2022 წლის თებერვლის თვის განმავლობაში საქართველოს საგადასახადო კანონმდებლობაში შესული ცვლილებები

Kreston Georgia აგრძელებს საგადასახადო კანონმდებლობაში შესული ცვლილებებისა და სიახლეების მიმოხილვას. ამჯერად გთავაზობთ 2022 წლის თებერვლის თვეში შესული საკანონმდებლო სიახლეების მიმოხილვას.

1. ცვლილებები ფინანსთა მინისტრის ბრძანებებში

1.1.  დაზუსტდა მცირე ბიზნესის სტატუსის გაუქმების წესი

2022 წლის 2 თებერვალს გამოქვეყნდა და ძალაში შევიდა ცვლილება ფინანსთა მინისტრის N999 ბრძანებაში. ცვლილება შეეხო ბრძანების მე-18 მუხლს, რომლითაც რეგულირდება მცირე ბიზნესის სტატუსის გაუქმების წესი.

კერძოდ ბრძანების 18-ე მუხლის მე-4 ნაწილის მიხედვით, თუ მცირე ბიზნესი განახორციელებს მცირე ბიზნესისთვის აკრძალულ საქმიანობას ან საკონტროლო-სალარო აპარატის გამოყენების წესების დარღვევისთვის კალენდარული წლის განმავლობაში 3-ჯერ დაეკისრება ჯარიმა, საგადასახადო ორგანო უუქმებს მას მცირე ბიზნესის სტატუსს. ცვლილებით დაზუსტდა, რომ ასეთ შემთხვევაში, მცირე ბიზნესის სტატუსი უქმდება იმ კალენდარული წლის დასაწყისიდან, რომელშიც პირმა დაიწყო  აკრძალული საქმიანობა ან საკონტროლო-სალარო აპარატის გამოყენების წესების დარღვევისთვის დაეკისრა სამი ჯარიმა.

აგრეთვე, ცვლილების შედეგად, „მაგალითი 2“-ის შემდეგ დაემატა შემდეგი შინაარსის „მაგალითი 3“:

პირობა:

გიორგის მცირე ბიზნესის სტატუსი მინიჭებული აქვს 2019 წლის 1 იანვრიდან. 2021 წელს საგადასახადო ორგანოს მიერ გამოვლინდა, რომ ფიზიკური პირი 2019 წელს ახორციელებდა მცირე ბიზნესისათვის აკრძალულ საქმიანობას. კერძოდ, პირი ფლობდა სასარგებლო წიაღისეულის ლიცენზიას და მოიპოვებდა სასარგებლო წიაღისეულს. პირის მიერ მცირე ბიზნესისათვის აკრძალული საქმიანობის განხორციელებას 2020 და 2021 წლების განმავლობაში ადგილი არ ჰქონია.

ანალიზი:

საქართველოს საგადასახადო კოდექსის მე-3 მუხლის გათვალისწინებით, ამ კოდექსით დადგენილი ვადა განისაზღვრება იმ გარემოებაზე მითითებით, რომელიც აუცილებლად უნდა დადგეს. საქართველოს საგადასახადო კოდექსის 89-ე მუხლის დებულებების გათვალისწინებით, მცირე ბიზნესის სტატუსი უქმდება, თუ პირი ახორციელებს მცირე ბიზნესისათვის აკრძალულ საქმიანობას. აღნიშნული საფუძვლით მცირე ბიზნესის სტატუსი გაუქმებულად ითვლება იმ კალენდარული  წლის დასაწყისიდან, რომელშიც პირმა დაიწყო  აკრძალული საქმიანობა.

ამრიგად, მოცემულ შემთხვევაში, მცირე ბიზნესისათვის აკრძალული საქმიანობის განხორციელების ფაქტი წარმოადგენს პირისათვის მცირე ბიზნესის სტატუსის გაუქმების საფუძველს.  შესაბამისად, გადასახადის გადამხდელი სპეციალური დაბეგვრის რეჟიმიდან გამოსულად ჩაითვლება 2019 წლის 1 იანვრიდან.

