2025 წლის თებერვლის თვის განმავლობაში საქართველოს საგადასახადო კანონმდებლობაში შესული ცვლილებები

Kreston Georgia აგრძელებს საგადასახადო კანონმდებლობაში შესული ცვლილებებისა და სიახლეების მიმოხილვას. ამჯერად გთავაზობთ 2025 წლის თებერვლის თვეში შესული საკანონმდებლო სიახლეების მიმოხილვას.

სარჩევი

1.ცვლილებები საქართველოს ფინანსთა მინისტრის ბრძანებებში

1.1. გარკვეული პირებისთვის შეიცვალა საგადასახადო აღრიცხვის გაუქმების წესი

2. სხვა ცვლილებები

2.1. ცვლილებები საპენსიო შენატანების ადმინისტრირების წესში

1.ცვლილებები საქართველოს ფინანსთა მინისტრის ბრძანებებში

1.1. გარკვეული პირებისთვის შეიცვალა საგადასახადო აღრიცხვის გაუქმების წესი

2025 წლის 7 თებერვალს გამოქვეყნდა და გამოქვეყნებისთანავე ამოქმედდა ცვლილება „გადასახადების ადმინისტრირების შესახებ“ ფინანსთა მინისტრის N996 ბრძანებაში. ცვლილება ეხება ბრძანების 71-ე მუხლს, რომელიც განსაზღვრავს საგადასახადო ორგანოს მიერ გადასახადის გადამხდელად აღრიცხული პირის საგადასახადო აღრიცხვის გაუქმების წესს.

ცვლილების შედეგად, ბრძანებას დაემატა ახალი მე-131 მუხლი, რის შედეგადაც ცალკე განისაზღვრა (აღარ ვრცელდება ზოგადი წესი) საგადასახადო აღრიცხვის გაუქმებაზე უარის თქმის საფუძვლები საჯარო სამართლის იურიდიული პირისათვის, საბიუჯეტო ორგანიზაციისა და დიპლომატიური და მასთან გათანაბრებული სტატუსის მქონე ორგანიზაციისთვის. კერძოდ კი, აღნიშნულ პირებს საგადასახადო აღრიცხვის გაუქმებაზე უარი შეიძლება ეთქვას, თუ არსებობს ერთ-ერთი შემდეგი გარემოება:

ა) პირის საგადასახადო აღრიცხვის გაუქმება უკვე დაფიქსირებულია გადასახადის გადამხდელთა რეესტრში;

ბ) სრულყოფილად არ არის წარდგენილი ამ მუხლით გათვალისწინებული დოკუმენტები;

გ) საგადასახადო აღრიცხვის გაუქმების მიზნით წარდგენილი დოკუმენტაციით არ დასტურდება გადაწყვეტილების მიმღები პირის შესაბამისი უფლებამოსილება ან/და გადაწყვეტილების მიმღები სუბიექტის გადაწყვეტილებაუნარიანობა;

დ) საგადასახადო აღრიცხვის გაუქმების თაობაზე განცხადება არ არის წარდგენილი უფლებამოსილი პირის მიერ.

აქედან გამომდინარე, ცვლილების შედეგად, საჯარო სამართლის იურიდიული პირისათვის, საბიუჯეტო ორგანიზაციისა და დიპლომატიური და მასთან გათანაბრებული სტატუსის მქონე ორგანიზაციისთვის, საგადასახადო აღრიცხვის გაუქმებაზე უარის თქმის საფუძველს აღარ წარმოადგენს შემდეგი პუნქტები, როგორც ეს ცვლილებამდე არსებული რედაქციით იყო განსაზღვრული:

• პირს გააჩნია საგადასახადო დავალიანება;
• მიმდინარეობს საგადასახადო შემოწმება ან გაგზავნილია შეტყობინება საგადასახადო შემოწმების დანიშვნის შესახებ;
• პირს გააჩნია რეგისტრირებული უძრავ-მოძრავი ქონება;
• პირს რეგისტრაციიდან არ მოუხსნია საკონტროლო-სალარო აპარატი;
• პირს არ განუხორციელებია ჩეკთან გათანაბრებული დოკუმენტის განაშთვა;
• პირს არ განუხორციელებია მატერიალური ფორმის საგადასახადო ანგარიშ-ფაქტურის (მათ შორის, სპეციალური საგადასახადო ანგარიშ-ფაქტურის) განაშთვა;
• პირს საბანკო დაწესებულებაში არ აქვს დახურული ბოლო საბანკო ანგარიში.

