებში

3.1. საგადასახადო დავალიანების ჩამოწერის წესის განსაზღვრა

2024 წლის 1 ივლისს გამოქვეყნდა ცვლილება შემოსავლების სამსახურის უფროსის №13446 ბრძანებაში „გადასახადის გადამხდელთა პირადი აღრიცხვის ბარათების წარმოების წესის შესახებ“ მეთოდური მითითების დამტკიცების თაობაზე. ცვლილების შედეგად მეთოდურ მითითებას დაემატა ახალი 9¹ მუხლი და მის საფუძველზე განიმარტა, სსკ-ის 309-ე გარდამავალი დებულებების მუხლის 37-ე ნაწილით განსაზღვრული, საგადასახადო დავალიანების ჩამოწერის წესი.

როგორც მოგეხსნებათ, 2024 წლის 5 ივნისიდან სსკ-ის გარდამავალი დებულებების 309-ე მუხლში განხორციელებული ცვლილების შესაბამისად, საქართველოს ფინანსთა მინისტრის მიერ დადგენილი წესით ჩამოწერას ექვემდებარება ფიზიკური პირის აღიარებული, 2021 წლის 1 იანვრამდე წარმოშობილი და ჩამოწერის მომენტისთვის არსებული საგადასახადო დავალიანება (გადასახადის თანხა და ჯარიმა) და მასზე დარიცხული საურავი. სწორედ ამ ჩანაწერის შესაბამისად შემუშავდა დავალიანების ჩამოწერის წესი. 

ასევე შეგახსენებთ, რომ ფიზიკური პირის საგადასახადო დავალიანება შესაძლებელია ჩამოიწეროს საქართველოს ფინანსთა მინისტრის 2010 წლის 31 დეკემბრის №994 ბრძანების 681 მუხლის შესაბამისად, შემდეგ შემთხვევებში:

ა) გადასახადის გადამხდელის განცხადების საფუძველზე;

ბ) დავის განმხილველი ორგანოს გადაწყვეტილების საფუძველზე;

გ) გადასახადის გადამხდელის მომართვის გარეშე (პროგრამულად ან/და ინდივიდუალური შესწავლის გზით).

მეთოდური მითითების ახალი მუხლით დეტალურად განისაზღვრა ის წესები და პირობები, რის მიხედვითაც ჩამოეწერება ფიზიკურ პირს 2021 წლის 1 იანვრამდე წარმოშობილი საგადასახადო დავალიანება. მათ შორის, აღნიშნული ბრძანების ახალი 9¹ მუხლით განისაზღვრა შემდეგი: 

• 309-ე მუხლის 37-ე ნაწილის „დ“ ქვეპუნქტის თანახმად, დავალიანების ჩამოწერის საკითხის შესწავლას დაექვემდებარება ყველა ფიზიკური პირი (მათ შორის, მეწარმე ფიზიკური პირი), რომელსაც ერიცხება აღიარებული, 2021 წლის 1 იანვრამდე წარმოშობილი და ჩამოწერის მომენტისთვის არსებული, აღიარებული საგადასახადო დავალიანება, მასზე დარიცხული საურავით. 
• გადასახადის გადამხდელის პირადი აღრიცხვის ბარათზე 2021 წლის 1 იანვრის შემდეგ ასახული ოპერაციები, გარდა 2021 წლის 1 იანვრამდე წარმოშობილი საგადასახადო დავალიანების დროებითი ბარათიდან ძირითად ბარათზე გადატანის ოპერაციებისა, არ დაექვემდებარება ჩამოწერას. 
• იმ შემთხვევაში, თუ 2021 წლის 1 იანვრამდე გამოცემული საგადასახადო მოთხოვნ(ებ)ის საფუძველზე პირადი აღრიცხვის ბარათზე დარიცხული თანხების კორექტირება განხორციელდა 2021 წლის 1 იანვრის შემდგომ, კორექტირებული საგადასახადო მოთხოვნ(ებ)ის შედეგად განსაზღვრული საგადასახადო დავალიანება კვლავ განიხილება 2021 წლის 1 იანვრამდე წარმოშობილ დავალიანებად. 
• დავალიანების ჩამოწერისას, მოსაკრებლის და ადმინისტრაციული ჯარიმის ბარათის ნარჩენი ან/და ზედმეტობა არ გაითვალისწინება.

მეთოდურ მითითებაში ასევე დამატებულია მაგალითები, რაც დეტალურად შეგიძლიათ ნახოთ მითითებულ ბმულზე.

ცვლილება ძალაშია 2024 წლის 25 ივნისიდან.

ცვლილების შესახებ დეტალური ინფორმაცია იხილეთ ბმულზე:

https://matsne.gov.ge/ka/document/view/6209236?publication=0

შპს კრესტონ ჯორჯია

მმართველი პარტნიორი                                                             დავით პაპიაშვილი

საგადასახადო აუდიტის დეპარტამენტის ხელმძღვანელი                     რუსუდან ჭაბუკიანი

The post 2024 წლის ივლისის თვის განმავლობაში საქართველოს საგადასახადო კანონმდებლობაში შესული ცვლილებები appeared first on ფინანსური აუდიტი და საგადასახადო მომსახურება.

უძრავი და მოძრავი ქონების, თუ ზოგადად აქტივების საკუთრების მუდმივად განვითარებად სფეროში, თქვენი ქონების ნამდვილი ღირებულების დადგენა არ არის უბრალოდ ხელსაყრელი, არამედ ეს სტრატეგიულად უმნიშვნელოვანესი ნაბიჯია, რომელიც მრავალი პროცესის წარმართვასა და გადაწყვეტილების მიღებაში იკავებს მთავარ ადგილს. ამიტომაც, ამ სტატიაში განვიხილავთ იმას, თუ კონკრეტულად რატომ არის თქვენი უძრავი ან მოძრავი ქონების შეფასება სწორედ ის ფაქტორი, რომელიც ფარულ პოტენციალს დაგანახებთ და გააზრებული ნაბიჯების გადადგმაში დაგეხმარებათ.