შედეგი:

გაუქმდება შესაბამისი საანგარიშო პერიოდების მიხედვით ყოველთვიური დეკლარაციების საფუძველზე განხორციელებული დარიცხვები და 2019 წლის დასაწყისიდან მიღებული შემოსავალი დაექვემდებარება საშემოსავლო გადასახადით დაბეგვრას საერთო წესით.

 

1.2.  ცვლილება მიკრო ბიზნესის საგადასახადო ანგარიშგების წესში

2022 წლის 18 თებერვალს გამოქვეყნდა და ძალაში შევიდა კიდევ ერთი ცვლილება ფინანსთა მინისტრის N999 ბრძანებაში. ცვლილება შეეხო ბრძანების მე-5 მუხლს, რომელიც განსაზღვრავს მიკრო ბიზნესის საგადასახადო ანგარიშგების წესს.

ცვლილებამდე არსებული რედაქციით, თუ ფიზიკური პირი მიმდინარე საანგარიშო წელს გადაწყვეტდა მიკრო ბიზნესის სტატუსის მიღებას და დაბეგვრის სხვა რეჟიმიდან მიკრო ბიზნესის დაბეგვრის რეჟიმზე გადასვლას, მის მიერ საანგარიშო პერიოდში მიკრო ბიზნესის სტატუსის მინიჭებამდე მიღებული შემოსავლებიც და თავისთავად, სტატუსის მინიჭების შემდეგ მიღებული შემოსავალიც, ექვემდებარება მიკრო ბიზნესისთვის დადგენილი სპეციალური რეჟიმით დაბეგვრას.

ცვლილების შედეგად კი, მიკრობიზნესის სტატუსის მინიჭებამდე და მინიჭების შემდეგ მიღებული შემოსავლები უნდა დაიბეგროს განცალკევებით, განსხვავებული წესით. კერძოდ, თუ ფიზიკური პირი მიმდინარე საანგარიშო წელს გადაწყვეტს მიკრობიზნესის სტატუსის მიღებას ან/და დაბეგვრის სხვა რეჟიმიდან მიკრობიზნესის დაბეგვრის რეჟიმზე გადასვლას, მის მიერ მიკრობიზნესის სტატუსის მინიჭებამდე პერიოდში მიღებული შემოსავალი ექვემდებარება დაბეგვრას იმ რეჟიმით ან/და წესით, რომლითაც იბეგრებოდა სტატუსის მინიჭებამდე საქმიანობის განხორციელებისას, ხოლო მიკრო ბიზნესის სტატუსის მინიჭებიდან მიღებული შემოსავლები ექვემდებარება დაბეგვრას მიკრო ობიზნესისთვის დადგენილი სპეციალური რეჟიმით.

 

1.3.  სათამაშო ბიზნესთან დაკავშირებული საკანონმდებლო ცვლილებები

როგორც უკვე ცნობილია ჩვენთვის, საქართველოს საგადასახდო კოდექსში მიმდინარე წლის 1-ლი იანვრიდან განხორციელდა ცვლილება, რომლის თანახმადაც განისაზღვრა:

• აზარტული თამაშობის სისტემურ-ელექტრონული ფორმით მოწყობი პირის მიერ საქმიანობის ამ ნაწილში, მოგების/საშემოსავლო გადასახადით დაბეგვრის ობიექტი და გადასახადის განაკვეთი;
• სისტემურ-ელექტრონული ფორმით მოწყობილ აზარტულ ან/და მომგებიან თამაშობებში (გარდა სისტემურ-ელექტრონული ფორმით მოწყობილი წამახალისებელი გათამაშებისა) მონაწილე(მოთამაშე) პირის მიერ სათამაშო ანგარიშიდან გატანილი თანხის საშემოსავლო გადასახადით დაბეგვრის წესი და განაკვეთი.