შეგახსენებთ, რომ აღნიშნული (კერძოდ, „ბ“-„დ“) ქვეპუნქტებით გათვალისწინებულ შემთხვევაში, გადასახადის გადამხდელს მიეცემა არანაკლებ 15 დღე არსებული ხარვეზის გამოსასწორებლად. ხარვეზის დადგენილ ვადაში გამოუსწორებლობის შემთხვევაში, საგადასახადო ორგანო იღებს გადაწყვეტილებას საგადასახადო აღრიცხვის გაუქმებაზე უარის თქმის შესახებ.

ცვლილების შესახებ დეტალური ინფორმაცია იხილეთ ბმულზე:

https://matsne.gov.ge/ka/document/view/6406655?publication=0

2.სხვა ცვლილებები

2.2. ცვლილებები საპენსიო შენატანების ადმინისტრირების წესში

2025 წლის 13 თებერვალს გამოქვეყნდა და გამოქვეყნებისთანავე ძალაში შევიდა ცვლილება „საპენსიო შენატანების გადახდის წესების, ინფორმაციის წარდგენის ფორმების, ზედმეტად გადახდილი თანხების ადმინისტრირების, ინდივიდუალურ საპენსიო ანგარიშზე საპენსიო შენატანების, ხარჯის, ნამეტი შემოსავლის, დანაკარგის, სხვა შემოსავლის, ამონაგებისა და ზარალის დარიცხვის შესახებ“ საჯარო სამართლის იურიდიული პირის  –  საპენსიო სააგენტოს დირექტორის 2019 წლის 30 ივლისის №002 ბრძანებაში.

ცვლილების შედეგად, საპენსიო სააგენტოს ელექტრონულ სისტემაში გენერირდა რამდენიმე ახალი ფუნქციონალი, რომლის შესახებაც წარმოგიდგენთ დეტალურ ინფორმაციას:

შედარების ფუნქციონალი

საპენსიო სააგენტოს ელექტრონულ სისტემაში დაემატა შედარების ფუნქციონალი, რომლის მეშვეობით დამსაქმებელს/თვითდასაქმებულს/არასტანდარტულ დასაქმებულს ეძლევა შესაძლებლობა, გაეცნოს ელექტრონულ სისტემაში არსებული მონაცემების შემოსავლების სამსახურისაგან მიღებულ ინფორმაციასთან შედარების შედეგებს. შედარების ფუნქციონალს ასევე აქვს კომენტარის გრაფა, სადაც დამსაქმებელს/თვითდასაქმებულს/არასტანდარტულ დასაქმებულს შეუძლია მიუთითოს შენიშვნა/ახსნა-განმარტება, თუ იგი არ ეთანხმება შედარების ფუნქციონალში მოცემულ შედარების შედეგებს.

წლიური მაკორექტირებელი დეკლარაცია

იმ შემთხვევაში, თუ დამსაქმებელი/თვითდასაქმებული/არასტანდარტული დასაქმებული ეთანხმება შედარების ფუნქციონალში მოცემულ შედარების შედეგებს, საპენსიო შენატანის დანაკლისით ან  ზედმეტად განხორციელების ფაქტის აღმოფხვრის მიზნით, მას ეძლევა შესაძლებლობა, რომ გამოვლენილი სხვაობების გასწორება მოახდინოს წლის ჭრილში ერთიანად, წლიური მაკორექტირებელი დეკლარაციის ინიცირებისა და დახურვის საფუძველზე.

