2026 წლის 1 აპრილს გამოქვეყნდა საქართველოს კანონი N1477-Vმს-XIმპ, რის საფუძველზეც ცვლილება შევიდა საქართველოს საგადასახადო კოდექსში და მნიშვნელოვნად შეიცვლა საგარეო-ეკონომიკური საქმიანობის ეროვნული სასაქონლო ნომენკლატურის 8703 სასაქონლო პოზიციით გათვალისწინებული მსუბუქი ავტომობილების აქციზის განაკვეთები, კერძოდ კი მნიშვნელოვნად იზრდება 2 წელზე უფრო ძველი ავტომობილების იმპორტისა და მწარმოებლის მიერ მიწოდებისას დაწესებული აქციზის განაკვეთები. 

როგორ იცვლება აქციზის განაკვეთები მსუბუქ ავტომობილებზე?

ცვლილება ამოქმედდა 2026 წლის 2 აპრილიდან და აქციზის ახალი განაკვეთები განისაზღვრა შემდეგნაირად:

1. 0–6 წლის მსუბუქი ავტომობილების აქციზის გადასახადი შეადგენს:

• 1.50 ლარს / 1 სმ³ ძრავის მოცულობაზე;
• მარჯვენასაჭიანი (ან გადატანილი საჭის მქონე) ავტომობილების შემთხვევაში – აქციზის განაკვეთი 3-ჯერ მეტია;
• მარცხენასაჭიანი ჰიბრიდული მსუბუქი ავტომობილის შემთხვევაში აქციზის განაკვეთი 60%-ით მცირდება.

2. 6 წელზე მეტი ასაკის მსუბუქი ავტომობილების აქციზის გადასახადი შეადგენს:

• 4.50 ლარს / 1 სმ³ ძრავის მოცულობაზე;
• მარჯვენასაჭიანი (ან გადატანილი საჭის მქონე) ავტომობილების შემთხვევაში – აქციზის განაკვეთი 3-ჯერ მეტია.

3. ელექტროძრავიანი მსუბუქი ავტომობილისთვის, რომელსაც საჭე მარჯვენა მხარეს აქვს ან გადატანილი აქვს, აქციზის განაკვეთი ფიქსირებულია და შეადგენს 3 000 ლარს.

აღნიშნულიდან გამომდინარე საგადასახადო კოდექსის ახალი რედაქციით განსაზღვრული განაკვეთები მსუბუქი ავტომობილების იმპორტისა და მიწოდების ოპერაციებზე (მწარმოებლის შემთხვევაში) უმეტესობა შემთხვევაში მნიშვნელოვნად გაზრდილია, გარდა 0-2 წლის ავტომანქანების შემთხვევისა (სადაც აქციზის განაკვეთის ოდენობა არ იცვლება) და ელექტროძრავიანი მარჯვენასაჭიანი ავტომობილებისა სადაც განაკვეთი ექვემდებარება შემცირებას.

რა შემთხვევაში იმოქმედებს ძველი აქციზის განაკვეთები მსუბუქი ავტომობილების იმპორტისას?

ძველი აქციზის წესები კვლავ ვრცელდება იმ ავტომობილებზე, რომლებიც 2026 წლის 2 აპრილამდე: 

• უკვე იყვნენ ტრანსპორტირების პროცესში და ეს დასტურდება შესაბამისი დოკუმენტით (კონოსამენტი, CMR თუ სხვა);
• რეგისტრაციის პროცესი უკვე დაწყებული იყო. კერძოდ, ავტომობილის საქართველოს შინაგან საქმეთა სამინისტროს მონაცემთა ავტომატიზებულ ბაზაში რეგისტრაცია/ასახვა ან გადამზიდავ სატრანსპორტო საშუალებაზე საქონლისა და სატრანსპორტო საშუალების აღრიცხვის მოწმობის/რკინიგზის ელექტრონული აღრიცხვის მოწმობის გამოწერა 2026 წლის 2 აპრილამდე განხორციელდა.

როგორ მოხდება ავტომობილების წლოვანების განსაზღვრა ახალი განაკვეთის განსაზღვრის მიზნით?

მსუბუქი ავტომობილის წლოვანება განისაზღვრება, როგორც სხვაობა დასაბეგრი ოპერაციის განხორციელების წელსა და მსუბუქი ავტომობილის გამოშვების წელს შორის, ხოლო იმპორტის შემთხვევაში – სხვაობა საბაჟო დეკლარაციის რეგისტრაციის წელსა და მსუბუქი ავტომობილის გამოშვების წელს შორის.

ცვლილება  ამოქმედდა 2026 წლის 2 აპრილიდან

ცვლილების შესახებ დეტალური ინფორმაცია იხილეთ მითითებულ ბმულზე:

https://infohub.rs.ge/ka/workspace/document/08f99c5d-74ab-4bae-94c6-0357cb9f8bdb

The post მსუბუქი ავტომობილების იმპორტისა და მიწოდებისას დაწესებული აქციზის განაკვეთები მნიშვნელოვნად გაიზარდა appeared first on ფინანსური აუდიტი და საგადასახადო მომსახურება.

Kreston Georgia აგრძელებს საგადასახადო კანონმდებლობაში შესული ცვლილებებისა და სიახლეების მიმოხილვას. ამჯერად გთავაზობთ 2026 წლის თებერვლის თვეში შესული საკანონმდებლო სიახლეების მიმოხილვას.

სარჩევი

1. ცვლილებები საქართველოს ფინანსთა მინისტრისა და შემოსავლების სამსახურის უფროსის ბრძანებებში

1.1. ცვლილება აქციზური მარკით ნიშანდებული აქციზური ნაწარმის ჩამოწერის წესში

1.2. ცვლილებები სპეციალური დაბეგვრის რეჟიმებთან (მიკრო, მცირე, ფიქსირებული) დაკავშირებით

1.3. ცვლილება საერთაშორისო კონტროლირებული ოპერაციების შესახებ ინფორმაციის წარდგენის წესში

1.4. გადახდის წყაროსთან დაკავებული გადასახადის  პირისთვის დაბრუნების წესი

1.5. დღგ-ის სავალდებულო რეგისტრაციის ვალდებულების დარღვევისას ჯარიმისგან გათავისუფლების ვადების გაფართოება

1. ცვლილებები საქართველოს ფინანსთა მინისტრისა და შემოსავლების სამსახურის უფროსის ბრძანებებში

1.1. ცვლილება აქციზური მარკით ნიშანდებული აქციზური ნაწარმის ჩამოწერის წესში

2026 წლის 5 თებერვალს გამოქვეყნდა საქართველოს ფინანსთა მინისტრის ბრძანებები N33 და N34, რის საფუძველზეც ცვლილებები შევიდა „გადასახადების ადმინისტრირების შესახებ“ ფინანსთა მინისტრის N996 ბრძანებით დამტკიცებულ ინსტრუქციაში და ასევე, „მიმდინარე კონტროლის პროცედურების ჩატარების, სასაქონლო-მატერიალურ ფასეულობათა ჩამოწერის, აღიარებული საგადასახადო დავალიანების დაფარვის, საგადასახადო დავალიანების გადახდევინების უზრუნველყოფის ღონისძიებების განხორციელების, სამართალდარღვევათა საქმისწარმოების წესის დამტკიცების თაობაზე“ ფინანსთა მინისტრის N994 ბრძანებით დამტკიცებულ ინსტრუქციაში. განხორციელებული ცვლილება ეხება აქციზური მარკით ნიშანდებული აქციზური ნაწარმის ჩამოწერას.

კერძოდ, ცვლილების შედეგად, N994 ბრძანებით დამტკიცებული ინსტრუქციის 32-ე მუხლს, რომელიც ადგენს სასაქონლო-მატერიალური ფასეულობების ჩამოწერის პროცედურას, დაემატა შემდეგი შინაარსის მე-6 და მე-7 პუნქტები:

„6. მწარმოებლის მიერ საქართველოში წარმოებული აქციზური მარკით ნიშანდებული აქციზური ნაწარმის ჩამოწერა ხორციელდება ადგილზე გასვლით და სრულდება სრული განადგურებით.

7. ამ მუხლის მე-6 პუნქტით გათვალისწინებულ შემთხვევაში მწარმოებლის მიერ აქციზური მარკით ნიშანდებული, საქართველოში წარმოებული აქციზური ნაწარმის ჩამოწერისას, საგადასახადო ორგანოს უფლებამოსილი პირის მიერ ადგილზე გასვლით დათვალიერებას ექვემდებარება ამ წესის დანართ №24-ში მითითებული აქციზური ნაწარმის საერთო რაოდენობის არანაკლებ 2% შერჩევით. შერჩევა ხორციელდება უდიდესი შეფუთვის აქციზური ნაწარმის ყუთის, ხოლო თითოეული ყუთიდან – აქციზური ნაწარმის არანაკლებ 2% ოდენობის უმცირესი შეფუთვის მიხედვით.“

აღნიშნული ცვლილებიდან გამომდინარე, შესაბამისი კორექტირებები განხორციელდება „სასაქონლო-მატერიალური ფასეულობების ჩამოწერის დოკუმენტში“ (დანართი №24) და განცხადებაში „სასაქონლო-მატერიალური ფასეულობების ჩამოწერის დადასტურების შესახებ“ (დანართი №23).

გარდა ამისა, ცვლილება შეეხო N996 ბრძანებით დამტკიცებულ ინსტრუქციას, კერძოდ ინსტრუქციის 81​2 მუხლს, რომელიც განსაზღვრავს შერჩეული პირის მიერ აქციზური საქონლის სავალდებულო ნიშანდების/არააქციზური საქონლის სავალდებულო მარკირების განხორციელებისას მეწარმე სუბიექტებისა და შერჩეული პირის უფლება-მოვალეობებს, დაემატა 5​1 პუნქტი, ხოლო ინსტრუქციის 112-ე მუხლს – „გარდამავალი დებულებები“, დაემატა 191 პუნქტი, რომელთა მიხედვითაც, მწარმოებლის მიერ აქციზური მარკით ნიშანდებული, საქართველოში წარმოებული აქციზური ნაწარმის ჩამოწერისას, აქციზური მარკები ითვლება უტილიზებულად და არ ექვემდებარება აქციზით დაბეგვრას. ხოლო 2025 წლის პირველი იანვრიდან 2025 წლის პირველ აგვისტომდე, სრული განადგურების ფორმით ჩამოწერილ, საქართველოში წარმოებულ აქციზურ ნაწარმზე, მწარმოებლის მიერ ნიშანდებული აქციზური მარკები, მწარმოებლის მიერ შემოსავლების სამსახურისათვის წარდგენილ განცხადებაში მითითებული სერიული ნომრებით/სერიული ნომრების დიაპაზონით, ითვლება უტილიზებულად და არ ექვემდებარება აქციზით  დაბეგვრას.

ცვლილება ამოქმედდა გამოქვეყნებისთანავე, ანუ 2026 წლის 5 თებერვლიდან.

ცვლილების შესახებ დეტალური ინფორმაცია იხილეთ ბმულზე:

https://matsne.gov.ge/document/view/6777909?publication=0

https://matsne.gov.ge/document/view/6777928?publication=0

1.2. ცვლილებები სპეციალური დაბეგვრის რეჟიმებთან (მიკრო, მცირე, ფიქსირებული) დაკავშირებით

2026 წლის 6 თებერვალს გამოქვეყნდა საქართველოს ფინანსთა მინისტრის N38 ბრძანება, რის საფუძველზეც ცვლილება შევიდა „სპეციალური დაბეგვრის რეჟიმების გამოყენების შესახებ“ ფინანსთა მინისტრის N999 ბრძანებით დამტკიცებულ ინსტრუქციაში. ცვლილება შეეხო, როგორც მიკრო და მცირე ბიზნესის სტატუსი მქონე პირებს, ასევე ფიქსირებული გადასახადის გადამხდელის სტატუსის მქონე პირებს. წარმოგიდგენთ თითოეულ ცვლილებას დეტალურად:

• ცვლილებამდე არსებული რეგულაციით, თუ მიკრო ბიზნესის სტატუსის მქონე ფიზიკური პირის ჯამური ერთობლივი შემოსავალი გადააჭარბებდა 30’000 ლარს ან იგი დაიწყებდა დაქირავებული პირის შრომის გამოყენებას, მას უფლება ქონდა ამ მომენტის დადგომიდან 15 დღის ვადაში საგადასახადო ორგანოსთვის მიემართა მცირე ბიზნესის სტატუსის მიღების მიზნით  და ასეთ შემთხვევაში, მის მიერ მცირე ბიზნესის სტატუსის მინიჭებამდე პერიოდში მიღებული შემოსავალი ექვემდებარება დაბეგვრას მიკრო ბიზნესისთვის დადგენილი წესის შესაბამისად. ხოლო, აღნიშნული 15 დღიანი ვადის დარღვევის და შესაბამისად, ამ უფლების არგამოყენების შემთხვევაში მას ავტომატურად უუქმდებოდა მიკრო ბიზნესის სტატუსი და მის მიერ საანგარიშო წლის განმავლობაში მიღებული შემოსავალი ექვემდებარებოდა საშემოსავლო გადასახადით დაბეგვრას საერთო წესით.

ცვლილების შედეგად, თუნდაც ზემოხსენებული 15 დღიანი ვადის დარღვევის შემთხვევაშიც, ფიზიკურ პირს რჩება შესაძლებლობა, რომ მიმართოს საგადასახადო ორგანოს მცირე ბიზნესის სტატუსის მიღების მიზნით და კალენდარული წლის მთლიანი შემოსავალი არ დაიბეგროს საშემოსავლო გადასახადით დაბეგვრას საერთო წესით. კერძოდ, თუ მიმდინარე საგადასახადო წელს მიკრობიზნესის სტატუსის მქონე ფიზიკური პირის ჯამური ერთობლივი შემოსავალი (აღნიშნული არ ეხება საქართველოს მთავრობის N415 დადგენილებით განსაზღვრული საქმიანობის სახეების მიხედვით მიღებულ შემოსავალს ან განსაზღვრული შემოსავლის სახეებს, რომელიც არ გაითვალისწინება აღნიშნული ზღვრის გაანგარიშებისას):

ა) გადააჭარბებს 30 000 ლარს ან იგი დაიწყებს დაქირავებული პირის შრომის გამოყენებას და ამ მომენტის დადგომიდან 15 დღის ვადაში საგადასახადო ორგანოს მიმართავს მცირე ბიზნესის სტატუსის მიღების მიზნით, ფიზიკურ პირს გაუუქმდება მიკრობიზნესის სტატუსი და მიენიჭება მცირე ბიზნესის სტატუსი გადაჭარბების დღიდან ან დაქირავებული პირის შრომის გამოყენების დაწყების დღიდან და მის მიერ მცირე ბიზნესის სტატუსის მინიჭებამდე პერიოდში მიღებული შემოსავალი დაექვემდებარება დაბეგვრას მიკრობიზნესისთვის დადგენილი წესის შესაბამისად;

ბ) გადააჭარბებს 30 000 ლარს ან იგი დაიწყებს დაქირავებული პირის შრომის გამოყენებას და ამ მომენტის დადგომიდან 15 დღის ვადის გასვლის შემდეგ საგადასახადო ორგანოს მიმართავს მცირე ბიზნესის სტატუსის მიღების მიზნით, ფიზიკურ პირს მიენიჭება მცირე ბიზნესის სტატუსი მიმართვის დღიდან და მის მიერ მიმდინარე წლის დასაწყისიდან მცირე ბიზნესის სტატუსის მინიჭებამდე პერიოდში მიღებული შემოსავალი დაექვემდებარება საშემოსავლო გადასახადით დაბეგვრას საერთო წესით;

გ) არ გადააჭარბებს 30 000 ლარს და საგადასახადო ორგანოს მიმართავს მცირე ბიზნესის სტატუსის მიღების მიზნით, ფიზიკურ პირს მიენიჭება მცირე ბიზნესის სტატუსი მიმართვის დღიდან და მის მიერ მცირე ბიზნესის სტატუსის მინიჭებამდე პერიოდში მიღებული შემოსავალი დაექვემდებარება დაბეგვრას მიკრობიზნესისთვის დადგენილი წესის შესაბამისად.

• დაზუსტდა, რომ მიკრობიზნესის სტატუსის მქონე ფიზიკური პირი ვალდებულია საგადასახადო დოკუმენტების შენახვა უზრუნველყოს 3 წლის ვადით, ნაცვლად 6 წლისა, როგორც ეს ინსტრუქციის ცვლილებამდე არსებული რედაქციით იყო განსაზღვრული. ეს ვადა აითვლება იმ საგადასახადო პერიოდის კალენდარული წლის დასრულებიდან, რომლის საგადასახადო ვალდებულების დადგენისთვისაც იგი არის აუცილებელი.
• ცვლილების შედეგად, მცირე ბიზნესის სტატუსი პირს მიენიჭება საგადასახადო ორგანოსთვის მცირე ბიზნესის სტატუსის მინიჭების თაობაზე განცხადებით მიმართვის დღიდან, ნაცვლად განცხადებით მიმართვის თვის მომდევნო თვის პირველი რიცხვიდან, როგორც ეს ინსტრუქციის ცვლილებამდე არსებული რედაქციით იყო განსაზღვრული. შესაბამისად, პირი მცირე ბიზნესის სტატუსის მქონედ ითვლება განცხადებით მიმართვის თარიღიდან.

მცირე ბიზნესის სტატუსის გაუქმების წესი კი, როდესაც პირი ამ მოთხოვნით თავად მიმართავს საგადასახადო ორგანოს კალენდარული წლის დასრულებამდე, რჩება უცვლელი და სტატუსი გაუქმებულად მიიჩნევა საგადასახადო ორგანოსთვის მიმართვის თვის მომდევნო თვის პირველი რიცხვიდან.

• ცვლილების შედეგად ასევე დაზუსტდა, რომ მეწარმე ფიზიკურ პირს, რომელსაც გაუუქმდა მცირე ბიზნესის სტატუსი, უფლება აქვს სტატუსის ხელახალი მინიჭების მოთხოვნით მიმართოს საგადასახადო ორგანოს სტატუსის გაუქმების წლის  მომდევნო საგადასახადო წლიდან და კვლავ მიიღოს სტატუსი.
• ცვლილების შედეგად, ინსტრუქციაში ჩაიწერა, რომ თუ მცირე ბიზნესის სტატუსის მქონე პირი არ წარადგენს „მცირე ბიზნესის სტატუსის მქონე ფიზიკური პირის საშემოსავლო გადასახადის ყოველთვიურ დეკლარაციას“, არ ითვლება, რომ მან წარადგინა დეკლარაცია, რომლის საფუძველზე გადასახდელად დასარიცხი გადასახადის თანხა ნულის ტოლია (ე.წ. ნულოვანი დეკლარაცია).
• თუკი ფიქსირებული გადასახადის გადამხდელის სტატუსი უნდა მიენიჭოს ფიზიკურ პირს, სხვა მოთხოვნების დაკმაყოფილებასთან ერთად, სავალდებულო გახდა, რომ ფიზიკური პირი იყოს რეგისტრირებული ინდივიდუალურ მეწარმედ. ამასთან, თუკი პირს გაუუქმდა ინდივიდუალურ მეწარმედ რეგისტრაცია, მას ასევე გაუუქმდება ფიქსირებული გადასახადის გადამხდელის სტატუსი.
• ცვლილების შედეგად დაზუსტდა, რომ მიკრო და მცირე ბიზნესის სტატუსი, ასევე ფიქსირებული გადასახადის გადამხდელის სტატუსი უქმდება ფიზიკური პირის გარდაცვალების შემთხვევაში.

ცვლილება ამოქმედდება გამოქვეყნებიდან 30-ე დღეს, ანუ 2026 წლის 8 მარტიდან.

ცვლილების შესახებ დეტალური ინფორმაცია იხილეთ ბმულზე:

https://matsne.gov.ge/document/view/6780342?publication=0

1.3. ცვლილება საერთაშორისო კონტროლირებული ოპერაციების შესახებ ინფორმაციის წარდგენის წესში

2026 წლის 25 თებერვალს გამოქვეყნდა საქართველოს ფინანსთა მინისტრის N52 ბრძანება, რის საფუძველზეც ცვლილება შევიდა „გადასახადების ადმინისტრირების შესახებ“ ფინანსთა მინისტრის N996 ბრძანებით დამტკიცებულ ინსტრუქციაში. ცვლილების შედეგად ინსტრუქციის მე-401 მუხლს – „მოგების გადასახადის ყოველთვიური დეკლარაციის შევსება“ დაემატა ახალი მე-10 პუნქტი, ხოლო 41-ე მუხლს – „მოგების გადასახადის დეკლარაციის შევსება“ დაემატა ახალი მე-20 პუნქტი. 

განხორციელებული ცვლილება ეხება იმ კომპანიებს, რომლებიც ოპერაციებს ახორციელებენ უცხოელ პარტნიორებთან (ურთიერთდამოკიდებულ პირებთან ან/და შეღავათიანი დაბეგვრის მქონე ქვეყნის რეზიდენტებთან). ცვლილების მთავარი მიზანია საერთაშორისო კონტროლირებული ოპერაციების უფრო მკაცრი და სისტემური მონიტორინგი.

კერძოდ კი, ცვლილების საფუძველზე, მარტის თვის საანგარიშო პერიოდის მიხედვით წარსადგენ მოგების გადასახადის ყოველთვიურ დეკლარაციაში და ასევე ყოველწლიურ მოგების გადასახადის დეკლარაციაში (რომლის წარდგენის სავადო თარიღი არის საანგარიშო წლის მომდევნო წლის 1 აპრილამდე და წარადგენენ ის პირები, რომლებიც არ არიან გადასულები მოგების გადასახადის ე.წ. ესტონურ მოდელზე) სავალდებულო გახდა კიდევ ერთი ახალი დანართის შევსება, რომელშიც აისახება ინფორმაცია საქართველოს საგადასახადო კოდექსის 126-129¹ მუხლებით გათვალისწინებული საერთაშორისო კონტროლირებული ოპერაციების შესახებ.

აღნიშნული დანართი ივსება, თუ:

• ყოველთვიური მოგების გადასახადის დეკლარაციის შემთხვევაში – პირის მიერ წინა კალენდარული წლის განმავლობაში;
• ყოველწლიური მოგების გადასახადის დეკლარაციის შემთხვევაში – კალენდარული წლის განმავლობაში.

პირის მიერ განხორციელებული საერთაშორისო კონტროლირებული ოპერაციების ჯამური მოცულობა (თანხა)  აღემატება  500 000  ლარს.  ამასთან, აღნიშნული ოპერაციების ჯამურ მოცულობაში ასევე გაითვალისწინება უსასყიდლოდ გაწეული კონტროლირებული ოპერაციების საბაზრო ღირებულება და არსებული კრედიტორული ან/და დებიტორული დავალიანების მოცულობა.

ასე მაგალითად,

ფაქტობრივი გარემოებები:

2020 წელს საქართველოს რეზიდენტ შპს „A“-სა და შვეიცარიის კონფედერაციის რეზიდენტ  საწარმო  „B“-ს  შორის  გაფორმდა  საკრედიტო  ხაზის  ხელშეკრულება 2 000 000 აშშ დოლარზე. „B“ არის შპს „A“-ს 52%-იანი წილის მფლობელი. 2020, 2022, 2023 და 2024 წლებში საკრედიტო ხაზის ხელშეკრულების საფუძველზე გაფორმებულია 8 სესხის ხელშეკრულება, სულ მიღებულია 1 500 000 აშშ დოლარი, მათ შორის, 2024 წელს მიღებულია სესხები:

1) 15.03.2024 – 350 000 აშშ დოლარი;

2) 15.08.2024 – 300 000 აშშ დოლარი.

ამასთან, 2020-2023 წელს მიღებული სესხები დაბრუნებულია სრულად. 2024 წლის 31 დეკემბერს შპს „A“-მ დააბრუნა მიღებული სესხის ძირი თანხიდან 250 000 აშშ დოლარი, ამავე თარიღისთვის შპს „A“-ს მიერ გადასახდელი პროცენტი შეადგენდა 97 500 აშშ დოლარს, რაც ასევე სრულად გადაიხადა. დეკლარაციის წარდგენის მომენტისთვის ოპერაციების შეფასებასთან დაკავშირებულ დოკუმენტაციას შპს „A“ არ ფლობს.

შედეგი:

2025 წლის მარტის საანგარიშო თვის დეკლარაციაში შპს „A“-ს მიერ დეკლარაციის ახალ დანართში აისახება ინფორმაცია ორ სტრიქონად  შემდეგი სახით:

I ოპერაცია:

1) პირველ – მე-3 სვეტებში მიეთითება – „B“ საწარმოს დასახელება, საიდენტიფიკაციო ნომერი, რეზიდენტობის ქვეყანა – შვეიცარიის კონფედერაცია;

2) მე-4 სვეტში აისახება  ურთიერთდამოკიდებულების ფორმა – პირდაპირ საწარმოს 50 პროცენტზე მეტის ფლობა;

3) მე-5 სვეტში აისახება განხორციელებული ოპერაციის სახე – მიღებული სესხი;

4) მე-6 სვეტში აისახება 2024 წლის განმავლობაში ჯამურად მიღებული სესხის მოცულობა  –  650 000  აშშ  დოლარი,  ხოლო  მე-7 სვეტში  –  სესხის მოცულობა  ოპერაციის განხორციელების დღისათვის საქართველოს ეროვნული ბანკის მიერ შესაბამისი უცხო ქვეყნის ვალუტის მიმართ განსაზღვრული ლარის ოფიციალური გაცვლითი კურსის შესაბამისად  –  1 744 340   ლარი   (350 000*2.6758  (15.03.2024   წლის   აშშ   დოლარის გაცვლითი   კურსი   ლართან   მიმართებით)   +   300 000*2.6927(15.08.2025   წლის   აშშ დოლარის გაცვლითი კურსი ლართან მიმართებით));

5) მე-8 სვეტში აისახება კრედიტორული დავალიანების ნაშთი – 400 000 აშშ დოლარი (650 000 – 250 000);

6) მე-9 სვეტში აისახება მხარეთა შორის გაფორმებული საკრედიტო ხაზის ხელშეკრულების თარიღი – 2020 წელი;

7) მე-10 სვეტში აისახება კონტროლირებული ოპერაციების შეფასებასთან დაკავშირებული დოკუმენტაციის ფლობის შესახებ ინფორმაცია – „არ მაქვს“.

II ოპერაცია:

1) პირველ – მე-3 სვეტებში მიეთითება – „B“ საწარმოს დასახელება, საიდენტიფიკაციო ნომერი, რეზიდენტობის ქვეყანა – შვეიცარიის კონფედერაცია;

2) მე-4 სვეტში აისახება ურთიერთდამოკიდებულების ფორმა – პირდაპირ საწარმოს 50 პროცენტზე მეტის ფლობა;

3) მე-5 სვეტში აისახება განხორციელებული ოპერაციის სახე – საპროცენტო ხარჯი;

4) მე-6 სვეტში აისახება 2024 წლის განმავლობაში საპროცენტო ხარჯის მოცულობა – 97 500  აშშ  დოლარი,  ხოლო  მე-7  სვეტში –მოცულობა  ოპერაციის განხორციელების დღისათვის საქართველოს ეროვნული ბანკის მიერ შესაბამისი უცხო ქვეყნის ვალუტის მიმართ განსაზღვრული ლარის ოფიციალური გაცვლითი კურსის შესაბამისად  –  273 663   ლარი   (97 500*2.8068  (31.12.2024   წლის   აშშ   დოლარის გაცვლითი   კურსი   ლართან   მიმართებით));

5) მე-8 სვეტში აისახება საპროცენტო დავალიანების ნაშთი – 0;

6) მე-9 სვეტში აისახება მხარეთა შორის გაფორმებული საკრედიტო ხაზის ხელშეკრულების თარიღი – 2020 წელი;

7) მე-10 სვეტში აისახება კონტროლირებული ოპერაციების შეფასებასთან დაკავშირებული დოკუმენტაციის ფლობის შესახებ ინფორმაცია – „არ მაქვს“.