კოდექსის აღნიშნულ ცვლილებასთან დაკავშირებით, 2022 წლის 9 თებერვალს გამოქვეყნდა და ძალაში შევიდა ცვლილება ფინანსთა მინისტრის N996 ბრძანებაში. ცვლილების საფუძველზე დაზუსტდა წარსადგენი დეკლარაციების შევსები წესი. კერძოდ, ცვლილება შეეხო:

• აზარტული თამაშობის ან/და ტოტალიზატორის სისტემურ-ელექტრონული ფორმით მომწყობი ფიზიკური პირის საშემოსავლო გადასახადის ყოველთვიურ დეკლარაციას;
• მოგების გადასახადის ყოველთვიური დეკლარაციას;
• გადახდის წყაროსთან დაკავებული გადასახადის ყოველთვიური დეკლარაციის შევსების წესს.

აღნიშნული დეკლარაციების განახლებული ელექტრონული ფორმები უკვე ხელმისაწვდომია შემოსავლების სამსახურის ელექტრონული სერვისების გვერდზე, რომლის წარდგენა სავალდებულოა მიმდინარე წლის იანვრის საანგარიშო პერიოდიდან.

2.ცვლილებები შემოსავლების სამსახურის უფროსის ბრძანებებში

2.1.  თიზ-ში რეგისტრირებული საწარმო

2022 წლის თებერვლის თვეში მოგების გადასახადის ნაწილში დაემატა ახალი N2664 სიტუაციური სახელმძღვანელო, რომლიც შეეხება თიზ-ში რეგისტრირებული საწარმოს. სიტუაციურ სახელმძღვანელოში აღწერილია შემდეგი გარემოება:

თიზ-ში რეგისტრირებული საწარმო ახორციელებს საქონლის შეძენას საქართველოს ფარგლებს გარეთ, ასაწყობებს შეძენილ საქონელს თიზ-ის ტერიტორიაზე და შემდეგ ახდენს ამ საქონლის რეალიზაციას როგორც ქვეყნის შიგნით, ისე საქართველოს ფარგლებს გარეთ. თიზ-ის საწარმო მოგებას იღებს მხოლოდ აღნიშნული საქმიანობიდან, ამ საქმიანობას თვლის თიზ-ის საწარმოს მიერ თავისუფალ ინდუსტრიულ ზონაში ნებადართულ საქმიანობად და მიღებული მოგების განაწილებაზე სარგებლობს მოგების გადასახადში საგადასახადო შეღავათით.

„თავისუფალი ინდუსტრიული ზონების შესახებ” საქართველოს კანონის შესაბამისად, თავისუფალი ინდუსტრიული ზონა არის საქართველოს ტერიტორიის ნაწილი განსაზღვრული საზღვრებითა და კანონით მინიჭებული სპეციალური სტატუსით. თავისუფალ ინდუსტრიულ ზონაში დასაშვებია ნებისმიერი საქონლის წარმოება, გადამუშავება ან მომსახურების გაწევა, გარდა ამ კანონის მე-12 მუხლით განსაზღვრული საქმიანობისა. სსკ-ის 25-ე მუხლის მე-5 ნაწილის გათვალისწინებით, თიზ-ის საწარმოს ეკრძალება: – საქართველოს კანონმდებლობით რეგისტრირებული პირისაგან (გარდა თიზ-ის საწარმოსი) მომსახურების შეძენა (გარდა ამავე პუნქტით გათვალისწინებული შემთხვევებისა); – საქართველოს კანონმდებლობით რეგისტრირებული პირისათვის (გარდა თიზ-ის საწარმოსი) მომსახურების გაწევა. სსკ-ის 99-ე მუხლის პირველი ნაწილის „ნ“ ქვეპუნქტის შესაბამისად, მოგების გადასახადისაგან თავისუფლდება თიზის საწარმოს მიერ თავისუფალ ინდუსტრიულ ზონაში ნებადართული საქმიანობიდან მიღებული მოგების განაწილება.