ქონების შეფასების უპირატესობები

პირველ რიგში, უნდა აღინიშნოს, რომ უძრავი და მოძრავი ქონების შეფასება გადამწყვეტ როლს თამაშობს თქვენს მიერ დაგროვილი სიმდიდრის ეფექტურ მენეჯმენტსა და სამომავლო გეგმების შედგენაში. ეს, თავის მხრივ, გეხმარებათ აქტივების მართებულ ნავიგაციაში. ამასთან ერთად, გასათვალისწინებელია ისიც, რომ უძრავი ქონების ბაზარი ძალიან დინამიკურია, სადაც მუდმივად განახლებულ ინფორმაციაზე წვდომა წინსვლის მთავარი გასაღებია. შესაბამისად, თავისუფლად შეიძლება ითქვას, რომ ქონების რეგულარული შეფასება ერთგვარი კომპასია, რომელიც ბაზრის ტენდენციების შესწავლასა და თავსებადი სტრატეგიების შედგენაში დაგეხმარებათ. ამ ცოდნით შეიარაღებულებს კი, შეგიძლიათ მიიღოთ ეკონომიკურად გამართლებული გადაწყვეტილებები და შედეგად, დააგროვოთ მეტი სიმდიდრე. 

იმისათვის, რომ საკითხი უკეთ გვესმოდეს ქონების სხვადასხვა ტიპის შემთხვევაში, განვიხილოთ რამდენიმე მათგანის შეფასების დადებითი მხარეები როგორც ფიზიკური, ასევე იურიდიული პირებისთვის:

უძრავი ქონების შეფასება

უძრავი ქონება, ხშირად, ერთ-ერთი ყველაზე მნიშვნელოვანი ინვესტიციაა, რომელსაც ადამიანები თავიანთი ცხოვრების განმავლობაში აკეთებენ. უძრავი ქონების შეფასება, იქნება ეს სახლის შეფასება თუ სხვა, გულისხმობს ქონების სამართლიანი საბაზრო ღირებულების განსაზღვრას, რაც სხვადასხვა მიზეზის გამო, გადამწყვეტი მნიშვნელობის მატარებელია. უპირველეს ყოვლისა, ის უზრუნველყოფს ქონების ღირებულების რეალისტურ და მიუკერძოებელ შეფასებას, რაც გადაწყვეტილების მიღებისას აუცილებელი ფაქტორია როგორც მყიდველებისთვის, ასევე გამყიდველებისთვის.

გამყიდველებისთვის ზუსტი შეფასების ცოდნა ხელს უწყობს კონკურენტუნარიანი და პოტენციური მყიდველისთვის მიმზიდველი ფასის დადგენას, რაც ზრდის ქონების უფრო სწრაფი და მომგებიანი გაყიდვის ალბათობას. მეორეს მხრივ, მყიდველებს შეუძლიათ გამოიყენონ უძრავი ქონების შეფასება იმაში დასარწმუნებლად, რომ ისინი სამართლიან და რეალისტურ ფასს იხდიან კონკრეტული ქონებისთვის. გარდა ამისა, უძრავი ქონების შეფასება ხშირად იპოთეკის დამტკიცებისთვისაც საჭიროა, რაც ამ სერვისს პროცესის განუყოფელ ნაწილად აქცევს.

უფრო მეტიც, გასათვალისწინებელია ის დეტალიც, რომ უძრავი ქონების ღირებულება შეიძლება ბაზრის პირობების, რემონტისა და სხვა ფაქტორების მიხედვითაც იცვლებოდეს. რეგულარული შეფასება ქონების მფლობელების მუდმივ ინფორმირებულებას განაპირობებს იმის შესახებ, თუ რა ღირებულებისაა მათი ინვესტიცია, რაც მათ საშუალებას აძლევს გააზრებული და ობიექტური გადაწყვეტილებები მიიღონ რეფინანსირების, რემონტის ან თუნდაც ქონების გაყიდვის შესახებ.

გარდა ზემოაღნიშნულისა, უძრავი ქონების შეფასება საჭიროა, რადგან მოქმედი კანონმდებლობის მიხედვით, ქონების გადასახადის დათვლა, როგორც წესი, აღნიშნული ქონების საბაზრო ღირებულებიდან შეიძლება განხორციელდეს. შესაბამისად, უძრავი ქონების შეფასების აუცილებლობა, ძალიან ხშირად, იმიტომ არსებობს, რომ ბიუჯეტში გადასახდელი გადასახადები მართებულად გამოვიანგარიშოთ. ფიზიკური პირები, რომელთა შემოსავალი (პირის ან მისი ოჯახის) 40 000 ლარს აღემატება და რომლებიც ქონების გადასახადის გამოანგარიშებისას, თვითნებურად ამცირებენ ქონების გადასახადით დასაბეგრ თანხას, შესაძლებელია დაჯარიმდნენ შემოსავლების სამსახურის მიერ და გარდა ძირითადი გადასახადისა და ჯარიმისა (რომელიც ძირითადი გადასახადის 50%-მდე აღწევს), მათ ასევე შესაძლებელია დაერიცხოთ საურავის თანხები (ძირითადი გადასახადის 0.05% დღეში), რაც ხშირად იმავე თანხამდე აღწევს, რასაც ჯარიმის თანხა შეადგენს. რაც შეეხება იურიდიულ პირებს ზოგადად ისინი ქონებაზე (გარდა მიწისა) ქონების გადასახადს ე.წ. საბალანსო ნარჩენი ღირებულებიდან იხდიან და არა საბაზრო ღირებულებიდან, თუმცა ამის მიუხედავად საგადასახადო კანონმდებლობა ითვალისწინებს შემთხვევას როდესაც მაგალითად შენობა-ნაგებობაზე ქონების გადასახადის დათვლა და გადასახადის დარიცხვა შენობის საბაზრო ღირებულებიდან შეიძლება მოხდეს. ამ უკანასკნელ შემთხვევაში, იურიდიულ პირს წარსულ პერიოდზე  დაერიცხება მხოლოდ ძირითადი გადასახადის თანხა (ჯარიმისა და საურავის დარიცხვა არ მოხდება), ხოლო საურავის დარიცხვა მოხდება მოთხოვნის წარმოდგენიდან 30 დღის გასვლის შემდგომ,  ასევე კომპანია ვალდებული იქნება, მომდევნო 3  წლის განმავლობაში, ქონების გადასახადი ქონების საბაზრო ღირებულებიდან გადაიხადოს, რის გამოც კომპანიას დროის მოკლე პერიოდში საკმაოდ დიდი საგადასახადო ვალდებულებები შეიძლება წარმოიშვას, რისი გადაუხდალობის შემთხვევაშიც კომპანიის საქმიანობა შესაძლებელია მნიშვნელოვნად შეფერხდეს.  შესაბამისად იურიდიული პირის მიერ უძრავი ქონების დროულად შეფასებამ კომპანიას მნიშვნელოვანი გართულებები შეუძლია აარიდოს თავიდან.