შედეგები, შესაძლო შეცდომები და ორაზროვნება

როგორც უკვე აღინიშნა ზემოთ ხსენებული ცვლილების მიხედვით მოითხოვება წინა წლის კონტროლირებული გარიგებების შესახებ დეტალური ინფორმაციის წარდგენა იმ შემთხვევაში თუ ასეთი გარიგებების მოცულობა აღემატება 500 000 ლარს, რის გამოც კომპანიებს  დამატებითი დროის დახარჯვა მოუწევთ აღნიშნული ინფორმაციის წარდგენის მიზნით. გარდა ამისა აღნიშნული ფორმის  შევსებისას გადასახადის გადამხდელი ვალდებულია მიუთითოს აქვს თუ არა მომზადებული კონტროლირებული ოპერაციის დოკუმენტაცია (მაქვს/არ მაქვს/მზადდება/ვაპირებ მომზადებას), რაც გულისხმობს საგადასახადო ორგანოს მხრიდან დამატებითი კონტროლის მექანიზმების ამოქმედებას აღნიშნული მიმართულებით. კონტროლირებული ოპერაციის დოკუმენტაციის (ე.წ. Transfer pricing-ის დასკვნა) მომზადების ვალდებულება (რომელიც საქართველოში სხვადასხვა მიზეზების გამო არ არის იაფი მომსახურება)  კომპანიებს აღნიშნული ცვლილების ამოქმედებამდეც გააჩნდათ, თუმცა მსგავსი ინფორმაციის წარდგენის შედეგად კერძო სექტორი უფრო მეტად ხდება ანგარიშვალდებული საგადასახადო ორგანოს მიმართ.

მიუხედავად იმისა, რომ შემოსავლების სამსახურისა და ფინანსთა სამინისტროს განზრახვა ნათელია, ცვლილებაში აშკარად იკითხება რამდენიმე შესაძლო შეცდომა, კერძოდ ცვლილებით წარმოდგენილი მაგალითის მიხედვით, აღნიშნული ინფორმაციის წარდგენის ვალდებულება წესდება  2025 წლის და მის შემდგომ საანგარიშო პერიოდზე წარსადგენ ინფორმაციაზე. ამ უკანასკნელ შემთხვევაში გაუგებარია ის თუ რატო ხდება 2024 წლის შესახებ ინფორმაციის წარდგენა (როგორც ეს მითითებულ მაგალითშია ხსენებული) თუ აღნიშნული ცვლილება 2025 წლის და მის შემდგომ საანგარიშო პერიოდზე წარსადგენ ინფორმაციაზე ვრცელდება. გარდა ამისა ცვლილება შეიცავს სხვა სახის ორაზროვნებასაც რასთან დაკავშირებითაც იმედს ვიტოვებთ  რომ ხარვეზების გასწორება უმოკლეს დროში იქნება შესაძლებელი. 

ცვლილება ამოქმედდა გამოქვეყნებისთანავე, ანუ 2026 წლის 25 თებერვლიდან და მისი მოქმედება გავრცელდა 2025 წლის და მის შემდგომ საანგარიშო პერიოდზე წარსადგენ ინფორმაციაზე.

ცვლილების შესახებ დეტალური ინფორმაცია იხილეთ ბმულზე:

https://matsne.gov.ge/ka/document/view/6791670?publication=0

1.4. გადახდის წყაროსთან დაკავებული გადასახადის  პირისთვის დაბრუნების წესი

2026 წლის 6 თებერვალს გამოქვეყნდა საქართველოს ფინანსთა მინისტრის N37 ბრძანება, რის საფუძველზეც ცვლილება შევიდა „გადასახადების ადმინისტრირების შესახებ“ ფინანსთა მინისტრის N996 ბრძანებით დამტკიცებულ ინსტრუქციაში. ცვლილების შედეგად ინსტრუქციას დაემატა ახალი 396-ე მუხლი – „საგადასახადო შეღავათით მოსარგებლე პირებისათვის გადახდის წყაროსთან დაკავებული გადასახადის თანხის დაბრუნების წესი“. სიახლე მდგომარეობს შემდეგში:

საგადასახადო ორგანო უფლებამოსილია სსკ-ის 82-ე მუხლის მე-2 ნაწილით (დეტალურად იხ. ქვემოთ) განსაზღვრულ შეღავათით მოსარგებლე პირს (შემდგომში, „პირი“) (გარდა ამავე ნაწილის „ა.ვ“ და „გ“ ქვეპუნქტებით გათვალისწინებული პირებისა) დაუბრუნოს მის მიერ მიღებულ შემოსავლებზე გადახდის წყაროსთან დაკავებული გადასახადის თანხა, საგადასახადო აგენტის მიერ წარდგენილი გადახდის წყაროსთან დაკავებული გადასახადის დეკლარაციის საფუძველზე.  

გადახდის წყაროსთან დაკავებული გადასახადის თანხის დაბრუნების მიზნით პირი ვალდებულია დარეგისტრირდეს გადასახადის გადამხდელ ფიზიკურ პირად და საგადასახადო ორგანოს წარუდგინოს განცხადება „საგადასახადო  შეღავათით მოსარგებლე პირებისთვის გადახდის წყაროსთან დაკავებული გადასახადის თანხის დაბრუნების წესით სარგებლობის თაობაზე“ (დანართი №II-08​7), სადაც მიეთითება საბანკო ანგარიშსწორების ანგარიში, რომელზეც უნდა განხორციელდეს აღნიშნული თანხის დაბრუნება პირადი აღრიცხვის ბარათზე არსებული სალდირებული ზედმეტობის გათვალისწინებით. მითითებული საბანკო ანგარიშსწორების ანგარიშის პირისადმი კუთვნილების დადგენის მიზნით, შემოსავლების სამსახურსა და საბანკო დაწესებულებას შორის საგადასახადო საიდუმლოების, საბანკო საიდუმლოების და პერსონალური მონაცემების შემცველი ინფორმაციის გაცვლა ხორციელდება პირის მიერ ამავე განცხადებით გამოხატული თანხმობის საფუძველზე. საგადასახადო ორგანო პირისთვის გადასახადის დაბრუნებას უზრუნველყოფს  განცხადების წარდგენის თვის მომდევნო საანგარიშო პერიოდიდან (ყოველი თვის 20 რიცხვში).

პირი, გადახდის წყაროსთან დაკავებული გადასახადის თანხის დაბრუნების ამ მუხლით განსაზღვრული წესით სარგებლობის შეწყვეტის მიზნით,  საგადასახადო ორგანოს წარუდგენს განცხადებას „გადახდის წყაროსთან დაკავებული გადასახადის თანხის დაბრუნების წესით სარგებლობის შეწყვეტის თაობაზე“  (დანართი №II-08​8). გადახდის წყაროსთან დაკავებული გადასახადის თანხის დაბრუნების ამ მუხლით განსაზღვრული წესით სარგებლობა წყდება განცხადების წარდგენის წლის მომდევნო წლის პირველი იანვრიდან.

პირისთვის გადახდის წყაროსთან დაკავებული გადასახადის თანხის დაბრუნების შემდეგ დამქირავებლის (საგადასახადო აგენტის) მიერ გადახდის წყაროსთან დაკავებული გადასახადის შესწორებული დეკლარაციის წარდგენა ამ მუხლის საფუძველზე დაბრუნებული თანხის გადაანგარიშების საფუძველია.

აქვე შეგახსენებთ, თუ რა საგადასახადო შეღავათებს აწესებს სსკ-ის 82-ე მუხლის მე-2 ნაწილი. საშემოსავლო გადასახადით არ იბეგრება:

ა) შემდეგ ფიზიკურ პირთა მიერ კალენდარული წლის განმავლობაში მიღებული დასაბეგრი შემოსავალი 3000 ლარამდე:

ა.ა) მეორე მსოფლიო ომის ვეტერანი, საქართველოს ტერიტორიული მთლიანობის, თავისუფლებისა და დამოუკიდებლობისათვის საბრძოლო მოქმედების ვეტერანი და სხვა სახელმწიფოთა ტერიტორიაზე საბრძოლო მოქმედების ვეტერანი საქართველოს მოქალაქეების;

ა.ბ) პირის, რომელსაც მინიჭებული აქვს „ქართვლის დედის“ საპატიო წოდება;

ა.გ) მარტოხელა მშობლის;

ა.დ) პირის, რომელმაც იშვილა ბავშვი (შვილად აყვანიდან 1 წლის განმავლობაში);

ა.ე) პირის, რომელმაც მინდობით აღსაზრდელად აიყვანა ბავშვი;

ა.ვ)  მაღალმთიან  დასახლებაში  მუდმივად  მცხოვრები სამ- ან მეტშვილიანი პირის (რომლის კმაყოფაზეა 18 წლამდე ასაკის სამი ან სამზე მეტი შვილი) მიერ მაღალმთიან დასახლებაში საბიუჯეტო ორგანიზაციიდან  კალენდარული  წლის განმავლობაში ხელფასის სახით მიღებული დასაბეგრი შემოსავალი. მაღალმთიან დასახლებაში მუდმივად მცხოვრებ ერთ- ან ორშვილიან პირს (რომლის კმაყოფაზეა 18 წლამდე ასაკის ერთი ან ორი შვილი) მაღალმთიან დასახლებაში საბიუჯეტო ორგანიზაციიდან კალენდარული წლის განმავლობაში ხელფასის სახით მიღებულ 3 000 ლარამდე დასაბეგრ შემოსავალზე გადასახდელი საშემოსავლო გადასახადი 50 პროცენტით უმცირდება;

ბ) ბავშვობიდან შეზღუდული შესაძლებლობის მქონე პირის, აგრეთვე მკვეთრად ან მნიშვნელოვნად გამოხატული შეზღუდული შესაძლებლობის მქონე პირის მიერ კალენდარული წლის განმავლობაში მიღებული დასაბეგრი შემოსავალი 6 000 ლარამდე;

ბ​​​1) იმ პირის მიერ, რომელმაც საქართველოს კანონმდებლობის შესაბამისად, საერთაშორისო მშვიდობისა და უსაფრთხოების შენარჩუნებისა და აღდგენის ოპერაციაში ან სხვა სახის სამშვიდობო საქმიანობაში მონაწილეობასთან დაკავშირებით ჯანმრთელობის მძიმე დაზიანება მიიღო, კალენდარული წლის განმავლობაში მიღებული 6 000 ლარამდე დასაბეგრი შემოსავალი;

გ) მაღალმთიან დასახლებაში მუდმივად მცხოვრები პირის სტატუსის მქონე პირის მიერ მაღალმთიან დასახლებაში საქმიანობით კალენდარული წლის განმავლობაში მიღებული 6 000 ლარამდე დასაბეგრი შემოსავალი, გარდა საბიუჯეტო ორგანიზაციიდან და სახელმწიფოს მიერ ან მუნიციპალიტეტის მიერ დაფუძნებული სამედიცინო დაწესებულებიდან ხელფასის სახით მიღებული შემოსავლისა.

ცვლილება ამოქმედდება გამოქვეყნებისთანავე, ანუ 2026 წლის 6 თებერვლიდან.

ცვლილების შესახებ დეტალური ინფორმაცია იხილეთ ბმულზე:

https://matsne.gov.ge/ka/document/view/6779881?publication=0

1.5. დღგ-ის სავალდებულო რეგისტრაციის ვალდებულების დარღვევისას ჯარიმისგან გათავისუფლების ვადების გაფართოება

2026 წლის 10 თებერვალს გამოქვეყნდა შემოსავლების სამსახურის უფროსის N2243 ბრძანება, რის საფუძველზეც ცვლილება შევიდა „საგადასახადო/საბაჟო ორგანოს მიერ ცალკეული ღონისძიებების განხორციელების შესახებ მეთოდური მითითების დამტკიცების თაობაზე“ შემოსავლების სამსახურის უფროსის N9021 ბრძანებაში. 

ცვლილება შეეხო, სსკ-ის 282-ე მუხლის პირველი ნაწილის საფუძველზე შეფარდებული ჯარიმისაგან ამავე კოდექსის 269-ე მუხლის მე-7 ნაწილის საფუძველზე (კეთილსინდისიერი გადამხდელი) პირის გათავისუფლების ღონისძიებებს. შეგახსენებთ, რომ აქ საუბარია დღგ-ის გადამხდელად რეგისტრაციის გარეშე საქმიანობისთვის, პირისთვის განსაზღვრულ ჯარიმაზე, რომელიც შეადგენს რეგისტრაციის გარეშე საქმიანობის პერიოდში განხორციელებული დღგ-ით დასაბეგრი ოპერაციების (გარდა გათავისუფლებული ოპერაციებისა) თანხის 5%-ს.

ძველი რედაქციით, ჯარიმისგან გათავისუფლების ერთ-ერთი აუცილებელი პირობა იყო ის, რომ პირს დღგ-ის დეკლარაცია უნდა წარედგინა სამართალდარღვევის ოქმის გამოცემამდე. თუ ოქმი უკვე დაწერილი იყო და პირს არ ქონდა შესაბამისი დღგ-ის დეკლარაციები წარდგენილი, შეღავათი პრაქტიკულად აღარ მოქმედებდა.

ახალმა რედაქციამ შემოიტანა „ალტერნატიული დროითი ფანჯარა”, კერძოდ დღგ-ის დეკლარაციის წარდგენა შესაძლებელია:

ვადა 1: სამართალდარღვევის ოქმის გამოცემამდე (როგორც ადრე);

ან/და ვადა 2: მომსახურების დეპარტამენტის მიერ 269-ე მუხლის მე-7 ნაწილის საფუძველზე ჯარიმისაგან გათავისუფლების შესახებ გადაწყვეტილების მიღების თარიღისთვის, ოღონდ ერთი მნიშვნელოვანი პირობით: დეკლარაციის წარდგენა უნდა მოხდეს არაუგვიანეს სსკ-ის დადგენილ ვადაში (მომდევნო თვის 15 რიცხვი).

მაშასადამე, ადრე, თუ საგადასახადო ორგანო ოპერატიულად გამოცემდა ოქმს მანამ, სანამ გადამხდელი დღგ-ის დეკლარაციას გადააგზავნიდა, პირი კარგავდა ჯარიმის მოხსნის შესაძლებლობას. ახლა, თუ გადამხდელმა დეკლარაციის წარდგენის კანონიერი ვადა (მომდევნო თვის 15 რიცხვი) არ დაარღვია და ჯერ არ არის მიღებული მომსახურების დეპარტამენტის გადაწყვეტილება ჯარიმის მოხსნის თაობაზე, პირს ჯარიმისგან გათავისუფლების შანსი უნარჩუნდება მაშინაც კი, თუ ოქმი უკვე შედგენილია და ჯერ დღგ-ის დეკლარაციები არ არის გაგზავნილი.

ჯარიმის მოხსნის სხვა დანარჩენი აუცილებელი პირობები კი უცვლელი რჩება, შეგახსენებთ, რომ ესენია:

ა) დღგ-ის გადამხდელად  სავალდებულო  რეგისტრაციის  გარეშე  საქმიანობა გამოვლენილია უშუალოდ გადასახადის გადამხდელის მიერ, საგადასახადო ორგანოსთვის შესაბამისი განცხადებით მიმართვის საფუძველზე;

ბ) გადასახადის გადამხდელს საგადასახადო კოდექსის 282-ე მუხლის პირველი ნაწილით გათვალისწინებული სამართალდარღვევის ოქმის შედგენის ან ამავე კოდექსის 269-ე მუხლის მე-7 ნაწილის საფუძველზე ჯარიმისაგან გათავისუფლების შესახებ მომსახურების დეპარტამენტის მიერ გადაწყვეტილების მიღების თარიღისათვის, პირადი აღრიცხვის ბარათზე არ უფიქსირდება აღიარებული საგადასახადო დავალიანება/აღიარებული მოსაკრებელი;

დ) დღგ-ის გადამხდელად სავალდებულო რეგისტრაციის თაობაზე საგადასახადო ორგანოში წარდგენილ განცხადებაში პირმა დააფიქსირა ამ განცხადების წარდგენის თვეში (მიმართვის თვის დასაწყისიდან მიმართვის მომენტამდე) განხორციელებული დღგ-ის დასაბეგრი ბრუნვა.    

ცვლილება  ამოქმედდა ხელმოწერისთანავე, ანუ 2026 წლის 4 თებერვლიდან.

ცვლილების შესახებ დეტალური ინფორმაცია იხილეთ ბმულზე:

https://matsne.gov.ge/ka/document/view/6783237?publication=0

შპს კრესტონ ჯორჯია

მმართველი პარტნიორი                                                             დავით პაპიაშვილი

საგადასახადო აუდიტის დეპარტამენტის ხელმძღვანელი                     რუსუდან ჭაბუკიანი

The post 2026 წლის თებერვლის თვის განმავლობაში საქართველოს საგადასახადო კანონმდებლობაში შესული ცვლილებები appeared first on ფინანსური აუდიტი და საგადასახადო მომსახურება.

2026 წლის 25 თებერვალს გამოქვეყნდა საქართველოს ფინანსთა მინისტრის N52 ბრძანება, რის საფუძველზეც ცვლილება შევიდა „გადასახადების ადმინისტრირების შესახებ“ ფინანსთა მინისტრის N996 ბრძანებით დამტკიცებულ ინსტრუქციაში. ცვლილების შედეგად ინსტრუქციის 40¹ მუხლს – „მოგების გადასახადის ყოველთვიური დეკლარაციის შევსება“ დაემატა ახალი მე-10 პუნქტი, ხოლო 41-ე მუხლს – „მოგების გადასახადის დეკლარაციის შევსება“ დაემატა ახალი მე-20 პუნქტი. 

განხორციელებული ცვლილება ეხება იმ კომპანიებს, რომლებსაც გააჩნიათ ე.წ. საერთაშორისო კონტროლირებული ოპერაციები, რომელთა შესახებაც კომპანიამ ყოველი წლის მარტის თვის დეკლაციაში უნდა წარადგინოს ინფორმაცია წინა წლის თითოეული კონტროლირებული გარიგების შესახებ, რაც გულისხმობს ასეთი გარიგებების შესახებ ისეთი დეტალური ინფორმაციის წარდგენას როგორიცაა გარიგების მეორე მხარის დასახელება, რეზიდენტობა, ურთიერთდამოკიდებულების ფორმა, გარიგების თანხა, კრედიტორული/დებიტორული დავალიანების ნაშთი და სხვა სახის ინფორმაცია. 

რა არის საერთაშორისო კონტროლირებული ოპერაცია და რომელი გარიგებების შესახებ ინფორმაციის წარდგენა ხდება სავალდებულო?

საგადასახადო კოდექსის თავი XVII-ს მიხედვით   საერთაშორისო კონტროლირებული ოპერაციად ითვლება რეზიდენტი საწარმოს მიერ  ე.წ. არარეზიდენტ ურთიერთდამოკიდებული პირთან  ან შეღავათიანი დაბეგვრის ქვეყანაში რეგისტირებულ პირთან (ე.წ. ოფშორი) დადებული გარიგება. 

საგადასახადო კოდექსის 126-ე მუხლის მიხედვით ურთიერთდამოკიდებულებად განიხილება (ამ შემთხვევაში ურთიერთდამოკიდებული პირების 19-ე მუხლის განმარტება არ გამოიყენება) რეზიდენტ საწარმოსა და  არარეზიდენტ საწარმოს შორის ისეთი ურთიერთობის არსებობა როგორიცაა:

ა) ერთი პირი პირდაპირ ან არაპირდაპირ მონაწილეობს მეორე პირის მართვაში, კონტროლში ან კაპიტალში;

ბ) ერთი და იგივე პირები პირდაპირ ან არაპირდაპირ მონაწილეობენ ორი პირის მართვაში, კონტროლში ან კაპიტალში.

პირი პირდაპირ ან არაპირდაპირ მონაწილეობს საწარმოს მართვაში, კონტროლში ან კაპიტალში, თუ:

ა) იგი პირდაპირ ან არაპირდაპირ ფლობს საწარმოს 50 პროცენტზე მეტს;

ბ) იგი პრაქტიკულად ახორციელებს საწარმოს სამეწარმეო გადაწყვეტილებების კონტროლს (დეტალურად განმარტებულია  ფინანსთა მინისტრის 423-ე ბრძანებაში).

შესაბამისად საერთაშორისო კონტროლირებულ ოპერაციად ითვლება ასეთ ურთიერთდამოკიდებულ პირთან ან  ე.წ. ოფშორულ კომპანიასთან დადებული ისეთი გარიგებები ისეთი როგორიცაა: 

1. რეზიდენტის საწარმოს მიერ (მაგ. შპს) ასეთი პირისგან საქონლის შესყიდვა/რეალიზაცია. 
2. რეზიდენტის საწარმოს მიერ (მაგ. შპს)  მსგავსი პირისგან მომსახურების შესყიდვა/რეალიზაცია.

ამასთან ე.წ. ოფშორულ კომპანიასთან დადებული გარიგება არ ჩაითვლება კონტროლირებულ გარიგებად თუ დასტურდება რომ ოფშორულ კომპანიასა და რეზიდენტ საწარმოს შორის  ურთიერთდამოკიდებულება არ არსებობს.

ზოგადად ასეთი გარიგებების დროს რეზიდენტი კომპანია აღნიშნული ცვლილების ამოქმედებამდეც იყო ვალდებული მოემზადებინა შესაბამისი დოკუმენტაცია (ე.წ. Transfer pricing-ის დასკვნა) რომელიც დაადასტურებდა ასეთი გარიგებების საბაზრო ფასთან შესაბამისობას, თუმცა ასეთი გარიგების  შესახებ დეტალური ინფორმაციის წარდენა ამ დრომდე სავალდებული არ იყო.

შესაბამისად იმ შემთხვევაში თუ მაგალითად ქართულ შპს-სა და არარეზიდენტ საწარმოს შორის არსებობს რაიმე სახის „განსაკუთრებული ურთიერთობა“ (50%-ზე მეტი წილის ფლობა ერთმანეთის კაპიტალში ან  საერთო 50%-ზე მეტი წილის მფლობელის პირის არსებობა და სხვა)  ან არარეზიდენტი საწარმო წარმოადგენს ე.წ. ოფშორში რეგისტრირებულ პირს, მათ შორის დადებული საქონლის ან მომსახურების მიწოდების ან შესყიდვის ოპერაციაზე კომპანია შესაძლოა ვალდებული იყოს წარადგინოს დეტალური ინფორმაცია მარტის თვის მოგების გადასახადის დეკლარაციაში მოცემული დანართის სახით.

რა შემთხვევაში და რა ფორმით არის სავალდებულო საერთაშორისო კონტროლირებული ოპერაციის შესახებ დეტალური ინფორმაციის წარდგენა? 

განხორციელებული ცვლილების შესაბამისად მარტის თვის საანგარიშო პერიოდის მიხედვით წარსადგენ მოგების გადასახადის ყოველთვიურ დეკლარაციაში და ასევე ყოველწლიურ მოგების გადასახადის დეკლარაციაში (წარადგენენ ის პირები, რომლებიც არ არიან გადასულები მოგების გადასახადის ე.წ. ესტონურ მოდელზე) სავალდებულო ხდება ახალი დანართის შევსება, რომელშიც აისახება ინფორმაცია საქართველოს საგადასახადო კოდექსის 126-129¹ მუხლებით გათვალისწინებული საერთაშორისო კონტროლირებული ოპერაციების შესახებ, თუ წინა კალენდარული წლის განმავლობაში განხორციელებული საერთაშორისო კონტროლირებული ოპერაციების ჯამური მოცულობა (თანხა)  აღემატება  500 000  ლარს.

იმ შემთხვევაში პირის საერთაშორისო კონტროლირებული ოპერაციების ჯამური მოცულობა (თანხა) წინა წლის მონაცემებით აღემატება  500 000  ლარს, პირი წარადგენს თითოეული ასეთი კონტროლირებული ოპერაციის შესახებ დეტალურ ინფორმაციას შემდეგი ფორმით:   

ამასთან, აღნიშნული ოპერაციების ჯამურ მოცულობაში ასევე გაითვალისწინება უსასყიდლოდ გაწეული კონტროლირებული ოპერაციების საბაზრო ღირებულება და არსებული კრედიტორული ან/და დებიტორული დავალიანების მოცულობა. გარდა ამისა თუ, კონტროლირებული ოპერაციის ფარგლებში ერთი და იმავე ხელშეკრულებიდან გამომდინარე, კალენდარული წლის განმავლობაში განხორციელებულია რამდენიმე კონტროლირებული ოპერაცია, ინფორმაცია აღნიშნული ოპერაციების შესახებ აისახება ერთ სტრიქონად.

გარდა ამისა ამ ქვეპუნქტის მიზნებისთვის კონტროლირებულ ოპერაციად ითვლება:

ა) საქონლის/მომსახურების მიწოდება/შესყიდვა;

ბ) მატერიალური/არამატერიალური აქტივების მიწოდება/შესყიდვა;

გ) მიღებული/გაცემული სესხი; 

დ) საპროცენტო შემოსავალი/ხარჯი;

ე) მიღებული/გაცემული გარანტია;

ვ) სხვა ფინანსური ოპერაციები;

ზ) არამატერიალური აქტივის გამოყენებისთვის გადახდილი/მიღებული თანხები (როიალტი);  

ეს უკანასკნელი მიანიშნებს იმაზე რეზიდენტის საწარმოს მიერ არარეზიდენტი ურთიერთდამოკიდებული  საწარმოსგან ან ე.წ. ოფშორული კომპანიისგან სესხის აღების/გაცემის შემთხვევაში ინფორმაციის წარდგენა მოხდება არა მხოლოდ სესხის პროცენტის თანხებისა და საბოლოო ნაშთის შესახებ,  არამედ სესხის ძირის შესახებაც რაც 2 ცალ-ცალკე სტრიქონად უნდა იქნეს ასახული. 

ცვლილების მიხედვით აღნიშნული ცვლილება ძალაშია გამოქვეყნებისთანავე (25/02/2026) და მისი მოქმედება უნდა გავრცელდეს 2025 წლის და მის შემდგომ საანგარიშო პერიოდზე წარსადგენ ინფორმაციაზე.

უცვლელად გთავაზობთ შესაბამის ბრძანებაში განხილულ მაგალითს. 