ზემოაღნიშნული სამართლებრივი ნორმებიდან გამომდინარე, თიზ-ის საწარმოს მიერ საქართველოს ფარგლებს გარეთ შეძენილი საქონლის, თიზ-ის ტერიტორიაზე დასაწყობება და შემდგომი რეალიზაცია ჩაითვლება თიზ-ის საწარმოს მიერ თავისუფალ ინდუსტრიულ ზონაში ნებადართულ საქმიანობად, ამ საქმიანობიდან მიღებული მოგების განაწილება – თავისუფალ ინდუსტრიულ ზონაში ნებადართული საქმიანობიდან მიღებული მოგების განაწილებად და მასზე გავრცელდება სსკ-ის 99-ე მუხლის პირველი ნაწილის „ნ“ ქვეპუნქტით დადგენილი შეღავათი. შესაბამისად, პირის ქმედებაში სამართალდარღვევა არ იკვეთება და დამატებითი საგადასახადო ვალდებულების დაკისრება არ მოხდება

2.2.  ელექტრონული საგადასახადო ანგარიშ-ფაქტურის გამოყენების სპეციალური წესი

2022 წლის 1 მარტიდან  ამოქმედდება შემოსავლების სამსახურის უფროსის N3751 ბრძანება, აღნიშნული ბრძანებით დამტკიცდა ინსტრუქცია, რომელიც განსაზღვრავს ცალკეულ შემთხვევებში გადასახადის გადამხდელისათვის საგადასახადო ანგარიშ-ფაქტურის, საგადასახადო დოკუმენტის გამოწერის/დადასტურების და სასაქონლო ზედნადების გამოწერის უფლების შეზღუდვის და გადასახადის გადამხდელის მიერ გამოწერილი ელექტრონული საგადასახადო ანგარიშ-ფაქტურის გამოყენების სპეციალურ წესს.

აღნიშნული ბრძანებით ძალადაკარგულად ცხადდება „ცალკეულ შემთხვევებში გადასახადის გადამხდელის მიერ გამოწერილი ელექტრონული საგადასახადო ანგარიშ-ფაქტურის გამოყენების სპეციალური წესის განსაზღვრის შესახებ“ შემოსავლების სამსახურის უფროსის 2021 წლის 29 დეკემბრის №41747 და „ცალკეულ შემთხვევებში გადასახადის გადამხდელისათვის საგადასახადო ანგარიშ-ფაქტურების, საგადასახადო დოკუმენტების გამოწერის/დადასტურების და სასაქონლო ზედნადების გამოწერის უფლების შეზღუდვის შესახებ“ შემოსავლების სამსახურის უფროსის 2021 წლის 5 აგვისტოს №25697 ბრძანებები.

წარმოდგენილი ბრძანებით განხორციელდება დღგ-ის გადამხდელისთვის კვალიფიციური გადასახადის გადამხდელის სტატუსის მინიჭება/გაუქმების და ელექტრონული ანგარიშ-ფაქტურის გამოწერის სპეციალური წესით სარგებლობის პრინციპების ცვლილება, კერძოდ:

• დღგ-ის გადამხდელი პირისთვის არაკვალიფიციური სტატუსის მინიჭების საფუძველს აღარ წარმოადგენს პირის საგადასახადო დავალიანება. დავალიანების მქონე გადასახადის გადამხდელები გადაყვანილ იქნებიან ელექტრონული საგადასახადო ანგარიშ-ფაქტურების გამოყენების სპეციალური წესზე.
• დღგ-ის გადამხდელად ახლად რეგისტრირებულ და უწყვეტი 12 თვის განმავლობაში პირადი აღრიცხვის ბარათზე გატარებული ოპერაციების არმქონე გადასახადის გადამხდელები, რომლებსაც აქვთ არაკვალიფიციური გადასახადის გადამხდელის სტატუსი, კვალიფიციური გადასახადის გადამხდელის სტატუსის მინიჭებასთან ერთად, იმავდროულად გადაყვანილ იქნებიან ელექტრონული საგადასახადო ანგარიშ-ფაქტურების გამოყენების სპეციალური წესზე 1 წლის ვადით.
• მოქმედი საბანკო ანგარიშის გაუქმების/არ ქონის შემთხვევაში არაკვალიფიციური გადასახადის გადამხდელის სტატუსის მინიჭება, ხოლო ანგარიშის გახსნის შემთხვევაში კვალიფიციური გადამხდელის სტატუსის მინიჭება განხორციელდება ავტომატურად გადასახადის გადამხდელის განცხადებით მომართვის გარეშე.
• ელექტრონული საგადასახადო ანგარიშ-ფაქტურების გამოყენების სპეციალური წესით სარგებლობის უფლება არ ვრცელდება არაკვალიფიციური დღგ-ის გადასახადის სტატუსის მქონე პირზე, ხოლო პირის მიერ საგადასახადო ანგარიშ-ფაქტურის გამოყენების სპეციალური წესით სარგებლობისას გამოწერილ საგადასახადო ანგარიშ-ფაქტურებზე ნარჩუნდება ანგარიშ-ფაქტურების გამოყენების სპეციალური წესი.

მეტი ინფორმაციისთვის, წარმოგიდგენთ ცხრილს (იხ.ცხრილი N1), სადაც კიდევ უფრო დეტალურად არის ასახული არაკვალიფიციური დღგ-ის გადამხდელის სტატუსის მინიჭებისა და გაუქმების წესი:

N	არაკვალიფიციური დღგ-ის გადამხდელის სტატუსის მინიჭების საფუძველი	არაკვალიფიციური დღგ-ის გადამხდელის სტატუსის მინიჭების დრო	არაკვალიფიციური დღგ-ის გადამხდელის სტატუსის გაუქმება
ა	გადასახადის გადამხდელის დღგ-ის გადამხდელად რეგისტრაცია.	ავტომატურად, სპეციალური პროგრამის მეშვეობით.	პირის მიმართვის შემთხვევაში,  გადაწყვეტილებას იღებს საგადასახადო ორგანოს უფლებამოსილი პირი.
ბ	თუ კვალიფიციური დღგ-ის გადამხდელის სტატუსის მქონე პირს ნებისმიერი უწყვეტი 12 კალენდარული თვის განმავლობაში პირადი აღრიცხვის ბარათზე არ უფიქსირდება გატარებული ოპერაცია ან/და გატარებულია 0-ის ტოლი ოპერაციები.	არაუგვიანეს შესაბამისი თვის მომდევნო თვის 15 რიცხვისა, ავტომატურად, სპეციალური პროგრამის მეშვეობით.	პირის მიმართვის შემთხვევაში,  გადაწყვეტილებას იღებს საგადასახადო ორგანოს უფლებამოსილი პირი.
გ	თუ კვალიფიციური დღგ-ის გადამხდელის სტატუსის მქონე პირს, შემოსავლების სამსახურში არსებული ინფორმაციის მიხედვით, არ უფიქსირდება მოქმედი საბანკო ანგარიშის ნომერი.	ავტომატურად, სპეციალური პროგრამის მეშვეობით.	საინფორმაციო სისტემაში დაუფიქსირდება მოქმედი საბანკო ანგარიში.
დ	შემოსავლების სამსახურის უფროსის გადაწყვეტილება.	შესაბამისი გადაწყვეტილების საფუძველზე, გადასახადის გადამხდელთან შეტყობინების გაგზავნის დღიდან.	პირის მიმართვის შემთხვევაში,  გადაწყვეტილებას იღებს საგადასახადო ორგანოს უფლებამოსილი პირი.