მოძრავი ქონების შეფასება

უძრავი ქონების გარდა, მოძრავი ქონება, მათ შორის ავტომობილები, ხელოვნების ნიმუშები, ოქროსა და ძვირფასი ქვების ნაკეთობები  და სხვა პირადი ნივთები, მნიშვნელოვანი ღირებულების მატარებელია. მოძრავი ქონების შეფასება საჭირო და უცილებელია სხვადასხვა მიზეზის გამო, მათ შორის, როგორიცაა სადაზღვევო დაფარვა, ქონების განაწილება და განქორწინებისას ანგარიშსწორება.

დაზღვევის შემთხვევაში, ზუსტი შეფასება უზრუნველყოფს თქვენი ძვირფასი ნივთებისთვის ადეკვატური სადაზღვევო დაფარვის მიღებას. დანაკარგის ან დაზიანების შემთხვევაში, შეფასების ანგარიში სანდო დოკუმენტია სადაზღვევო ანაზღაურების მოთხოვნისას, რაც დაგეხმარებათ თქვენი აქტივების შესაბამისი ღირებულების აღდგენაში.

ქონების განაწილება გულისხმობს აქტივების გადანაწილებას მემკვიდრეებს ან ბენეფიციარებს შორის. მოძრავი ქონების ყოვლისმომცველი შეფასება ხელს უწყობს სამართლიან განაწილებას, ოჯახის წევრებს შორის დავის თავიდან აცილებას და იმის უზრუნველყოფას, რომ თითოეული მხარე მიიღებს ქონების სამართლიან და ადეკვატურ წილს.

განქორწინების პროცესის დროს, აქტივების გაყოფა შეიძლება სადავო საკითხი აღმოჩნდეს. მოძრავი ქონების შეფასებას გადამწყვეტი როლის შესრულება შეუძლია აქტივების ღირებულების განსაზღვრაში, რაც ხელს უწყობს უფრო გამარტივებულ და სამართლიან განაწილების პროცესს, სადაც ორივე მხარე კმაყოფილია.

ბიზნესის შეფასება

ბიზნესის მფლობელებისთვის, მათი კომპანიის ღირებულების გაგება მნიშვნელოვანია  სტრატეგიული დაგეგმვის, რეორგანიზაციის (მ.შ. კომპანიათა  შერწყმის), შესყიდვისა და მემკვიდრეობის საკითხების გადაწყვეტისთვის. ბიზნესის შეფასება სხვადასხვა ფაქტორის საფუძვლიან ანალიზს მოიცავს, მათ შორის, ფინანსური მაჩვენებლების, ბაზრის პირობებისა და ინდუსტრიის ტენდენციების ჩათვლით.

ბიზნესის შეფასება შესაძლოა ძალიან კარგად გამოიყენოთ ინვესტორების ან პარტნიორების მოსაზიდად. ვინაიდან, იგი ბიზნესის ღირებულების მკაფიოდ განსაზღვრასთან ერთად, ნდობისა და სტატუსის ჩამოყალიბებაში გეხმარებათ. 

ავტომობილის შეფასება

მიუხედავად იმისა, რომ ავტომობილი დროთა განმავლობაში ცვდება, მათი საბაზრო ღირებულება შეიძლება განსხვავდებოდეს ისეთი ასპექტების მიხედვით, როგორიცაა გარბენი, ვიზუალური და ტექნიკური მდგომარეობა და ბაზარზე არსებული მოთხოვნა. შესაბამისად, ავტომობილის შეფასება არა მხოლოდ გაყიდვის ან ყიდვის მომენტშია რელევანტური, არამედ დაზღვევის მიზნებისთვისაც. სადაზღვევო კუთხით, ავტომობილის შეფასება გადამწყვეტია იმის უზრუნველსაყოფად, რომ სადაზღვევო დაფარვა შეესაბამებოდეს მანქანის რეალურ ღირებულებას. 

საბოლოოდ, შეიძლება ითქვას, რომ იქნება ეს უძრავი ქონება, მოძრავი ქონება, ბიზნესი თუ სატრანსპორტო საშუალება, ნებისმიერ შემთხვევაში, თქვენი აქტივების შეფასება არის სტრატეგიულად გამართლებული გადაწყვეტილება, რომელსაც მრავალი სარგებლის მოტანა შეუძლია. სწორედ ამიტომ, მნიშვნელოვანია ისარგებლოთ და გამოიყენოთ სანდო, კვალიფიციური და ძლიერი ისტორიის მქონე კომპანიის დახმარებით, რომელიც თქვენი ქონების შეფასების პროცესს გაუძღვება და წარმართავს. რაც მთავარია, Საერთაშორისო აუდიტორული კომპანია Kreston.ge, რომლის ირგვლივაც სფეროს პროფესიონალები და ძლიერი საერთაშორისო პარტნიორები არიან შემოკრებილი, თქვენი საიმედო პარტნიორი ბიზნესის აუდიტის, გადასახადებისა და მ.შ. ქონების შეფასებისასაც გახდება.

The post რატომ უნდა შეაფასოთ თქვენი უძრავი თუ მოძრავი ქონება? – Kreston.ge appeared first on ფინანსური აუდიტი და საგადასახადო მომსახურება.