ფაქტობრივი გარემოებები:

2020 წელს საქართველოს რეზიდენტ შპს „A“-სა და შვეიცარიის კონფედერაციის რეზიდენტ  საწარმო  „B“-ს  შორის  გაფორმდა  საკრედიტო  ხაზის  ხელშეკრულება 2 000 000 აშშ დოლარზე. „B“ არის შპს „A“-ს 52%-იანი წილის მფლობელი. 2020, 2022, 2023 და 2024 წლებში საკრედიტო ხაზის ხელშეკრულების საფუძველზე გაფორმებულია 8 სესხის ხელშეკრულება, სულ მიღებულია 1 500 000 აშშ დოლარი, მათ შორის, 2024 წელს მიღებულია სესხები:

1) 15.03.2024 – 350 000 აშშ დოლარი;

2) 15.08.2024 – 300 000 აშშ დოლარი.

ამასთან, 2020-2023 წელს მიღებული სესხები დაბრუნებულია სრულად. 2024 წლის 31 დეკემბერს შპს „A“-მ დააბრუნა მიღებული სესხის ძირი თანხიდან 250 000 აშშ დოლარი, ამავე თარიღისთვის შპს „A“-ს მიერ გადასახდელი პროცენტი შეადგენდა 97 500 აშშ დოლარს, რაც ასევე სრულად გადაიხადა. დეკლარაციის წარდგენის მომენტისთვის ოპერაციების შეფასებასთან დაკავშირებულ დოკუმენტაციას შპს „A“ არ ფლობს.

შედეგი:

2025 წლის მარტის საანგარიშო თვის დეკლარაციაში შპს „A“-ს მიერ დეკლარაციის ახალ დანართში აისახება ინფორმაცია ორ სტრიქონად  შემდეგი სახით:

I ოპერაცია (სესხის ძირის ასახვა)

1) პირველ – მე-3 სვეტებში მიეთითება – „B“ საწარმოს დასახელება, საიდენტიფიკაციო ნომერი, რეზიდენტობის ქვეყანა – შვეიცარიის კონფედერაცია;

2) მე-4 სვეტში აისახება  ურთიერთდამოკიდებულების ფორმა – პირდაპირ საწარმოს 50 პროცენტზე მეტის ფლობა;

3) მე-5 სვეტში აისახება განხორციელებული ოპერაციის სახე – მიღებული სესხი;

4) მე-6 სვეტში აისახება 2024 წლის განმავლობაში ჯამურად მიღებული სესხის მოცულობა  –  650 000  აშშ  დოლარი,  ხოლო  მე-7 სვეტში  –  სესხის მოცულობა  ოპერაციის განხორციელების დღისათვის საქართველოს ეროვნული ბანკის მიერ შესაბამისი უცხო ქვეყნის ვალუტის მიმართ განსაზღვრული ლარის ოფიციალური გაცვლითი კურსის შესაბამისად  –  1 744 340   ლარი   (350 000*2.6758  (15.03.2024   წლის   აშშ   დოლარის გაცვლითი   კურსი   ლართან   მიმართებით)   +   300 000*2.6927(15.08.2025   წლის   აშშ დოლარის გაცვლითი კურსი ლართან მიმართებით));

5) მე-8 სვეტში აისახება კრედიტორული დავალიანების ნაშთი – 400 000 აშშ დოლარი (650 000 – 250 000);

6) მე-9 სვეტში აისახება მხარეთა შორის გაფორმებული საკრედიტო ხაზის ხელშეკრულების თარიღი – 2020 წელი;

7) მე-10 სვეტში აისახება კონტროლირებული ოპერაციების შეფასებასთან დაკავშირებული დოკუმენტაციის ფლობის შესახებ ინფორმაცია – „არ მაქვს“.

II ოპერაცია (სესხის პროცენტის ასახვა):

1) პირველ – მე-3 სვეტებში მიეთითება – „B“ საწარმოს დასახელება, საიდენტიფიკაციო ნომერი, რეზიდენტობის ქვეყანა – შვეიცარიის კონფედერაცია;

2) მე-4 სვეტში აისახება ურთიერთდამოკიდებულების ფორმა – პირდაპირ საწარმოს 50 პროცენტზე მეტის ფლობა;

3) მე-5 სვეტში აისახება განხორციელებული ოპერაციის სახე – საპროცენტო ხარჯი;

4) მე-6 სვეტში აისახება 2024 წლის განმავლობაში საპროცენტო ხარჯის მოცულობა – 97 500  აშშ  დოლარი,  ხოლო  მე-7  სვეტში –მოცულობა  ოპერაციის განხორციელების დღისათვის საქართველოს ეროვნული ბანკის მიერ შესაბამისი უცხო ქვეყნის ვალუტის მიმართ განსაზღვრული ლარის ოფიციალური გაცვლითი კურსის შესაბამისად  –  273 663   ლარი   (97 500*2.8068  (31.12.2024   წლის   აშშ   დოლარის გაცვლითი   კურსი   ლართან   მიმართებით));

5) მე-8 სვეტში აისახება საპროცენტო დავალიანების ნაშთი – 0;

6) მე-9 სვეტში აისახება მხარეთა შორის გაფორმებული საკრედიტო ხაზის ხელშეკრულების თარიღი – 2020 წელი;

7) მე-10 სვეტში აისახება კონტროლირებული ოპერაციების შეფასებასთან დაკავშირებული დოკუმენტაციის ფლობის შესახებ ინფორმაცია – „არ მაქვს“.

შედეგები, შესაძლო შეცდომები და ორაზროვნება

როგორც უკვე აღინიშნა ზემოთ ხსენებული ცლილების მიხედვით მოითხოვება წინა წლის კონტროლირებული გარიგებების შესახებ დეტალური ინფორმაციის წარდგენა იმ შემთხვევაში თუ ასეთი გარიგებების მოცულება აღემატება 500 000 ლარს, რის გამოც კომპანიებს  დამატებითი დროის დახარჯვა მოუწევთ აღნიშნული ინფორმაციის წარდგენის მიზნით. გარდა ამისა აღნიშნული ფორმის  შევსებისას გადასახადის გადამხდელი ვალდებულია მიუთითოს აქვს თუ არა მომზადებული კონტროლირებული ოპერაციის დოკუმენტაცია (მაქვს/არ მაქვს/მზადდება/ვაპირებ მომზადებას), რაც გულისხმობს საგადასახადო ორგანოს მხრიდან დამატებითი კონტროლის მექანიზმების ამოქმედებას აღნიშნული მიმართულებით. კონტროლირებული ოპერაციის დოკუმენტაციის (ე.წ. Transfer pricing-ის დასკვნა) მომზადების ვალდებულება (რომელიც საქართველოში სხვადასხვა მიზეზების გამო არ არის იაფი მომსახურება)  კომპანიებს აღნიშნული ცვლილების ამოქმედებამდეც გააჩნდათ, თუმცა მსგავსი ინფორმაციის წარდგენის შედეგად კერძო სექტორი უფრო მეტად ხდება ანგარიშვალდებული საგადასახადო ორგანოს მიმართ.

მიუხედავად იმისა რომ შემოსავლების სამსახურისა და ფინანსთა სამინისტროს განზრახვა ნათელია, ცვლილებაში აშკარად იკითხება რამოდენიმე შესაძლო შეცდომა, ტექნიკური ხარვეზი თუ ორაზროვნება. მაგალითად ზემოთ ხსენებულ მაგალითის მიხედვით ქართულმა შპს-მ აიღო სესხი 650 000 დოლარი, რის შემდეგაც დააბრუნა 250 000 აშშ დოლარი, რის გამოც როგორც მაგალითში ვკითხულობთ გადასახადის გადამხდელმა ნაშთის სახის უნდა ასახოს 400 000 დოლარი როგორც  დებიტორული დავალიანების ნაშთი. ამ მომენტამდე გაუგებარია ის თუ როგორ შეიძლება კომპანიის მიერ აღებული და გადასახდელი სასესხო ვალდებულება მიჩნეული იქნას დებიტორულ დავალიანებად როდესაც საუბარია არათუ მისაღებ არამედ გადასახდელ თანხებზე. 

გარდა ამისა ცვლილების მიხედვით აღნიშნული ინფორმაციის წარდგენის ვალდებულება წესდება  2025 წლის და მის შემდგომ საანგარიშო პერიოდზე წარსადგენ ინფორმაციაზე. ამ უკანასკნელ შემთხვევაში გაუგებარია ის თუ რატო ხდება 2024 წლის შესახებ ინფორმაციის წარდგენა (როგორც ეს მითითებულ მაგალითშია ხსენებული) თუ აღნიშნული ცვლილება 2025 წლის და მის შემდგომ საანგარიშო პერიოდზე წარსადგენ ინფორმაციაზე ვრცელდება.

გარდა ამისა ცვლილება შეიცავს სხვა სახის ორაზროვნებასაც რასთან დაკავშირებითაც იმედს ვიტოვებთ  რომ ხარვეზების გასწორება უმოკლეს დროში იქნება შესაძლებელი. 

ცვლილება ამოქმედდა გამოქვეყნებისთანავე, ანუ 2026 წლის 25 თებერვლიდან და მისი მოქმედება გავრცელდა 2025 წლის და მის შემდგომ საანგარიშო პერიოდზე წარსადგენ ინფორმაციაზე.

ცვლილების შესახებ დეტალური ინფორმაცია იხილეთ ბმულზე:

https://matsne.gov.ge/ka/document/view/6791670?publication=0

The post მოგების გადასახადის დეკლარაციაში საერთაშორისო კონტროლირებული ოპერაციების შესახებ დეტალური ინფორმაციის მითითება სავალდებულო ხდება appeared first on ფინანსური აუდიტი და საგადასახადო მომსახურება.

2026 წლის 6 თებერვალს გამოქვეყნდა საქართველოს ფინანსთა მინისტრის N38 ბრძანება, რის საფუძველზეც ცვლილებები შევიდა „სპეციალური დაბეგვრის რეჟიმების გამოყენების შესახებ“ ფინანსთა მინისტრის N999 ბრძანებით დამტკიცებულ ინსტრუქციაში. ცვლილება შეეხო, როგორც მიკრო და მცირე ბიზნესის სტატუსი მქონე პირებს, ასევე ფიქსირებული გადასახადის გადამხდელის სტატუსის მქონე პირებს. წარმოგიდგენთ თითოეული სტატუსის მიხედვით  განხორციელებული ცვლილებების მიმოხილვას.

მიკრო ბიზნესის სტატუსის მქონე პირების დაბეგვრა აღნიშნული სტატუსის გაუქმებისას

ცვლილებამდე არსებული რეგულაციით, თუ მიკრო ბიზნესის სტატუსის მქონე ფიზიკური პირის ჯამური ერთობლივი შემოსავალი გადააჭარბებდა 30’000 ლარს ან იგი დაიწყებდა დაქირავებული პირის შრომის გამოყენებას, მას უფლება ქონდა ამ მომენტის დადგომიდან საგადასახადო ორგანოსთვის მიემართა მცირე ბიზნესის სტატუსის მიღების მიზნით  და ასეთ შემთხვევაში, მის მიერ მცირე ბიზნესის სტატუსის მინიჭებამდე პერიოდში მიღებული შემოსავალი დაექვემდებარება დაბეგვრას მიკრო ბიზნესისთვის დადგენილი წესის შესაბამისად, თუმცა აღნიშნულისთვის ვადა ორაზროვნად იყო განსაზღვრული.  ამასთან ორაზროვანი იყო მიკრო ბიზნესის სტატუსის საკუთარი ინიციატივით გაუქმების შემთხვევაში  მცირე ბიზნესის სტატუსის მოპოვებისას, წლის დასაწყისიდან სტატუსის გაუქმებამდე მიღებული შემოსავლის დაბეგვრის რეჟიმი.

ცვლილების შედეგად ზუსტდება მიკრო ბიზნესის სტატუსის გაუქმების სხვადასხვა შემთხვევების დროს, წლის დასაწყისიდან გაუქმებამდე პერიოდში მიღებული შემოსავლების დაბეგვრის დეტალები, კერძოდ ეს შემოსავალი 20%-ით დაიბეგრება, თუ მიღებულ შემოსავალზე გავრცელდება მიკრო ბიზნესის სტატუსი და მისი დაბეგვრა არ მოხდება.  ცვლილების მიხედვით მიკრო ბიზნესის სტატუსის გაუქმებისა და მცირე ბიზნესის სტატუსის მოპოვების შემთხვევაში, წლის დასაწყისიდან მიღებული შემოსავლების დაბეგვრა/არ დაბეგვრის საკითხის გადაწყვეტა მოხდება შემდეგნაირად: 

ა) თუ შემოსავალი გადააჭარბებს 30 000 ლარს ან მიკრო მეწარმე დაიწყებს დაქირავებული პირის შრომის გამოყენებას და ამ მომენტის დადგომიდან პირი 15 დღის ვადაში საგადასახადო ორგანოს მიმართავს მცირე ბიზნესის სტატუსის მიღების მიზნით, ფიზიკურ პირს გაუუქმდება მიკრობიზნესის სტატუსი და მიენიჭება მცირე ბიზნესის სტატუსი გადაჭარბების დღიდან ან დაქირავებული პირის შრომის გამოყენების დაწყების დღიდან და მის მიერ მცირე ბიზნესის სტატუსის მინიჭებამდე პერიოდში მიღებული შემოსავალი დაექვემდებარება დაბეგვრას მიკრობიზნესისთვის დადგენილი წესის შესაბამისად (ასეთი შემოსავალი არ დაიბეგრება);

ბ) თუ შემოსავალი გადააჭარბებს 30 000 ლარს ან მიკრო მეწარმე დაიწყებს დაქირავებული პირის შრომის გამოყენებას და ამ მომენტის დადგომიდან პირი 15 დღის ვადის გასვლის შემდეგ საგადასახადო ორგანოს მიმართავს მცირე ბიზნესის სტატუსის მიღების მიზნით, ფიზიკურ პირს მიენიჭება მცირე ბიზნესის სტატუსი მიმართვის დღიდან და მის მიერ მიმდინარე წლის დასაწყისიდან მცირე ბიზნესის სტატუსის მინიჭებამდე პერიოდში მიღებული შემოსავალი დაექვემდებარება საშემოსავლო გადასახადით დაბეგვრას საერთო წესით (ასეთი შემოსავალი დაიბეგრება 20%-ით) ;

გ) თუ შემოსავალი არ გადააჭარბებს 30 000 ლარს და საგადასახადო ორგანოს მიმართავს მცირე ბიზნესის სტატუსის მიღების მიზნით, ფიზიკურ პირს მიენიჭება მცირე ბიზნესის სტატუსი მიმართვის დღიდან და მის მიერ მცირე ბიზნესის სტატუსის მინიჭებამდე პერიოდში მიღებული შემოსავალი დაექვემდებარება დაბეგვრას მიკრობიზნესისთვის დადგენილი წესის შესაბამისად (ასეთი შემოსავალი არ დაიბეგრება);.

შედეგად მიკრო მეწარმის სტატუსის გაუქმებისა და მცირე მეწარმის სტატუსის მოპვებისას წლის დასაწყისიდან ამ მომენტამდე მიღებული შემოსავლების დაბეგვრა ხდება განსხვავებული წესით (ზოგ შემთხვევაში ეს შემოსავალი იბეგრება, ხოლო ზოგიერთ შემთხვევაში არა).

გარდა ამისა დაზუსტდა, რომ მიკრობიზნესის სტატუსის მქონე ფიზიკური პირი ვალდებულია საგადასახადო დოკუმენტების შენახვა უზრუნველყოს 3 წლის ვადით, ნაცვლად 6 წლისა, როგორც ეს ინსტრუქციის ცვლილებამდე არსებული რედაქციით იყო განსაზღვრული. ეს ვადა აითვლება იმ საგადასახადო პერიოდის კალენდარული წლის დასრულებიდან, რომლის საგადასახადო ვალდებულების დადგენისთვისაც იგი არის აუცილებელი.

ცვლილება მცირე ბიზნესის ბიზნესის სტატუსის მინიჭებისას 1%-იანი განაკვეთით დასაბეგრი შემოსავლის დათვლის ნაწილში

გარდა ზემოთ აღნიშნული გაკეთდა ჩანაწერი რომ ზოგადად პირის მიერ მცირე ბიზნესის სტატუსი მიღებისას (არა მხოლოდ მაშინ როდესაც მიკრო მეწარმე იღებს ამ სტატუსს) მცირე ბიზნესის სტატუსი ძალაში შედის ასეთი სტატუსის მინიჭების თაობაზე განცხადებით მიმართვის დღიდან, ნაცვლად განცხადებით მიმართვის თვის მომდევნო თვის პირველი რიცხვისა, როგორც ეს ინსტრუქციის ცვლილებამდე არსებული რედაქციით იყო განსაზღვრული. შესაბამისად მცირე ბიზნესის სტატუსის მიღებისას აღნიშნული რეჟიმით დაბეგვრა (შემოსავლის 1%) ამოქმედდება არა მომდევნო თვის პირველი რიცხვიდან მიღებულ შემოსავალებზე, არამედ მცირე ბიზნესის სტატუსის მიღების თაობაზე განცხადებით მიმართვის თარიღიდან მიღებულ შემოსავალებზე. 

მაგალითი 1:

პირობა:

ფიზიკური პირი, რომელიც რეგისტრირებულია ინდივიდუალურ მეწარმედ, ახორციელებს სურსათით საცალო ვაჭრობას. აღნიშნული საქმიანობის ფარგლებში მის მიერ 2023 და 2024 წლების განმავლობაში მიღებულმა ერთობლივმა შემოსავალმა თითოეული წლის მიხედვით შეადგინა 600 000 ლარი.

პირმა მცირე ბიზნესის სტატუსის მინიჭების მოთხოვნით საგადასახადო ორგანოს მიმართა განცხადებით 2025 წლის 10 იანვარს.

ანალიზი:

მიუხედავად იმისა, რომ გიორგის მიერ 2023 და 2024 წლების განმავლობაში მიღებული ერთობლივი შემოსავალი თითოეული წლის მიხედვით აღემატება 500 000 ლარს, აღნიშნული არ არის მცირე ბიზნესის სტატუსის მინიჭებისათვის შემზღუდველი პირობა. ამასთან, ვაჭრობა არ წარმოადგენს საქართველოს მთავრობის დადგენილების მიხედვით მცირე ბიზნესისთვის აკრძალულ საქმიანობას. გიორგი აკმაყოფილებს საქართველოს საგადასახადო კოდექსის 88-ე მუხლით დადგენილ მცირე ბიზნესის სტატუსის მოთხოვნებს. შესაბამისად, მას უფლება აქვს, მიმართოს საგადასახადო ორგანოს და მიიღოს მცირე ბიზნესის სტატუსი.

შედეგი:

საგადასახადო ორგანო გიორგის ანიჭებს მცირე ბიზნესის სტატუსს და გადასცემს სტატუსის დამადასტურებელ სერტიფიკატს. გიორგი მცირე ბიზნესის სტატუსის მქონედ ჩაითვლება 2025 წლის 10 იანვრიდან. მის მიერ 10 იანვრიდან მიღებული შემოსავალი ექვემდებარება დაბეგვრას სპეციალური დაბეგვრის რეჟიმით.

გარდა ამისა კეთდება  დაზუსტება რომ  მეწარმე ფიზიკურ პირს, რომელსაც გაუუქმდა მცირე ბიზნესის სტატუსი, უფლება აქვს სტატუსის ხელახალი მინიჭების მოთხოვნით მიმართოს საგადასახადო ორგანოს სტატუსის გაუქმების წლის მომდევნო საგადასახადო წლიდან და კვლავ მიიღოს სტატუსი, რითაც გამოირიცხება გაუქმების წელსვე აღნიშნული სტატუსის ხელახლა მიღება. 

მცირე ბიზნესის სტატუსის გაუქმების წესი კი, როდესაც პირი ამ მოთხოვნით თავად მიმართავს საგადასახადო ორგანოს კალენდარული წლის დასრულებამდე, რჩება უცვლელი და სტატუსი გაუქმებულად მიიჩნევა საგადასახადო ორგანოსთვის მიმართვის თვის მომდევნო თვის პირველი რიცხვიდან.

ცვლილების შედეგად, ინსტრუქციაში ჩაიწერა, რომ თუ მცირე ბიზნესის სტატუსის მქონე პირი არ წარადგენს „მცირე ბიზნესის სტატუსის მქონე ფიზიკური პირის საშემოსავლო გადასახადის ყოველთვიურ დეკლარაციას, არ ითვლება, რომ მან წარადგინა დეკლარაცია, რომლის საფუძველზე გადასახდელად დასარიცხი გადასახადის თანხა ნულის ტოლია (ე.წ. ნულოვანი დეკლარაცია).

ფიქსირებული გადასახადის გადამხდელის სტატუსის მინიჭებსა და შენარჩუნების ნაწილში დადგენილი დამატებითი მოთხოვნები  

იმ შემთხვევაში თუ ფიქსირებული გადასახადის გადამხდელის სტატუსი ენიჭება ფიზიკურ პირს, სხვა მოთხოვნების დაკმაყოფილებასთან ერთად, სავალდებულო ხდება რომ ფიზიკური პირი იყოს რეგისტრირებული ინდივიდუალურ მეწარმედ. ამასთან, თუკი პირს გაუუქმდა ინდივიდუალურ მეწარმედ რეგისტრაცია, მას ასევე გაუუქმდება ფიქსირებული გადასახადის გადამხდელის სტატუსი.

ცვლილების შედეგად დაზუსტდა, რომ მიკრო და მცირე ბიზნესის სტატუსი, ასევე ფიქსირებული გადასახადის გადამხდელის სტატუსი უქმდება ფიზიკური პირის გარდაცვალების შემთხვევაში.

ცვლილება ამოქმედდება გამოქვეყნებიდან 30-ე დღეს (გამოქვეყნების თარიღი 06/02/2026)

ცვლილების შესახებ დეტალური ინფორმაცია იხილეთ ბმულზე:

https://matsne.gov.ge/document/view/6780342?publication=0

The post მიკრო, მცირე და ფიქსირებული გადასახადის გადამხდელების სტატუსის მინიჭების, გაუქმებისა დაბეგვრის წესში ცვლილებები განხორციელდა appeared first on ფინანსური აუდიტი და საგადასახადო მომსახურება.

Kreston Georgia აგრძელებს საგადასახადო კანონმდებლობაში შესული ცვლილებებისა და სიახლეების მიმოხილვას. ამჯერად გთავაზობთ 2025 წლის დეკემბრის თვეში შესული საკანონმდებლო სიახლეების მიმოხილვას.

სარჩევი

1. ცვლილებები საქართველოს საგადასახადო კოდექსში

1.1. საგადასახადო საიდუმლოებასთან დაკავშირებული ცვლილებები

2. ცვლილებები საქართველოს ფინანსთა მინისტრის ბრძანებებში

2.1. ცვლილება აქციზის თანხის გაანგარიშებაში

2.2. ცვლილება არააქციზური საქონლის სავალდებულო მარკირებასთან და აქციზური მარკის ნომინალურ ღირებულებასთან დაკავშირებით

2.3. ცვლილება პიროტექნიკურ ნაწარმზე სასაქონლო ზედნადების გამოწერის წესში

2.4. ცვლილებები ინოვაციური საქმიანობის განმახორციელებელი სუბიექტების დეკლარაციებთან დაკავშირებით

3. ცვლილება მთავრობის დადგენილებებში

3.1.  „მაღალმთიან დასახლებაში მუდმივად მცხოვრები პირის სტატუსის მინიჭების, შეწყვეტის, შეჩერებისა და აღდგენის წესის დამტკიცების შესახებ“ ახალი დადგენილება.

1. ცვლილებები საქართველოს საგადასახადო კოდექსში

1.1. საგადასახადო საიდუმლოებასთან დაკავშირებული ცვლილებები

2025 წლის 18 დეკემბერს გამოქვეყნდა საქართველოს კანონი 1282-IVმს-XIმპ, ხოლო 2025 წლის 23 დეკემბერს გამოქვეყნდა საქართველოს კანონი 1296-IVმს-XIმპ. ორივე კანონის საფუძველზე ცვლილება შევიდა საქართველოს საგადასახადო კოდექსის (შემდგომში – სსკ) 39-ე მუხლის – „საგადასახადო საიდუმლოება“ მე-2 ნაწილში.

როგორც მოგეხსენებათ, სსკ-ის 39-ე მუხლის მე-2 ნაწილის მიხედვით, საგადასახადო ორგანო, მისი თანამშრომელი, მოწვეული სპეციალისტი ან/და ექსპერტი ვალდებულია დაიცვას გადასახადის გადამხდელის შესახებ ინფორმაციის საიდუმლოება, რომელიც მისთვის ცნობილი გახდა სამსახურებრივი მოვალეობის შესრულებისას. ამასთან, მას უფლება აქვს, ცალკეული გადასახადის გადამხდელის შესახებ იდენტიფიცირებული ინფორმაცია გადასცეს მხოლოდ ამავე მუხლით მკაცრად განსაზღვრულ პირებს. 

• პირველი ცვლილების მიხედვით, 39-ე მუხლის მე-2 ნაწილიდან ამოღებულ იქნა შემდეგი შინაარსის „რ“ ქვეპუნქტი: „საქართველოს ბიზნეს ომბუდსმენს/საქართველოს ბიზნეს ომბუდსმენის მოადგილეს საქართველოს კანონმდებლობით გათვალისწინებული უფლებამოსილების განხორციელებისას.“

მაშასადამე, ცვლილების საფუძველზე, სსკ-ის 39-ე მუხლის მე-2 ნაწილის მიხედვით განსაზღვრული პირების ჩამონათვალს გამოაკლდა ბიზნეს ომბუდსმენი და მისი მოადგილე, რაც იმას ნიშნავს, რომ საგადასახადო ორგანოს აღარ ექნება უფლება  საგადასახადო საიდუმლოების შემცველი ინფორმაცია გადასცეს აღნიშნულ პირებს. 

ცვლილება  ამოქმედდება 2026 წლის 1 იანვრიდან.

• მეორე ცვლილება კი გამომდინარეობს საკანონმდებლო ცვლილებების პაკეტით გათვალისწინებული, საჯარო სამართლის იურიდიული პირის − ანტიკორუფციული ბიუროს და პერსონალურ მონაცემთა დაცვის სამსახურის ლიკვიდაციისა და მათი ფუნქციებისა და უფლებამოსილებების სახელმწიფო აუდიტის სამსახურისთვის გადაცემის საკითხიდან.

აქედან გამომდინარე, 39-ე მუხლის მე-2 ნაწილიდან ამოღებულ იქნა შემდეგი შინაარსის „ბ1“ ქვეპუნქტი: „პერსონალურ მონაცემთა დაცვის სამსახურს − „პერსონალურ მონაცემთა დაცვის შესახებ“ საქართველოს კანონით გათვალისწინებული შემოწმების განხორციელებისას.“

ხოლო, „ზ“ და „ს“ ქვეპუნქტები ჩამოყალიბდა ახალი რედაქციით:

„ზ) სახელმწიფო აუდიტის სამსახურს – „პერსონალურ მონაცემთა დაცვის შესახებ“ საქართველოს კანონით გათვალისწინებული შემოწმების განხორციელებისას, აგრეთვე მოსამართლის ბრძანების საფუძველზე, „სახელმწიფო აუდიტის სამსახურის შესახებ“ საქართველოს ორგანული კანონით დადგენილი უფლებამოსილების განხორციელების მიზნით;“

„ს) საქართველოს იუსტიციის სამინისტროს მმართველობის სფეროში მოქმედ საჯარო სამართლის იურიდიულ პირს − ციფრული მმართველობის სააგენტოს − ამ სააგენტოს მიერ აღნიშნული ინფორმაციის სახელმწიფო აუდიტის სამსახურისთვის გადასაცემად, „კორუფციის წინააღმდეგ ბრძოლის შესახებ“ საქართველოს კანონითა და მის საფუძველზე გამოცემული კანონქვემდებარე ნორმატიული აქტებით გათვალისწინებული უფლებამოსილებების განხორციელების მიზნით, მონაცემების ელექტრონული მიმოცვლის სისტემის ფუნქციონირებისთვის.“

ცვლილება  ამოქმედდება 2026 წლის 2 მარტიდან.

