2022 წლის აპრილის თვის განმავლობაში საქართველოს საგადასახადო კანონმდებლობაში შესული ცვლილებები

Kreston Georgia აგრძელებს საგადასახადო კანონმდებლობაში შესული ცვლილებებისა და სიახლეების მიმოხილვას. ამჯერად გთავაზობთ 2022 წლის აპრილის თვეში შესული საკანონმდებლო სიახლეების მიმოხილვას.

შინაარსი
1. ცვლილებები შემოსავლების სამსახურის უფროსის ბრძანებებში
1.1. მაღალმთიან დასახლებაში მუდმივად მცხოვრები პირის შეღავათი საშემოსავლო გადასახადში
1.2. საერთაშორისო კომპანიის სტატუსის მქონე საწარმოს შეღავათი ქონების გადასახადში
1.3. მეთოდური მითითება ჯარიმებისგან გათავისუფლების შესახებ

1. ცვლილებები შემოსავლების სამსახურის უფროსის ბრძანებებში
1.1. მაღალმთიან დასახლებაში მუდმივად მცხოვრები პირის შეღავათი საშემოსავლო
გადასახადში

2022 წლის 6 აპრილს კიდევ ერთი ახალი N1516 სიტუაციური სახელმძღვანელო დამტკიცდა და დაემატა საშემოსავლო გადასახადის შეღავათების ნაწილში, რომელიც მაღალმთიან დასახლებაში მუდმივად მცხოვრები პირის სტატუსის მქონე პირის მიერ მაღალმთიან დასახლებაში საქმიანობით კალენდარული წლის განმავლობაში მიღებული 6,000 ლარამდე დასაბეგრი შემოსავლის საშემოსავლო გადასახადისგან გათავისუფლებას. სსკ-ის 82-ე მუხლის მე-2 ნაწილის „გ“ ქვეპუნქტის მიხედვით, საშემოსავლო გადასახადით არ იბეგრება მაღალმთიან დასახლებაში მუდმივად მცხოვრები პირის სტატუსის მქონე პირის მიერ მაღალმთიან დასახლებაში საქმიანობით კალენდარული წლის განმავლობაში მიღებული 6,000 ლარამდე დასაბეგრი შემოსავალი, გარდა საბიუჯეტო ორგანიზაციიდან და სახელმწიფოს მიერ ან ადგილობრივი თვითმმართველობის ორგანოს მიერ დაფუძნებული სამედიცინო დაწესებულებიდან ხელფასის სახით მიღებული შემოსავლისა. ამასთან, მაღალმთიანი რეგიონების განვითარების შესახებ საქართველოს კანონის მე-3 მუხლის მე-5 პუნქტის თანახმად, ფიზიკურ პირს მაღალმთიან დასახლებაში მუდმივად მცხოვრები პირის სტატუსი ენიჭება, თუ იგი აკმაყოფილებს შემდეგ კრიტერიუმებს:

• არის საქართველოს მოქალაქე;
• რეგისტრირებულია მაღალმთიან დასახლებაში;
• ყოველი კალენდარული წლის განმავლობაში ჯამში 9 თვის ან 9 თვეზე მეტი ვადით ფაქტობრივად ცხოვრობს მაღალმთიან დასახლებაში.

იმავე მუხლის მე-6 პუნქტის ,,ბ“ ქვეპუნქტიდან გამომდინარე, მაღალმთიან დასახლებაში მუდმივად მცხოვრებ პირს მაღალმთიან დასახლებაში მუდმივად მცხოვრები პირის სტატუსი უწყდება იმ შემთხვევაში, თუ შეიცვალა რეგისტრაციის მისამართი (გარდა აღნიშნული პირის სხვა მაღალმთიან დასახლებაში რეგისტრაციის შემთხვევისა).
შესაძლოა, მაღალმთიან დასახლებაში მუდმივად მცხოვრები პირის სტატუსის მქონე პირის მუდმივი საცხოვრებელი და საქმიანობის ადგილები მდებარეობდეს სხვადასხვა მაღალმთიან დასახლებაში. მაგალითად, ფიზიკურ პირს მაღალმთიან დასახლებაში მუდმივად მცხოვრები პირის სტატუსი მინიჭებული ჰქონდეს ყაზბეგის მუნიციპალიტეტის მიერ და იგი 2 წლის
განმავლობაში დაქირავებით მუშაობას ეწეოდეს სხვა მაღალმთიან დასახლებაში, კერძოდ,ბაკურიანში მდებარე საწარმოში. ასეთ შემთხვევაში, აღნიშნული პირი მაინც ისარგებლებს შეღავათით, რადგან 6,000 ლარიანი შეღავათი ეხება ნებისმიერ მაღალმთიან დასახლებაში
საქმიანობით მიღებულ დასაბეგრ შემოსავალს.