მემორანდუმი ითვალისწინებს თანამშრომლობას პროფესიული განათლების, პერსონალის განვითარების, აუდიტის სფეროში პროფესიული კადრების დაინტერესებისა და მოზიდვის ხელშემწყობ აქტივობებში, ასევე, გამოცდილებების და ცოდნის გაზიარების ერთობლივ ღონისძიებებში.

მემორანდუმს ხელი მოაწერეს საჯარო აუდიტის ინსტიტუტის დირექტორმა გელა წიკლაურმა და კომპანია „კრესტონ ჯორჯიას” მმართველმა პარტნიორმა ლევან პაპიაშვილმა. „კრესტონ ჯორჯია“ საერთაშორისო ქსელის Kreston Global-ის წევრი და ოფიციალური წარმომადგენელია საქართველოში.

საჯარო აუდიტის ინსტიტუტი პროფესიული ტრენინგების მომსახურებას უწევს სხვადასხვა აუდიტორულ ორგანიზაციას, რომლებიც თავის მხრივ, საუკეთესო პრაქტიკების გამოცდილებას უზიარებენ საჯარო აუდიტის ინსტიტუტს.

The post საჯარო აუდიტის ინსტიტუტმა თანამშრომლობის მემორანდუმი Kreston Georgia – სთან გააფორმდაა appeared first on ფინანსური აუდიტი და საგადასახადო მომსახურება.

Kreston Georgia აგრძელებს საგადასახადო კანონმდებლობაში შესული ცვლილებებისა და სიახლეების მიმოხილვას. ამჯერად გთავაზობთ 2023 წლის აგვისტოს და სექტემბრის თვეებში შესული საკანონმდებლო სიახლეების მიმოხილვას.

სარჩევი

1. ცვლილებები საქართველოს საგადასახადო კოდექსში

     1.1. ტერმინთა დაზუსტება კანონში

2. ცვლილებები საქართველოს ფინანსთა მინისტრის ბრძანებებში

     2.1. მარკირების ნომინალური ღირებულების ანაზღაურება

     2.2. აქციზის დეკლარაციის ცვლილება და ფიქსირებული გადასახადის ფარგლებში დღგ-ის გადამხდელად რეგისტრაციის წესი

     2.3. უცხოეთის დიპლომატიური წარმომადგენლობებისა და მათთან გათანაბრებული საერთაშორისო ორგანიზაციებისათვის სავალდებულო გახდა ახალი ფორმის წარდგენა

     2.4. ბარტერული ოპერაციის საბაზრო ფასით დაბეგვრა

3. ახალი სიტუაციური სახელმძღვანელოები

     3.1. დაქირავებულ პირთა რეესტრში სტაჟიორის ასახვა N2551

     3.2. საიმპორტო საქონელზე გრანტის სტატუსის მინიჭება N2552

     3.3. აქციზური მარკებით საქონლის სავალდებულო ნიშანდების არაჯეროვანი შესრულება N2553

     3.4. იჯარით აღებული ქონების რემონტის დაბეგვრა ქონების გადასახადით N1431

     3.5. ლატარიიდან მიღებული მოგების დაბეგვრა გადახდის წყაროსთან N2436

1. ცვლილებები საქართველოს საგადასახადო კოდექსში

    1.1 ტერმინთა დაზუსტება კანონში

2023 წლის 12 ოქტომბერს გამოქვეყნდა და ამავე თარიღში ძალაში შევიდა ცვლილება საქართველოს საგადასახადო კოდექსში, კერძოდ ახალი რედაქციით ჩამოყალიბდა სსკ-ის 82-ე მუხლის მე-2 ნაწილის „ბ1“ ქვეპუნქტი. ცვლილების მიზანი არის საქართველოს საგადასახადო კოდექსის თავდაცვის კოდექსთან შესაბამისობაში მოყვანა და შესაბამისად მოხდა მხოლოდ ტერმინის დაზუსტება და შინაარსობრივი ცვლილება არ განხორციელებულა. 

ახალი რედაქციით, „იმ პირის მიერ, რომელმაც საქართველოს კანონმდებლობის შესაბამისად, საერთაშორისო მშვიდობისა და უსაფრთხოების შენარჩუნებისა და აღდგენის ოპერაციაში ან სხვა სახის სამშვიდობო საქმიანობაში მონაწილეობასთან დაკავშირებით ჯანმრთელობის მძიმე დაზიანება მიიღო, კალენდარული წლის განმავლობაში მიღებული 6’000 ლარამდე დასაბეგრი შემოსავალი  არ იბეგრება საშემოსავლო გადასახადით”.

2. ცვლილებები საქართველოს ფინანსთა მინისტრის ბრძანებებში

    1.2 მარკირების ნომინალური ღირებულების ანაზღაურება

2023 წლის 4 აგვისტოს გამოქვეყნდა და ძალაში შევიდა ცვლილება „გადასახადების ადმინისტრირების შესახებ“ საქართველოს ფინანსთა მინისტრის N996 ბრძანებით დამტკიცებული ინსტრუქციის გარდამავალ დებულებებში, კერძოდ ახალი რედაქციით ჩამოყალიბდა 112-ე მუხლის მე-13 ნაწილი.

აღნიშნული მუხლის მიხედვით, შერჩეულ პირს, მათთან გაფორმებული ხელშეკრულების საფუძველზე, შემოსავლების სამსახურის მიერ აუნაზღაურდება არააქციზური საქონლის სავალდებულო მარკირების ნომინალური ღირებულება. ცვლილებამდე არსებული რედაქციით აღნიშნული მუხლი ეხებოდა 2023 წლის 31 ივლისის ჩათვლით შერჩეულ პირებს, ცვლილების შედეგად კი განსაზღვრული ვადა გაიზარდა 2025 წლის 31 დეკემბრის თვის ჩათვლით პერიოდამდე.

აღნიშნული ცვლილება ვრცელდება 2023 წლის 1 აგვისტოდან წარმოშობილ სამართლებრივ ურთიერთობებზე.

   1.3 აქციზის დეკლარაციის ცვლილება და ფიქსირებული გადასახადის ფარგლებში დღგ-ის გადამხდელად         რეგისტრაციის წესი

2023 წლის 17 აგვისტოს გამოქვეყნდა და ძალაში შევიდა ცვლილება „გადასახადების ადმინისტრირების შესახებ“ საქართველოს ფინანსთა მინისტრის N996 ბრძანებით დამტკიცებულ ინსტრუქციაში. 