იმ შემთხვევაში, თუ წლიური მაკორექტირებელი დეკლარაცია ითვალისწინებს არაჯეროვანი შესრულების (საპენსიო შენატანის განხორციელების ვალდებულების სრულად ან ნაწილობრივ შეუსრულებლობა) აღმოფხვრას, მისი დახურვისთვის აუცილებელია შესაბამისი ოდენობის საბალანსო თანხის არსებობა. ხოლო იმ შემთხვევაში, თუ წლიური მაკორექტირებელი დეკლარაცია ითვალისწინებს საპენსიო შენატანის ზედმეტად განხორციელების ფაქტის აღმოფხვრას, დეკლარაციის დახურვიდან არაუმეტეს 5 სამუშაო დღის ვადაში:

• დამსაქმებლის/თვითდასაქმებულის/არასტანდარტული დასაქმებულის მიერ ზედმეტად განხორციელებული საპენსიო შენატანი და მასზედ დარიცხული სარგებელი (ასეთის არსებობის შემთხვევაში) მას დაუბრუნდება საბალანსო თანხის სახით;
• სახელმწიფოს მიერ ზედმეტად განხორციელებული საპენსიო შენატანის თანხა, გადაირიცხება სახაზინო ანგარიშზე, ხოლო მასზე დარიცხული სარგებელი  (ასეთის არსებობის შემთხვევაში) გადაირიცხება ბიუჯეტის ერთიან სახაზინო ანგარიშზე.

წლიურ მაკორექტირებელი დეკლარაციის სისწორეზე პასუხისმგებელია დამსაქმებელი/ არასტანდარტული დასაქმებული/თვითდასაქმებული და ასეთი დეკლარაცია შესაძლოა მონიტორინგის პროცესში გახდეს სააგენტოს მიერ შემოწმების საგანი.

სქემაში მონაწილის სტატუსის გაუქმება

იმ შემთხვევაში, თუ დადასტურდება, რომ  დამსაქმებლის მიერ შეცდომით მოხდა ისეთი დასაქმებულის დაგროვებით საპენსიო სქემაში გაწევრიანება, რომელზეც არ ვრცელდება დაგროვებითი პენსიის შესახებ საქართველოს კანონი, სააგენტო უფლებამოსილია, ასეთ მონაწილეს, მისი დამსაქმებლის/მონაწილის მომართვის გარეშე, გაუუქმოს სქემაში მონაწილეობის სტატუსი. ასეთ შემთხვევაში, სააგენტო ვალდებულია სტატუსის გაუქმებიდან არაუგვიანეს 5 სამუშაო დღის ვადაში:

• დამსაქმებლის მიერ ასეთი მონაწილის სასარგებლოდ, სახელით და ხარჯით განხორციელებული საპენსიო შენატანი და მასზე დარიცხული სარგებელი (ასეთის არსებობის შემთხვევაში) გადარიცხოს  ელექტრონულ სისტემაში დაფიქსირებულ დამსაქმებლის საბანკო ანგარიშზე ან დამსაქმებლის მიერ დამატებით ელექტრონული სისტემის მეშვეობით წარდგენილ მის სხვა საბანკო ანგარიშზე;
• სახელმწიფოს მიერ ასეთი მონაწილის სასარგებლოდ  განხორციელებულ საპენსიო შენატანის თანხა გადარიცხოს  სახაზინო ანგარიშზე, ხოლო მასზედ დარიცხული სარგებელი  (ასეთის არსებობის შემთხვევაში) – ბიუჯეტის ერთიან სახაზინო ანგარიშზე;
• სტატუსის გაუქმებისა და ამ პუნქტის  შესაბამისად საპენსიო შენატანების და მათზე დარიცხული სარგებლის (ასეთის არსებობის შემთხვევაში) დაბრუნების თაობაზე ელექტრონული სისტემის მეშვეობით აცნობოს დამსაქმებელს და მონაწილეს.

ცვლილების შესახებ დეტალური ინფორმაცია იხილეთ ბმულზე:

https://matsne.gov.ge/ka/document/view/6410873?publication=0

შპს კრესტონ ჯორჯია

მმართველი პარტნიორი                                                             დავით პაპიაშვილი

საგადასახადო აუდიტის დეპარტამენტის ხელმძღვანელი                     რუსუდან ჭაბუკიანი