1.2. საერთაშორისო კომპანიის სტატუსის მქონე საწარმოს შეღავათი ქონების გადასახადში

2022 წლის 6 აპრილს დამტკიცდა და ქონების გადასახადის ნაწილში დაემატა ახალი N1429 სიტუაციური სახელმძღვანელო, რომელიც ეხება საერთაშორისო კომპანიის სტატუსის მქონე საწარმოსათვის საქართველოს საგადასახადო კოდექსით განსაზღვრულ შეღავათს ქონების
გადასახადის ნაწილში. სსკ-ის 23-ე მუხლის თანახმად, საერთაშორისო კომპანია არის საქართველოს საწარმო, რომელიც საქართველოს მთავრობის დადგენილებით განსაზღვრულ საქმიანობებს ახორციელებს და შემოსავალს მხოლოდ ამ საქმიანობებიდან იღებს. აგრეთვე საქართველოს მთავრობა ადგენს პირისათვის საერთაშორისო კომპანიის სტატუსის მინიჭებისა და გაუქმების წესს. ამასთან, პირი სტატუსის მქონედ ითვლება სტატუსის მინიჭების თვის დასაწყისიდან.
საერთაშორისო კომპანია გარკვეული სახის საგადასახადო შეღავათებით სარგებლობს, მათ შორის სსკ-ის 23-ე მუხლის მე-13 ნაწილის მიხედვით, იგი გათავისუფლებულია ქონების (გარდა მიწისა) გადასახადისაგან, თუ ეს ქონება საქართველოს მთავრობის დადგენილებით
ნებადართული საქმიანობის განხორციელებისათვის არის გამიზნული ან გამოიყენება. ქონების გადასახადის აღნიშნული შეღავათით სარგებლობა პირს შეუძლია წლის ჭრილში საერთაშორისო კომპანიის სტატუსის ფლობის პროპორციულად. მაგალითად, თუ საწარმოს
2021 წლის 1 მარტიდან მინიჭებული აქვს საერთაშორისო კომპანიის სტატუსი, შეღავათით ისარგებლებს არა მთელს 2021 წელზე, არამდე 10 თვის პროპორციულად განსაზღვრულ ქონების გადასახადში – ქონების წლიური გადასახადის 10/12-ით.

1.3. მეთოდური მითითება ჯარიმებისგან გათავისუფლების შესახებ

2022 წლის 11 აპრილს შემოსავლების სამსახურის უფროსის N9021 ბრძანებით დამტკიცდა მეთოდური მითითება, საქართველოს საგადასახადო კოდექსის 269-ე მუხლის მე-7 ნაწილისა და საქართველოს საბაჟო კოდექსის 163-ე მუხლის მე-11 ნაწილის გამოყენების შესახებ.
მეთოდური მითითება შეეხება საქართველოს საგადასახადო კოდექსის მიზნებისთვის კეთილსინდისიერ გადასახადის გადამხდელებს, კერძოდ სსკ-ის 269-ე მუხლის მე-7 ნაწილს, რომლის თანახმადაც, საგადასახადო ორგანოს/დავის განმხილველ ორგანოს ან სასამართლოს
უფლება აქვს, გაათავისუფლოს კეთილსინდისიერი გადასახადის გადამხდელი ამ კოდექსით გათვალისწინებული სანქციისაგან, თუ სამართალდარღვევა გამოწვეულია გადასახადის გადამხდელის შეცდომით/არცოდნით. კერძოდ მეთოდური მითითებით განისაზღვრა ორი ჯარიმა, რომლისგანაც პირის გათავისუფლების უფლებამოსილება აქვს მომსახურების დეპარტამენტს, თუკი გადასახადის გადამხდელის მიერ სსკ-ის ზემოხსენებულ 269-ე მუხლის მე-7 ნაწილის შესაბამისად წარმოდგენილია საჩივარი. ქვემოთ მოცემულია ეს ორი ჯარიმა, რომლისგან პირის გათავისუფლების უფლებამოსილებაც აქვს მომსახურების დეპარტამენტს და ის პირობები,რომელიც უნდა დაკმაყოფილდეს იმისათვის, რომ ჯარიმა მოიხსნას:

1. სსკ-ის 274-ე მუხლის საფუძველზე, საგადასახადო დეკლარაციის/გაანგარიშების წარდგენის ვადის დარღვევაზე შეფარდებული ჯარიმა
(2 თვემდე _ გადასახადის 5%, 2 თვის შემდეგ _ გადასახადის 10%), თუ კმაყოფილდება შემდეგი პირობები:

ა) გადასახადის გადამხდელს საგადასახადო კოდექსის 274-ე მუხლით გათვალისწინებული სამართალდარღვევის ოქმის შედგენის ან საგადასახადო დეკლარაციის/გაანგარიშების წარდგენის საქართველოს საგადასახადო კოდექსით გათვალისწინებული თარიღისთვის ან სსკ-ის 269-ე მუხლის მე-7 ნაწილის საფუძველზე ჯარიმისაგან გათავისუფლების შესახებ გადაწყვეტილების მიღების თარიღისათვის პირადი აღრიცხვის ბარათზე არ უფიქსირდება აღიარებული საგადასახადო დავალიანება გადასახადის ნაწილში/აღიარებული მოსაკრებლის
ნაწილში;
ბ) პირს, საგადასახადო დეკლარაციის/გაანგარიშების დაგვიანებით წარდგენის წინა დღის მდგომარეობით 12 კალენდარული თვის განმავლობაში, იგივე ქმედება ჩადენილი არ ჰქონია.ამასთან, ამავე მეთოდური მითითების მიხედვით, მომსახურების დეპარტამენტის მიერ
აღნიშნული 274-ე მუხლით გათვალისწინებული ჯარიმისაგან გათავისუფლების შემდეგ პირის მიერ იმავე საგადასახადო დეკლარაციის/გაანგარიშების შემდგომი დაზუსტებისას, როდესაც შესწორებული დეკლარაციით/გაანგარიშებით დამატებით დარიცხული გადასახადის თანხა არ აღემატება პირველადი დეკლარაციით დარიცხული გადასახადის თანხის 50%-ს, მომსახურების დეპარტამენტი უფლებამოსილია არ განახორციელოს დაზუსტებული დეკლარაციით/გაანგარიშებით დაანგარიშებული სანქციის დაკისრება.

2. სსკ-ის 282-ე მუხლის 1-ლი ნაწილის საფუძველზე, დღგ-ის გადამხდელად რეგისტრაციის გარეშე საქმიანობაზე შეფარდებული ჯარიმა (დასაბეგრი ბრუნვის 5%), თუ კმაყოფილდება შემდეგი პირობები:

ა) დღგ-ის გადამხდელად სავალდებულო რეგისტრაციის გარეშე საქმიანობა გამოვლენილია უშუალოდ გადასახადის გადამხდელის მიერ, საგადასახადო ორგანოსთვის შესაბამისი განცხადებით მიმართვის საფუძველზე;
ბ) გადასახადის გადამხდელს საგადასახადო კოდექსის 282-ე მუხლის პირველი ნაწილით გათვალისწინებული სამართალდარღვევის ოქმის შედგენის ან ამავე კოდექსის 269-ე მუხლის მე-7 ნაწილის საფუძველზე ჯარიმისაგან გათავისუფლების შესახებ გადაწყვეტილების მიღების თარიღისათვის, პირადი აღრიცხვის ბარათზე არ უფიქსირდება აღიარებული საგადასახადო დავალიანება გადასახადების ნაწილში;
გ) დღგ-ის გადამხდელად სავალდებულო რეგისტრაციის თაობაზე პირის მიერ საგადასახადო ორგანოში განცხადების წარდგენის შემდგომ, მაგრამ დღგ-ის გადამხდელად სავალდებულო რეგისტრაციის გარეშე საქმიანობის ფაქტზე შესაბამისი საგადასახადო სამართალდარღვევის ოქმის გამოცემამდე, პირს წარდგენილი აქვს დღგ-ის შესაბამისი დეკლარაცია;
დ) დღგ-ის გადამხდელად სავალდებულო რეგისტრაციის თაობაზე საგადასახადო ორგანოში წარდგენილ განცხადებაში პირმა დააფიქსირა ამ განცხადების წარდგენის თვეში (მიმართვის თვის დასაწყისიდან მიმართვის მომენტამდე) განხორციელებული დღგ-ის დასაბეგრი ბრუნვა.

ამასთან, ამავე მეთოდური მითითების მიხედვით, მომსახურების დეპარტამენტის მიერ აღნიშნული სსკ-ის 282-ე მუხლის 1-ლი ნაწილით გათვალისწინებული ჯარიმისაგან გათავისუფლების შემდეგ, პირის მიერ დღგ-ის შესაბამისი დეკლარაცი(ებ)ის ან/და მიმართვის განცხადებაში მითითებული თანხის დაზუსტებისას (რომელთა მიხედვით მოხდა შეფარდებული სანქციის გამოანგარიშება) როდესაც დაზუსტებული მონაცემებით დამატებით დარიცხული თანხა (რომელთა მიხედვით უნდა მოხდეს სანქციის გამოანგარიშება) არ აღემატება პირველადი მონაცემებით დარიცხული თანხის 50%-ს,მომსახურების დეპარტამენტი უფლებამოსილია არ განახორციელოს დაზუსტებული მონაცემებით დაანგარიშებული სანქციის დაკისრება.

შპს კრესტონ ჯორჯია

მმართველი პარტნიორი / დავით პაპიაშვილი

საგადასახადო აუდიტის დეპარტამენტის ხელმძღვანელი / რუსუდან ჭაბუკიანი