ახალი რედაქციით ჩამოყალიბდა ინსტრუქციის 46-ე მუხლის მე-4 ნაწილი და განიმარტა, რომ დღგ-ის სავალდებულო რეგისტრაციის მიზნებისათვის 100’000 ლარიანი ზღვარის გაანგარიშებისას არ გაითვალისწინება ფიქსირებული გადასახადის გადამხდელის სტატუსის მქონე პირის მიერ ფიქსირებული გადასახადით დასაბეგრი საქმიანობიდან მიღებული შემოსავალი. ამასთან დაკავშირებით დაემატა „მაგალითი 1“:

პირობა:

პირი ახორციელებს ავტომობილების ტექნიკურ მომსახურებას, რაზეც მინიჭებული აქვს ფიქსირებული გადასახადის გადამხდელის სტატუსი. ამასთანავე, პირი დამატებით ეწევა სამშენებლო-სარემონტო საქმიანობას.

ვარიანტი I: პირმა უწყვეტი 12 კალენდარული თვის განმავლობაში  განახორციელა, ფიქსირებული გადასახადით დასაბეგრი საქმიანობის ფარგლებში, 103 000 ლარის მომსახურების გაწევა, ხოლო დამატებით, ნებადართული საქმიანობის ფარგლებში – 58 000 ლარის სამშენებლო-სარემონტო სამუშაოს შესრულება.

ვარიანტი II: პირმა უწყვეტი 12 კალენდარული თვის განმავლობაში  განახორციელა, ფიქსირებული გადასახადით დასაბეგრი საქმიანობის ფარგლებში,  63 000 ლარის მომსახურების გაწევა, ხოლო დამატებითი საქმიანობის ფარგლებში – 108 000 ლარის სამშენებლო-სარემონტო სამუშაოს შესრულება.

შეფასება:

პირველ ვარიანტში: ვინაიდან ფიქსირებული გადასახადის გადამხდელის სტატუსის მქონე პირისთვის, დღგ-ის გადამხდელად რეგისტრაციის ვალდებულების მიზნებისათვის, დღგ-ით დასაბეგრი საქონლის/მომსახურების მიწოდების ოპერაციების ჯამური თანხის განსაზღვრისას ფიქსირებული გადასახადით დასაბეგრი საქმიანობიდან მიღებული შემოსავალი არ გაითვალისწინება, პირს დღგ-ის გადამხდელად რეგისტრაციის ვალდებულება არ წარმოეშობა.

მე-2 ვარიანტში: ვინაიდან ნებადართული დამატებითი საქმიანობის ნაწილში პირს წარმოეშვა დამატებული ღირებულების გადასახადის გადამხდელად რეგისტრაციის ვალდებულება, იგი ვალდებულია გატარდეს დამატებული ღირებულების გადასახადის გადამხდელად რეგისტრაციაში. ამასთან, ფიქსირებული გადასახადის გადამხდელის სტატუსი ექვემდებარება გაუქმებას, კანონმდებლობით დადგენილი წესით.

ცვლილება ასევე შეეხო აქციზის გადასახადს. კერძოდ კი, ცვლილების მიხედვით არსებულ კანონმდებლობასთან შესაბამისობაში მოვიდა აქციზის დეკლარაციის „განაყოფი III“, „განაყოფი IV“, „განაყოფი V“ და „განაყოფი VI“. 

აგრეთვე, სსკ-ის 192-ე მუხლის მე-7 ნაწილის მიზნებისათვის, აქციზით დასაბეგრი ოპერაციის განუხორციელებლობის შემთხვევაში, მატერიალური ფორმის აქციზური მარკების დაბრუნების 6-თვიანი ვადის ათვლა ხორციელდება გადასახადის გადამხდელზე 2023 წლის 18 აპრილის შემდგომ გაცემულ აქციზურ მარკებთან მიმართებაში.

გარდა ამისა, 2912 11 000 00 კოდში (მეთანალი (ფორმალდეჰიდი)) მითითებულ საქონელზე სსკ-ის 194-ე მუხლის მე-5 ნაწილის „ზ“ ქვეპუნქტით აქციზისაგან გათავისუფლების წესი გავრცელდება 2023 წლის 18 აპრილის შემდგომ განხორციელებულ იმპორტთან მიმართებაში.

     1.4 უცხოეთის დიპლომატიური წარმომადგენლობებისა და მათთან გათანაბრებული საერთაშორისო ორგანიზაციებისათვის სავალდებულო გახდა ახალი ფორმის წარდგენა

2023 წლის 22 სექტემბერს გამოქვეყნდა და ძალაში შევიდა ცვლილება „გადასახადების ადმინისტრირების შესახებ“ საქართველოს ფინანსთა მინისტრის N996 ბრძანებით დამტკიცებულ ინსტრუქციაში.

როგორც მოგეხსენებათ, დამქირავებელი, ვალდებულია დაქირავებულ პირთა შესახებ ინფორმაცია ასახოს „დაქირავებულ პირთა რეესტრში“, რომელსაც აწარმოებს შემოსავლების სამსახური. ცვლილების შედეგად, აღნიშნულ რეესტრში დაქირავებულ პირთა შესახებ ინფორმაციის ასახვის ვალდებულება მოეხსნათ უცხოეთის დიპლომატიურ წარმომადგენლობებს და უცხოეთის დიპლომატიურ წარმომადგენლობებთან გათანაბრებულ საერთაშორისო ორგანიზაციებს.

თუმცა, აღნიშნული ორგანიზაციებისათვის სავალდებულო გახდა, საგადასახადო წლის დამთავრებიდან 30 კალენდარული დღის ვადაში, საგადასახადო ორგანოსათვის ფიზიკური პირებისთვის გადახდილი ანაზღაურების, გვარის, სახელის, პირადი ნომრის და ანაზღაურების სახის თაობაზე, ინფორმაციის წარდგენა, დანართი №II-12-ის შესაბამისად.