ცვლილების შესახებ დეტალური ინფორმაცია იხილეთ ბმულზე:

https://matsne.gov.ge/ka/document/view/6699254?publication=0

https://matsne.gov.ge/ka/document/view/6698071?publication=0

2. ცვლილებები საქართველოს ფინანსთა მინისტრის ბრძანებებში

2.1. ცვლილება აქციზის თანხის გაანგარიშებაში

2025 წლის 12 და 29 დეკემბერს გამოქვეყნდა საქართველოს ფინანსთა მინისტრის ბრძანება N322 და N341, რის საფუძველზეც ცვლილება შევიდა „გადასახადების ადმინისტრირების შესახებ“ ფინანსთა მინისტრის N996 ბრძანებით დამტკიცებულ ინსტრუქციაში. ცვლილების შედეგად, ახალი რედაქციით ჩამოყალიბდა ინსტრუქციის 771-ე მუხლი, დანართი №IV-01-ის „განაყოფი III. აქციზის საერთო თანხის გაანგარიშება“, ხოლო 112-ე მუხლს დაემატა ახალი 78, 79 და 80 პუნქტები. აღსანიშნავია, რომ ცვლილება გამოწვეულია საგადასახადო კოდექსში 2025 წლის ნოემბრის (დეტალური ინფორმაციისთვის იხილეთ 2025 წლის ნოემბრის თვის სიახლეების მიმოხილვა https://kreston.ge/finansuri-media-blogi/) თვეში შესული ცვლილებით, რომელიც ეხება აქციზით დასაბეგრი განაკვეთების ცვლილებას.

ცვლილების მიხედვით, ინსტრუქციის 771-ე მუხლს „ა“ და „ბ“ ქვეპუნქტები ჩამოყალიბდა ახალი რედაქციით და ასევე დაემატა „ა1“ ქვეპუნქტი:

„ა) საგარეო-ეკონომიკური საქმიანობის ეროვნული სასაქონლო ნომენკლატურის 2402 20 კოდში მითითებული სიგარეტებისათვის, თამბაქოს შემცველობით, 20 ღერზე აქციზის განაკვეთი შეადგენს საქართველოს საგადასახადო კოდექსის 188-ე მუხლის პირველი ნაწილით განსაზღვრული აქციზის განაკვეთისა და ამ საქონლის საცალო სარეალიზაციო ფასის 20 პროცენტის ჯამს;

ბ) საგარეო-ეკონომიკური საქმიანობის ეროვნული სასაქონლო ნომენკლატურის 2404 11 000 00 კოდში მითითებული კაფსულებისა და მსგავსი სახის პროდუქტებისთვის (თამბაქოს შემცველობით) 20 ცალზე და წვის პროცესის გარეშე აეროზოლის მისაღებად გამოსაყენებელი ღერებისთვის 20 ღერზე აქციზის განაკვეთი შეადგენს საქართველოს საგადასახადო კოდექსის 188-ე მუხლის პირველი ნაწილით განსაზღვრული აქციზის განაკვეთისა და ამ საქონლის საცალო სარეალიზაციო ფასის 20 პროცენტის ჯამს.“

„ა​1) საგარეო-ეკონომიკური საქმიანობის ეროვნული სასაქონლო ნომენკლატურის 2402 20 კოდში მითითებული ყოველწლიურად 35 მილიონ კოლოფამდე/შეფუთვამდე ადგილობრივი წარმოების სიგარეტებისათვის, თამბაქოს შემცველობით, 20 ღერზე აქციზის განაკვეთი შეადგენს საქართველოს საგადასახადო კოდექსის 188-ე მუხლის პირველი ნაწილით განსაზღვრული აქციზის განაკვეთისა და ამ საქონლის საცალო სარეალიზაციო ფასის 15 პროცენტის ჯამს.“

ცვლილება  ამოქმედდება 2026 წლის 1 იანვრიდან.

რაც შეეხება 112 მუხლს, მოხდა შემდეგი შინაარსის ახალი პუნქტების დამატება:

„78. საგარეო-ეკონომიკური საქმიანობის ეროვნული სასაქონლო ნომენკლატურის 2402 20 კოდში მითითებული სიგარეტების მწარმოებელი/იმპორტიორი, მიუხედავად 2025 წლის 1 ოქტომბრამდე წარმოდგენილი სარეკომენდაციო საცალო სარეალიზაციო ფასისა, ვალდებულია, 2026 წლისათვის აქციზის თანხის გამოანგარიშების მიზნებისათვის, არაუგვიანეს 2025 წლის 29 დეკემბრისა შემოსავლების სამსახურს წარუდგინოს ინფორმაცია მის მიერ წარმოებული/იმპორტირებული საქონლის დასახელების/ქვედასახელების და თითოეული მათგანის სარეკომენდაციო საცალო სარეალიზაციო ფასის შესახებ.

79. შემოსავლების სამსახური ვალდებულია, 2026 წლის აქციზის თანხის გამოანგარიშების მიზნებისათვის, საქართველოს ფინანსთა მინისტრს არაუგვიანეს 2025 წლის 30 დეკემბრისა წარუდგინოს ინფორმაცია საგარეო-ეკონომიკური საქმიანობის ეროვნული სასაქონლო ნომენკლატურის 2402 20 კოდში მითითებული სიგარეტების, აგრეთვე  საგარეო-ეკონომიკური საქმიანობის ეროვნული სასაქონლო ნომენკლატურის 2404 11 000 00 და  2402 10 000 02 კოდებში მითითებული საქონლის დასახელებისა და მათი საცალო სარეალიზაციო ფასის შესახებ.

80. 2026 წლის აქციზის თანხის გამოანგარიშების მიზნისათვის საქონლის საცალო სარეალიზაციო ფასი საქართველოს ფინანსთა მინისტრის ბრძანებით დგინდება არაუგვიანეს 2025 წლის 31 დეკემბრისა და გამოიყენება ერთი წლის განმავლობაში.“

ცვლილება ამოქმედდა გამოქვეყნებისთანავე, ანუ 2025 წლის 12 დეკემბრიდან.

ცვლილების შესახებ დეტალური ინფორმაცია იხილეთ ბმულზე:

https://matsne.gov.ge/ka/document/view/6693750?publication=0

https://matsne.gov.ge/ka/document/view/6730740?publication=0

2.2. ცვლილება არააქციზური საქონლის სავალდებულო მარკირებასთან და აქციზური მარკის ნომინალურ ღირებულებასთან დაკავშირებით

2025 წლის 11 და 30 დეკემბერს გამოქვეყნდა საქართველოს ფინანსთა მინისტრის ბრძანება N320 და N345, რის საფუძველზეც ცვლილება შევიდა „გადასახადების ადმინისტრირების შესახებ“ ფინანსთა მინისტრის N996 ბრძანებით დამტკიცებულ ინსტრუქციაში. 

ცვლილების შედეგად, ახალი რედაქციით ჩამოყალიბდა ინსტრუქციის 112-ე მუხლის მე-13 პუნქტი და 2027 წლის 31 დეკემბრის ჩათვლით გაგრძელდა შემდეგი რეგულაცია, რომელიც ცვლილებამდე არსებული რედაქციით მოქმედებდა მხოლოდ 2025 წლის 31 დეკემბრის ჩათვლით:

„2027 წლის 31 დეკემბრის ჩათვლით შერჩეულ პირს არააქციზური საქონლის სავალდებულო მარკირების ნომინალური ღირებულება აუნაზღაურდება შემოსავლების სამსახურის მიერ, შერჩეულ პირთან გაფორმებული ხელშეკრულების საფუძველზე.“

ცვლილება ასევე შევიდა ინსტრუქციის 79-ე მუხლის მე-4 პუნქტში, რომელიც ადგენს თუ როგორ განისაზღვრება შერჩეული პირის მიერ მიწოდებული აქციზური მარკის ნომინალური ღირებულება. ცვლილების შედეგად იმპორტირებულ თამბაქოს ნაწარმზე და ადგილობრივი და იმპორტული ალკოჰოლიანი სასმელისთვის განკუთვნილ აქციზურ მარკაზე შემცირდა ნომინალური ღირებულება, კერძოდ:

• იმპორტული ფილტრიანი და უფილტრო (მათ შორის: სიგარა, სიგარილა) თამბაქოს ნაწარმისთვის განკუთვნილ 1 000 ცალ აქციზურ მარკაზე განისაზღვრა 18 დოლარის ეკვივალენტი ლარებში, ნაცვლად 19.5 დოლარის ეკვივალენტი ლარებისა, როგორც ეს ცვლილებამდე მოქმედი რედაქციით იყო განსაზღვრული;
• გ) ადგილობრივი და იმპორტული ალკოჰოლიანი სასმელისთვის განკუთვნილ 1 000 ცალ აქციზურ მარკაზე – 10 დოლარის ეკვივალენტი ლარებში, ნაცვლად 12 დოლარის ეკვივალენტი ლარებისა, როგორც ეს ცვლილებამდე მოქმედი რედაქციით იყო განსაზღვრული;
• ზ) იმპორტირებული საგარეო-ეკონომიკური საქმიანობის ეროვნული სასაქონლო ნომენკლატურის 2404 12 000 00 და 2404 19 900 00 კოდებში მითითებული საქონლისთვის განკუთვნილ 1 000 ცალ აქციზურ მარკაზე – 19.5 დოლარის ეკვივალენტი ლარებში, ნაცვლად 12 დოლარის ეკვივალენტი ლარებისა, როგორც ეს ცვლილებამდე მოქმედი რედაქციით იყო განსაზღვრული.

ცვლილება  ამოქმედდება 2026 წლის 1 იანვრიდან.

ცვლილების შესახებ დეტალური ინფორმაცია იხილეთ ბმულზე:

https://matsne.gov.ge/ka/document/view/6740426?publication=0

https://matsne.gov.ge/ka/document/view/6740426?publication=0

2.3. ცვლილება პიროტექნიკურ ნაწარმზე სასაქონლო ზედნადების გამოწერის წესში

2025 წლის 22 დეკემბერს გამოქვეყნდა საქართველოს ფინანსთა მინისტრის ბრძანება N328, რის საფუძველზეც ცვლილება შევიდა „გადასახადების ადმინისტრირების შესახებ“ ფინანსთა მინისტრის N996 ბრძანებით დამტკიცებულ ინსტრუქციაში. 

ცვლილება შეეხო ინსტრუქციის 251-ე მუხლს, რომელიც განსაზღვრავს სასაქონლო ზედნადების გამოწერის წესს. კერძოდ:

• სასაქონლო ზედნადების მე-4 და მე-5 სტრიქონებში, როგორც წესი, იწერება გამყიდველის/გამგზავნის და მყიდველის/მიმღების დასახელება ან სახელი და გვარი, საიდენტიფიკაციო/პირადი ნომერი. ცვლილების შედეგად კი დაზუსტდა, რომ პიროტექნიკური ნაწარმის შემთხვევაში (გარდა F1 ქვეკატეგორიის ზოგიერთი პიროტექნიკური ნაწარმისა, რომელიც არ არის ასაფეთქებელი სახის (მათ შორის, ბენგალური სანთელი, შუშხუნა და სხვა), ასევე,  P1 ქვეკატეგორიის ზოგიერთი პიროტექნიკური ნაწარმისა, რომელთა რეალიზაციაც დასაშვებია ლიცენზიის გარეშე), ამავე სტრიქონებში იწერება მხოლოდ შესაბამისი სერტიფიკატის ან/და რეალიზაციის ლიცენზიის მქონე პირის დასახელება და საიდენტიფიკაციო ნომერი;
• როგორც ვიცით, თუ საქართველოს ფინანსთა სამინისტროს ელექტრონული სერვისების ტექნიკური გაუმართაობის გამო ვერ ხერხდება სისტემასთან დაკავშირება და შეუძლებელია ზედნადების ელექტრონულად შევსება, პირს უფლება აქვს ისარგებლოს ზედნადების ქაღალდური ვერსიით გამოწერის შესაძლებლობით. ცვლილების შედეგად განისაზღვრა, რომ ამ პუნქტის მოქმედება არ ვრცელდება პიროტექნიკურ ნაწარმზე (გარდა F1 ქვეკატეგორიის ზოგიერთი პიროტექნიკური ნაწარმისა, რომელიც არ არის ასაფეთქებელი სახის (მათ შორის, ბენგალური სანთელი, შუშხუნა და სხვა), ასევე, P1 ქვეკატეგორიის ზოგიერთი პიროტექნიკური ნაწარმისა, რომელთა რეალიზაციაც დასაშვებია ლიცენზიის გარეშე) ზედნადების შევსების შემთხვევაზე. შესაბამისად, ზემოაღნიშნულ პიროტექნიკურ ნაწარმზე ქაღალდური ზედნადები არ გამოიწერება და ზედნადები ივსება მხოლოდ ელექტრონული ფორმით. ამასთან, სავალდებულოა ზედნადებში პროგრამულად მოინიშნოს ველი – „პიროტექნიკური ნაწარმი“.

ცვლილება  ამოქმედდება გამოქვეყნებიდან 30-ე დღეს, ანუ 2026 წლის 21 იანვრიდან.

ცვლილების შესახებ დეტალური ინფორმაცია იხილეთ ბმულზე:

https://matsne.gov.ge/ka/document/view/6703574?publication=0

2.4. ცვლილებები ინოვაციური საქმიანობის განმახორციელებელი სუბიექტების დეკლარაციებთან დაკავშირებით

2025 წლის 10 დეკემბერს გამოქვეყნდა საქართველოს ფინანსთა მინისტრის ბრძანება N317, რის საფუძველზეც ცვლილება შევიდა „გადასახადების ადმინისტრირების შესახებ“ ფინანსთა მინისტრის N996 ბრძანებით დამტკიცებულ ინსტრუქციაში. 

ცვლილება ითვალისწინებს „ინოვაციების შესახებ“ საქართველოს კანონით განსაზღვრული ინოვაციური საქმიანობის განმახორციელებელი სუბიექტების საქმიანობასთან დაკავშირებული ხელშემწყობი მექანიზმების ასახვას გადახდის წყაროსთან დაკავებული გადასახადისა და მოგების გადასახადის დეკლარაციებში. კერძოდ:

• ცვლილების შედეგად, ახალი რედაქციით ჩამოყალიბდა ინსტრუქციის 38-ე მუხლის მე-7 პუნქტის „ბ“ ქვეპუნქტი, რის საფუძველზეც გადახდის წყაროსთან დაკავებული გადასახადის დეკლარაციის მე-5 სვეტში, სადაც გადამხდელის მიერ მიეთითება შემოსავლების მიმღებ პირთა კატეგორია, არსებულ ჩამონათვალს დაემატა „ინოვაციების შესახებ“ საქართველოს კანონით გათვალისწინებულ ინოვაციური სტარტაპის სტატუსის მქონე სუბიექტში და კვლევისა და განვითარების მომსახურების გამწევი კომპანიის სტატუსის მქონე სუბიექტში დასაქმებული ფიზიკური პირები.
• ახალი რედაქციით ჩამოყალიბდა ინსტრუქციის მე-401 მუხლის მე-5 პუნქტის პრეამბულა, რის საფუძველზეც გარკვეული ცვლილებები შევიდა მოგების გადასახადის ყოველთვიური დეკლარაციის შევსების წესში. კერძოდ კი, ცვლილების შედეგად,  დეკლარაციის III ნაწილის მეორე სვეტში აისახება მოგების გადასახადით დაბეგვრის ობიექტი, რომელიც იბეგრება მოგების გადასახადის 15%-იანი განაკვეთით (მათ შორის, საერთაშორისო კომპანიის სტატუსის მქონე საწარმოს მიერ შესაბამისი სტატუსის მინიჭებამდე საანგარიშო პერიოდებში მიღებული წმინდა მოგებიდან დივიდენდის განაწილება), გარდა „ინოვაციების შესახებ“ საქართველოს კანონით გათვალისწინებული ინოვაციური სტარტაპის სტატუსის მქონე სუბიექტისა, შესაბამისი მოგების გადასახადით დასაბეგრი თანხა და მოგების გადასახადი, ხოლო მესამე სვეტში – მოგების გადასახადით დაბეგვრის ობიექტი, რომელიც იბეგრება მოგების გადასახადის 5%-იანი ან 10%-იანი განაკვეთით (მიუხედავად მოგების ფორმირების საანგარიშო პერიოდისა), შესაბამისი მოგების გადასახადით დასაბეგრი თანხა და მოგების გადასახადი. დეკლარაციის III ნაწილის მესამე სვეტში აისახება აგრეთვე „ინოვაციების შესახებ“ საქართველოს კანონით გათვალისწინებული ინოვაციური სტარტაპის და ინოვაციური მცირე და საშუალო კომპანიის სტატუსის მქონე სუბიექტის მოგების გადასახადით დაბეგვრის ობიექტი, რომელიც იბეგრება მოგების გადასახადის 15%-იანი განაკვეთით.

ასევე, ინსტრუქციის მე-401 მუხლს დაემატა ახალი 6​​9 პუნქტი, რის საფუძველზეც დეკლარაციის III ნაწილს დაემატა ახალი 1​7 დანართი, რომელიც წარმოადგენს ინოვაციური მცირე და საშუალო კომპანიის სტატუსის მქონე სუბიექტის მიერ წმინდა მოგებიდან დივიდენდის განაწილების შემთხვევაში მოგების გადასახადით დასაბეგრი თანხის კვლევისა და განვითარებისთვის გაწეული ხარჯების სამმაგი ოდენობით შესამცირებელი თანხის გათვალისწინებით, მოგების გადასახადით დასაბეგრი განაწილებული მოგების თანხის გაანგარიშების ფორმას და ივსება სვეტების დასახელების შესაბამისად. კერძოდ:

ა) პირველ სვეტში მიეთითება მიმდინარე საანგარიშო პერიოდში (თვეში) განაწილებული დივიდენდის ოდენობა, რომელიც ექვემდებარება მოგების გადასახადით დაბეგვრას;

ბ) მე-2 სვეტში მიეთითება მათ შორის, წინა ფინანსური წლის განმავლობაში მიღებული წმინდა მოგებიდან მიმდინარე საანგარიშო პერიოდში (თვეში) განაწილებული დივიდენდის ოდენობა, რომელიც ექვემდებარება მოგების გადასახადით დაბეგვრას;

გ) მე-3 სვეტში მიეთითება ინოვაციური მცირე და საშუალო კომპანიის სტატუსის მქონე სუბიექტის მიერ წინა ფინანსური წლის განმავლობაში კვლევისა და განვითარებისთვის გაწეული ხარჯების სამმაგი ოდენობა, რომლის გაწევის შემთხვევაშიც პირს უფლება აქვს შეამციროს მოგების გადასახადით დასაბეგრი განაწილებული მოგების თანხა;

დ) მე-4 სვეტში მიეთითება ინოვაციური მცირე და საშუალო კომპანიის სტატუსის მქონე სუბიექტის მიერ წინა ფინანსური წლის განმავლობაში კვლევისა და განვითარებისთვის გაწეული ხარჯების სამმაგი ოდენობიდან ხარჯების ის ოდენობა, რომლითაც  წინა საანგარიშო პერიოდებში შემცირდა მოგების გადასახადით დასაბეგრი განაწილებული მოგების თანხა;

ე) მე-5 სვეტში მიეთითება  ინოვაციური მცირე და საშუალო კომპანიის სტატუსის მქონე სუბიექტის მიერ წინა ფინანსური წლის განმავლობაში კვლევისა და განვითარებისთვის გაწეული ხარჯების სამმაგი ოდენობიდან ხარჯების ის ოდენობა, რომლითაც  მიმდინარე საანგარიშო პერიოდში მცირდება  მოგების გადასახადით დასაბეგრი განაწილებული მოგების თანხა (სვ.3-სვ.4);

ვ) მე-6 სვეტში მიეთითება მიმდინარე საანგარიშო პერიოდში მოგების გადასახადით დასაბეგრი განაწილებული მოგების თანხა  კვლევისა და განვითარებისთვის გაწეული ხარჯების თანხის შემცირების შემდგომ, რომელიც წარმოადგენს პირველ და მე-2 სვეტებს შორის სხვაობას, თუ მე-5 სვეტში ასახული თანხის ოდენობა მეტია ან ტოლია მე-2 სვეტში ასახულ თანხის ოდენობაზე, ან პირველ და მე-5 სვეტებს შორის სხვაობას, თუ მე-5 სვეტში ასახული თანხის ოდენობა ნაკლებია მე-2 სვეტში ასახულ თანხის ოდენობაზე. აღნიშნული თანხა აისახება დეკლარაციის III ნაწილის 16.1 სტრიქონის მესამე სვეტში.“.

ცვლილება  ამოქმედდა გამოქვეყნებისთანავე, ანუ 2025 წლის 10 დეკემბრიდან.

ცვლილების შესახებ დეტალური ინფორმაცია იხილეთ ბმულზე:

https://matsne.gov.ge/ka/document/view/6692355?publication=0

3. ცვლილება მთავრობის დადგენილებებში

3.1. მაღალმთიან დასახლებაში მუდმივად მცხოვრები პირის სტატუსის მინიჭების, შეწყვეტის, შეჩერებისა და აღდგენის დადგენილების დამტკიცების შესახებ

ძალაში შევიდა ახალი მთავრობის დადგენილება „მაღალმთიან დასახლებაში მუდმივად მცხოვრები პირის სტატუსის მინიჭების, შეწყვეტის, შეჩერებისა და აღდგენის წესის დამტკიცების შესახებ“, რომელიც ეხება პირების მიერ მაღალმთიანი დასახლების სუბიექტის სტატუსის მინიჭებას და ასეთი პირებისთვის განსაზღვრული საგადასახადო შეღავათებით სარგებლობას. 

დადგენილების ახალი რედაქციის  მიხედვით იცვლება მაღალმთიანი დასახლებაში მუდმივად მცხოვრები პირის სტატუსის მინიჭების წესი, კერძოდ ზუსტდება რომ სტატუსის მინიჭება ზოგიერთ შემთხვევაში მოხდება ცალკეულ დასახლებებში 6 თვეზე მეტი ხნით ცხოვრების შემთხვევაშიც, კერძოდ:

საქართველოს მოქალაქე მაღალმთიან დასახლებაში მცხოვრები პირებისთვის სტატუსის მინიჭება ხდება იმ შემთხვევაში თუ  იგი კალენდარული წლის განმავლობაში, ჯამში 9 თვის ან 9 თვეზე მეტი ვადით, ფაქტობრივად ცხოვრობს მაღალმთიან დასახლებაში, თუ მაღალმთიანი დასახლება ზღვის დონიდან 2000 მეტრის სიმაღლეზე ან მის ზევით მდებარეობს, ამ ქვეპუნქტით განსაზღვრული მაღალმთიან დასახლებაში ფაქტობრივად ცხოვრების ვადაა კალენდარული წლის განმავლობაში ჯამში 6 თვე ან 6 თვეზე მეტი.

ძველი რედაქციის მიხედვით ასეთი სტატუსის მისაღებად აუცილებელი იყო მაღალთიან დასახლებაში მინიმუმ 9 თვიანი პერიოდის გატარება, რაც ასეთ დასახლებებში 6 თვიანი პერიოდის გატარების შემთხვევაში აღნიშნული შეღავათით სარგებლობის შესაძლებლობას არ იძლეოდა.

გარდა ამისა ზუსტდება რომ მაღალმთიან დასახლებაში ცხოვრების დამადასტურებელი დოკუმენტის სახით წარსადგენია იმავე მაღალმთიან დასახლებაში რეგისტრირებული არანაკლებ ორი მოწმის, ნოტარიულად დამოწმებული განცხადება (ნოტარიულად დამოწმების შესახებ ჩანაწერი მანამდე არ არსებობდა).

ცვლილება  ამოქმედდა გამოქვეყნებისთანავე, ანუ 2025 წლის 26 დეკემბრიდან.

ცვლილების შესახებ დეტალური ინფორმაცია იხილეთ ბმულზე:

https://infohub.rs.ge/ka/workspace/document/13e90e44-ad56-477d-b940-5a6fc937a7e5

შპს კრესტონ ჯორჯია

მმართველი პარტნიორი                                                             დავით პაპიაშვილი

საგადასახადო აუდიტის დეპარტამენტის ხელმძღვანელი                     რუსუდან ჭაბუკიანი

The post 2025 წლის დეკემბრის თვის განმავლობაში საქართველოს საგადასახადო კანონმდებლობაში შესული ცვლილებები appeared first on ფინანსური აუდიტი და საგადასახადო მომსახურება.

Kreston Georgia აგრძელებს საგადასახადო კანონმდებლობაში შესული ცვლილებებისა და სიახლეების მიმოხილვას. ამჯერად გთავაზობთ 2025 წლის ნოემბრის თვეში შესული საკანონმდებლო სიახლეების მიმოხილვას.