ცხრილი N1: არაკვალიფიციური დღგ-ის გადამხდელის სტატუსის მინიჭება და გაუქმება

 

ასევე, დამატებით წარმოგიდგენთ ცხრილს (იხ.ცხრილი N2), სადაც დეტალურად არის ასახული თუ რა შემთხვევაში ხდება გადასახადის გადამხდელის საგადასახადო ანგარიშ-ფაქტურის გამოყენების სპეციალური წესზე გადაყვანა და ამ წესით სარგებლობის გაუქმება:

N	სპეციალური წესზე გადაყვანის ფორმები	სპეციალური წესზე გადაყვანის საფუძველი	სპეციალური წესზე გადაყვანის დრო	სპეციალური წესის შეწყვეტის საფუძვლები
ა	ნებაყოფლობით	Rs.ge-დან წარდგენილი განცხადება, გარდა იმ შემთხვევისა, როცა პირს მინიჭებული აქვს არაკვალიფიც. დღგ-ის გადამხდელის სტატუსი.	შესაბამისი განცხადების წარმოდგენის მომენტიდან.	ავტომატურად, თუკი Rs.ge-დან წარდგენილია შესაბამისი განცხადება.
ბ	სავალდებულო წესით	1) საგადასახადო დავალიანება შეადგენს ან აღემატება 50 000 ლარს;	ავტომატურად, შესაბამისი საგადასახადო დავალიანების დაფიქსირების მომენტიდან.	ავტომატურად, თუკი საგადასახადო დავალიანება ნაკლებია 50 000 ლარზე.
		2) საგადასახადო ორგანოსათვის მიმართვის საფუძველზე მიენიჭა კვალიფიც. დღგ-ის გადამხდელის სტატუსი;	კვალიფიც. დღგ-ის გადამხდელის სტატუსის მინიჭებისთანავე.	სტატუსის მინიჭებიდან 1 წლის ვადის გასვლა.
გ	შემოსავლების სამსახურის უფროსის გადაწყვეტილება	გადასახადის გადამხდელთან შესაბამისი შეტყობინების გაგზავნა	შესაბამისი შეტყობინების გაგზავნისთანავე.	შესაბამისი შეტყობინების გაგზავნისთანავე.

ცხრილი N2: საგადასახადო ანგარიშ-ფაქტურის გამოყენების სპეციალური წესზე გადაყვანა

 

სპეციალური წესით მოსარგებლე პირის მიერ გამოწერილი ელექტრონული საგადასახადო ანგარიშ-ფაქტურის საფუძველზე დღგ-ის ჩათვლა ხორციელდება იმ შემთხვევაში, თუ საგადასახადო ანგარიშ-ფაქტურის გამოწერის შემდეგ, შესაბამისი დღგ-ის ოდენობით თანხა გადახდილია ბიუჯეტში. ასეთ შემთხვევაში დღგ-ის ჩათვლის წესი დეტალურად აღწერილია თანდართულ ცხრილში (იხ.ცხრილი N3):

N	დღგ-ის თანხა გადახდილია ბიუჯეტში	დღგ-ის ჩათვლის საფუძველი
ა	მიმწოდებლის (გამყიდველის) მიერ.	ა/ფ-ის საფუძველზე დღგ-ის ჩათვლა შესაძლებელია განხორციელდეს მიმწოდებლის (გამყიდველის) მიერ, ბიუჯეტში გადახდილი თანხის ფარგლებში, მხოლოდ პროგრამულად შესაბამისი ა/ფ-ის გააქტიურების (მონიშვნის) შემდეგ.
ბ	მიმღების (მყიდველის) მიერ – მიმწოდებლის (გამყიდველის) სახელით.	ა/ფ-ის საფუძველზე დღგ-ის ჩათვლა შესაძლებელია განხორციელდეს საინფორმაციო ბარათში ასახული საბანკო ანგარიშიდან გადახდილი თანხის იდენტიფიცირების შემდეგ, რა დროსაც ა/ფ აქტიურდება ავტომატურად