      1.5 ბარტერული ოპერაციის საბაზრო ფასით დაბეგვრა

2023 წლის 15 აგვისტოს გამოქვეყნდა და ძალაში შევიდა ცვლილება „გადასახადების ადმინისტრირების შესახებ“ საქართველოს ფინანსთა მინისტრის N996 ბრძანებით დამტკიცებულ ინსტრუქციაში. ცვლილება უკავშირდება საქართველოს საგადასახადო კოდექსის 73-ე მუხლის ბოლოდროინდელ ცვლილებას.

როგორც უკვე ჩვენთვის ცნობილია, 2023 წლის აპრილის თვეში ახალი რედაქციით ჩამოყალიბდა სსკ-ის 73-ე მუხლის მე-8 ნაწილი, რომლის მიხედვითაც, საგადასახადო ორგანო უფლებამოსილია საქონლის/მომსახურების გაცვლის (ბარტერული) ოპერაციის შემთხვევაში დასაბეგრი თანხის ოდენობა განსაზღვროს საბაზრო ფასით. ამ ნაწილის გამოყენების პირობები და წესები, აგრეთვე შემთხვევები, როდესაც ეს ნაწილი არ გამოიყენება, უნდა განსაზღვრულიყო საქართველოს ფინანსთა მინისტრის მიერ და სწორედ აღნიშნულის განსაზღვრა მოხდა განხორციელებული ცვლილების საფუძველზე.

განხორციელებული ცვლილების შედეგად, საქართველოს ფინანსთა მინისტრის N996 ბრძანებით დამტკიცებულ ინსტრუქციას დაემატა ახალი 483-ე მუხლი, რომლითაც განისაზღვრა გაცვლის (ბარტერული) ოპერაციების შემთხვევაში დღგ-ით დასაბეგრი თანხის საბაზრო ფასით განსაზღვრის წესი და რომლის მიხედვითაც, ოპერაციის თითოეული მხარისთვის დღგ-ით დასაბეგრი თანხა განისაზღვრება მისაღები საქონლის/მომსახურების საბაზრო ფასით დღგ-ის გარეშე, თუ გაცვლის (ბარტერული) ოპერაციის ფარგლებში ხორციელდება უძრავი ნივთის მიწოდება.

ახალ მუხლს თან ახლავს მაგალითი, რომლის მიხედვითაც, თუ ვთქვათ საწარმოსა და ფიზიკურ პირს შორის გაფორმდა გაცვლის (ბარტერული) ხელშეკრულება, რომლის მიხედვითაც, ფიზიკური პირი საწარმოს საკუთრებაში გადასცემს მიწის ნაკვეთს, ხოლო სანაცვლოდ, ამავე მიწის ნაკვეთზე საწარმომ უნდა ააშენოს შენობა-ნაგებობა, რომელშიც განთავსებული ფართების ნაწილს გადასცემს ფიზიკურ პირის საკუთრებაში და მიწის ნაკვეთის საბაზრო ფასია 236’000 ლარი, ასეთ შემთხვევაში, იმის გათვალისწინებით, რომ ადგილი აქვს უძრავი ნივთის მიწოდებას, საწარმოს მიერ ფიზიკური პირისათვის ფართების მიწოდების დღგ-ით დასაბეგრი თანხა უნდა განისაზღვროს მიწის ნაკვეთის საბაზრო ფასით დღგ-ის გარეშე, რაც შეადგენს 200’000 ლარს (236’000/1.18).

აღნიშნული ცვლილებით, მეტად თვალსაჩინო გახდა სსკ-ის 164-ე მუხლის 1-ლი ნაწილით განსაზღვრული დებულება, იმის შესახებ, რომ ბარტერული ოპერაციის შემთხვევაში მიწოდებული საქონელი/მომსახურება უნდა დაიბეგროს სანაცვლოდ მიღებული/მისაღები ანაზღაურების (სანაცვლოდ მიღებული საქონლის/მომსახურების) დღგ-ის გარეშე საბაზრო ფასის შესაბამისად.

თუმცა, კვლავ ბუნდოვანი რჩება ძალზედ მნიშვნელოვანი საკითხი იმის შესახებ, საბაზრო ფასი თუ რა მომენტისთვის უნდა იქნას განსაზღვრული: მაშინ როდესაც ბარტერის ხელშეკრულება გაფორმდა; მაშინ როდესაც ბინების საჯარო რეესტრში გადაფორმება მოხდა; თუ მაშინ როდესაც ბინები შევიდა ექსპლუატაციაში და დადგა მიწოდების ოპერაციის დაბეგვრის მომენტი. დროის ზემოაღნიშნულ სამივე მომენტში მიწის საბაზრო ფასი, არსებული ეკონომიკური გარემოს გათვალისწინებით, მაშინ როდესაც უძრავი ქონების ფასები დინამიკაში მზარდი ტენდენციით ხასიათდება, მოსალოდნელია, რომ არსებითად განსხვავდებოდეს ერთმანეთისგან და შესაბამისად, არსებითი გავლენა მოახდინოს დასაბეგრი ოპერაციის მოცულობაზე. აქედან გამომდინარე, აღნიშნული საკითხი/პრობლემა საჭიროებს დამატებით განმარტებებს და მნიშვნელოვანია, გარკვევით იმის განსაზღვრა, თუ სანაცვლოდ მიღებული მიწის საბაზრო ფასი დროის რა მომენტისათვის უნდა იქნას განსაზღვრული დაბეგვრის მიზნებისათვის.