სარჩევი

1.ცვლილებები საქართველოს საგადასახადო კოდექსში

1.1. საგადასახადო კოდექსის მნიშვნელოვანი ცვლილებები

1.2. საგადასახადო საიდუმლოებასთან დაკავშირებული ცვლილებები

1.3. შეიცვალა აქციზის გადასახადი თამბაქოს ნაწარმზე

1.4. ტექნიკური ხასიათის ცვლილება

2. ცვლილებები საქართველოს ფინანსთა მინისტრის ბრძანებებში

2.1. ცვლილება გასაჩივრებაზე უარის თქმის წესში

3.ცვლილებები შემოსავლების სამსახურის უფროსის ბრძანებებში

3.1. ცვლილება დებიტორული დავალიანებისა და გადახდილი ავანსების მეთოდურ მითითებაში

3.2. ცვლილება სიდიდის შესაბამისი კატეგორიის განსაზღვრის, გაუქმებისა და აღრიცხვის წესში

1. ცვლილებები საქართველოს საგადასახადო კოდექსში

1.1. საგადასახადო კოდექსის მნიშვნელოვანი ცვლილებები

2025 წლის 14 ნოემბერს გამოქვეყნდა საქართველოს კანონი 1061-IVმს-XIმპ, რის საფუძველზეც რიგი მნიშვნელოვანი ცვლილება შევიდა საქართველოს საგადასახადო კოდექსში (შემდგომში – სსკ). განვიხილოთ თითოეული მათგანი დეტალურად:

1. გაუქმდა სპეციალური სავაჭრო ზონისა და ბაზრობის ორგანიზების მარეგულირებელი მუხლები (3%-იანი დაბეგვრა)

როგორც მოგეხსენებათ, ცვლილებამდე არსებული რედაქციით, სსკ-ის 26-ე და 262-ე მუხლები განსაზღვრავდა სპეციალური დაბეგვრის რეჟიმებს ბაზრობის ორგანიზების და ბაზრობის ტერიტორიაზე მოვაჭრეთათვის, რაც ითვალისწინებდა ბაზრობის მოვაჭერეების დაბეგვრას ბრუნვიდან 3%-იანი განაკვეთით. აღნიშნული ნორმები ფაქტობრივად არ ამოქმედებულა და ცვლილებამდე არსებული კანონმდებლობით 262-ე მუხლის ამოქმედება 2026 წლიდან უნდა მომხდარიყო. იმის გათვალისწინებით, რომ მცირე მეწარმეებისთვის მოქმედებს საშემოსავლო გადასახადის 1%-ით დაბეგვრის რეჟიმი, ხსენებულ დებულებებს, რომლებიც ამოქმედების შემთხვევაში მოვაჭრეების 3%-ით დაბეგვრას ითვალისწინებდა ნაწილობრივ დაკარგული ქონდა აქტუალობა,  თუმცა გასათვალისწინებელია ის გარემოება რომ 3%-იანი დაბეგვრის ამოქმედების შემთხვევაში წლიური შემოსავლის 500 000 ლარიანი ზღვარი არ მოქმედებდა, რაც 3%-იანი განაკვეთით დაბეგვრას ბაზრობის მოვაჭერებისთვის  გარკვეულ მიზიდველობას სძენდა. ამის მიუხედავად კანონმდებელმა გადაწყვეტა არ აემოქმედებინა მოვაჭერეებისთვის ბრუნვიდან 3%იანი განაკვეთი, შესაბამისად უქმდება სპეციალური სავაჭრო ზონისა (სსკ-ის 26-ე მუხლი) და ბაზრობის ორგანიზების (სსკ-ის 262 მუხლი) მარეგულირებელი დებულებები. ამიტომ, ტექნიკური ცვლილებები ხორციელდება საგადასახადო კოდექსის შესაბამის მუხლებში. კერძოდ, იცვლება სსკ-ს 93-ე მუხლის პირველი ნაწილი და ხორციელდება სსკ-იდან 2901 და 2902 , 1331-მუხლების, აგრეთვე 154-ე მუხლის პირველი ნაწილის „ნ“ ქვეპუნქტისა და 309-ე მუხლის 42-ე და 111-ე ნაწილების ამოღება.

2. დღგ-ისგან ჩათვლის უფლებით გათავისუფლდება საინვესტიციო ოქროს მიწოდება და იმპორტი

სსკ-ის 157-ე მუხლს დაემატა „წ“, 172-ე მუხლის მე-4 ნაწილს „ო1“, ხოლო 173-ე მუხლს „უ1“ ქვეპუნქტი. ცვლილების შედეგად, დღგ-ისგან ჩათვლის უფლებით გათავისუფლდება საინვესტიციო ოქროს მიწოდება და იმპორტი. საინვესტიციო ოქრო კი განისაზღვრა, როგორც არანაკლებ 995/1000 სინჯის ოქროს ზოდი ან ფირფიტა, აგრეთვე არანაკლებ 900/1000 სინჯის ოქროსგან დამზადებული ოქროს მონეტა, რომელიც გამოშვებულია 1800 წლის შემდეგ და გამოშვების ქვეყანაში ფულად-საგადახდო საშუალებად გამოიყენება/გამოიყენებოდა. ამასთან,  საინვესტიციო ოქროს სტატუსის დადგენის დამატებითი კრიტერიუმები და წესი, აგრეთვე იმ ოქროს მონეტების სია, რომლებიც აკმაყოფილებს საინვესტიციო ოქროს კრიტერიუმებს, განისაზღვრება საქართველოს ფინანსთა მინისტრის ბრძანებით.

3. მულტინაციონალური საწარმოთა ანგარიშის წარდგენის ვადა

ცვლილებამდე მოქმედი კანონმდებლობით, მულტინაციონალური საწარმოთა ჯგუფის საბოლოო მშობელი საწარმო, რომელიც საქართველოს რეზიდენტია, ვალდებულია საგადასახადო ორგანოს წარუდგინოს ქვეყნების მიხედვით ანგარიში საანგარიშო წლის მომდევნო წლის 31 დეკემბრამდე. აღნიშნული დებულების „ქვეყნების მიხედვით ანგარიშების გაცვლის შესახებ კომპეტენტური ორგანოების მრავალმხრივ შეთანხმებასთან“ (საქართველოს მთავრობის 2016 წლის 30 ივნისის №1233 განკარგულება) შესაბამისობაში მოყვანის მიზნით, განისაზღვრება, რომ მულტინაციონალური საწარმოთა ჯგუფის საბოლოო მშობელი საწარმო, რომელიც საქართველოს რეზიდენტია, ვალდებულია, საგადასახადო ორგანოს წარუდგინოს ქვეყნების მიხედვით ანგარიში საანგარიშო წლის დასრულებიდან არაუგვიანეს 12 კალენდარული თვისა. ამ მიზნით, შესაბამისი ცვლილება ხორციელდება სსკ-ის 701 მუხლის პირველ ნაწილში.

4. საფინანსო დაწესებულებიდან მიღებული დივიდენდის შემდგომი განაწილება

მოქმედი კანონმდებლობით თუ პირი, რომელიც არ არის საფინანსო დაწესებულება, და პარტნიორზე (რეზიდენტ ფიზიკურ პირზე, არასამეწარმეო (არაკომერციულ) იურიდიულ პირზე ან არარეზიდენტ საწარმოზე) დივიდენდად გაანაწილებს იმ მოგებას, რომელიც გენერირებულია საფინანსო დაწესებულებიდან მიღებული დივიდენდებიდან, ამ პირმა გადახდის წყაროსთან უნდა დაბეგროს გაცემული დივიდენდი 5%-იანი განაკვეთით. მიუხედავად იმისა, რომ 2023 წლიდან საფინანსო ინსტიტუტების მოგების განაკვეთი 20 პროცენტი გახდა. აღნიშნულის გათვალისწინებით, ცალკეულ შემთხვევებში გაცემული დივიდენდის ორჯერ დაბეგვრის აღმოფხვრის მიზნით 309-ე მუხლს ემატება 992 ნაწილი, რომლის მიხედვით, რეზიდენტი საწარმოს მიერ გადახდილი დივიდენდი გადახდის წყაროსთან არ დაიბეგრება და დივიდენდის მიმღები პირის ერთობლივ შემოსავალში არ ჩაირთვება, თუ ეს დივიდენდი საწარმოს მიღებული აქვს ამ მუხლის 94-ე ნაწილით გათვალისწინებული (მაგ. ბანკი, მიკროსაფინანსო ორგანიზაცია) პირისგან, 2023 წლის და ამავე წლის შემდგომი პერიოდების კუთვნილი მოგების განაწილების შედეგად;

5. სადაზღვევო ორგანიზაციების მიერ მიღებული წმინდა მოგებიდან დივიდენდის განაწილება

ცვლილების მიხედვით 309-ე ”გარდამავალ დებულებათა” მუხლს დაემატება 1031 ნაწილი, რომლითაც იმის გათვალისწინებით, რომ სადაზღვევო ორგანიზაციები, მოგების მისი განაწილებისას დაბეგვრის მოდელზე (ე.წ. ესტონურ მოდელზე) 2024 წლიდან გადავიდნენ, ზუსტდება, რომ სადაზღვევო ორგანიზაციის მიერ 2015 წლის 1 იანვრიდან 2024 წლის 1 იანვრამდე საანგარიშო პერიოდში მიღებული წმინდა მოგებიდან დივიდენდის განაწილება მოგების განაწილებად მიიჩნევა, ხოლო 2024 წლის 1 იანვრამდე საანგარიშო პერიოდებში მიღებული დივიდენდის შემდგომი განაწილება მოგების განაწილებად არ განიხილება.

6. 2026 წლამდე მოქმედი საგადასახადო შეღავათების ვადების გადაწევა

ცვლილების  შედეგად, სასოფლო-სამეურნეო სფეროში და ფასიან ქაღალდებთან დაკავშირებით 2026 წლის 1 იანვრამდე მოქმედი დებულებების მოქმედების ვადა გაგრძელდა 2028 წლის 1 იანვრამდე, კერძოდ: 

• სსკ-ის 82-ე მუხლის პირველი ნაწილის „ლ“ ქვეპუნქტის შესაბამისად, 2028 წლის 1 იანვრამდე საშემოსავლო გადასახადისგან გათავისუფლდება, სასოფლო-სამეურნეო წარმოებაში დასაქმებული პირის მიერ საქართველოში წარმოებული სოფლის მეურნეობის პროდუქციის პირველადი მიწოდებით მიღებული დასაბეგრი შემოსავალი, თუ კალენდარული წლის განმავლობაში ასეთი მიწოდებით მიღებული ერთობლივი შემოსავალი 200 000 ლარს არ აღემატება;
• სსკ-ის 82-ე მუხლის პირველი ნაწილის „ც“ ქვეპუნქტის შესაბამისად, 2028 წლის 1 იანვრამდე საშემოსავლო გადასახადისგან გათავისუფლდება, სასოფლო-სამეურნეო წარმოებაში დასაქმებული ფიზიკური პირის მიერ ამ საქმიანობის ფარგლებში გაცემული ხელფასი, თუ დამქირავებლის მიერ აღნიშნული საქმიანობიდან მიღებული ერთობლივი შემოსავალი 200 000 ლარს არ აღემატება;
• სსკ-ის 99-ე მუხლის პირველი ნაწილის „ვ“ ქვეპუნქტის თანახმად, 2028 წლის 1 იანვრამდე მოგების გადასახადისგან გათავისუფლდება, სასოფლო-სამეურნეო კოოპერატივის მიერ საქართველოში წარმოებული სოფლის მეურნეობის პროდუქციის სამრეწველო გადამუშავებამდე (სასაქონლო კოდის შეცვლამდე) პირველადი მიწოდებით მიღებული მოგების განაწილება და ამავე საქმიანობის ფარგლებში გაწეული ხარჯები/განხორციელებული განაცემები, რომლებიც გათვალისწინებულია ამ კოდექსის 97-ე მუხლის პირველი ნაწილის „ბ“−„დ“ ქვეპუნქტებით;
• ასევე, 2028 წლის 1 იანვრამდე გრძელდება სსკ-ის მე-100 მუხლის მე-4 ნაწილის „ზ“ ქვეპუნქტის მოქმედება და ახალი რედაქციით ერთობლივ შემოსავალში ასახვას არ ექვემდებარება 2028 წლის 1 იანვრამდე სასოფლო-სამეურნეო კოოპერატივსა და მის წევრთა (მეპაიეთა) შორის სასოფლო-სამეურნეო საქმიანობის შედეგად მიღებული, საქართველოში წარმოებული სოფლის მეურნეობის პროდუქციის მიწოდება ან/და ამ საქმიანობასთან დაკავშირებული მომსახურების გაწევა;
• სსკ-ის 130-ე მუხლის 41 ნაწილის თანახმად, 2028 წლის 1 იანვრამდე სასოფლო-სამეურნეო კოოპერატივის წევრის მიერ ამ კოოპერატივისგან მიღებული დივიდენდები (გარდა იმ დივიდენდებისა, რომლებიც მიღებულია „სასოფლო-სამეურნეო კოოპერატივის შესახებ“ საქართველოს კანონის მე-6 მუხლის მე-2 პუნქტით გათვალისწინებული საქმიანობიდან მიღებული მოგებიდან) გადახდის წყაროსთან არ იბეგრება და დივიდენდის მიმღები პირის მიერ ერთობლივ შემოსავალში არ ჩაირთვება;
• სსკ-ის 82-ე მუხლის პირველი ნაწილის „უ2“ ქვეპუნქტის შესაბამისად, 2028 წლის 1 იანვრამდე საშემოსავლო გადასახადისგან გათავისუფლდება, 2028 წლის 1 იანვრამდე რეზიდენტი იურიდიული პირის მიერ საქართველოში საჯარო შეთავაზების გზით გამოშვებული და საქართველოს ეროვნული ბანკის მიერ აღიარებულ ორგანიზებულ ბაზარზე სავაჭროდ დაშვებული სასესხო ფასიანი ქაღალდიდან პროცენტის სახით მიღებული შემოსავალი;
• სსკ-ის 99-ე მუხლის პირველი ნაწილის „მ2“ ქვეპუნქტის თანახმად, მოგების გადასახადისგან თავისუფლდება, არარეზიდენტის მიერ რეზიდენტი იურიდიული პირის მიერ 2028 წლის 1 იანვრამდე  საქართველოში საჯარო შეთავაზების გზით გამოშვებული და საქართველოს ეროვნული ბანკის მიერ აღიარებულ ორგანიზებულ ბაზარზე სავაჭროდ დაშვებული სასესხო ფასიანი ქაღალდიდან პროცენტის სახით მიღებული შემოსავალი, რომელიც არ მიეკუთვნება საქართველოში ამ არარეზიდენტის მუდმივ დაწესებულებას.

ასევე გაგრძელდა 2026 წლის 1 იანვრამდე მოქმედი სსკ-ის 199, 309-ე და 310-ე მუხლებით განსაზღვრული ზოგიერთი დებულებების მოქმედების ვადა, კერძოდ:

• სსკ-ის 199-ე მუხლის პირველი ნაწილის „ი“ ქვეპუნქტის თანახმად, იმპორტის გადასახადისაგან 2028 წლის 1 იანვრამდე გათავისუფლდა თამბაქოს ნედლეულის იმპორტი;
• სსკ-ის 309-ე მუხლის მე-15 ნაწილის ახალი რედაქციით, 2028 წლის 1 იანვრამდე გახანგრძლივდება, საკონტროლო-სალარო აპარატის გამოყენების ვალდებულებისგან გათავისუფლება ფიზიკური პირისთვის, რომელიც არ იყენებს დაქირავებული პირის შრომას და ახორციელებს ეკონომიკურ საქმიანობას ბაზრის (ბაზრობის) ტერიტორიაზე განლაგებული არასტაციონარული სავაჭრო ადგილიდან, მათ შორის, დახლიდან, გარდა ფიზიკური პირისა, რომელსაც მინიჭებული აქვს მცირე ბიზნესის სტატუსი ან რომელიც დარეგისტრირებულია ან ვალდებულია დარეგისტრირდეს დღგ-ის გადამხდელად საგადასახადო კოდექსის შესაბამისად;
• სსკ-ის 309-ე მუხლის 24-ე ნაწილის ახალი რედაქციით, 2028 წლის 1 იანვრამდე გაგრძელდება ფიზიკური პირის მიერ საკუთრებაში არსებული საცხოვრებელი ადგილის მოკლე ვადით გაცემით მიღებული შემოსავლის ფიქსირებული საშემოსავლო გადასახადით დაბეგვრის შესაძლებლობა;
• სსკ-ის 309-ე მუხლის 79-ე-812 ნაწილების მიხედვით, 2029 წლის 1 იანვრამდე, დღგ-ისგან ჩათვლის უფლებით გათავისუფლებულია, უძრავი ქონების მიწოდება, აგრეთვე უძრავი ქონების მიმწოდებლის მიერ მიწოდებულ ქონებასთან დაკავშირებული სამშენებლო-სამონტაჟო მომსახურების გაწევა, თუ შესრულებულია აღნიშნული მუხლის 79-ე ნაწილით გათვალისწინებული ყველა პირობა;
• ახალი რედაქციით ჩამოყალიბდა სსკ-ის 309-ე მუხლის 131-ე ნაწილი, რომელიც მიზნად ისახავს ამავე ნაწილით გათვალისწინებული დებულებების მოქმედების გაგრძელებას 2028 წლის 1 იანვრამდე. კონკრეტულად კი აღნიშნულ ვადამდე შენარჩუნებული იქნება საქონლის იმპორტისას დღგ-ით დასაბეგრი თანხის გამოთვლის არსებული წესი, რაც გულისხმობს, რომ საქონლის იმპორტისას დღგ-ით დასაბეგრი თანხის მთავარ კომპონენტს – საქონლის საბაჟო ღირებულებას დაემატება საქართველოში კუთვნილი იმპორტის გადასახდელი, გარდა დღგ-ისა. ასევე, სსკ-ის 309-ე მუხლის 132-ე ნაწილის ახალი რედაქცია მიზნად ისახავს ამავე ნაწილით გათვალისწინებული დებულებების მოქმედების ვადის გაგრძელებას 2028 წლის 1 იანვრამდე. აღნიშნული ცვლილებით სსკ-ის 309-ე მუხლის 132-ე ნაწილი შესაბამისობაში მოვიდა „საქართველოს საბაჟო კოდექსში“ განხორციელებულ ცვლილებასთან, რომლის მიხედვითაც 2028 წლის 1 იანვრამდე ჩერდება საქართველოს საბაჟო კოდექსის X წიგნის ამოქმედება;
• ახალი რედაქციით ჩამოყალიბდა სსკ-ის 310-ე მუხლის მე-4 ნაწილი, რომელიც მიზნად ისახავს კოდექსის 173-ე მუხლის „შ“ ქვეპუნქტისა და 199-ე მუხლის „ს“ ქვეპუნქტის მოქმედების შეჩერების გადავადებას 2028 წლის 1 იანვრამდე. აღნიშნული ცვლილებით სსკ-ის 310-ე მუხლის მე-4 ნაწილი შესაბამისობაში მოვა „საქართველოს საბაჟო კოდექსში ცვლილების შესახებ“ საქართველოს კანონის ცვლილებებთან, რომლის მიხედვითაც 2028 წლის 1 იანვრამდე ჩერდება საქართველოს საბაჟო კოდექსის X წიგნის ამოქმედება.

ამასთან აღსანიშნავია ტურისტული ზონის პირის სუბიექტის მოგების/საშემოსავლო გადასახადისა და ქონების გადასახადისგან გათავისუფლების საკანონმდებლო ნორმა რომელიც ითვალისწინებდა მაგალითად ანაკლიის მიმდებარე ტერიტორიაზე არსებული სასტუმროების გადასახადებისგან გათავისუფლებას 15 წლის ვადით. უნდა აღინიშნოს რომ ამ უკანასკნელი  შეღავათების გახანგრძლივება ზემოთ აღნიშული ცვლილებათა პაკეტის მიხედვით არ მომხდარა, შესაბამისად შეგვიძლია დავასკვნათ რომ ტურისტული ზონის სუბიექტების განთავისუფლება ხსენებული გასახადების ნაწილში აღარ მოხდება. 

ცვლილება ამოქმედდება 2026 წლის 1 იანვრიდან.

ცვლილების შესახებ დეტალური ინფორმაცია იხილეთ ბმულზე:

https://matsne.gov.ge/ka/document/view/6669028?publication=0

1.2.საგადასახადო საიდუმლოებასთან დაკავშირებული ცვლილებები

2025 წლის 17 და 27 ნოემბერს გამოქვეყნდა საქართველოს კანონები 1055-IVმს-XIმპ და 1074-IVმს-XIმპ შესაბამისად, რის საფუძველზეც ცვლილება შევიდა საქართველოს საგადასახადო კოდექსში (შემდგომში – სსკ). ცვლილების შედეგად, სსკ-ის 39-ე მუხლის – „საგადასახადო საიდუმლოება“ მე-2 ნაწილს დაემატა ახალი „ჯ“ და „ჰ“ ქვეპუნქტები.

როგორც მოგეხსენებათ, სსკ-ის 39 მუხლის მე-2 ნაწილის მიხედვით, საგადასახადო ორგანო, მისი თანამშრომელი, მოწვეული სპეციალისტი ან/და ექსპერტი ვალდებულია დაიცვას გადასახადის გადამხდელის შესახებ ინფორმაციის საიდუმლოება, რომელიც მისთვის ცნობილი გახდა სამსახურებრივი მოვალეობის შესრულებისას. ამასთან, მას უფლება აქვს, ცალკეული გადასახადის გადამხდელის შესახებ იდენტიფიცირებული ინფორმაცია გადასცეს მხოლოდ ამავე მუხლით მკაცრად განსაზღვრულ პირებს. 

ცვლილების საფუძველზე, აღნიშნული პირების ჩამონათვალს დაემატა, შემდეგი პირები, რომლებიც განსაზღვრულია ახალი „ჯ“ და „ჰ“ ქვეპუნქტებით:

ჯ) საქართველოს მთავრობის ადმინისტრაცია – „საქართველოს მთავრობის სტრუქტურის, უფლებამოსილებისა და საქმიანობის წესის შესახებ“ საქართველოს კანონით გათვალისწინებული გადაწყვეტილებების შესრულების კონტროლის ხელშეწყობის ფუნქციის შესრულების მიზნით;

ჰ) საქართველოს თავდაცვის სამინისტრო − „იარაღის შესახებ“, „სამხედრო და ორმაგი დანიშნულების პროდუქციის კონტროლის შესახებ“ და „ლიცენზიებისა და ნებართვების შესახებ“ საქართველოს კანონებით გათვალისწინებული სანებართვო პირობების შესრულების კონტროლის მიზნით, მისი კომპეტენციის ფარგლებში.

ცვლილებები ამოქმედდა გამოქვეყნებისთანავე, ანუ 2025 წლის 17 და 27 ნოემბრიდან, შესაბამისად.

ცვლილების შესახებ დეტალური ინფორმაცია იხილეთ ბმულზე:

https://matsne.gov.ge/ka/document/view/6668456?publication=0

https://matsne.gov.ge/ka/document/view/6678180?publication=0

1.3. შეიცვალა აქციზის გადასახადი თამბაქოს ნაწარმზე

2025 წლის 28 ნოემბერს გამოქვეყნდა საქართველოს კანონი 1114-IVმს-XIმპ, რის საფუძველზეც ცვლილება შევიდა საქართველოს საგადასახადო კოდექსში (შემდგომში – სსკ). ცვლილება შეეხო სსკ-ის 188-ე მუხლს და შეიცვალა აქციზის გადასახადი თამბაქოს გარკვეულ ნაწარმზე. კერძოდ კი განხორციელდება შემდეგი ძირითადი ცვლილებები:

• 2402 20 კოდში მითითებული ადგილობრივი წარმოების სიგარეტები, თამბაქოს შემცველობით, ყოველწლიურად 35 მილიონ კოლოფამდე/შეფუთვამდე დაიბეგრება 20 ღერზე 1.3 ლარის (ნაცვლად 1.9 ლარისა) ოდენობის აქციზის განაკვეთით. ხოლო, 35 მილიონ კოლოფზე/შეფუთვაზე მეტი ადგილობრივი წარმოების სიგარეტები, თამბაქოს შემცველობით, ასევე იმპორტირებული სიგარეტები დაიბეგრება 20 ღერზე 2.75 ლარის (ნაცვლად 1.9 ლარისა) ოდენობის აქციზის განაკვეთით;
• 2402 20 კოდში მითითებული ყოველწლიურად 35 მილიონ კოლოფამდე/შეფუთვამდე ადგილობრივი წარმოების ფილტრიანი სიგარეტებისათვის/უფილტრო სიგარეტებისათვის, თამბაქოს შემცველობით, 20 ღერზე აქციზის განაკვეთი იქნება 188-ე მუხლის პირველი ნაწილით განსაზღვრული აქციზის განაკვეთისა და ამ საქონლის საცალო სარეალიზაციო ფასის 15 პროცენტის (ნაცვლად 30%-ისა) ჯამი. ხოლო ყოველწლიურად 35 მილიონ კოლოფზე/შეფუთვაზე მეტი ადგილობრივი წარმოების ფილტრიანი სიგარეტებისათვის/ უფილტრო სიგარეტებისათვის, თამბაქოს შემცველობით, 20 ღერზე აქციზის განაკვეთი იქნება 188-ე მუხლის პირველი ნაწილით განსაზღვრული აქციზის განაკვეთისა და ამ საქონლის საცალო სარეალიზაციო ფასის 20 პროცენტის (ნაცვლად 30%-ისა) ჯამი;
• საგარეო-ეკონომიკური საქმიანობის ეროვნული სასაქონლო ნომენკლატურის 2404 11 000 00 კოდში მითითებული კაფსულებისა და მსგავსი სახის პროდუქტებისთვის (თამბაქოს შემცველობით) 20 ცალზე და წვის პროცესის გარეშე აეროზოლის მისაღებად გამოსაყენებელი ღერებისთვის 20 ღერზე აქციზის განაკვეთია 188-ე მუხლის პირველი ნაწილით განსაზღვრული აქციზის განაკვეთისა და ამ საქონლის საცალო სარეალიზაციო ფასის 20 პროცენტის (ნაცვლად 30%-ისა) ჯამი.

გარდა ამისა, წარმოდგენილი ცვლილებით 188-ე მუხლს დაემატება მე-11 ნაწილი, რომლის მიხედვითაც საგარეო-ეკონომიკური საქმიანობის ეროვნული სასაქონლო ნომენკლატურის 2402 20 კოდში მითითებული ყოველწლიურად 35 მილიონ კოლოფამდე/შეფუთვამდე ადგილობრივი წარმოების სიგარეტისათვის ამ მუხლის პირველი ნაწილის ცხრილის მე-3 გრაფით დადგენილი განაკვეთის გამოყენების წესი და პირობები, ასევე კვოტირების წესი განისაზღვრება საქართველოს მთავრობის დადგენილებით.

ცვლილება ამოქმედდება 2026 წლის 1 იანვრიდან.

ცვლილების შესახებ დეტალური ინფორმაცია იხილეთ ბმულზე:

https://matsne.gov.ge/ka/document/view/6681174?publication=0

1.4. ტექნიკური ხასიათის ცვლილება

2025 წლის 14 ნოემბერს გამოქვეყნდა საქართველოს კანონი 1024-IVმს-XIმპ, რის საფუძველზეც ცვლილება შევიდა საქართველოს საგადასახადო კოდექსში (შემდგომში – სსკ). ცვლილების შედეგად ახალი რედაქციით ჩამოყალიბდა სსკ-ის  82-ე მუხლის 1-ლი ნაწილის „მ“ ქვეპუნქტი, 171-ე მუხლის 1-ლი ნაწილის „თ“ ქვეპუნქტი, 182-ე მუხლის მე-5 ნაწილი, 1901 მუხლის 11 ნაწილი, 192-ე მუხლის 11 და მე-5 ნაწილები.

ცვლილება არის დამაზუსტებელი ხასიათის და მიზნად ისახავს საგადასახდო კოდექსის იმ ცვლილებებთან შესაბამისობაში მოყვანას, რომელიც  განხორციელდა „სახელმწიფო ქონების შესახებ“ საქართველოს კანონში.

კერძოდ კი, ცვლილებამდე არსებული სსკ-ის რედაქციით განსაზღვრული იყო, 82-ე მუხლის 1-ლი ნაწილის „მ“ ქვეპუნქტში, რომ საშემოსავლო გადასახადის დაბეგვრისგან თავისუფლდება ფიზიკურ პირთა შემოსავლები პრივატიზების წესით (მათ შორის, უსასყიდლოდ) ქონების მიღების შედეგად, აგრეთვე მიწისძვრითა და სხვა სტიქიური მოვლენების შედეგად დაზარალებულთა მიერ დაზიანებული ბინების სანაცვლოდ იმავე დასახლებულ პუნქტში ან ეკომიგრანტების მიერ სხვა დასახლებულ პუნქტში ბინების უსასყიდლოდ მიღების შედეგად წარმოშობილი სარგებელი. ასევე, ამავე კოდექსის 171-ე მუხლის 1-ლი ნაწილის „თ“ ქვეპუნქტის თანახმად, განსაზღვრული იყო, რომ დღგ-ისგან ჩათვლის უფლების გარეშე გათავისუფლებულია სახელმწიფო ქონების მიწოდება პრივატიზაციის პროგრამის მიხედვით. ცვლილების შედეგად დაემატა ჩანართი, რომელიც გულისხმობს, რომ აღნიშნული საგადასახადო შეღავათები არ ვრცელდება სახელმწიფო საკუთრებაში მიქცეული მოძრავი ქონების რეალიზაციის შემთხვევაზე.