ცხრილი N3: სპეციალური წესით მოსარგებლე პირის მიერ გამოწერილი ა/ფ-ის საფუძველზე დღგ-ის ჩათვლა

 

სხვა მნიშვნელოვანი წესები:

• შემოსავლების სამსახურის უფროსი უფლებამოსილია, ამ ინსტრუქციის მოთხოვნათა გაუთვალისწინებლად:

ა) მიანიჭოს/არ მიანიჭოს/გაუუქმოს გადასახადის გადამხდელს კვალიფიციური დღგ-ის გადამხდელის/არაკვალიფიციური დღგ-ის გადამხდელის სტატუსი;

ბ) გადაიყვანოს/არ გადაიყვანოს/შეუწყვიტოს გადასახადის გადამხდელს საგადასახადო ანგარიშ-ფაქტურის გამოყენების სპეციალური წესით სარგებლობის უფლება;

გ) მიიღოს გადაწყვეტილება ამ მუხლის პირველი და მე-2 პუნქტებით გათვალიწინებულ საკითხებზე ერთობლივად ან ცალ-ცალკე.

• გადასახადის გადამხდელს, რომელსაც ამ ინსტრუქციის ამოქმედებამდე მინიჭებული აქვს არაკვალიფიციური გადასახადის გადამხდელის სტატუსი მხოლოდ საგადასახადო დავალიანების არსებობის საფუძველზე, ამ ინსტრუქციის ამოქმედებისთანავე, ავტომატურად, მიენიჭოს კვალიფიციური დღგ-ის გადამხდელის სტატუსი და გადაყვანილ იქნას საგადასახადო ანგარიშ-ფაქტურის გამოყენების სპეციალურ წესზე.
• საგადასახადო დავალიანების ფარგლებში, რომელზეც გაფორმებულია საგადასახადო შეთანხმება, აღნიშნული შეთანხმებით განსაზღვრული პირობების შესრულებისთვის განსაზღვრულ პერიოდში, ასევე იმ დავალიანებაზე, რომელზეც გაფორმებულია აღიარებული საგადასახადო დავალიანების გადახდევინების გადავადების შესახებ ხელშეკრულება საგადასახადო ანგარიშ-ფაქტურის გამოყენების სპეციალურ წესზე გადაყვანა არ ვრცელდება.
• ამ ინსტრუქციით განსაზღვრული არაკვალიფიციური დღგ-ის გადამხდელის სტატუსი არ მიენიჭება, ასევე არ გადაიყვანება ელექტრონული საგადასახადო ანგარიშ-ფაქტურის გამოყენების სპეციალურ წესზე პირი, რომელსაც „გადასახადების ადმინისტრირების შესახებ“ საქართველოს ფინანსთა მინისტრის 996 ბრძანებით დამტკიცებული ინსტრუქციის შესაბამისად, საგადასახადო ორგანოს მიერ განესაზღვრა მსხვილი გადასახადის გადამხდელის კატეგორია, აგრეთვე საქართველოს ორგანული კანონის „ადგილობრივი თვითმმართველობის კოდექსი“ შესაბამისად შექმნილ საჯარო სამართლის იურიდიულ პირი, სახელმწიფოს, სახელმწიფო მმართველობის ორგანოების ან ადგილობრივი თვითმმართველობის ორგანოების მიერ დაფუძნებულ არასამეწარმეო (არაკომერციულ) იურიდიულ პირი.