აგრეთვე, უნდა აღინიშნოს კიდევ ერთი ბუნდოვანება, რაც წარმოდგენილ ცვლილებას თან ახლავს. კერძოდ კი, როგორც ახალ 483-ე მუხლში ვკითხულობთ, რომ სანაცვლოდ მიღებული საქონლის/მომსახურების საბაზრო ფასი გამოიყენება თუ გაცვლის (ბარტერული) ოპერაციის ფარგლებში ხორციელდება უძრავი ნივთის მიწოდება. აღნიშნული კი აჩენს კითხვებს იმასთან დაკავშირებით თუ როგორ მოხდება დასაბეგრი ოპერაციის თანხის განსაზღვრა იმ შემთხვევაში, როდესაც ბარტერული ოპერაციის ერთ-ერთი ან ორივე მხარის მიერ ხდება მოძრავი ქონების ან სულაც მომსახურების მიწოდება. ცვლილების მიხედვით ბუნდოვანია ამ შემთხვევაშიც დღგ-ით დაბეგვრის იგივე წესები გავრცელდება თუ დაბეგვრა მოხდება უძრავი ქონების დაბეგვრისგან განსხვავებული წესით. გარდა ამისა, ცვლილებით არ ხდება იმისა დაზუსტება თუ როგორ უნდა იქნეს განსაზღვრული დღგ-ით დასაბეგრი თანხა თუ ბარტერული ოპერაციის ერთ-ერთი მხარე საქონლის/მომსახურების მიწოდებასთან ერთად ახდენს ფულადი ფორმით ანაზღაურებას.

3. ახალი სიტუაციური სახელმძღვანელოები

2023 წლის 9 აგვისტოს (1,2,3) და 28 სექტემბერს (4,5) გამოქვეყნდა შემოსავლების სამსახურის უფროსის მიერ დამტკიცებული ახალი სიტუაციური სახელმძღვანელოები:

      1.6 დაქირავებულ პირთა რეესტრში სტაჟიორის ასახვა N2551

საწარმო ვალდებულია დაქირავებულ პირთა რეესტრში ასახოს სტაჟიორის შესახებ ინფორმაცია, თუ სტაჟიორი სამუშაოს ასრულებს ანაზღაურების სანაცვლოდ. ხოლო საწარმოს ზემოაღნიშნული ვალდებულება არ გააჩნია, თუკი სტაჟიორი სამუშაოს ასრულებს ანაზღაურების გარეშე.

     1.7 საიმპორტო საქონელზე გრანტის სტატუსის მინიჭება N2552

მეწარმე სუბიექტს უფლება აქვს მოითხოვოს საიმპორტო საქონლისათვის გრანტის სტატუსის მინიჭება, იმ შემთხვევაში, თუკი დაცულია პროგრამის თანამონაწილეობის წილი და პირზე გაცემული სახსრები ითვლება გრანტად.

ასე მაგალითად, სახელმწიფო პროგრამის „აწარმოე საქართველოში“ მიერ მიკრო და მცირე მეწარმეობის ხელშეწყობის პროგრამის ფარგლებში მეწარმე სუბიექტს, რომელსაც მინიჭებული ჰქონდა პროგრამის ბენეფიციარის სტატუსი, გამოეყო დაფინანსება (გრანტი). გრანტის მიმღებმა უნდა შეიძინოს 15’000 ლარის ღირებულების დანადგარი, აქედან გრანტის თანხა შეადგენს 11’000 ლარს, ხოლო თანამონაწილეობის თანხა – 4’000 ლარს. გრანტის მიმღებმა პირმა თანადაფინანსებით საზღვარგარეთ შეიძინა საქონელი და მოახდინა მისი იმპორტი. ოპერაცია განხორციელებულია გრანტის მიღებისათვის განსაზღვრული ბენეფიციარის თანამონაწილეობის ხელშეკრულების პირობების დაცვით, შესაბამისად მართლზომიერია, რომ პირმა მოთხოვოს საიმპორტო საქონლისათვის გრანტის სტატუსის მინიჭება.

      1.8 აქციზური მარკებით საქონლის სავალდებულო ნიშანდების არაჯეროვანი შესრულება N2553

თუკი დათვალიერების პროცედურის ფარგლებში გამოვლინდა, რომ პირის მიერ შემოსავლების სამსახურში არ იყო წარდგენილი ინფორმაცია საქონელზე დაკრული აქციზური მარკების თაობაზე ან დაკრული აქციზური მარკების შესახებ ინფორმაცია, კანონმდებლობით განსაზღვრულ ვადებში წარდგენილი იყო არასწორად, ორივე შემთხვევაში პირს სანქციის სახით შეეფარდება გაფრთხილება. ხოლო ქმედების განმეორებით ჩადენის შემთხვევაში გამოიყენება სსკ-ის 291-ე მუხლით გათვალისწინებული სანქცია – 100 ლარი.

     1.9 იჯარით აღებული ქონების რემონტის დაბეგვრა ქონების გადასახადით N1431

სიტუაციური სახელმძღვანელოს გამოცემამდეც ცნობილი იყო შემოსავლების სამსახურის აუდიტის დეპარტამენტის მიდგომის შესახებ, რის მიხედვითაც შემოსავლების სამსახურის მოსაზრებით საწარმოს მიერ იჯარით აღებული ქონების რემონტის ხარჯები (რომელიც განმარტებულია სსკ-ის მე-8 მუხლის 32-ე ნაწილით) უნდა დაბეგრილიყო ქონების გადასახადით, თუმცა პირდაპირი მინიშნება აღნიშნულის შესახებ მოქმედი კანონმდებლობის ამა თუ იმ ნორმაში ან რომელიმე მეთოდურ მითითებაში არ გვქონდა.

შემოსავლების სამსახურმა 28 სექტემბერს გამოსცა სიტუაციური სახელმძღვანელო N1431, რის მიხედვითაც შემოსავლების სამსახური ცალსახად აღნიშნავს, რომ ასეთი კაპიტალური რემონტის ხარჯების დაბეგვრა ქონების გადასახადით აუცილებლად უნდა მოხდეს. შემოსავლების სამსახური აღნიშნავს, რომ აუცილებელია ქონების გადასახადით დაბეგვრა ასევე ისეთი ხარჯებისაც როგორიცაა ფასადის და მიმდებარე ტერიტორიის კეთილმოწყობის: დასუფთავების, გამწვანებისა, გარე განათების ხარჯები.

    1.10ლატარიიდან მიღებული მოგების დაბეგვრა გადახდის წყაროსთან N2436

შემოსავლების სამსახურმა დაამტკიცა N2436 სიტუაციური სახელმძღვანელო, რომლის მიხედვითაც ლატარიიდან მიღებული მოგების დაბეგვრა უნდა მოხდეს გადახდის წყაროსთან იმ შემთხვევაში, თუ მოგებული თანხა მეტია 1’000 ლარზე.