გამომდინარე აქედან, რომ „სახელმწიფო ქონების შესახებ“ საქართველოს კანონში, სახელმწიფო საკუთრებაში მიქცეულ მოძრავ ქონებასთან მიმართებით, ტერმინი „რეალიზაცია“ ჩანაცვლდა ტერმინით „პრივატიზება“, საქართველოს საგადასახადო კოდექსის შესაბამისობაში მოყვანის მიზნით, შევიდა ტექნიკური ცვლილებები და ჩანაცვლდა ტერმინი „რეალიზაცია“ ტერმინით „პრივატიზება“ შემდეგ მუხლებში: 182-ე მუხლის მე-5 ნაწილი, 1901 მუხლის 11 ნაწილი, 192-ე მუხლის 11 და მე-5 ნაწილებში.

შესაბამისად, საქართველოს საგადასახადო კოდექსის ტერმინოლოგიური თვალსაზრისით შესაბამისობაში მოსვლა  „სახელმწიფო ქონების შესახებ“ საქართველოს კანონში ცვლილების შეტანის თაობასთან, არ გამოიწვევს „საქართველოს საგადასახო კოდექსის“ მოქმედი რეგულაციების ცვლილებას და საგადასახადო შეღავათების გაფართოებას, სახელმწიფო საკუთრებაში მიქცეულ მოძრავ ქონებასთან დაკავშირებით.

ცვლილება ამოქმედდა გამოქვეყნებიდან 46-ე დღეს, ანუ 2025 წლის 26 დეკემბრიდან.

ცვლილების შესახებ დეტალური ინფორმაცია იხილეთ ბმულზე:

https://matsne.gov.ge/ka/document/view/6665530?publication=0

2.ცვლილებები საქართველოს ფინანსთა მინისტრის ბრძანებებში

2.1.ცვლილება გასაჩივრებაზე უარის თქმის წესში

2025 წლის 14 ნოემბერს გამოქვეყნდა საქართველოს ფინანსთა მინისტრის N296 ბრძანება, რის საფუძველზეც ცვლილება შევიდა „გადასახადების ადმინისტრირების შესახებ“ ფინანსთა მინისტრის N996 ბრძანებით დამტკიცებულ ინსტრუქციაში. ცვლილების შედეგად, ახალი რედაქციით ჩამოყალიბდა ინსტრუქციის მე-171 მუხლი – „საგადასახადო მოთხოვნის გასაჩივრებაზე უარის თქმა“ და დაემატა ახალი 172 მუხლი – „საგადასახადო დავის განმხილველი ორგანოს გადაწყვეტილების გასაჩივრებაზე უარის თქმა“.

კერძოდ კი, ცვლილება შევიდა საგადასახადო მოთხოვნის და საგადასახადო დავის განმხილველი ორგანოს გადაწყვეტილების გასაჩივრებაზე უარის თქმის შესახებ განცხადების შევსების და აღნიშნული საფუძველზე გადასახადის გადამხდელის პირადი აღრიცხვის ბარათზე თანხების მოძრაობის წესში. კერძოდ, გადასახადის გადამხდელს მიეცემა შესაძლებლობა „საგადასახადო მოთხოვნის გასაჩივრებაზე უარის თქმის შესახებ“ განცხადება წარმოადგინოს ელექტრონული ფორმით. გარდა აღნიშნულისა, ცვლილების თანახმად, საგადასახადო ორგანოსათვის განისაზღვრება გადასახადის გადამხდელის დროებითი აღრიცხვის ბარათიდან გადასახადის გადამხდელის პირადი აღრიცხვის ძირითად ბარათზე თანხის გადატანის განსხვავებული ვადები, იმის მიხედვით, თუ რა არის განცხადების წარმოდგენის მიზნობრიობა. კერძოდ, გარდა სტანდარტული სამდღიანი ვადისა, ცვლილების თანახმად, შემოსავლების სამსახურის უფროსს ენიჭება უფლებამოსილება, ცალკეულ შემთხვევაში დაადგინოს პირადი აღრიცხვის ბარათზე თანხის ასახვის განსხვავებული ვადები.

ცვლილების შესაბამისად ასევე, განახლდა №I-12​1 დანართი (განცხადება საგადასახადო მოთხოვნის გასაჩივრებაზე უარის თქმის შესახებ) და განისაზღვრა ახალი №I-12​2 დანართი (განცხადება საგადასახადო დავის განმხილველი ორგანოს გადაწყვეტილების გასაჩივრებაზე უარის თქმის შესახებ).

ცვლილება ამოქმედდება 2026 წლის 1 იანვრიდან.

ცვლილების შესახებ დეტალური ინფორმაცია იხილეთ ბმულზე:

https://matsne.gov.ge/ka/document/view/6669950?publication=0

3. ცვლილებები შემოსავლების სამსახურის უფროსის ბრძანებებში

3.1.ცვლილება დებიტორული დავალიანებისა და გადახდილი ავანსების მეთოდურ მითითებაში

2025 წლის 6 ნოემბერს გამოქვეყნდა სსიპ – შემოსავლების სამსახურის უფროსის ბრძანება №24351, რის საფუძველზეც ცვლილება შევიდა  შემოსავლების სამსახურის უფროსის №22708 ბრძანებაში „ცალკეულ შემთხვევებში პირის საგადასახადო ვალდებულებების განსაზღვრის მიზნით მეთოდური მითითებების დამტკიცების თაობაზე“. ცვლილების შედეგად,  ამოუღებელი დებიტორული დავალიანებებისა და გადახდილი ავანსების დაბეგვრის ნაწილში შემოსავლების სამსახურის მიდგომები ნაწილობრივ შეიცვალა.

აღნიშნული მეთოდური მითითება შემოსავლების სამსახურის მიერ პირველად 2024 წლის ოქტომბრის თვეში გამოქვეყნდა, რასთან დაკავშირებით ჩვენმა აუდიტორულმა კომპანიამ გამოაქვეყნა ვრცელი პუბლიკაცია მეთოდური მითითებაში მოცემული დაბეგვრის მიდგომების შესახებ. მეთოდური მითითების მიხედვით თუ  „გონივრული“  ვადის განმავლობაში არ მოხდებოდა ასეთი დებიტორული დავალიანების  დაფარვა (ამოღება) ან მომწოდებლებისთვის გადახდილი ავანსების სანაცვლოდ საქონლის ან მომსახურების მოწოდება, აღნიშნულ შემთხვევაში თანხის ოდენობა ჩაითვლებოდა დირექტორზე გადახდილ ხელფასად და დაიბეგრებოდა საშემოსავლო გადასახადით.

აღსანიშნავია, რომ დებიტორული დავალიანების შესახებ მეთოდური მითითების პირველ ვერსიაში დებიტორული დავალიანების ან გადახდილი ავანსის დირექტორზე გაცემულ ხელფასად განხილვა და საშემოსავლო გადასახადით დაბეგვრა ხდებოდა როგორც არარეზიდენტ პირთან მიმართებაში ასევე საქართველოს რეზიდენტი ფიზიკურ და იურიდიულ პირებთან მიმართებაში. ანუ პირველი მეთოდური მითითების მიხედვით არ ჰქონდა მნიშვნელობა ამოუღებელი დებიტორული დავალიანება პირს არარეზიდენტ პირთა მიმართებაში ჰქონდა, თუ რეზიდენტ ფიზიკურ ან იურიდიულ პირთან მიმართებაში. გარდა ამისა, მეთოდური მითითების პირველ ვერსიაში იყო უამრავი სხვადასხვა ტიპის ორაზროვნება და გაურკვეველი ისეთი საკითხები როგორიცაა ერთი და იგივე თანხების დუბლირებულად დაბეგვრა, კერძოდ არ იყო დაზუსტებული ის თუ რა მიდგომას გამოიყენებდა შემოსავლების სამსახური ამოუღებელი დებიტორული დავალიანების ხელფასად დაბეგვრის შემდეგ თანხის მიღების შემთხვევაში (მეორედ მოხდებოდა დაბეგვრა თუ არა). ერთ-ერთ მნიშვნელოვან ხარვეზს წარმოადგენდა ისიც, რომ არ იყო არანირი განმარტება იმის შესახებ თუ როგორ უნდა მომხდარიყო  დებიტორული დავალიანების გონივრული ვადის განსაზღვრა. გარდა ამისა იყო უამრავი სხვადასხვა სახის ხარვეზი, მ.შ. მცირე თანხიანი დებიტორული დავალიანების ამოღებულად მიჩნევისა და სხვა მრავალ საკითხთან მიმართებაში.

რა არის ახალი?

1. ერთ-ერთი მთავარი სიახლე არის ის, რომ მეთოდურ მითითებაში აღარ იძებნება ჩანაწერი რეზიდენტ პირებთან მიმართებაში არსებული (მაგ. რეზიდენტი შპს და ი/მ) დებიტორული დავალიანების ამოღებულად მიჩნევის შესახებ. მეთოდური მითითების მე-4 მუხლის მიხედვით გონივრულ ვადაში  ამოუღებელი დებიტორული დავალიანების დაბეგვრა ხელფასად მოხდება იმ შემთხვევაში, როდესაც ასეთი დებიტორული დავალიანება (ან გადახდილი ავანსი) არსებობს არარეზიდენტ პირთან მიმართებაში, თუ კმაყოფილდება ყველა შემდეგი პირობა:

ა) დებიტორული დავალიანების წარმოშობიდან გასულია გონივრული ვადა;

ბ) საგადასახადო შემოწმების დანიშვნის თარიღამდე არ დასტურდება დებიტორული დავალიანების ანაზღაურება (უცხოეთში გადახდილი ავანსის შემთხვევაში არ დასტურდება საქონლის/მომსახურების მოწოდება);

გ) იმ შემთხვევაში, თუ მიწოდებულია საქონელი, საგადასახადო შემოწმების დასრულებამდე არ დასტურდება ამავე საქონლის უკან დაბრუნება.

შესაბამისად ახალი მეთოდური მითითებით საქონლის/მომსახურების დებიტორული დავალიანების გონივრულ ვადაში არ ამოღების შემთხვევაში,  ასევე გადახდილი ავანსის სანაცვლოდ საქონლის/მომსახურების გონივრულ ვადაში არ მოწოდების შემთხვევაში თანხების ხელფასად განხილვა და საშემოსავლო გადასახადით დაბეგვრა მოხდება მხოლოდ არარეზიდენტ პირებთან მიმართებაში,  რეზიდენტ ფიზიკურ და იურიდიულ პირებთან მიმართებით ამოუღებელ დებიტორულ დავალიანებებთან მიმართებით აღნიშნული მეთოდური მითითება აღარ გამოიყენება. 

ეს უკანასკნელი ჩანაწერი ბუნებრივია სრულად არ გამორიცხავს შემოსავლების სამსახურის მხრიდან მსგავსი მიდგომის გამოყენებას რეზიდენტ პირებთან არსებული დებიტორული დავალიანებების შემთხვევებში თუ ამ სამსახურის ხელთ იქნება უტყუარი მტკიცებულებები ასეთი დებიტორული დავალიანების ამოღების ან სხვა ფაქტების შესახებ, რომელიც ამ დავალიანების გადახდაზე მიანიშნებს, თუმცა თავად ის ფაქტი, რომ მეთოდურ მითითებაში პირდაპირ აღარ არის საუბარი რეზიდენტ პირებთან მიმართებაში არსებული დაბეგვრის შესახებ, ცალსახად მიანიშნებს შემოსავლების სამსახურის მიდგომის შერბილებაზე  ამ მიმართულებით. გარდა ამისა, შემოსავლების სამსახურის მეთოდურ მითითებაში ზუსტდება შემდეგი საკითხები:

1. ზუსტდება რომ ამოუღებელი დებიტორული დავალიანებებისა და გადახდილი ავანსების შემთხვევა არ დაექვემდებარება დაბეგვრას თუ დავალიანების ამოღება ან გადახდილი ავანსების სანაცვლოდ საქონლის/მომსახურების მოწოდება არ მომხდარა 12 თვემდე ვადაში. შესაბამისად დაბეგვრა აღნიშნული მეთოდური მითითების მიხედვით შესაძლოა განხორციელდეს მხოლოდ მაშინ თუ ამოუღებელი დებიტორული დავალიანებები და გადახდილი ავანსები (რის სანაცვლოდაც არ მომხდარა მოწოდება) ფიქსირდება 12 თვეზე მეტი ხნის განმავლობაში.  
2. გარდა აღნიშნულისა, დაზუსტდა დებიტორული დავალიანების ხელფასად დაბეგვრის შემდეგ, მყიდველის მიერ თანხის გადახდისას ორმაგი დაბეგვრის პრობლემური საკითხიც. ძველი მეთოდური მითითება არ გამორიცხავდა ამოუღებელი დებიტორული დავალიანების/ავანსების დაბეგვრის შემდეგ აღნიშნული თანხების მეორედ დაბეგვრას თუ მოხდება ასეთი დებიტორული დავალიანების ამოღება ან საქონლის მომსახურების მოწოდება.  ახალ მეთოდურ მითითებაში ჩაიწერა, რომ მეთოდური მითითების შესაბამისად საშემოსავლო გადასახადით დაბეგრილი თანხების (ოპერაციების) მიმართ შემდგომში არ წარმოიშობა საგადასახადო ვალდებულებები, რამაც უნდა გამორიცხოს ერთი და იგივე თანხები ორმაგად დაბეგვრა, შემოსავლების სამსახურის მიერ დაბეგრილი დებიტორული დავალიანების (ან გადახდილი ავანსების)  მიმწოდებელისთვის გადახდის ან გადახდილი ავანსების სანაცვლოდ საქონელის მოწოდების შემთხვევაში.

აღნიშნულის ხარვეზების გამოსწორებისა და გარკვეული დაზუსტების მიუხედავად კვლავ ბუნდოვანი და გაურკვეველია მრავალი საკითხი მ.შ. ის თუ როგორ უნდა მოხდეს დებიტორული დავალიანების „გონივრული ვადის“ განსაზღვრა საგადასახადო აუდიტის დროს და რა მეთოდოლოგიითა და საინფორმაციო წყაროების გამოყენებით მოხდება ზემოთ აღნიშნულის შესახებ გადაწყვეტილების მიღება. ჩვენი აზრით, ამ უკანასკნელმა განუსაზღვრელობამ შესაძლოა გამოიწვიოს შემოსავლების სამსახურის აუდიტორების მხრიდან სუბიექტური მიდგომები საგადასახადო შემოწმების დროს, რაც თავის მხრივ შემოსავლების სამსახურში სხვა რისკების წარმოშობასთან არის კავშირში.

გარდა ამისა, კვლავ გაურკვეველი რჩება რამდენიმე მნიშვნელოვანი საკითხი მ.შ. ისეთი დებიტორული დავალიანებების ჩამოწერის საკითხი, როდესაც დებიტორული დავალიანების ამოღების ხარჯები აღემატება დებიტორული დავალიანების ოდენობას. ეს მეტად მნიშვნელოვანი საკითხი არ არის განმარტებული ახალი მეთოდური მითითების მიხედვით რაც შესაძლოა პრობლემური იყოს ისეთი კომპანიების შემთხვევაში ვისაც აქვს მცირე თანხიანი ამოუღებელი დებიტორული დავალიანებები მრავალ პირთან მიმართებაში, რა დროსაც აღნიშნული დავალიანების ამოსაღებად გაწეული სასამართლო და იურიდიული ხარჯები (მ.შ. დავის წარმოება საქართველოს ფარგლებს გარეთ) შესაძლოა აღემატებოდეს თავად ამ დებიტორული დავალიანების თანხას.

ცვლილება ამოქმედდა ხელმოწერისთანავე, ანუ 2025 წლის 4 ნოემბრიდან.

ცვლილების შესახებ დეტალური ინფორმაცია იხილეთ ბმულზე:

https://www.matsne.gov.ge/ka/document/view/6662350?publication=0

3.2.ცვლილება სიდიდის შესაბამისი კატეგორიის განსაზღვრის, გაუქმებისა და აღრიცხვის წესში

2025 წლის 18 ნოემბერს გამოქვეყნდა სსიპ – შემოსავლების სამსახურის უფროსის ბრძანება №25093, რის საფუძველზეც დამტკიცდა განახლებული შიდა ინსტრუქცია „გადასახადის გადამხდელისთვის სიდიდის შესაბამისი კატეგორიის განსაზღვრის, გაუქმებისა და აღრიცხვის წესის შესახებ“. შედეგად კი, გაუქმდა შემოსავლების სამსახურის უფროსის 2023 წლის 30 ოქტომბრის №26626 ბრძანებით დამტკიცებული ზემოთ ხსენებული ინსტრუქცია.

აღნიშნული ინსტრუქცია არეგულირებს „გადასახადების ადმინისტრირების შესახებ“ საქართველოს ფინანსთა მინისტრის №996 ბრძანებით დამტკიცებული ინსტრუქციის 61 მუხლით გათვალისწინებულ გადასახადის გადამხდელთა სიდიდის შესაბამისი კატეგორიების განსაზღვრასთან, აგრეთვე, განსაზღვრული კატეგორიების გაუქმებასა და აღრიცხვასთან დაკავშირებულ საკითხებს. შეგახსენებთ, რომ ზემოხსენებული 6¹ მუხლის თანახმად, საგადასახადო ორგანოს მიერ გადასახადის გადამხდელს განესაზღვრება სიდიდის კატეგორია, რის შედეგადაც, პირს შეიძლება მიენიჭოს მცირე, საშუალო ან მსხვილი გადამხდელის კატეგორია.

ახალი შიდა ინსტრუქციით განახლებულად ჩამოყალიბდა მსხვილ გადამხდელთა კატეგორიის განმსაზღვრელი კრიტერიუმები. კერძოდ, მსხვილი გადამხდელის კატეგორიის მისანიჭებლად პირი უნდა აკმაყოფილებდეს ამავე ინსტრუქციით გათვალისწინებულ არანაკლებ 2 კრიტერიუმს ერთდროულად, განსხვავებით წინა ინსტრუქციისა, სადაც 1 კრიტერიუმის არსებობაც კი საკმარისი იყო პირისთვის მსხვილი გადამხდელის კატეგორიის მისანიჭებლად. ასევე, მსხვილი კატეგორიის მისანიჭებლად კრიტერიუმების ჩამონათვალს დაემატა ახალი „თ“ ნაწილი, რომელიც ეხება პირის მიერ შესაბამისი კატეგორიის განსაზღვრის თვის წინა 12 კალენდარული თვის მიხედვით გადახდილი ან უკან დაბრუნებული გადასახადის მინიმალურ ზღვარს არანაკლებ 1,000,000 ლარის ოდენობით.

ბრძანება ამოქმედდა ხელმოწერისთანავე, ანუ 2025 წლის 14 ნოემბრიდან.

ცვლილების შესახებ დეტალური ინფორმაცია იხილეთ ბმულზე:

https://www.matsne.gov.ge/ka/document/view/6672956?publication=0

შპს კრესტონ ჯორჯია

მმართველი პარტნიორი                                                             დავით პაპიაშვილი

საგადასახადო აუდიტის დეპარტამენტის ხელმძღვანელი                     რუსუდან ჭაბუკიანი

The post 2025 წლის ნოემბრის თვის განმავლობაში საქართველოს საგადასახადო კანონმდებლობაში შესული ცვლილებები appeared first on ფინანსური აუდიტი და საგადასახადო მომსახურება.

Kreston Georgia აგრძელებს საგადასახადო კანონმდებლობაში შესული ცვლილებებისა და სიახლეების მიმოხილვას. ამჯერად გთავაზობთ 2025 წლის ოქტომბრის თვეში შესული საკანონმდებლო სიახლეების მიმოხილვას.

სარჩევი

1.ცვლილებები საქართველოს ფინანსთა მინისტრის ბრძანებებში

1.1.ცვლილებები ბიუჯეტში ზედმეტად გადახდილი გადასახადის ან/და სანქციის თანხის დაბრუნების წესში

1.ცვლილებები საქართველოს ფინანსთა მინისტრის ბრძანებებში

1.1. ცვლილებები ბიუჯეტში ზედმეტად გადახდილი გადასახადის ან/და სანქციის თანხის დაბრუნების წესში

2025 წლის 10 და 24 ოქტომბერს გამოქვეყნდა ფინანსთა მინისტრის N262 და N277 ბრძანებები, რომლითაც ცვლილებები შევიდა „ბიუჯეტების შემოსულობების აღრიცხვა-ანგარიშგებისა და ანგარიშსწორების განხორციელებისა და ბიუჯეტში ზედმეტად ან შეცდომით გადახდილი შემოსულობის თანხის დაბრუნების, აღრიცხვისა და ანგარიშგების შესახებ“ ფინანსთა მინისტრის N916 ბრძანებაში.

ცვლილების შედეგად, ზედმეტად გადახდილი გადასახადის ან/და სანქციის თანხის მოთხოვნაზე (შემდგომში, „მოთხოვნა“) უარის თქმის საფუძველთა ნუსხას დაემატა კიდევ ერთი საფუძველი, რომლის მიხედვითაც, საგადასახადო ორგანოს უფლება აქვს უარი თქვას გადასახადის გადამხდელის „მოთხოვნაზე“, თუკი გადასახადის გადამხდელი არ გაეცნო საგადასახადო ორგანოს მიერ დადგენილ ხარვეზს ან უარი განაცხადა მის მიღებაზე, და ამასთან, ხარვეზის დადგენის შესახებ წერილის გაგზავნის თარიღიდან გასულია 30 კალენდარული დღე.

ცვლილების მიხედვით ასევე, განისაზღვრა გადასახადის გადამხდელისთვის, მოთხოვნის შემთხვევაში, ხანდაზმულობის ვადის გათვალისწინებით, ბიუჯეტში ზედმეტად გადახდილი თანხის დაბრუნების ახალი საფუძველი. კერძოდ, აღნიშნული ქვეპუნქტი განიხილავს ისეთ შემთხვევას, როდესაც საგადასახადო ორგანოს ერთი და იგივე საინკასო დავალებით, გადასახადის გადამხდელის სხვადასხვა საბანკო ანგარიშიდან მოხდა გადასახადის ან/და საგადასახადო სანქციის (მათ შორის, საბაჟო სანქციის) თანხის ჩამოწერა საინკასო დავალებით განსაზღვრულ ოდენობაზე მეტი ოდენობით. შედეგად, აღნიშნულ შემთხვევაში, გადასახადის გადამხდელს მხოლოდ მოთხოვნის საფუძველზე, ამავე ბრძანებით განსაზღვრული დამატებითი დოკუმენტების წარდგენის გარეშე, შეუძლია მიმართოს საგადასახადო ორგანოს ზედმეტად გადახდილი გადასახადის ან/და სანქციის თანხის დაბრუნების მიზნით.

ცვლილებები ამოქმედდა გამოქვეყნებისთანავე, ანუ 2025 წლის 10 და 24 ოქტომბრიდან.

ცვლილების შესახებ დეტალური ინფორმაცია იხილეთ ბმულზე:

https://www.matsne.gov.ge/ka/document/view/6642279?publication=0

https://www.matsne.gov.ge/ka/document/view/6652985?publication=0

შპს კრესტონ ჯორჯია

მმართველი პარტნიორი                                                             დავით პაპიაშვილი

საგადასახადო აუდიტის დეპარტამენტის ხელმძღვანელი                     რუსუდან ჭაბუკიანი

The post 2025 წლის ოქტომბრის თვის განმავლობაში საქართველოს საგადასახადო კანონმდებლობაში შესული ცვლილებები appeared first on ფინანსური აუდიტი და საგადასახადო მომსახურება.

მიმდინარე წლის 6 ნოემბერს გამოქვეყნდა ცვლილება „ცალკეულ შემთხვევებში პირის საგადასახადო ვალდებულებების განსაზღვრის მიზნით მეთოდური მითითებების დამტკიცების თაობაზე“ შემოსავლების სამსახურის უფროსის ბრძანებაში, რისი მიხედვითაც ამოუღებელი დებიტორული დავალიანებებისა და გადახდილი ავანსების დაბეგვრის ნაწილში შემოსავლების სამსახურის მიდგომები ნაწილობრივ იცვლება.

აღნიშნული მეთოდური მითითება შემოსავლების სამსახურის მიერ პირველად 2024 წლის ოქტომბრის თვეში გამოქვეყნდა, რასთან დაკავშირებით ჩვენმა აუდიტორულმა კომპანიამ გამოაქვეყნა ვრცელი პუბლიკაცია მეთოდური მითითაში მოცემული დაბეგვრის მიდგომების შესახებ. მეთოდური მითითების მიხედვით თუ  „გონივრული“  ვადის განმავლობაში არ მოხდებოდა ასეთი დებიტორული დავალიანების  დაფარვა (ამოღება) ან მომწოდებლებისთვის გადახდილი ავანსების სანაცვლოდ საქონლის ან მომსახურების მოწოდება, აღნიშნულ შემთხვევაში თანხის ოდენობა ჩაითვლებოდა დირექტორზე გადახდილ ხელფასად და დაბეგრებოდა საშემოსავლო გადასახადით.

აღსანიშნავია რომ დებიტორული დავალიანების შესახებ მეთოდური მითითების პირველ ვერსიაში დებიტორული დავალიანების ან გადახდილი ავანსის დირექტორზე გაცემულ ხელფასად განხილვა და საშემოსავლო გადასახადით დაბეგვრა ხდებოდა როგორც არარეზიდენტ პირთან მიმართებაში ასევე საქართველოს რეზიდენტი ფიზიკურ და იურიდიულ პირებთან მიმართებაში. ანუ პირველი მეთოდური მითითების მიხედვით არ ჰქონდა მნიშვნელობა ამოუღებელი დებიტორული დავალიანება პირს არარეზიდენტ პირთა მიმართებაში ჰქონდა, თუ რეზიდენტ ფიზიკურ ან იურიდიულ პირთან მიმართებაში. გარდა ამისა მეთოდური მითითების პირველ ვერსიაში იყო უამრავი სხვადასხვა ტიპის ორაზროვნება და გაურკვეველი ისეთი საკითხები როგორიცაა ერთი და იგივე თანხების დუბლირებულად დაბეგვრა, კერძოდ არ იყო დაზუსტებული ის თუ რა მიდგომას გამოიყენებდა შემოსავლების სამსახური ამოუღებელი დებიტორული დავალიანების ხელფასად დაბეგვრის შემდეგ თანხის მიღების შემთხვევაში (მეორედ მოხდებოდა დაბეგვრა თუ არა). ერთ-ერთ მნიშვნელოვან ხარვეზს წარმოადგენდა ისიც რომ არ იყო არანირი განმარტება იმის შესახებ თუ როგორ უნდა მოხდარიყო  დებიტორული დავალიანების გონივრული ვადის განსაზღვრა. გარდა ამისა იყო უამრავი სხვადასხვა სახის ხერვეზი, მ.შ. მცირე თანხიანი დებიტორული დავალიანების ამოღებულად მიჩნევისა და სხვა მრავალ სახითხთან მიმართებაში.