• იმ საანგარიშო პერიოდზე ან საკითხზე, რომელზეც საგადასახადო ორგანომ განახორციელა საგადასახადო შემოწმება ან დარიცხვა, პროგრამულად განხორციელდეს ზემოაღნიშნულ პერიოდში/პერიოდებში საგადასახადო ანგარიშ-ფაქტურის/საგადასახადო დოკუმენტის გამოწერის შეზღუდვა. ამ შემთხვევაში, საგადასახადო ანგარიშფაქტურის/საგადასახადო დოკუმენტის გამოწერა დასაშვებია გადასახადის გადამხდელის მიერ შემოსავლების სამსახურში განცხადების და შესაბამისი არგუმენტაციის წარმოდგენის შემთხვევაში, რომელსაც შეისწავლის აუდიტის დეპარტამენტი და სათანადო გადაწყვეტილების მიღებიდან 3 სამუშაო დღის ვადაში, გადასახადის გადამხდელს მიეცემა საშუალება, გამოწეროს შესაბამისი საგადასახადო ანგარიშ-ფაქტურა/საგადასახადო დოკუმენტი, საქართველოს ფინანსთა მინისტრის მიერ დადგენილი წესით.
• „ქონებაზე ყადაღის დადების შესახებ“ ბრძანების გამოცემისთანავე, ბრძანების გამოცემის შემდგომ პერიოდში განსახორციელებელ ოპერაციებზე, საქართველოს საგადასახადო კოდექსის 241-ე მუხლის მე-2 ნაწილით გათვალისწინებული ქონების განკარგვის აკრძალვის უზრუნველყოფის მიზნით, გადასახადის გადამხდელს შეეზღუდოს სასაქონლო ზედნადების, საგადასახადო ანგარიშ-ფაქტურის და საგადასახადო დოკუმენტის გამოწერის უფლება. ამ შემთხვევაში, სასაქონლო ზედნადების, საგადასახადო ანგარიშ-ფაქტურის გამოწერა დასაშვებია გადასახადის გადამხდელის მიერ შემოსავლების სამსახურში განცხადების და შესაბამისი დოკუმენტების წარმოდგენის შემთხვევაში, რომელსაც შეისწავლის ვალის მართვის დეპარტამენტი და სათანადო გადაწყვეტილების მიღებიდან 3 სამუშაო დღის ვადაში, გადასახადის გადამხდელს მიეცემა საშუალება გამოწეროს შესაბამისი სასაქონლო ზედნადები, საგადასახადო ანგარიშ-ფაქტურა, საქართველოს ფინანსთა მინისტრის მიერ დადგენილი წესით.
• თუ საგადასახადო ანგარიშ-ფაქტურის გამოყენების სპეციალური წესით მოსარგებლე პირს მიენიჭა არაკვალიფიციური დღგ-ის გადამხდელის სტატუსი, პირის მიერ საგადასახადო ანგარიშ-ფაქტურის გამოყენების სპეციალური წესით სარგებლობისას გამოწერილ საგადასახადო ანგარიშ-ფაქტურებზე ვრცელდება ამ ინსტრუქციით დადგენილი წესები.
• საგადასახადო ანგარიშ-ფაქტურის გამოყენების სპეციალური წესის შეწყვეტის შემთხვევაში, სპეციალური წესის მოქმედების პერიოდში გამოწერილ საგადასახადო ანგარიშფაქტურებზე ვრცელდება მათი გამოყენების ზოგადი წესი.
• თუ საგადასახადო ანგარიშ-ფაქტურის გამოყენების სპეციალურ წესზე გადაყვანილ პირს მიენიჭა არაკვალიფიციური დღგ-ის გადამხდელის სტატუსი, უნარჩუნდება საგადასახადო ანგარიშ-ფაქტურის გამოყენების სპეციალური წესით სარგებლობის უფლება, ამ ინსტრუქციით განსაზღვრული დებულებების გათვალისწინებით.
• არაკვალიფიციური გადასახადის გადამხდელის სტატუსის მქონე პირის, საგადასახადო ანგარიშ-ფაქტურის გამოყენების სპეციალურ წესზე გადაყვანა არ ხორციელდება.

 

 

შპს კრესტონ ჯორჯია

მმართველი პარტნიორი –  დავით პაპიაშვილი

საგადასახადო აუდიტის დეპარტამენტის ხელმძღვანელი – რუსუდან ჭაბუკიანი