მაგალითის მიხედვით მიმდინარე წლის მარტის თვეში გათამაშებულ ლატარიაში მომგებიანი აღმოჩნდა სამი ბილეთი, ხოლო მოგებულმა თანხამ შეადგინა: I – 500 ლარი; II – 700 ლარი; III – 1300 ლარი.

საწარმომ, რომელმაც მოაწყო გათამაშება (ლატარია), გამარჯვებულ ფიზიკურ პირზე გადახდის წყაროსთან დააკავა საშემოსავლო გადასახადი 1’300 ლარის ღირებულების მოგებიდან, ხოლო დანარჩენი მოგებული თანხა გასცა საშემოსავლო გადასახადის დაკავების გარეშე.

სსკ-ის 82-ე მუხლის პირველი ნაწილის “ღ” ქვეპუნქტის თანახმად, საშემოსავლო გადასახადით დაბეგვრისაგან თავისუფლდება ლატარიიდან მიღებული მოგება, რომლის ღირებულება არ აღემატება 1’000 ლარს. ხოლო სსკ-ის 154-ე მუხლის პირველი ნაწილის “ე” ქვეპუნქტის მიხედვით, გადახდის წყაროსთან გადასახადის დაკავება ევალება საგადასახადო აგენტს, რომელიც არის ლატარიის მომწყობი პირი, რომელიც ფიზიკურ პირს უხდის მოგებას.

შესაბამისად, შემოსავლების სამსახურის მიდგომის მიხედვით საშემოსავლო გადასახადით დაიბეგრება მხოლოდ 1’300 ლარის მოგების გაცემა, ხოლო დანარჩენი განაცემების დაბეგვრა არ მოხდება.

შპს კრესტონ ჯორჯია

მმართველი პარტნიორი                                               დავით პაპიაშვილი

საგადასახადო აუდიტის დეპარტამენტის ხელმძღვანელი       რუსუდან ჭაბუკიანი

The post 2023 წლის აგვისტოსა და სექტემბრის თვეების განმავლობაში საქართველოს საგადასახადო კანონმდებლობაში შესული ცვლილებები appeared first on ფინანსური აუდიტი და საგადასახადო მომსახურება.

2023 წლის 24 ოქტომბერს გამოქვეყნდა ცვლილება საქართველოს საგადასახადო კოდექსში, რომელიც ამოქმედდება 2025 წლის 1 იანვრიდან. განხორციელებული ცვლილების მიხედვით, 2025 წლის 1 იანვრიდან მოგების გადასახადით აღარ დაიბეგრება და ასევე, დღგ-ისგან ჩათვლის უფლებით გათავისუფლდება, „სურსათის დანაკარგებისა და მისი ნარჩენების შემცირების და სურსათის შეწირულების შესახებ“ საქართველოს კანონის შესაბამისად, სურსათის მიწოდების ჯაჭვის მონაწილის მიერ სურსათის საქველმოქმედო ორგანიზაციისთვის/სურსათის ბანკისთვის სურსათის უსასყიდლოდ მიწოდება (გადაცემა).

„სურსათის დანაკარგებისა და მისი ნარჩენების შემცირების და სურსათის შეწირულების შესახებ“ საქართველოს კანონი გამოქვეყნდა და ძალაში შევიდა 2023 წლის 24 ოქტომბრიდან. ეს კანონი უზრუნველყოფს სურსათის დანაკარგებისა და მისი ნარჩენების შემცირებას, ჭარბი სურსათის ბენეფიციარებისთვის გადაცემის (მიწოდების) წახალისებისა და მათთვის უვნებელი სურსათის ხელმისაწვდომობის უზრუნველყოფის გზით. კერძოდ კი, სურსათის მიწოდების ჯაჭვის მონაწილეს უფლება აქვს, სურსათის საქველმოქმედო ორგანიზაციას/სურსათის ბანკს ან უშუალოდ ბენეფიციარს გადასცეს ჭარბი სურსათი შეწირულების სახით, თუ სურსათი ვარგისია ადამიანის მიერ მოხმარებისთვის და აკმაყოფილებს საქართველოს კანონმდებლობით განსაზღვრულ სურსათის უვნებლობის მოთხოვნებს. ფიზიკური ან იურიდიული პირის მიერ, რომელიც სურსათის მიწოდების ჯაჭვში მონაწილეობს, სურსათის გადაცემა საქველმოქმედო ორგანიზაციისთვის ან/და სურსათის ბანკისთვის, გათავისუფლდება მოგების გადასახადის 15%-იანი განაკვეთით დაბეგვრისგან, სსკ-ის 98³-ე მუხლის მე-3 ნაწილის „თ“ ქვეპუნქტის მიხედვით და ასევე, გათავისუფლდება დღგ-ის 18%-იანი განაკვეთით დაბეგვრისგან ჩათვლის უფლებით, სსკ-ის 172-ე მუხლის მე-4 ნაწილის „ჰ“ ქვეპუნქტის მიხედვით.

საქართველოს მთავრობამ, „სურსათის დანაკარგებისა და მისი ნარჩენების შემცირების და სურსათის შეწირულების შესახებ“ საქართველოს კანონის ამოქმედებიდან, 6 თვის ვადაში დადგენილებით უნდა დაამტკიცოს, სურსათის შეწირულებისა და გადანაწილების წესი და სურსათით საქველმოქმედო საქმიანობის ავტორიზაციის წესი, ამასთან არაუგვიანეს 2025 წლის 1 იანვრისა ასევე უნდა დაამტკიცოს სურსათის ნარჩენების მართვის კონცეფცია. ამ სფეროსთვის შეღავათიანი საგადასახადო დაბეგვრის რეჟიმიც 2025 წლის 1 იანვრიდან ამოქმედდება.

The post საქველმოქმედო ორგანიზაციისთვის სურსათის უსასყიდლო მიწოდება მოგების გადასახადითა და დღგ-ით აღარ დაიბეგრება appeared first on ფინანსური აუდიტი და საგადასახადო მომსახურება.