რა არის ახალი?

1. ერთ-ერთი მთავარი სიახლე არის ის რომ მეთოდურ მითითებაში აღარ იძებნება ჩანაწერი რეზიდენტ პირებთან მიმართებაში არსებული (მაგ. რეზიდენტი შპს და ი/მ) დებიტორული დავალიანების ამოღებულად მიჩნევის შესახებ. მეთოდური მითითების მე-4 მუხლის მიხედვით გონივრულ ვადაში  ამოუღებელი დებიტორული დავალიანების დაბეგვრა ხელფასად მოხდება იმ შემთხვევაში როდესაც ასეთი დებიტორული დავალიანება (ან გადახდილი ავანსი) არსებობს არარეზიდენტ პირთან მიმართებაში, თუ კმაყოფილდება ყველა შემდეგი პირობა:

ა) დებიტორული დავალიანების წარმოშობიდან გასულია გონივრული ვადა;

ბ) საგადასახადო შემოწმების დანიშვნის თარიღამდე არ დასტურდება დებიტორული დავალიანების ანაზღაურება (უცხოეთში გადახდილი ავანსის შემთხვევაში არ დასტურდება საქონლის/მომსახურების მოწოდება).

გ) იმ შემთხვევაში, თუ მიწოდებულია საქონელი, საგადასახადო შემოწმების დასრულებამდე არ დასტურდება ამავე საქონლის უკან დაბრუნება

შესაბამისად ახალი მეთოდური მითითებით საქონლის/მომსახურების დებიტორული დავალიანების გონივრულ ვადაში არ ამოღების შემთხვევაში,  ასევე გადახდილი ავანსის სანაცვლოდ საქონლის/მომსახურების გონივრულ ვადაში არ მოწოდების შემთხვევაში თანხების ხელფასად განხილვა და საშემოსავლო გადასახადით დაბეგვრა მოხდება მხოლოდ არარეზიდენტ პირებთან მიმართებაში.  

ეს უკანასკნელი ჩანაწერი ბუნებრივია სრულად არ გამორიცხავს შემოსავლების სამსახურის მხრიდან მსგავსი მიდგომის გამოყენებას რეზიდენტ პირებთან არსებული დაბიტორული დავალიანებების შემთხვევევაში თუ ამ სამსახურის ხელთ იქნება უტყუარი მტკიცებულებები ასეთი დებიტორული დავალიანების ამოღების ან სხვა ფაქტების შესახებ რომელიც ამ დავალიანების გადახდაზე მიანიშნებს, თუმცა თავად ის ფაქტი რომ მეთოდურ მითითებაში პირდაპირ აღარ არის საუბარი რეზიდენტ პირებთან მიმართებაში არსებული დაბეგვრის შესახებ, ცალსახად მიანიშნებს შემოსავლების სამსახურის მიდგომის შერბილებაზე  ამ მიმართულებით.

2. გარდა აღნიშნულისა დაზუსტდა დაბიტორული დავალიანების ხელფასად დაბეგვრის შემდეგ, მყიდველის მიერ თანხის გადახდისას ორმაგი დაბეგვრის პრობლემური საკითხიც.  ახალ მეთოდურ მიმართებაში ჩაიწერა რომ მეთოდური მითითების შესაბამისად საშემოსავლო გადასახადით დაბეგრილი თანხების (ოპერაციების) მიმართ შემდგომში არ წარმოიშობა საგადასახადო ვალდებულებები, რამაც უნდა გამორიცხოს ერთი და იგივე თანხები ორმაგად დაბეგვრა.

აღნიშნულის ხარვეზების გამოსწორებისა და გარკვეული დაზუსტების მიუხედავად  კვლავ ბუნდოვანი და გაურვეველია მრავალი საკითხი მ.შ. ის თუ როგორ უნდა მოხდეს დებიტორული დავალიანების „გონივრული ვადის“ განსაზღვრა საგადასახადო აუდიტის დროს და რა მეთოდოლოგიითა და საინფორმაციო წყარობის გამოყენებით მოხდება ზემოთ აღნიშნული შესახებ გადაწყვეტილების მიღება. ჩვენი აზრით ამ უკანასკნელმა განუსაზღვრელობამ შესაძლოა გამოიწვიოს   შემოსავლების სამსახურის აუდიტორების მხრიდან სუბიექტური მიდგომები საგადასახადო შემოწმების დროს, რაც თავისმხრივ შემოსავლების სამსახურში სხვა რისკების წარმოშობასთან არის კავშირში.

გარდა ამისა კვლავ გაურკვეველი რჩება  რამოდენიმე მნიშვნელოვანი საკითხი მ.შ. ისეთი დებიტორული დავალიანებების ჩამოწერის საკითხი როდესაც დაბიტორული დავალიანების ამოღების ხარჯები აღემატება დებიტორული დავალიანების ოდენობას.  ეს მეტად მნიშვნელოვანი საკითხი არ არის განმარტებული ახალი მეთოდური მითითების მიხედვით რაც შესაძლოა პრობლემური იყოს ისეთი კომპანიების შემთხვევაში ვისაც აქვს მცირე თანხიანი ამოუღებელი დაბუტორული დავალიანებები მრავალ პირთან მიმართებაში, რა დროსაც აღნიშნული დავალიანების ამოსაღებად გაწეული სასამართლო და იურიდიული ხარჯები (მ.შ. დავის წარმოება საქართველოს ფარგლებს გარეთ) შესაძლოა აღემატებოდეს თავად ამ დებიტორული დავალიანების თანხას.

გარდა ამისა არის სხვა სახის ორაზროვნებაც, რაც ჩვენი აზრით უმოკლეს ვადებში უნდა აღმოიფვრას.

მეთოდური მითითება ნოემბრის თვიდან ამოქმედდა.

მეთოდური მითითების სანახავად გთხოვთ ეწვიოთ ქვემოთ მითითებულ ბმულს:

https://infohub.rs.ge/ka/workspace/document/f08be43f-6d24-4236-9479-a5a4fe058da3

The post შემოსავლების სამსახურის ამოუღებელი დებიტორული დავალიანებების მეთოდურ მითითება არარეზიდენტ პირებზე გავრცელდება. appeared first on ფინანსური აუდიტი და საგადასახადო მომსახურება.

Kreston Georgia აგრძელებს საგადასახადო კანონმდებლობაში შესული ცვლილებებისა და სიახლეების მიმოხილვას. ამჯერად გთავაზობთ 2025 წლის სექტემბრის თვეში შესული საკანონმდებლო სიახლეების მიმოხილვას.

სარჩევი

1.​ ცვლილებები შემოსავლების სამსახურის უფროსის ბრძანებებში​

1.1.​ დარიცხული ჯარიმის 50%-ის გაუქმების წესი​

2.​ ცვლილებები საქართველოს მთავრობის დადგენილებებში​

2.1.​ ცვლილება შეღავათიანი სტატუსის შეცვლასთან დაკავშირებით​

2.2.​ ინოვაციების სფეროში მოქმედი კომპანიების საგადასახადო შეღავათები​

3.​ ცვლილებები ფინანსთა მინისტრის ბრძანებებში​

1. ცვლილებები შემოსავლების სამსახურის უფროსის ბრძანებებში

1.1. დარიცხული ჯარიმის 50%-ის გაუქმების წესი

2025 წლის 26 სექტემბერს გამოქვეყნდა შემოსავლების სამსახურის უფროსის N20688 ბრძანება, რის საფუძველზეც დამტკიცდა ახალი მეთოდური   მითითება   „საგადასახადო   შემოწმების   შედეგად   დარიცხული ჯარიმების თანხების 50%-ის გაუქმების შესახებ“ (შემდგომში – მეთოდური მითითება), რომელიც არეგულირებს საგადასახადო შემოწმების შედეგად (მათ შორის შუალედური საგადასახადო შემოწმების აქტით) დარიცხული ჯარიმების თანხების 50%-ის გაუქმების წესს.

როგორც მოგეხსენებათ, სსკ-ის 269-ე მუხლის მე-11 ნაწილის მიხედვით, საგადასახადო შემოწმების შედეგად დარიცხული ჯარიმების თანხების 50% უქმდება, თუ გადასახადის გადამხდელს ამ საგადასახადო შემოწმების შედეგად გამოცემული საგადასახადო მოთხოვნის ჩაბარებიდან 30 დღის ვადაში ბიუჯეტში სრულად აქვს გადახდილი საგადასახადო მოთხოვნით გათვალისწინებული გადასახადების, აგრეთვე ჯარიმების 50% ტოლფასი თანხა და პირის მიერ ამავე ვადაში აღიარებულია შესაბამისი საგადასახადო მოთხოვნით გათვალისწინებული თანხა.

მეთოდური მითითება მიზნად ისახავს უზრუნველყოს პროცედურების ერთიანი მეთოდოლოგია იმ გადამხდელებისთვის, ვისაც სურს გამოიყენოს ზემოხსენებული სსკ-ის 269-ე მუხლით გათვალისწინებული შესაძლებლობა და საგადასახადო შემოწმების შედეგად დარიცხული ჯარიმების თანხა შეიმციროს 50%-ით.

საგადასახადო შემოწმების შედეგად დარიცხული ჯარიმის 50%-ის გაუქმების მიზნით:

• გადასახადის გადამხდელი ვალდებულია საგადასახადო მოთხოვნის ჩაბარების შემდეგ ბიუჯეტში გადაიხადოს შესაბამისი საგადასახადო მოთხოვნით გათვალისწინებული გადასახადები სრულად და ასევე ჯარიმების თანხების 50%, რა დროსაც, მხედველობაში არ მიიღება გადასახადის გადამხდელის პირადი აღრიცხვის ძირითად ბარათზე/დროებითი აღრიცხვის ბარათზე არსებული მდგომარეობა. რაც იმას ნიშნავს, რომ მიუხედავად იმისა, გადასახადის გადამხდელს პირადი აღრიცხვის ბარათზე ზედმეტობა აქვს თუ დავალიანება, საგადასახადო მოთხოვნით დარიცხული ძირითადი გადასახადის 100% და დარიცხული ჯარიმის 50% მან უნდა გადაიხადოს ბიუჯეტის შესაბამის ანგარიშზე, კერძოდ კი ერთიან სახაზინო კოდზე – 101001000.
• გადასახადის გადამხდელი ვალდებულია საგადასახადო მოთხოვნით გათვალისწინებული გადასახადები სრულად და ასევე ჯარიმების თანხების 50% გადაიხადოს მოთხოვნის ჩაბარებიდან 30 დღის ვადაში. ამასთან, აღნიშნულ 30 დღიან ვადაში გაითვალისწინება თანხის ფაქტობრივად გადახდის თარიღი. რაც იმას ნიშნავს, რომ გადამხდელმა სულ რომ 30-ე დღეს, რომელიც ვთქვათ და დაემთხვა კვირის ბოლო სამუშაო დღეს – პარასკევს, 23:59 საათზე მოახდინოს გადარიცხვა, რომელიც ვთქვათ ბიუჯეტში აისახა ორშაბათს, საგადასახადო მოთხოვნის ჩაბარებიდან 30 დღის გასვლის შემდეგ, გადამხდელს მაინც არ ჩაეთვლება ეს ქმედება 30 დღიანი ვადის დარღვევად, ვინაიდან თანხის ფაქტობრივად გადახდა განხორციელდა ამ ვადაში.
• გადასახადის გადამხდელმა საგადასახადო მოთხოვნის ჩაბარებიდან 30 დღის ვადაში საგადასახადო მოთხოვნით დარიცხული თანხები უნდა აღიაროს, ამისათვის კი, გადასახადის გადამხდელმა თავისი ავტორიზებული გვერდიდან (https://eservices.rs.ge) საგადასახადო ორგანოს უნდა წარუდგინოს განცხადება – „საგადასახადო მოთხოვნის გასაჩივრებაზე უარის თქმის შესახებ“, რომელშიც განცხადების წარდგენის საფუძვლად მიეთითება სსკ-ის 269-ე მუხლის მე-11 ნაწილის გამოყენება.
• გადასახადის გადამხდელი უფლებამოსილია, მისთვის საგადასახადო მოთხოვნის ჩაბარებიდან 30 დღის ვადაში, როგორც წესი, გადასახადის გადამხდელის ავტორიზებული მომხმარებლის გვერდიდან (https://eservices.rs.ge) საგადასახადო ორგანოს წარუდგინოს წერილობითი განცხადება „საგადასახადო შემოწმების შედეგად დარიცხული ჯარიმების თანხების 50 პროცენტის გაუქმების შესახებ“, რომელიც წარედგინება ზემოხსენებული  „საგადასახადო მოთხოვნის გასაჩივრებაზე უარის თქმის შესახებ“ განცხადებასთან ერთად. განცხადებას თან უნდა დაერთოს სსკ-ის 269-ე მუხლის მე-11 ნაწილით გათვალისწინებული შესაბამისი თანხების ბიუჯეტში გადახდის დამადასტურებელი დოკუმენტ(ებ)ი. აუდიტორი განიხილავს განცხადებას 10 სამუშაო დღის ვადაში, ხარვეზის დადგენის შემთხვევაში გადამხდელს მიეცემა 10 კალენდარული დღე მის აღმოსაფხვრელად, ხარვეზის არ არსებობის შემთხვევაში აუდიტორი ადგენს დასკვნას ჯარიმების თანხების 50%-ის გაუქმების მიზანშეწონილობის თაობაზე ან მისი გაუქმების თაობაზე უარის თქმის შესახებ.

სსკ-ის 269-ე მუხლის მე-11 ნაწილის მოქმედება არ ვრცელდება:

ა) კორექტირებული საგადასახადო მოთხოვნის მიმართ – რაც იმას ნიშნავს, რომ თუ გადასახადის გადამხდელმა გაასაჩივრა მიღებული მოთხოვნა, რის შედეგადაც დავების საბჭოს გადაწყვეტილების საფუძველზე გამოიცა ახალი კორექტირებული საგადასახადო მოთხოვნა, აღნიშნულზე არ გავრცელდება ჯარიმის 50%-ის გაუქმების წესი, სულ რომ სხვა ყველა პირობა სრულდებოდეს;

ბ) საგადასახადო შემოწმების შედეგად გამოცემულ იმ საგადასახადო მოთხოვნის მიმართ, რომელიც მოიცავს სსკ-ის 280-ე ან/და 282-ე მუხლის მე-3 ნაწილის შესაბამისად შეფარდებულ ჯარიმის თანხას –  რაც იმას ნიშნავს, რომ უსაქონლო ოპერაციის ან ფიქტიური გარიგების შედეგად ან ყალბი დღგ-ის ჩათვლის დოკუმენტით ჩათვლის განხორციელების, ასევე პირის მიერ ფიქტიური გარიგების/უსაქონლო ოპერაციის ამსახველი ან ყალბი საგადასახადო ანგარიშ-ფაქტურის გამოწერის საფუძველზე დარიცხული ჯარიმის 50%-ის გაუქმება არ ხდება, სულ რომ ყველა პირობა სრულდებოდეს.

სსკ-ის 269-ე მუხლის მე-11 ნაწილის მოქმედება ვრცელდება იმ საგადასახადო მოთხოვნის მიმართ, რომლითაც პირს:

ა) არ ერიცხება გადასახადი და ერიცხება მხოლოდ ჯარიმის თანხა – ამ შემთხვევაში გადასახადის გადამხდელმა 30 დღის ვადაში უნდა უზრუნველყოს ჯარიმის 50%-ის გადახდა;

ბ) ერიცხება ან მათ შორის ერიცხება მოსაკრებელი  – ამ შემთხვევაში გადასახადის გადამხდელმა 30 დღის ვადაში უნდა უზრუნველყოს როგორც დარიცხული ძირითადი გადასახადის, ასევე დარიცხული მოსაკრებლის თანხის სრულად და ჯარიმის 50%-ის გადახდა;

გ) ერიცხება ან მათ შორის ერიცხება მიმდინარე გადასახდელები.

ცვლილება ამოქმედდა ხელმოწერისთანავე, ანუ 2025 წლის 22 სექტემბრიდან.

ცვლილების შესახებ დეტალური ინფორმაცია იხილეთ ბმულზე:

https://matsne.gov.ge/ka/document/view/6632833?publication=0

2. ცვლილებები საქართველოს მთავრობის დადგენილებებში

2.1. ცვლილება შეღავათიანი სტატუსის შეცვლასთან დაკავშირებით

2025 წლის 24 სექტემბერს მიღებულ იქნა, საქართველოს მთავრობის N420 და N422 დადგენილებები, რის საფუძველზეც ცვლილებები შევიდა „საერთაშორისო კომპანიის სტატუსის განსაზღვრის, მისთვის ნებადართული საქმიანობისა და ცალკეული ხარჯების ნუსხის დამტკიცების თაობაზე“ საქართველოს მთავრობის №619 და „ვირტუალური ზონის პირის სტატუსის მინიჭების წესისა და პირობების და ვირტუალური ზონის პირის სტატუსის მიმნიჭებელი პირის განსაზღვრის შესახებ“ საქართველოს მთავრობის N49 დადგენილებებში.

ცვლილება უკავშირდება იმ პირებს, რომლებიც გეგმავენ სტატუსის ცვლილებას, კერძოდ ვირტუალური ზონის პირის ან საერთაშორისო კომპანიის სტატუსის ნაცვლად თუკი აპირებენ, რომ მიიღონ „ინოვაციების  შესახებ“ საქართველოს კანონით განსაზღვრული ინოვაციური სტარტაპის სტატუსი ან პირიქით. კერძოდ კი, განხორციელდება შემდეგი შინაარსის ცვლილებები:

• თუკი ინოვაციური სტარტაპის სტატუსის მქონე სუბიექტს მიენიჭა ვირტუალური ზონის პირის ან საერთაშორისო კომპანიის სტატუსი, ასეთ შემთხვევაში სუბიექტს უუქმდება ინოვაციური სტარტაპის სტატუსი, ახალი სტატუსის მინიჭების თვის პირველი რიცხვიდან.
• თუკი ვირტუალური ზონის ან საერთაშორისო კომპანიის სტატუსის მქონე პირს მიენიჭა ინოვაციური სტარტაპის სტატუსი, ასეთ შემთხვევაში ზემოხსენებული სტატუსი გაუქმებულად ითვლება, კერძოდ კი:

• ვირტუალური ზონის პირის სტატუსი გაუქმებულად ითვლება _ ინოვაციური სტარტაპის სტატუსის მინიჭების დღიდან;
• საერთაშორისო კომპანიის სტატუსი გაუქმებულად ითვლება _ ინოვაციური სტარტაპის სტატუსის მინიჭების შესახებ გადაწყვეტილების მიღების მომდევნო თვის პირველი რიცხვიდან.

• ინფორმაცია პირისთვის ვირტუალური ზონის პირის ან საერთაშორისო კომპანიის სტატუსის მინიჭების/გაუქმების თაობაზე შესაბამისი სამსახურის მიერ წერილობით ეცნობება სსიპ − საქართველოს ინოვაციების და ტექნოლოგიების სააგენტოს.

ცვლილება ამოქმედდა 2025 წლის 24 სექტემბრიდან.

ცვლილების შესახებ დეტალური ინფორმაცია იხილეთ ბმულზე:

https://matsne.gov.ge/ka/document/view/6635337?publication=0

https://matsne.gov.ge/ka/document/view/6635309?publication=0

2.2.ინოვაციების სფეროში მოქმედი კომპანიების საგადასახადო შეღავათები

როგორც მოგეხსნებათ, 2025 წლის 24 სექტემბრიდან საქართველოს საგადასახადო კოდექსში (შემდგომში – სსკ) ამოქმედდა ცვლილება, რის საფუძველზე, სსკ-ის  309-ე მუხლს – „გარდამავალი დებულებანი“ დაემატა ახალი 147-ე ნაწილი, რომლის მიხედვითაც „ინოვაციების შესახებ“ საქართველოს კანონით გათვალისწინებული ინოვაციური სტარტაპის, ინოვაციური მცირე და საშუალო კომპანიის, კვლევისა და განვითარების მომსახურების გამწევი კომპანიის სტატუსების მქონე სუბიექტების საგადასახადო შეღავათები განისაზღვრება „ინოვაციების შესახებ“ საქართველოს კანონით (დაწვრილებით იხ. 2025 წლის ივნისის თვის სიახლეების მიმოხილვა ბმულზე: https://kreston.ge/finansuri-blogi/blogi/ivnisi-2025/).

აღნიშნული სიახლესთან დაკავშირებით, 2025 წლის 30 სექტემბერს გამოქვეყნდა საქართველოს მთავრობის N424 დადგენილება „ინოვაციური სტარტაპის სტატუსის, ინოვაციური მცირე და საშუალო კომპანიის სტატუსისა და კვლევისა და განვითარების მომსახურების გამწევი კომპანიის სტატუსის მინიჭებისა და გაუქმების წესის დამტკიცების, ინოვაციური სტარტაპის მიერ გაცემული ხელფასის მაქსიმალური ოდენობის განსაზღვრის შესახებ, რომელიც თავისუფლდება საშემოსავლო გადასახადისაგან და ინოვაციური მცირე და საშუალო კომპანიის ხელშემწყობი მექანიზმების თაობაზე“. მთავრობის დადგენილება გვთავაზობს, ინოვაციების სფეროში მოქმედი კომპანიებისთვის განსაზღვრული საგადასახადო შეღავათების პრაქტიკულ გამოყენებასთან დაკავშირებით ინსტრუქციას, ასევე სტატუსის მინიჭებისა და გაუქმების წესებთან დაკავშირებით დამატებით განმარტებებს.

1. ინოვაციური სტარტაპის სტატუსი

ინოვაციური სტარტაპის სტატუსის მაძიებელი სამეწარმეო საზოგადოება (შემდგომში − სუბიექტი) ინოვაციური სტარტაპის სტატუსის მინიჭების თაობაზე განაცხადით მიმართავს სააგენტოს. განაცხადი უნდა მოიცავდეს, სუბიექტის განაცხადის წარდგენამდე არაუგვიანეს 1 თვით ადრე განახლებულ ამონაწერს „მეწარმეთა და არასამეწარმეო (არაკომერციული) იურიდიულ პირთა რეესტრიდან“, ინოვაციური პროდუქტის, პროცესის ან/და ინოვაციური მომსახურების აღწერას, მიღებული გრანტებისა და ფინანსური სახსრების შესახებ ინფორმაციას, აუდიტირებულ ფინანსური ანგარიშგების, ასევე ცნობას იმის თაობაზე, რომ პირის მიმართ არ მიმდინარეობს გადახდისუუნარობის საქმის წარმოება. განცხადების საფასურის – 200 ლარის, გადახდა ხდება სააგენტოს ანგარიშზე თანხის ჩარიცხვის გზით.

ინოვაციური სტარტაპის სტატუსის მინიჭების თაობაზე განაცხადის მიღებიდან 15 სამუშაო დღის ვადაში სააგენტო ამოწმებს მის შესაბამისობას კანონმდებლობის მოთხოვნებთან, ხარვეზის დადგენის შემთხვევაში კი სუბიექტს განესაზღვრება 10 სამუშაო დღე ხარვეზის აღმოსაფხვრელად. თუ აღნიშნულ ვადაში სუბიექტის მიერ არ იქნა აღმოფხვრილი ხარვეზი, სააგენტო იღებს გადაწყვეტილებას განაცხადის განუხილველად დატოვების შესახებ. საბოლოო გადაწყვეტილებას სუბიექტისთვის ინოვაციური სტარტაპის სტატუსის მინიჭების ან მინიჭებაზე უარის თქმის შესახებ გადაწყვეტილებას იღებს საქართველოს მთავრობა, რის თაობაზე გამოსცემს განკარგულებას.

სუბიექტს ინოვაციური სტარტაპის სტატუსი ენიჭება 1 წლის ვადით და შესაბამისი სტატუსის მქონედ ითვლება სტატუსის მინიჭების შესახებ გადაწყვეტილების მიღების მომდევნო თვის პირველი რიცხვიდან. სტატუსის ხანგრძლივობა შეიძლება გაგრძელდეს მაგრამ არა უმეტეს 10 წლის ვადით, რომელთან დაკავშირებითაც სუბიექტისთვის განსაზღვრული სავალდებულო მოთხოვნები დეტალურად არის ასახული ამავე დადგენილების მე-5, მე-6 და მე-7 მუხლებში.

ინოვაციური სტარტაპის სტატუსი უქმდება ქვემოთ მოცემული ერთ-ერთი პირობის დადგომის შეთხვევაში, ამასთან სუბიექტი არ არის უფლებამოსილი, სააგენტოს ხელახლა მიმართოს ინოვაციური სტარტაპის სტატუსის მოთხოვნით:

ა) ინოვაციური სტარტაპის სტატუსის მინიჭების/გაგრძელების შესახებ შესაბამისი გადაწყვეტილებით დადგენილი ვადის გასვლით, თუ სუბიექტის მიერ არ მოხდა ინოვაციური სტარტაპის სტატუსის მოქმედების გაგრძელებისა და ყოველწლიური შესაბამისობის დადასტურების მიზნით განაცხადის წარდგენა ან/და ყოველწლიური შესაბამისობის შემოწმების შედეგად გამოვლინდა ინოვაციური სტარტაპის სტატუსის მქონე სუბიექტის შეუსაბამობა „ინოვაციების შესახებ“ საქართველოს კანონითა და ამ წესით სტატუსისთვის დადგენილ მოთხოვნებთან;

სტატუსი გაუქმებულად ითვლება გაუქმების თაობაზე გადაწყვეტილების მიღების თვის დასაწყისიდან.

ბ) ინოვაციური სტარტაპის სტატუსის მქონე სუბიექტისთვის საერთაშორისო კომპანიის სტატუსის ან ვირტუალური ზონის პირის სტატუსის მინიჭების შემთხვევაში;

სტატუსი გაუქმებულად ითვლება საერთაშორისო კომპანიის ან ვირტუალური ზონის პირის სტატუსის მინიჭების თარიღიდან.

გ) გამოვლინდა ინოვაციური სტარტაპის სტატუსის მქონე სუბიექტის მიერ სტატუსით ბოროტად სარგებლობის ფაქტი, ასევე სტატუსის მოპოვების ან სტატუსის მოქმედების ვადის გაგრძელების მიზნით, სააგენტოს განზრახ შეცდომაში შეყვანის ფაქტი არასწორი ინფორმაციის წარდგენით;

სტატუსი გაუქმებულად ითვლება მისი მინიჭების თარიღიდან.

დ) ინოვაციური სტარტაპის სტატუსის მქონე სუბიექტი სააგენტოში წარადგენს განცხადებას ინოვაციური სტარტაპის სტატუსის გაუქმების მოთხოვნით.

სტატუსი გაუქმებულად ითვლება გაუქმების თაობაზე გადაწყვეტილების მიღების თვის დასაწყისიდან.

ხოლო რაც შეეხება სტატუსთან დაკავშირებულ ხელშემწყობ მექანიზმს, ინოვაციური სტარტაპის მიერ, სტატუსის მინიჭებიდან პირველი 3 წლის განმავლობაში, გაცემული ხელფასის მაქსიმალური ოდენობის ფარგლები, რომელიც თავისუფლდება საშემოსავლო გადასახადისგან, შეადგენს თითოეულ დაქირავებულ პირზე თვიურად 10,000 ლარამდე.

2. ინოვაციური მცირე და საშუალო კომპანიის სტატუსი

ინოვაციური მცირე და საშუალო კომპანიის სტატუსის მაძიებელი სამეწარმეო საზოგადოება (შემდგომში − სუბიექტი) ინოვაციური მცირე და საშუალო კომპანიის სტატუსის მინიჭების თაობაზე განაცხადით მიმართავს სააგენტოს. განაცხადი უნდა მოიცავდეს, სუბიექტის განაცხადის წარდგენამდე არაუგვიანეს 1 თვით ადრე განახლებულ ამონაწერს „მეწარმეთა და არასამეწარმეო (არაკომერციული) იურიდიულ პირთა რეესტრიდან“, აუდიტირებულ ფინანსური ანგარიშგების, ასევე მის მიერ ინოვაციური პროდუქტის, პროცესის/მომსახურები ან/და პატენტისა და დეპონირებული კომპიუტერული პროგრამის ფარგლებში შექმნილი პროდუქტის განვითარებისკენ მიმართული კვლევისა და განვითარების სამუშაოს დეტალური აღწერას, ასევე ცნობას იმის თაობაზე, რომ პირის მიმართ არ მიმდინარეობს გადახდისუუნარობის საქმის წარმოება. განცხადების საფასურის – 500 ლარის, გადახდა ხდება სააგენტოს ანგარიშზე თანხის ჩარიცხვის გზით.

ინოვაციური მცირე და საშუალო კომპანიის სტატუსის მინიჭების თაობაზე განაცხადის მიღებიდან 15 სამუშაო დღის ვადაში სააგენტო ამოწმებს მის შესაბამისობას კანონმდებლობის მოთხოვნებთან, ხარვეზის დადგენის შემთხვევაში კი სუბიექტს განესაზღვრება 10 სამუშაო დღე ხარვეზის აღმოსაფხვრელად. თუ აღნიშნულ ვადაში სუბიექტის მიერ არ იქნა აღმოფხვრილი ხარვეზი, სააგენტო იღებს გადაწყვეტილებას განაცხადის განუხილველად დატოვების შესახებ. საბოლოო გადაწყვეტილებას სუბიექტისთვის ინოვაციური მცირე და საშუალო კომპანიის სტატუსის მინიჭების ან მინიჭებაზე უარის თქმის შესახებ გადაწყვეტილებას იღებს საქართველოს მთავრობა, რის თაობაზე გამოსცემს განკარგულებას.

სუბიექტს ინოვაციური მცირე და საშუალო კომპანიის სტატუსი ენიჭება უვადოდ და შესაბამისი სტატუსის მქონედ ითვლება სტატუსის მინიჭების შესახებ გადაწყვეტილების მიღების მომდევნო თვის პირველი რიცხვიდან.

ინოვაციური მცირე და საშუალო კომპანიის სტატუსი უქმდება ქვემოთ მოცემული ერთ-ერთი პირობის დადგომის შეთხვევაში, ამასთან  სტატუსის გაუქმება არ ზღუდავს სუბიექტის უფლებას ხელახლა მოიპოვოს ინოვაციური მცირე და საშუალო კომპანიის სტატუსი, კანონმდებლობით გათვალისწინებული მოთხოვნების დაკმაყოფილების შემთხვევაში:

ა) თუ სუბიექტის მიერ არ მოხდა ყოველწლიური შესაბამისობის დადასტურების მიზნით განაცხადის წარდგენა ან ყოველწლიური შესაბამისობის შემოწმების შედეგად გამოვლინდა ინოვაციური მცირე და საშუალო კომპანიის სტატუსის მქონე სუბიექტის შეუსაბამობა „ინოვაციების შესახებ“ საქართველოს კანონითა და ამ წესით დადგენილ მოთხოვნებთან;

სტატუსი გაუქმებულად ითვლება გაუქმების თაობაზე გადაწყვეტილების მიღების თვის დასაწყისიდან.

ბ) ინოვაციური მცირე და საშუალო კომპანიის სტატუსის მქონე სუბიექტი გახდა „ბუღალტრული აღრიცხვის, ანგარიშგებისა და აუდიტის შესახებ“ საქართველოს კანონით განსაზღვრული პირველი ან მეორე კატეგორიის საწარმო;

სტატუსი გაუქმებულად ითვლება პირველი ან მეორე კატეგორიის საწარმოსთვის დადგენილი მოთხოვნების დაკმაყოფილების მომენტიდან.

გ) გამოვლინდა ინოვაციური მცირე და საშუალო კომპანიის სტატუსის მქონე სუბიექტის მიერ სტატუსით ბოროტად სარგებლობის ფაქტი, ასევე სტატუსის მოპოვების ან სტატუსის მოქმედების ვადის გაგრძელების მიზნით, სააგენტოს განზრახ შეცდომაში შეყვანის ფაქტი არასწორი ინფორმაციის წარდგენით;

სტატუსი გაუქმებულად ითვლება მისი მინიჭების თარიღიდან.

დ) ინოვაციური მცირე და საშუალო კომპანიის სტატუსის მქონე სუბიექტი სააგენტოში წარადგენს განცხადებას ინოვაციური სტარტაპის სტატუსის გაუქმების მოთხოვნით.

სტატუსი გაუქმებულად ითვლება გაუქმების თაობაზე გადაწყვეტილების მიღების თვის დასაწყისიდან.

ხოლო რაც შეეხება სტატუსთან დაკავშირებულ ხელშემწყობ მექანიზმებს, როგორც „ინოვაციების შესახებ“ კანონით არის დადგენილი ინოვაციური მცირე და საშუალო კომპანია უფლებამოსილია წინა ფინანსურ წელს დაგროვილი წმინდა მოგებიდან დივიდენდის განაწილების შემთხვევაში მოგების გადასახადით დასაბეგრი თანხა შეიმციროს მის მიერ წინა ფინანსურ წელს კვლევისა და განვითარებისთვის გაწეული ხარჯების სამმაგი ოდენობით. ახალი დადგენილებით კი განისაზღვრა, რომ ზემოხსენებული ხელშემწყობი მექანიზმის გამოყენებისას კვლევისა და განვითარებისთვის გაწეული აუთვისებელი ხარჯი შემდეგ ფინანსურ წელს გადატანას არ ექვემდებარება. რაც შეეხება, მოგების რეინვესტირებასთან დაკავშირებულ მექანიზმს, ინოვაციური მცირე და საშუალო კომპანიის სტატუსის მქონე სუბიექტი უფლებამოსილია, სააგენტოსგან მიიღოს გრანტი, მის მიერ გაწეული კვლევისა და დანახარჯების 20%-ის ოდენობით, არაუმეტეს 100,000 ლარისა.

3. კვლევისა და განვითარების მომსახურების გამწევი კომპანიის სტატუსი

კვლევისა და განვითარების მომსახურების გამწევი კომპანიის სტატუსის მაძიებელი სამეწარმეო საზოგადოება (შემდგომში − სუბიექტი) კვლევისა და განვითარების მომსახურების გამწევი კომპანიის სტატუსის მინიჭების თაობაზე განაცხადით მიმართავს სააგენტოს. განაცხადი უნდა მოიცავდეს, სუბიექტის განაცხადის წარდგენამდე არაუგვიანეს 1 თვით ადრე განახლებულ ამონაწერს „მეწარმეთა და არასამეწარმეო (არაკომერციული) იურიდიულ პირთა რეესტრიდან“, აუდიტირებულ ანგარიშს შესაბამისი საქმიანობიდან კანონით განსაზღვრული მოცულობის შემოსავლის მიღების დადასტურების მიზნით, ასევე ცნობას იმის თაობაზე, რომ პირის მიმართ არ მიმდინარეობს გადახდისუუნარობის საქმის წარმოება. განცხადების საფასურის – 500 ლარის, გადახდა ხდება სააგენტოს ანგარიშზე თანხის ჩარიცხვის გზით.

კვლევისა და განვითარების მომსახურების გამწევი კომპანიის სტატუსის მინიჭების თაობაზე განაცხადის მიღებიდან 15 სამუშაო დღის ვადაში სააგენტო ამოწმებს მის შესაბამისობას კანონმდებლობის მოთხოვნებთან, ხარვეზის დადგენის შემთხვევაში კი სუბიექტს განესაზღვრება 10 სამუშაო დღე ხარვეზის აღმოსაფხვრელად. თუ აღნიშნულ ვადაში სუბიექტის მიერ არ იქნა აღმოფხვრილი ხარვეზი, სააგენტო იღებს გადაწყვეტილებას განაცხადის განუხილველად დატოვების შესახებ. საბოლოო გადაწყვეტილებას სუბიექტისთვის კვლევისა და განვითარების მომსახურების გამწევი კომპანიის სტატუსის მინიჭების ან მინიჭებაზე უარის თქმის შესახებ გადაწყვეტილებას იღებს საქართველოს მთავრობა, რის თაობაზე გამოსცემს განკარგულებას.

სუბიექტს კვლევისა და განვითარების მომსახურების გამწევი კომპანიის სტატუსი ენიჭება უვადოდ და ერთჯერადად, შესაბამისად სტატუსის გაუქმების შემთხვევაში, სუბიექტი არ არის უფლებამოსილი, სააგენტოს მიმართოს მოთხოვნით სტატუსის ახლიდან მინიჭების თაობაზე. სუბიექტი სტატუსის მქონედ ითვლება სტატუსის მინიჭების შესახებ გადაწყვეტილების მიღების მომდევნო თვის პირველი რიცხვიდან.

კვლევისა და განვითარების მომსახურების გამწევი კომპანიის სტატუსი უქმდება ქვემოთ მოცემული ერთ-ერთი პირობის დადგომის შეთხვევაში:

ა) თუ სუბიექტის მიერ არ მოხდა ყოველწლიური შესაბამისობის დადასტურების მიზნით განაცხადის წარდგენა ან ყოველწლიური შესაბამისობის შემოწმების შედეგად გამოვლინდა კვლევისა და განვითარების მომსახურების გამწევი კომპანიის სტატუსის მქონე სუბიექტის შეუსაბამობა „ინოვაციების შესახებ“ საქართველოს კანონითა და ამ წესით დადგენილ მოთხოვნებთან;

სტატუსი გაუქმებულად ითვლება გაუქმების თაობაზე გადაწყვეტილების მიღების თვის დასაწყისიდან.

ბ) გამოვლინდა კვლევისა და განვითარების მომსახურების გამწევი კომპანიის სტატუსის მქონე სუბიექტის მიერ სტატუსით ბოროტად სარგებლობის ფაქტი, ასევე სტატუსის მოპოვების ან სტატუსის მოქმედების ვადის გაგრძელების მიზნით, სააგენტოს განზრახ შეცდომაში შეყვანის ფაქტი არასწორი ინფორმაციის წარდგენით;

სტატუსი გაუქმებულად ითვლება მისი მინიჭების თარიღიდან.

გ) კვლევისა და განვითარების მომსახურების გამწევი კომპანიის სტატუსის მქონე სუბიექტი სააგენტოში წარადგენს განცხადებას კვლევისა და განვითარების მომსახურების გამწევი კომპანიის სტატუსის გაუქმების მოთხოვნით.

სტატუსი გაუქმებულად ითვლება გაუქმების თაობაზე გადაწყვეტილების მიღების თვის დასაწყისიდან.

ხოლო რაც შეეხება სტატუსთან დაკავშირებულ ხელშემწყობ მექანიზმებს, აღნიშნულთან დაკავშირებით დადგენილებაში დამატებით განმარტება არ არის მოცემული, შესაბამისად „ინოვაციების შესახებ“ კანონით დადგენილი შეღავათისთვის რაიმე ზღვრები/შეზღუდვები დადგენილებით არ წესდება, როგორც ეს ინოვაციური სტარტაპის მიერ გაცემულ ხელფასთან მიმართებით მოხდა. შეგახსენებთ, რომ „ინოვაციების შესახებ“ კანონის მიხედვით, კვლევისა და განვითარების მომსახურების გამწევი კომპანიის მიერ შესაბამისი სტატუსის მოქმედების პერიოდში კომპანიის მოგების გადასახადი და გაცემული ხელფასის გადახდის წყაროსთან დასაკავებელი საშემოსავლო გადასახადი შეადგენს 5%-ს.

დადგენილება ამოქმედდა 2025 წლის 24 სექტემბრიდან.

ცვლილების შესახებ დეტალური ინფორმაცია იხილეთ ბმულზე:

https://matsne.gov.ge/ka/document/view/6635359?publication=0

3. ცვლილებები ფინანსთა მინისტრის ბრძანებებში

3.1. თიზ-ის საწარმოს 4%-იანი გადასახადის გაანგარიშების ფორმის ცვლილება

საქართველოს ფინანსთა მინისტრის 30 სექტემბრის ბრძანებით შეიცვალა ფინანსთა მინისტრის 996-ე ბრძანებით დამტკიცებულული თიზ-ის საწარმოთა ე.წ. 4%-იანი გადასახადის გაანგარიშების ფორმა.

თიზ-ის საწარმოები მოქმედი კანონმდებლობით 4%-იანი განაკვეთით ბეგრავენ რეზიდენტი პირებისგან (რომლების საქმიანობენ ზონის გარეთ) საქონლის როგორც შესყიდვის, ასევე ასეთ პირებზე საქონლის რეალიზაციის ოპერაციებს.

აღნიშნული თანხების დეკლარირების მიზნით თიზ-ის საწარმოები აბარებენ ე.წ. 4%-იანი გადასახადის ყოველთვიურ გაანგარიშებას, რა დროსაც ახდენენ რეზიდენტი პირებისგან შეძენილი საქონლის ღირებულების, ასევე ასეთ პირებზე რეალიზებული საქონლის ღირებულების 4%-ის შესაბამისი გადასახადის დეკლარირებას და გადახდას.

ცვლილება  თიზ-ის საწარმოს გაანგარიშების სწორედ ამ ფორმაში შევიდა, რაც გულისხმობს იმას რომ როგორც საქონლის შეძენის, ასევე საქონლის რეალიზაციის შემთხვევაში გაანგარიშების ფორმის მე-4 სვეტში სავალდებულო ხდება სასაქონლო ზედნადების ნომრის (ასეთის არსებობის შემთხვევაში) მითითება და ნაცვლად საბაჟო დეკლარაციის ნომრის მითითებისა როგორც ეს ცვლილებმდე არსებულ ფორმაში მოითხოვებოდა.

შესაბამისად ე.წ. 4%-იანი გადასახადის გაანგარიშების ფორმაში საბაჟო დეკლარაციის ნომერის მაგივრად ჩაიწერება შესაბამისი სასაქონლო ზედნარების ნომერი (ასეთის არსებობის შემთხვევაში), რის შედეგადაც გაანგარიშების ფორმა მიიღებს შემდეგ სახეს:

ბრძანება ამოქმედდება 2025 წლის 1 ოქტომბრიდან

ცვლილების შესახებ დეტალური ინფორმაცია იხილეთ ბმულზე:

https://infohub.rs.ge/ka/workspace/document/2f72f7e6-1f32-4306-a86a-76a25d69969e

შპს კრესტონ ჯორჯია

მმართველი პარტნიორი                                                             დავით პაპიაშვილი

საგადასახადო აუდიტის დეპარტამენტის ხელმძღვანელი                     რუსუდან ჭაბუკიანი

The post 2025 წლის სექტემბრის თვის განმავლობაში საქართველოს საგადასახადო კანონმდებლობაში შესული ცვლილებები appeared first on ფინანსური აუდიტი და საგადასახადო მომსახურება.

Kreston Georgia აგრძელებს საგადასახადო კანონმდებლობაში შესული ცვლილებებისა და სიახლეების მიმოხილვას. ამჯერად გთავაზობთ 2025 წლის აგვისტოს თვეში შესული საკანონმდებლო სიახლეების მიმოხილვას.

სარჩევი

1. ცვლილებები საქართველოს ფინანსთა მინისტრის ბრძანებებში 

1.1. საგადასახადო ანგარიშ-ფაქტურების” მოდულის ახალი ფუნქციონალი 

2. ცვლილებები შემოსავლების სამსახურის უფროსის ბრძანებებში 

2.1. პირადი აღრიცხვის ბარათზე ჯარიმის აღიარების წესის ცვლილება 

1. ცვლილებები საქართველოს ფინანსთა მინისტრის ბრძანებებში

1.1. საგადასახადო ანგარიშ-ფაქტურების მოდულის ახალი ფუნქციონალი

2025 წლის 5 აგვისტოს გამოქვეყნდა საქართველოს ფინანსთა მინისტრის N207 ბრძანება, რის საფუძველზეც ცვლილება შევიდა „გადასახადების ადმინისტრირების შესახებ“ ფინანსთა მინისტრის N996 ბრძანებით დამტკიცებულ ინსტრუქციაში. ცვლილების შედეგად „საგადასახადო ანგარიშ-ფაქტურების” (შემდგომში, „საფ“) მოდულს დაემატა ახალი ფუნქციონალი – „ავანსით განაშთვა“.

ახალი ფუნქციონალის მეშვეობით, მომხმარებელს აქვს შესაძლებლობა მის მიერ ან/და მის სახელზე გამოწერილი ავანსისა და მიწოდების საფ-ის დაწყვილების შესახებ მოიძიოს ინფორმაცია, იმ შემთხვევაშიც, როდესაც ერთი ავანსის საფ-ი დაწყვილებულია მიწოდების რამდენიმე საფ-თან. ცვლილება ეხება როგორც საგადასახადო ანგარიშ-ფაქტურებს, ასევე ნავთობპროდუქტების სპეციალური საგადასახადო ანგარიშ-ფაქტურებს.

ცვლილების ძირითადი არსი მდგომარეობს იმაში, რომ საფ-ის დონეზევე მოხდება მიწოდებისა და ე.წ. ავანსის ანგარიშ-ფაქტურების დაკავშირება, რაც გულისხმობს იმას, რომ საქონლის/მომსახურების მიწოდების ანგარიშ-ფაქტურაშივე მოხდეს როგორც  მასთან დაკავშირებული ავანსის ანგარიშ-ფაქტურის მითითება,  ასევე დღგ-ის დასაბეგრი თანხის სხვაობის ასახვა.

საფ-ის გამოწერის დღეს მოქმედი წესი

როგორც ცნობილია, კანონის  ზემოაღნიშნულ ცვლილებამდე მოქმედი რედაქციის მიხედვით, ავანსისა და მიწოდების საფ-ის გამოწერა ხდებოდა ცალ-ცალკე. ამასთან, მიწოდების საფ-ში არ ხდებოდა მასთან დაკავშირებული ავანსის საფ-ის მითითება და დღგ-ით დასაბეგრი თანხის სხვაობის გამოყვანა. კერძოდ კი, მიწოდებისა და ავანსის საფ-ების „დაწყვილება“ ხდებოდა მხოლოდ დღგ-ს დეკლარაციის ერთ-ერთ დანართში, თუმცა თავად საფ-ის მოდულიდან მიწოდებისა და ავანსის საფ-ებს შორის კავშირის დადგენა შეუძლებელი იყო.

საფ-ის ახალი ფორმა და გამოწერის წესი

ცვლილების შედეგად ძალაში შევიდა  საფ-ის ახალი ფორმა, რაც ითვალისწინებს იმას, რომ საქონლის/მომსახურების მიწოდების საფ-შივე მოხდება მასთან დაკავშირებული ავანსის საფ-ის რეკვიზიტების მითითება და მიმდინარე მომენტისთვის დღგ-ით დასაბეგრი სხვაობის თანხის გამოყვანა (რეალიზაციის დღგ-ს გამოკლებული ადრე დაბეგრილი ავანსის დღგ), რამაც სწორი იმპლემენტაციის შემთხვევაში უნდა გაამარტივოს მიმდინარე პერიოდში დასაბეგრი დღგ-ს თანხის მ.შ. ვიზუალური აღქმა.

უცვლელად გთავაზობთ N26 მაგალითს ფინანსთა მინისტრის 996-ე ბრძანებიდან:

დღგ-ის გადამხდელმა შპს „X“-მა 3 000 ლარის ღირებულების საქონლის მიწოდების თაობაზე გააფორმა ხელშეკრულება შპს „Y“-თან, რომელიც არ არის დღგ-ის გადამხდელი. მხარეები შეთანხმდნენ, რომ საქონლის მიწოდებამდე შპს „Y“ გადაიხდიდა საქონლის ღირებულების ნაწილს 2 000 ლარს, ხოლო დარჩენილ ნაწილს გადაიხდიდა საქონლის მიწოდების შემდგომ. შპს „Y“-მა შეთანხმებული თანხა შპს „X“-ს გადაუხადა 2025 წლის 20 სექტემბერს. ვინაიდან მხარეების მიერ განსაზღვრული იყო მისაწოდებელი საქონელი, საქონლის რაოდენობა, ღირებულება და საქონლის მიწოდება წარმოადგენდა დღგ-ით დასაბეგრ ოპერაციას, შპს „X“-ის მიერ მიღებულ თანხაზე გამოწერილ იქნა საგადასახადო ანგარიშ-ფაქტურა და 2 000 ლარი დაბეგრილ იქნა დღგ-ით 2025 წლის სექტემბრის თვეში.

2025 წლის 2 ოქტომბერს შპს „Y“ დარეგისტრირდა დღგ-ის გადამხდელად. შეთანხმებული საქონლის ნაწილის, 1600 ლარის, ღირებულების მიწოდება განხორციელდა 2025 წლის 9 ნოემბერს, ხოლო დარჩენილი 1400 ლარის ღირებულების საქონლის მიწოდება – 10 დეკემბერს.

შპს „X“-მა გამოწერა:

– სექტემბრის თვის საანგარიშო პერიოდზე ავანსის საგადასახადო ანგარიშ-ფაქტურა 2000 ლარის ოდენობით;

– ოქტომბრის თვის საანგარიშო პერიოდზე 1600 ლარის საქონლის მიწოდების საგადასახადო ანგარიშ-ფაქტურა, სადაც ასახა საქონლის მიწოდებამდე გადახდილი საქონლის საკომპენსაციო (ავანსის) თანხა 1600 ლარი;

– დეკემბრის საანგარიშო პერიოდზე 1400 ლარის მიწოდების ოპერაციაზე ანგარიშ-ფაქტურა, სადაც ასახა საქონლის მიწოდებამდე გადახდილი საქონლის საკომპენსაციო (ავანსის) თანხა 400 ლარი.

შპს „Y“-მა მისაწოდებელ საქონელზე გადახდილი დღგ-ის 2 000 ლარის ჩათვლა ავანსის საგადასახადო ანგარიშ-ფაქტურის საფუძველზე განახორციელა ოქტომბრის (დღგ-ის გადამხდელად რეგისტრაციის) საანგარიშო პერიოდში, ხოლო დარჩენილი ნაწილის ჩათვლა განახორციელა საქონლის მიწოდების საგადასახადო ანგარიშ-ფაქტურის საფუძველზე დეკემბრის საანგარიშო პერიოდზე, 1 000 ლარის ოდენობით.

ზემოთ აღნიშნულიდან გამომდინარე იცვლება  მიწოდების საფ-ის ფორმა და მას ემატება ველები სადაც მოხდება მიწოდების საფ-სთან დაკავშირებული ავანსის საფ-ის რეკვიზიტების მითითება, ასევე დღგ-ით დასაბეგრი სხვაობის თანხების  მითითება. თანდართულ ფოტოზე იხილეთ საფ-ის ახალი ფორმიდან ამონარიდი (იხ. წითლად შემოხაზული ველი):

ცვლილება ამოქმედდა 2025 წლის 1 სექტემბრიდან.

ცვლილების შესახებ დეტალური ინფორმაცია იხილეთ ბმულზე:

https://matsne.gov.ge/ka/document/view/6597132?publication=0

https://rs.ge/Callcenterguides?advanceTaxinvoice&guid=3C52FCAEB1C05AF0E063970214ACC27C

2. ცვლილებები შემოსავლების სამსახურის უფროსის ბრძანებებში

2.1. პირადი აღრიცხვის ბარათზე ჯარიმის აღიარების წესის ცვლილება

2025 წლის 26 აგვისტოს მიღებულ იქნა, ხოლო 2025 წლის 2 სექტემბერს გამოქვეყნდა სსიპ შემოსავლების სამსახურის უფროსის N19043 ბრძანება, რის საფუძველზეც ცვლილებები შევიდა „გადასახადის გადამხდელთა პირადი აღრიცხვის ბარათების წარმოების წესის შესახებ“ მეთოდური მითითების დამტკიცების თაობაზე შემოსავლების სამსახურის უფროსის N13446 ბრძანებაში.

ცვლილება შეეხო ბრძანების მე-4 მუხლს, რომელიც არეგულირებს  გადასახადის გადამხდელის პირადი აღრიცხვის ბარათზე ოპერაციების ჩაწერის წესებს. კერძოდ კი, მე-4 მუხლს დაემატა შემდეგი შინაარსის 7² პუნქტი:

„დღგ-ის გადამხდელად რეგისტრაციის გარეშე საქმიანობის პერიოდზე პირის მიმართ სსკ-ის 282-ე მუხლის პირველი ნაწილით განსაზღვრული ჯარიმის აღიარების შემდეგ, საქმიანობის იმავე პერიოდზე განხორციელებული დღგ-ით დასაბეგრი ოპერაციების დაზუსტების შემთხვევაში, თუ დაზუსტებით მცირდება დღგ-ით დასაბეგრი ოპერაციების (გარდა გათავისუფლებული ოპერაციებისა) თანხა, ძირითად ბარათზე დარიცხული ჯარიმა ექვემდებარება შემცირებას ავტომატურ რეჟიმში, შესაბამისი სხვაობის თანხის სსკ-ის 282-ე მუხლის პირველი ნაწილით განსაზღვრული ოდენობით, საგადასახადო მოთხოვნის გამოცემის გარეშე.“

შეგახსენებთ, რომ სსკ-ის 282-ე მუხლის მიხედვით, დღგ-ის გადამხდელად რეგისტრაციის გარეშე საქმიანობა – იწვევს პირის დაჯარიმებას რეგისტრაციის გარეშე საქმიანობის პერიოდში განხორციელებული დღგ-ით დასაბეგრი ოპერაციების (გარდა გათავისუფლებული ოპერაციებისა) თანხის 5%-ის ოდენობით.

ცვლილება ამოქმედდა ხელმოწერისთანავე, ანუ 2025 წლის 26 აგვისტოდან.

ცვლილების შესახებ დეტალური ინფორმაცია იხილეთ ბმულზე:

https://matsne.gov.ge/ka/document/view/6617659?publication=0

შპს კრესტონ ჯორჯია

მმართველი პარტნიორი                                                             დავით პაპიაშვილი

საგადასახადო აუდიტის დეპარტამენტის ხელმძღვანელი                     რუსუდან ჭაბუკიანი

The post 2025 წლის აგვისტოს თვის განმავლობაში საქართველოს საგადასახადო კანონმდებლობაში შესული ცვლილებები appeared first on ფინანსური აუდიტი და საგადასახადო მომსახურება.